Zende koyikaramo

Zende koyikaramo

Nombangi daJehova

Horowora eraka Rukwangali

Ove kuna kugazara ngwendi Jehova ndi?

Ove kuna kugazara ngwendi Jehova ndi?

“Sigeni Karunga a rundurure magazaro geni, mu situnuke nawa-nawa.”—ROM. 12:2.

MARUSUMO: 56, 123

1, 2. Ngomu tuna kukura pampepo, yisinke atu ya diva? Gava sihonena.

TU TANTE asi munona tava mu pe uhwi. Ano vakondi vendi tava mu tantere asi: “Ninka asi mpandu.” Makura munona ogo ta yi rugana morwa kuna yi mu tantere. Ngomu ana kuyakura, age ta kwata egano konda zeyi ya karera nomulyo kulikida rupandu kwava wopeke. Mwaza siruwo age kuyatameka kupandura wopeke va hana kuyimutantera vakondi vendi. Morwasinke? Morwa ga lironga kulikida rupandu.

2 Mokulifana, apa twa tambwire usili, ose twa ya dimbwilire omu ya kara nomulyo kulimburukwa konompango daJehova. Nye ngomu tuna kukura pampepo, ose kuyadiva magazaro gaJehova. Pasihonena, eyi ga hara neyi ga nyenga ntani omu a tara yininke. Nsene tu tara yininke ngamoomu ayi tara Jehova, ngatu rugana yininke yoyiwa ntani ngatu tura po matokoro gomawa.

3. Morwasinke ayi tu karerere udigu kugazara ngwendi Jehova?

3 Nampili ngomu atu hafere kulironga kugazara ngwendi Jehova, ayo pamwe kutudigopera kuyisikisa mo morwa kapi twa sikilira mo. Pasihonena, pamwe kuvhura yi tu digopere  kukwata egano omu Jehova a tara yininke ngwendi ruhonda, emona, sirugana sokuzuvhisa, kutambura honde ntani nayimwe ngoso. Yisinke twa hepa kurugana? Ngapi natu twikira kulironga kugazara ngwendi Jehova? Ntani ngapi ngayi tu vatera oyo tu ture po matokoro gomawa ngesi ntani komeho?

OMU NATU GAZARA NGWENDI JEHOVA

4. Yisinke ayi tanta ‘kurundurura magazaro getu’?

4 Resa Varoma 12:2. Mupositoli Paurusa kwa tumbwire eyi ya hamena mo mokutara yininke ngamoomu ayi tara Jehova. Mosirongwa sa ka pita katu lirongere asi nsene kapi tuna hara ‘kulifana nouzuni ou,’ twa hepa kunyokera po kutambura magano gouzuni ou. Paurusa kwa uyungire hena asi twa hepa ‘kurundurura magazaro getu.’ Eyi kutanta asi twa hepa kulironga Nonkango daKarunga nokudikwata egano nokuteda ko nokutara yininke ngamoomu ayi tara Jehova.

5. Faturura malisigo ga kara pokatji kokuresa tupu ntani kulironga?

5 Kulironga kapi ayi tanta asi kuresa tupu nokutenda malimbururo. Nsene kuna kulironga, twa hepa kugazadara ko eyi sina kuturonga sirongwa kuhamena Jehova neyi a ruganene yininke monkedi zongandi ntani nomu a tara yininke. Twa hepa hena kuhetekera ko kukwata egano eyi Karunga ga pulisilira yuma yongandi nokutunyokesa yimwe. Ya wapa hena kugazadara ko asi marunduruko musinke natu hepa kutura po meparu lyetu. Nampili ngomu nayi dira kututompoka kutarurura yitwa nayinye oyo pwankenye elirongo lyetu, ya wapa kuruganesa siruwo sosinzi mokuteda ko kweyi atu resa.—Epis. 119:97; 1 Tim. 4:15.

6. Yisinke ayi horoka apa atu tede ko koNonkango daJehova?

6 Nkenye apa atu tede ko koNonkango daKarunga, yitundwamo kuyakara yoyiwa. Ose ‘kuyadiva’ asi magazaro gaJehova kwa sikilira mo. Ntani ose kuyatameka kutara yininke ngamoomu a yi tara age. Ose kuyatameka kugazara mwapeke morwa magazaro getu ‘kuyasitunuka.’ Ano kanunu-kanunu, tatu ya tameke kutara yininke ngamoomu a yi tara Jehova.

