Zende koyikaramo

Zende koyikaramo

Nombangi daJehova

Horowora eraka Rukwangali

‘Wa hara nge kupitakana omu wa hara eyi ndi?’

‘Wa hara nge kupitakana omu wa hara eyi ndi?’

‘Simoni zaJohanesa, wa hara nge kupitakana omu wa hara eyi ndi?’—JOH. 21:15.

MARUSUMO: 128, 45

1, 2. Konyima zokutega nomfi masiku mudima, sihorokwa musinke sa horokerere Peturusa?

VARONGWA vaJesus ntambali kwa tegere nomfi mefuta lyaGalireya masiku mudima, nye kwato eyi va kwete. Jesus ogu ga kere konontere defuta, tava tantere asi: “Tegeni ekwe korulyo rowato, makura mu kwate. Awo makura tava li tege, makura tali va vhuru kulikoka mo morwaunzi wonomfi.”—Joh. 21:1-6.

2 Apa va mene kulihaka, Jesus makura ta pura Simoni Peturusa asi: ‘Simoni zaJohanesa, wa hara nge kupita omu wa hara eyi ndi?’ Kosinke ga tembe Jesus? Peturusa kwa here unene yirugana yokukwata nomfi. Jesus kwa pulire Peturusa yipo a dive eyi ga here po unene. Ngoso Peturusa kwa here po unene kukwata nomfi kupitakana omu ga here Jesus neyi nga rongo ndi? Peturusa ta limburura asi: “Nhi, Hompa, wa diva asi ame na ku hara.” (Joh. 21:15) Yosili, Peturusa ga sikisire mo eyi ga tente. Kutunda pena, ga yi likidire asi ga here  Kristusa pokulihameka mosirugana sokutulisa po varongwa ntani age kwa kere sihonena sosiwa mombungakriste mosiruwo sovapositoli.

3. Koyininke musinke va hepa kutakamesa Vakriste?

3 Yisinke natu lirongera ko kononkango daJesus edi ga tanterere Peturusa? Twa hepa kutakamesa asi eharo lyetu kwaKristusa lya ha tenda nokutuninkisa tu dire kulitura mo unene moyirugana yoUhompa. Jesus ga divire yinka ava ligwanekere nayo vantu mouzuni ou. Mosifanekeso sendi somukuni, Jesus kwa tente asi, vamwe ngava tambura ‘nonkango doUhompa’ nokutura po ezokomeho nye ‘ sinka seyi youzuni nedowo ndi eyivayiwo lyemona’ ngali dipaga “nonkango” odo. (Mat. 13:19-22; Mar. 4:19) Nsene kapi tuna kutakamesa, yinka yeparu yankenye ezuva kuvhura ngayi tu ninkise tu tengure monyima pampepo. Eyi yiyo Jesus ga rondwere varongwa vendi asi: “Omu litakamese nyamweni! Walye omu lizumbilire moyipito nomoyinwa yononkondo noyinka youzuni ou.”—Ruk. 21:34.

4. Yisinke nayi tu vatera tu likonakone nsene twa hara Kristusa unene? (Tara efano pepenuno 22.)

4 Ngamoomu ga yi rugene Peturusa konyima zapa ga mu pulire Jesus, nose kulikida eharo lyetu lyenene kwaKristusa pokutura muhowo sirugana esi ga tu pa. Ngapi omu natu divilisa asi ose kuna kutwikira kuyirugana? Nkenye apa, twa hepa kulipura asi: ‘Yisinke eyi na hara po unene? Ame kugwana ruhafo rorunene nsene kuna kurugana yininke yopanyama ndi yopampepo?’ Mokukagwana elimbururo, ngesi tatu ka konakona yininke yitatu eyi nayi vhura kutendeka eharo lyetu kwaKristusa nokoyininke yopampepo. Yininke oyo kuna kara yirugana noyilihafeso ntani emona.

KARA NEHETAKANO KOYIRUGANA

5. Situmbukira musinke va kara naso vanturagumbo?

5 Kukwata nomfi kwa kere sirugana esi nga parukire Peturusa. Naina, vanturagumbo va diva asi va kara nositumbukira sokurera mapata gawo. (1 Tim. 5:8) Awo va hepa kurugana unene yipo va sikise mo situmbukira sawo. Nye momazuva aga gopouhura, rorunzi yirugana kuretera vantu yinka.

