Zende koyikaramo

Zende koyikaramo

Nombangi daJehova

Horowora eraka Rukwangali

Vamwe kwa pura asi muntu kuparuka hena konyima zonomfa

 SIRONGWA SOKUHOVA | YISINKE AZI UYUNGA BIBELI KUHAMENA EPARU NONOMFA?

Epuro eli lya piyaganeka sinzi sovantu

Epuro eli lya piyaganeka sinzi sovantu

VANTU kwa kara nomagano gokulisiga-siga kuhamena eparu nonomfa. Vamwe kwa pura asi konyima zonomfa kukaparuka hena ngosisitwa sapeke ndi kevango lyapeke. Vamwe hena kwa pura asi konyima zonomfa kuvahampurukurura va paruke hena. Ano vamwe kwa pura asi nomfa ehagero lyomuntu.

Nampo wa kara nepuliro lyoge kuhamena nomfa kuliza nompo zeni ndi noukarelikarunga. Mokumona asi vantu kwa kara nomagano gokulisiga-siga kuhamena eyi ayi horoka konyima zonomfa, kupi natu gwana elimbururo lyouhunga kepuro eli ali piyaganeke sinzi sovantu?

Monomvhura dononzi vampitisili womaukarelikarunga kwa ronga asi muntu kwa kara nomwenyo ogu agu dili kufa. Sinzi somaukarelikarunga gomanene ngwendi Vakriste noVahindu noVajuda noVamuslema ntani nagamwe kwa pura asi muntu kwa kara nomwenyo ogu agu ka paruka konyima zonomfa. Ano Vabuda kwa pura asi nsene muntu ana fu, kukamuhampurukurura hena yikando yoyinzi, ano konyima age kugwana mpito zokukaparuka mevango lyombili ava tumbura asi Nirvana.

Morwa marongo ogo, sinzi sovantu kwa pura asi nomfa kuna kara mpito zokukaparukira kevango ndi mouzuni wapeke. Awo kutara nomfa asi ntambo zomulyo ezi azi pulisire muntu a rundurukire keparu lyapeke, ntani asi nomfa Karunga adi retesa po. Nye yisinke za uyunga ko Bibeli kosirongwa oso? Resa sirongwa sokukwama ko, yipo o gwane elimbururo.