MAGAZARO GETU KUKUNDAMA YIRUGANA YETU

7, 8. (a) Ngapi a tara Jehova emona? (Tara mafano pepenuno 23.) (b) Kosinke ngatu demenena nsene tu kara nomutaro gwaJehova?

7 Twa ha gazara asi magazaro getu kapi aga kundama yirugana yetu. Ago kukundama eyi atu rugana. (Mar. 7:21-23; Jak. 2:17) Mokuninka asi tu yi kwate egano eyi, tu tareni koyihonena yimwe. Sokuhova, Mavangeli kutulikida nawa-nawa omu Jehova a tara emona. Jehova kwa horowere Josefa naMariya va rere Munwendi nampili ngomu va dilire kuweka yoyinzi. (Lev. 12:8; Ruk. 2:24) Apa Jesus va mu hampurukire, Mariya “ta mu rangeke mekungu lyokulira yimuna, morwa kapi va gwene nzugo membo lyovanangenda.” (Ruk. 2:7) Jehova ngano ga here, age ngano ga rugene ko yuma yipo Munwendi va mu hampurukire mevango lyewa. Nye, age kwa here Munwendi va mu rerere mepata lyava ava tura muhowo mpango zendi.

8 Sihorokwa oso kuturonga omu Jehova a tara emona. Vakurona vamwe kwa harera vana vawo va kondjere po unene emona mevango lyokudemenena  kelikwatakano lyawo naJehova. Nye, Jehova kutara elikwatakano lyetu nendi asi mulyo unene kupitakana nkenye eyi. Nove kuhetekera ko kutara yininke ngamoomu a yi tara Jehova ndi? Ove kuyilikida momparukiso zoge ndi?—Resa Vahebeli 13:5.

9, 10. Ngapi natu yi likida asi kapi twa hara kupundukisa wopeke?

9 Sihonena sauvali kuna kara omu Jehova a tara muntu ogu a pundukisa wopeke. Jesus kwa tente asi: “Ogu a pukisa kanonagona kamwe potu twa pura nge, gwangesi ngano ga fira kumumangerera emumanya monsingo, a ka damenene nalyo mekurutondo lyefuta.” (Mar. 9:42) Nonkango odo kulikida asi kupundukisa wopeke kapisi sininke sosiwa. Mokumona asi Jesus kulikida yikara yoGuhwe, kuvhura tu yi kwatese ko asi Jehova kapi ayi mu hafesa apa nkenye gumwe a rugana yuma eyi nayi pundukisa vakareli vendi.—Joh. 14:9.

10 Ose ngapi atu tara kupundukisa wopeke? Yisinke azi likida mparukiso zetu? Pasihonena, kuvhura tu hare ndwareso zongandi, nye azo nampo kuhandukisa womombungakriste ndi kupindura madowo gomadona mwawo. Nsene twa hara vanavazinyetu, ngatu nyokera po ndwareso ozo.—1 Tim. 2:9, 10.

11, 12. Ngapi kunyenga udona nokukara nonkareso zelipangero ngayi tu vatera?

11 Sihonena sautatu kuna kara asi, Jehova kwa nyenga udona. (Jes. 61:8) Nampili ngomu ga yi diva asi ose kulipuka morwa kapi twa sikilira mo, age kuna tu harere tu nyenge udona. (Resa Episarome 97:10.) Nsene tu teda ko konda zeyi Jehova ga nyengera udona, ngayi tu vatera tu kare nomutaro ngwendi gwendi ntani ngayi tu tumangeda tu nyokere po kurugana udona.

12 Nsene tu lironga kunyenga udona, ngayi tu vatera tu dimburure asi yininke yimwe eyi va dira kuvyukilira kutumbura moBibeli yidona. Pasihonena, ndanesa zokuligoga-goga korutu romuntu kuna kuvhuka mouzuni. Vamwe kuvhura va ligusa-guse mo asi kapi ya lifana nokuligwanekera panyama. * Nye ngoso Karunga ogu ga nyenga nkenye udona yimo ayi gazara ndi? Tu nyokereni po udona pokutunga po nkareso zelipangero nokunyenga eyi ga nyenga Jehova.—Rom. 12:9.