6. Yinka musinke ava ligwanekere nayo vantu kuhamena yirugana?

6 Morwa udigu kugwana yirugana, varugani wovanzi kuvatumangeda va rugane novili dononzi ano pamwe kuvafuta yimaliwa yoyisesu. Nongesefa dimwe kwa kara novarugani wovasesu, ngoyitundwamo, awo va hepa kurugana novili dononzi ano oyo kuvaninkisa va roroke unene parutu nopanandunge ntani pamalizuvho. Varugani vamwe kukara nosinka sokuzumbanesa yirugana yawo makura awo kurugana nkenye eyi ava va pangere vahona vawo.

7, 8. (a) Yilye twa hepa kulimburukwa po unene? (b) Sirongwa musinke somulyo ga lirongerere ko munazinyetugara gomoTairanda kuhamena sirugana sendi?

7 NgoVakriste, ose twa hepa kulimburukwa Jehova Karunga kupitakana vahona vetu. (Ruk. 10:27) Yirugana kutuvatera tu gwane yimaliwa yokulireresa nokulivateresa ko moyirugana yokuzuvhisa. Nye nsene kapi tuna kutakamesa, yirugana kuvhura yi donganese ukareli wetu. Pasihonena, munazinyetugara gumwe gomoTairanda kwa tanta asi: “Ame kwa here yirugana yange yokupangera nokompiuta,  nye ngani rugana novili dononzi. Ngoyitundwamo, kapi na gwene siruwo sokurugana yopampepo. Konyima naya dimbwilire asi mokutura Uhompa muhowo, na hepere kugwana yirugana yapeke.” Yisinke ga rugene munazinyetu ogo?

8 Age kwa tanta asi: “Konyima zokugazadara ko ure womvhura, yipo na tokwere kurandesa noice cream. Ketameko, kapi ngani gwana mo yimaliwa yokugwanena po ntani ya dompesere nge. Apa ngani ligwana novarugani vakwetu vanare, ngava zoro nge nokupura nge eyi na sigira yirugana yange yoyiwa ni ya randese noice cream. Ame kwa kandererere kwaJehova a vatere nge ni lididimike nokusikisa mo sitambo sange sokugwana siruwo sosinzi seyi yopampepo. Mwaza siruwo, tapa wiza erunduruko. Ame na ya divire eyi va here varandi vange ntani na kere noudivi wokurugana noice cream edi va here. Konyima zosiruwo, ngava di randa po nadinye nkenye ezuva. Ame ngesi kugwana yimaliwa yoyinzi kupitakana eyi ngani gwana pokupangera nokompiuta. Ngesi nina kara noruhafo morwa kapi nina kara nosinka esi na kere naso koyirugana yange yanare. Nye unene po, ngesi na hedera pepi naJehova.”—Resa Mateusa 5:6; Rukasa 11:28.

9. Ngapi omu natu kara nehetakano koyirugana?

9 Jehova kuyihafera apa atu rugana unene. (Yis. 12:14) Nampili ngoso, ngwendi moomu ga yi nongwenene munazinyetu tuna tumbura, twa hepa kukara nehetakano koyirugana. Jesus kwa tente asi: ‘Yipo nye nomu hovera tanko kupapara Uhompa waKarunga neyi ga hepa ko kweni, ano yininke eyi nayinye ngano ngava yi mu gwederera po.’ (Mat. 6:33) Mokutuvatera tu dive nsene twa kara nehetakano lyewa koyirugana ntani koyininke yopampepo, ya wapa kulipura asi: ‘Ame kuhafera unene kurugana yirugana yopanyama ndi yopampepo?’ Kugazadara ko omu atu lizuvhu kuhamena yirugana yopanyama ndi yopampepo ngayi tu vatera tu dive asi yipi twa hara po unene.

10. Sirongwa musinke somulyo ga rongere Jesus?

10 Jesus ga tulire po sihonena sokukara nehetakano koyininke yopanyama neyi yopampepo. Sikando simwe, Jesus kwa ka dingwire Mariya naMalita. Apa Malita ga viyaukire a wapaike nondya, Mariya age kwa hingilire konompadi daJesus a purakene. Apa Malita ga sivanene asi Mariya kapi ana kumuvatera, makura Jesus ta tantere Malita asi: “Mariya kuna horowora po age ruha roruwa, oru ngava dira kumugusa.” (Ruk. 10:38-42) Jesus kwa rongere Malita sirongwa somulyo. Mokunyokera po yininke yopanyama yi dire kutudonganesa nokulikida eharo lyetu kwaKristusa, twa hepa kutwikira kuhorowora po “ruha roruwa” ndi kutura muhowo yininke yopampepo.

