Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA SOKUHOVA | NSENE ONO FISA

Vafe ngava ka vhumbuka

Vafe ngava ka vhumbuka

Gail, ogu tuna tumbura nare, kulizuvha asi kapi nga hageka kulira nomfa damugara gwendi, Robert. Nye age kuna kundindira nononkondo mokukamumona hena mouzuni woupe. Age kwa tanta asi: “Etjangwa na hara unene kuna kara Ehororo 21:3, 4.” Alyo kutanta asi: “Karunga mwene nga kara pwawo, a kare Karunga gwawo. Ano Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”

Gail kwa tanta asi: “Etumbwidiro eli kuhengagwida nge sili. Ame kufira nkenda ava va fisa nye kapi va diva asi ngatu ka mona hena ava twa fisa.” Ngomuzuvhisi gosiruwo nasinye, Gail kutantera ko wopeke kuhamena etumbwidiro lyaKarunga eli ga pura asi: “Nomfa kapi hena ngadi kara ko.”

Joba kwa kere nehuguvaro asi ngava ka mu vhumbura

Kuvhura o gazare asi: “Oyo kapi ngayi horoka!” Nye koneka sihonena somugara gedina Joba. Age kwa verere unene. (Joba 2:7) Nampili ngomu Joba ga here asi ngano a fe, simpe ga kere nepuro lyenene asi Karunga nga ka mu vhumbura keparu pevhu. Age kwa uyungire asi: “Ngano to horeke nge mosirongo sovafe . . . Makura ngo zigide nge, ame ngani ku limburure, makura ngo hafere nge ame siungwa soge.” (Joba 14:13, 15) Joba ga kere nepuro asi Karunga nga mu diworoka makura nga mu tengwidira keparu.

Apa evhu ngava li ninka li kare paradisa, Karunga nga ka vhumbura Joba ntani vantu wovanzi. (Rukasa 23:42, 43) Bibeli kwa yi pameka moYirugana 24:15 asi: “Vantu navenye, ngava va pindura koufe.” Jesus kwa tumbwidira asi: “Mwa ha yi tetuka eyi, yeeyi siruwo ngasi wiza, apa ngava zuvha ezwi lyendi navenye ava va kara monontoko, makura tava pwaga mo.” (Johanesa 5:28, 29) Joba nga ka mona esikomo lyetumbwidiro olyo. Rutu rwendi ngaru ka tengwira hena ‘koudinkantu ru ka kare nononkondo.’ (Joba 33:24, 25) Navenye ava ngava vhumbura ngava kara nompito zokuparuka narunye pevhu.

Nsene wa fisa, eyi tuna zogere kuvhura kukuhengagwida. Nampili o kare simpe moruguwo, pokuteda komatumbwidiro gaKarunga gomoBibeli, kuvhura kukupa eheguvaro nononkondo dokulididimikira.—1 Vatesaronika 4:13.

Ono hara kulironga ko yoyinzi kuhamena omu no lididimikira ruguwo ndi? Ndi wa lipura rumwe asi: “Morwasinke Karunga a pulisilire udona noruhepo?” Tara koIntaneta zetu, jw.org, o gwane malimbururo gokuhengagwida moBibeli.