GAZADARA KO NGESI EYI NGO HEPA KURUGANA

13. Morwasinke ya karera nomulyo kugazadara ko komeho zosiruwo omu Jehova a tara yininke?

13 Nsene kuna kulironga, ya wapa kugazadara ko omu Jehova a tara yininke morwa ngayi tu vatera mokutura po matokoro gomawa komeho. Ano apa ngatu kara moukaro omu twa hepa kutokora usimbu, ngatu diva asi yisinke natu rugana. (Yis. 22:3) Tu konakoneni yihonena yimwe yomoBibeli.

14. Yisinke natu lirongera ko kononkango edi Josefa ga tanterere mukadaPotifara?

14 Josefa kwa nyokerere po kurara namukadaPotifara, morwa ga gazadarere ko komeho zosiruwo omu Jehova a tara nonkwara. (Resa Genesis 39:8, 9.) Josefa kwa tanterere mukadaPotifara asi:  “Ngapi omu nani rugana-rugana udona wa hura opo, ni zone kwaKarunga gwange!” eyi kulikida asi age kwa tere yininke ngamoomu a yi tara Jehova. Ose ngapi? Ngapi nsene murugani mukwetu kuna kutulihoresa, ndi ngapi nsene gumwe a tu tumina mbudi ndi efano lyoruhonda koserefoni zetu? * Ayo ngayi tu rerupira kulimburukwa kwaJehova nsene tu tara yininke ngamoomu a yi tara ntani nsene tu tokora komeho zosiruwo eyi ngatu rugana moukaro wangoso.

15. Yisinke nayi tu vatera tu twikire kulimburukwa Jehova ngwendi Vahebeli vena vatatu?

15 Tu konakoneni sihonena saSaduraka naMesaka naAbetenego. Awo kwa nyokere kutongamena efano lyongorodo eli ga rugene hompa Nebukadenesara. Nonkango edi va tanterere hompa kwa likidire asi awo kwa gazadarere ko komeho zosiruwo eyi va hepere kurugana yipo va twikire kulimburukwa Jehova. (Ex. 20:4, 5; Ndan. 3:4-6, 12, 16-18) Tu tante asi muhona goge ta ku pura o gave ko yimaliwa yipo ngava ruganese ko sipito esi sa likwatakana noukareli woyimpempa. Yisinke no rugana? Mevango lyokundindira maukaro gangoso ga horoke, ya wapa tu gazadare ko komeho zosiruwo omu Jehova a tara yininke oyo. Nsene tu yi rugana, ngayi tu vatera tu dive eyi ngatu limburura ngwendi Vahebeli vena vatatu.

Ove wa rugana epaparo nokuzwida mbapira zouhaku ntani nokuuyunga nandokotora ndi? (Tara paragarafu 16)

16. Pokuteda ko omu Jehova a tara uhaku, ngapi ngayi tu vatera apa ngatu hepa uhaku wohararasi?

16 Nsene tu gazadara ko omu ya kara nomulyo kulimburukwa, ngayi tu vatera apa ngatu hepa uhaku wohararasi. Nampili ngomu twa hepa kunyoka kutambura honde ndi maruha gane gohonde, nongendeseso dimwe kuhepa koMukriste mokutura po etokoro lyamwene kuliza nonompango doBibeli. (Yirug. 15:28, 29) Ayo kapi ya wapa kundindira dogoro mosipangero tuna kara ntani tuna ku tura po etokoro, nampo morwa kuna kuzuvha kukora ntani wopeke kuna kutusininika tu tokore usimbu. Esi ngesi kuna kara siruwo sosiwa kwetu mokurugana ko mapaparo nokuzogera  nandokotora ntani kuzwida mbapira zouhaku ezi za faturura kuhamena uhaku ou atu tambura. *

17-19. Morwasinke ya karera nomulyo tu dive komeho zosiruwo omu Jehova a tara yininke? Gava sihonena.

17 Koneka eyi ga limbwilire Jesus apa Peturusa ga mu tanterere asi: “Karunga ngano ta kwafa tupu yi ka fire mo Hompa.” Elimbururo lyendi kwa likidire asi age kwa gazadarere ko komeho zosiruwo kweyi ga mu harerere Karunga a rugane nokomauporofete aga ga uyunga kuhamena eparu lyendi lyepevhu nonomfa dendi. Ediwo eli ga gwene kwa mu vaterere a twikire kulimburukwa Jehova nokugava eparu lyendi yipo a tu zowore.—Resa Mateusa 16:21-23.