MUTARO GWETU KOYILIHAFESO

11. Yisinke aga tanta ko Matjangwa kuhamena kupwizumuka?

11 Ose vantu twa hepa siruwo sokupwizumuka. Nonkango daKarunga kwa tanta asi: “Sosiwa po esi ga hepa kurugana mugara sokulya oku ta nu a bodjane eyi ga pongaika.” (Muud. 2:24) Jesus ga mwene mulyo gokupwizumuka. Sikando simwe konyima zokurugana unene mokuzuvhisa age kwa tanterere varongwa vendi asi: “Wizeni nyonelike kevega lyomaporeza, mu ka pwizumuke kanunu.”—Mar. 6:31, 32.

12. Yisinke twa hepa kutakamesa kuhamena yilihafeso? Gava sihonena.

 12 Yosili, yilihafeso kwa kara nomulyo. Nampili ngoso, twa hepa kutakamesa asi kapisi yiyo nayi kara yomulyo po meparu lyetu. Mosiruwo sovapositoli, vamwe kwa kere nonkareso ezi asi: “Tu lyeni nye oku tatu nu, yeeyi mungura tatu fu.” (1 Kol. 15:32) Nkareso zangoso kuna lihanene mouzuni mudima. Pasihonena, nomvhura dina ka pita mudinkantu gomoEuropa kwa tamekere kuza komapongo. Nye age kwa here unene yilihafeso makura yipo ga hagekere kulipakerera kumwe noNombangi daJehova. Mwaza siruwo, yipo ga ya dimbwilire asi kudemenena koyilihafeso kwa mu reterere tupu maudigu. Makura ta ya tameke hena kulironga Bibeli nokukara muzuvhisi. Konyima zokugwana ekuho, age kwa tente asi: “Sininke simwe tupu ani livere, kuna kara asi ame kwa hepekere siruwo sange sosinzi komeho ni ya dimburure asi kukarera Jehova kureta ruhafo kupitakana yilihafeso yomouzuni.”

13. (a) Fanekesa omu yilihafeso ya kara siponga. (b) Yisinke nayi tu vatera tu kare nehetakano koyilihafeso?

13 Sitambo soyilihafeso kuna kara sokutupwizumukisa. Siruwo sokuhura kupi natu ruganesa koyilihafeso? Gazadara ko kosifaneko esi: Sinzi setu kwa hara kulya yikuki nomaureke nye nsene tu yi lya nkenye apa ngayi zonagura ukanguki wetu. Yipo nye twa hepera kulya nondya doukanguki. Ayo ya lifana, nsene tu hokwa tupu kulihafesa nkenye apa, ngayi tu ninkisa tu tengure monyima pampepo. Mokuyinyokera po oyo, twa hepa kulitura mo nkenye apa moyirugana yoUhompa. Ngapi omu natu diva asi tuna kara nehetakano koyilihafeso? Kuvhura tu horowore sivike simwe omu natu didilika novili edi tuna kuruganesa mokuzuvhisa nokomapongo ntani pokurugana ukareli wepata nelirongo lyanyamwetu lyoBibeli. Makura tatu di hetakanesa nonovili edi tuna ruganesa mosivike oso mokutarera tivi nokulihameka momaudano nayimwe hena. Nsene novili edi tuna ruganesa koyilihafeso nonzi, twa hepa kutura po marunduruko.—Resa Vaefeso 5:15, 16.

14. Yisinke nayi tu vatera mokuhorowora yilihafeso?

14 Nkenye muntu ntani vanturagumbo kuvhura kuhorowora yilihafeso eyi ya liza nonompango daJehova edi da kara moBibeli. * Yilihafeso “uhwi wokutunda kwaKarunga.” (Muud. 5:19) Nampili ngoso, ose kwa hara yilihafeso yokulisiga-siga. (Gar. 6:4, 5) Nye, yi kare asi yilihafeso musinke tuna kuhorowora, twa hepa kukara nehetakano. Jesus kwa tente asi: “Oku aku kara emona lyoge, yiko kooko aku kara mutjima goge.” (Mat. 6:21) Eharo lyetu kwaHompa gwetu Jesus ngali tu tumangeda tu demenene koyirugana yoUhompa mevango lyokudemenena koyininke yapeke.—Fil. 1:9, 10.

KUNYOKERA PO EDOWO LYEMONA

15, 16. (a) Monkedi musinke omu emona nali kara siraha koMukriste? (b) Epukururo musinke ga geve Jesus kuhamena edowo lyemona?

15 Vantu wovanzi kwa hara kuranda yikoverero nonoserefoni nayimwe hena eyi yina kara momode. Yipo nye, nkenye Mukriste ga hepa kulikonakona nkenye apa pokulipura asi: ‘Ame kuruganesa siruwo sange unene mokupapara nokugazara kuhamena yikoverero nomatuwa noyininke eyi yina  kara momode kupitakana siruwo esi ani ruganesa mokuliwapaikira komapongo ndi? Ame kuruganesa siruwo sange sosinzi koyininke yanyamwange kupitakana siruwo esi ani ruganesa pokuresa Bibeli nokukanderera ndi?’ Nsene tu dimburura asi twa hara unene yininke yopanyama kupitakana Kristusa, twa hepa kugazadara ko kononkango edi ga tente Jesus asi: ‘Omu rungarare edowo lyemona.’ (Ruk. 12:15) Morwasinke Jesus ga gaverere erondoro lina?

16 Jesus kwa tente asi: “Muntu simpe a vhuru kukerera ohekuru vavali.” Ntani ta gweda ko asi: “Nokuvhura si kukerera Karunga nomamona.” Morwa “ohekuru vavali” navenye va hepa siruwo soge. Jesus kwa tente asi: ‘Morwa no nyenga po gumwe, to hara po mukwawo, ndi no korera kwagumwe, to nusa po mukwawo.’ (Mat. 6:24) Ngovantu wokudira kusikilira mo, twa hepa kukondja mokunyokera po ‘madowo goparutu’ kukwatera mo edowo lyemona.—Efe. 2:3.

17. (a) Morwasinke vantu wovanzi ayi va digopere kukara nomutaro gehetakano koyininke yopanyama? (b) Yisinke nayi tu vatera tu nyokere po edowo lyemona?

17 Vantu wovanzi kuvadigopera kukara nomutaro gehetakano koyininke yopanyama. Morwasinke? Morwa kapi ava kwata egano yininke yopampepo asi mulyo. (Resa 1 Vakolinte 2:14.) Apa ava dili kukwata egano yininke yopampepo, awo kapi ava vhuru kuhangura uwa koudona. (Heb. 5:11-14) Ngoyitundwamo, awo kuyakara neharo lyokuhara yininke yoyinzi nye simpe kapi ayi va gwanene po. (Muud. 5:10) Mokunyokera po nkareso ozo, twa hepa kuresa Bibeli nkenye ezuva. (1 Pet. 2:2) Kuteda kwa vaterere Jesus a nyokere po maheteko, nose nsene tu ruganesa nompango doBibeli, ngayi tu vatera tu nyokere po edowo lyemona. (Mat. 4:8-10) Pokurugana ngoso, ose ngatu yi likida asi twa hara Jesus kupitakana emona.

Yisinke wa hara po unene meparu? (Tara paragarafu 18)

18. Yisinke ono tokomene kurugana?

18 Jesus kwa pulire Peturusa asi: ‘Wa hara nge kupita omu wa hara eyi ndi?’ Age kwa pulire Peturusa epuro olyo pokumudiworokesa mulyo gokutura muhowo yininke yopampepo meparu lyendi. Edina Peturusa kutanta asi: “Emanya”, age kwa likidire yikara yokuliza nedina lyendi. (Yirug. 4:5-20) Naina, nose twa hepa kutokomena mokutwikira kuhara Kristusa nokukara nehetakano koyirugana noyilihafeso ntani emona. Momatokoro getu, ngano tu yi likide ngwendi moomu ga uyungire Peturusa asi: “Nhi, Hompa, wa diva asi ame na ku hara.”

^ para. 14 Tara sirongwa “Yilihafeso yoge kukuretera uwa ndi?” moRuhungu 15 Sikukutu 2011, pepenuno 9-12 paragarafu 6-15.