18 Naina, Karunga kuna tu harere tu kare vakaume vendi nokulitura mo unene mosirugana sokuzuvhisa. (Mat. 6:33; 28:19, 20; Jak. 4:8) Nye, ngwendi Peturusa, vantu vamwe kuvhura va tu hagekese va hana kuyidivira. Pasihonena, ngapi nsene muhona goge a ku pa sirugana sokufuta yimaliwa yoyinzi esi nasi kuninkisa o dire kuza nkenye apa komapongo ndi mokuzuvhisa? Ndi nampo ove kuna kudimba sure makura tava ku ninki o ka dimbire kevango nalyopeke. Moukaro wangoso, wa hepa kukanderera nokuyizogera nava vemepata lyeni ndi novakuronambunga ntani no tokora. Ya kara nomulyo kugazadara ko komeho zosiruwo kuhamena omu Jehova a tara yininke ntani no tura po etokoro. Nsene o yi rugana, ngayi ku rerupira apa ngo ligwanekera noukaro wangoso. Ove ngo diva eyi ngo hepa kurugana morwa wa tura po matokoro nare kuhamena kukarera Jehova.

19 Kuvhura o gazadare ko kuhamena maukaro gamwe hena aga naga vhura kuheteka ulimburukwi woge. Yosili, kapi tayi tu tompoka kuliwapaikira nkenye udigu. Nye nsene tu gazadara ko omu Jehova a tara yininke pelirongo lyanyamwetu, ngayi tu vatera tu diworoke eyi twa lironga nokuyiruganesa mokutura po matokoro gomawa mwankenye ukaro. Yipo nye, nkenye apa tuna kulironga twa hepa kudiva omu Jehova a tara yininke ntani nokugazadara ko omu ngayi tu vatera apa ngatu hepa kutura po matokoro.

MAGAZARO GAJEHOVA NTANI MEHO ZOGE

20, 21. (a) Morwasinke ngatu ka karera noumanguruki mouzuni woupe? (b) Ngapi natu gwana ruhafo ngesi?

20 Natuvenye kuna kundindira nononkondo uzuni woupe. Sinzi setu kwa kara nehuguvaro lyokukaparuka pevhu moParadisa. MoUhompa waKarunga, ose ngatu ka manguruka ko komaudigu aga tuna kuligwanekera nago mouzuni ou. Nye nampili ngoso, ngatu ka twikira simpe kutura po matokoro. Nkenye ogu nga ka horowora eyi ga hara nokutokora asi yipi na hafera.

21 Nye oyo kapi yina kutanta asi kapi ngatu ka hepa noveta. Valinunupiki simpe ngava ka ruganesa nompango daJehova mokutokora asi yipi yoyiwa neyi yoyidona. Oyo ngayi ka reta ruhafo rorunene ntani mpora zonene. (Epis. 37:11) Ano ngesi, ose kuvhura tu hafe ngomu tuna kutokomena kugazara ngwendi moomu a gazara Jehova.

^ para. 12 Ndanesa ezi kwa kwatera mo muntu ana dwara tupu mudwaro gokonhi ana hingire pomatungi gomuntu oku ta dana monkedi zokupindura madowo gomadona. Mukriste nsene a yi rugana oyo kuna kara ngwendi kuna kuhondera. Yipo nye, vakuronambunga va hepa kumupangura kuliza nomaumbangi aga nava gwana. Mukriste ogu ga lihameka moyirugana yangoso, ga hepa kupura evatero kovakuronambunga.—Jak. 5:14, 15.

^ para. 14 Kulitumina nombudi nomafano ntani novidiyo doruhonda koserefoni kuvhura kutwaredesa kepanguro. Momaukaro gamwe, epangero kwa tengeka vadinkantu vamwe morwa kulitumina mafano goruhonda. Komauzera gomanzi, tara koIntaneta zetu jw.org nokuresa sirongwa “Vadinkantu tava pura—Yisinke na hepa kudiva kuhamena kulitumina yininke yoruhonda?” (Tara koruha BIBLE TEACHINGS > TEENAGERS, moRuingilisa.)Ndi tara sirongwa “Omu no zogera nomudinkantu goge kuhamena kulitumina yininke yoruhonda” moAwake! zaMangundu 2013 epe. 4-5.

^ para. 16 Nompango dimwe edi nadi kuvatera kwa di zogera moyimbapiratjangwa yetu. Pasihonena, tara mobuke Omu kare meharo lyaKarunga, epe. 246-249.