Zende koyikaramo

Zende koyikaramo

Nombangi daJehova

Horowora eraka Rukwangali

Nsene kuna fisa gumwe gemepata

Nsene kuna fisa gumwe gemepata

Mukadi gedina Vanessa gomoAustralia kwa tanta asi: “Apa mukurwange gomugara ga fire, ame kwa lizuvhire asi kwato eyi nani rugana ko. Nampili konyima zomakwedi gongandi ngani mu diworoka ntani ngayi veresa nge nokulizuvha ngwendi mbere vana kutwa nge komutjima. Poyiruwo yimwe, ame ngani handuka, nokulipura asi morwasinke nye mukurwange ana fire? Ntani na lizuvhire udona-dona kweyi ngani dili kukara kumwe nage apa ga kere muzuni.”

NSENE nove gumwe ogu ga fisa gemepata, nove wa lizuvhire ruguwo rorunene nomukuma ntani wa zumbanesere ehuguvaro. Ndi nampo ya ku handukisire nokulizuvha unzoni nowoma. Nampo wa lipulire nsene asi eparu mulyo koge.

Kapi ya kara epuko kuguva siruwo sosire. Ayo kulikida eharo lyoge komuntu gwina. Nye kupi no vhura kugwana ehengagwido nsene ono guwu?

OMU VAMWE VA LIDIDIMIKIRE

Nampili ngomu kukora aku moneka ngwendi kapi nga kuhaga, magano aga gana kukwama ko kuvhura kukuvatera.

SIRUWO SOKUGUVA

Twa lisiga omu atu guwu, vamwe kugusa siruwo sosire, ano vamwe karuwogona tupu. Nye kulira kuvatera mokupwagesa malizuvho yipo o lizuvhe ko hansa. Vanessa ogu vana tumbura ketameko lyosirongwa esi, kwa tanta asi: “Ame ngani lili mokupwagesa kukora kwange.” Sofía ogu ga fisire mumbyendi hararasi, kwa tanta asi: “Apa ngani gazara kweyi ya horokerere mumbyange ngayi koresa nge sili, kukora oko kwa fana ngwendi mungwa vana tura posironda. Mungwa kukora unene nye kuninkisa sironda si veruke.”

PWAGESA MALIZUVHO GOGE

Poyiruwo yimwe, kuvhura o lizuvhe ngwendi o kare nyovelike. Udigu kulididimikira ruguwo pwanyovelike. Jared gonomvhura 17, ogu ga fisire oguhwe kwa tanta asi: “Ame ngani pwagesere vakwetu malizuvho gange. Nampili ngomu ngani uyunga yininke ya hana mulyo, nye ngayi vatere nge ni lizuvhe hansa ko.” Janice ogu vana tumbura mosirongwa sokuhova, kwa gweda ko asi: “Kupwagesera vakweni malizuvho goge kuvatera sili. Na lizuvhire asi va kwete nge egano ntani asi kapisi nyamelike nina kara.”

TAMBURA EVATERO

Ndokotora gumwe kwa tanta asi: “Muntu ogu ana fisa a pulisire vakwawo novanekoro va mu vatere posiruwo soruguwo yipo yi mu rerupire kulididimikira ruguwo nokurufunda po.” Vakweni ngava yi hafera nsene o va tantera omu nava vhura kukuvatera.—Yisewe 17:17.

HEDERA KARUNGA PEPI

Tina kwa tanta asi: “Apa mugara gwange ga fire kokankera, kwato hena ogu ngani tantere maudigu gange noyinka yange, nye ngani tantere Karunga nayinye! Nkenye ezuva ngani hundire Karunga a vatere nge ni lididimikire. Karunga kwa vaterere nge mononkedi dokulisiga-siga.” Tarsha ogu ga fisire ozina, age opo nomvhura dendi 22, kwa tanta asi: “Kuresa Bibeli nkenye ezuva ngayi hengagwida nge. Azo kwa vaterere nge ni gazadare ko koyininke yoyiwa.”

GAZADARA KO KEHUGUVARO LYEVHUMBUKO

Tina kwa gweda ko asi: “Pomuhowo ehuguvaro lyevhumbuko kapi lya hengagwidire nge, morwa ame kwa hepere mugara gwange ntani vana vange va hepere guhyawo. Ngesi nomvhura ne dina piti po, ntani lina kuhengagwida nge ehuguvaro lyevhumbuko. Alyo kuhengagwida nge nokuvatera nge ni lididimikire. Apa ani gazara asi ngani ka mu mona hena, ayo kuretera nge ruhafo nombili!”

Ruguwo kapi aru haga usimbu. Nye sihorokwa saVanessa kuvhura kutuvatera. Age kwa tanta asi: “Kuvhura o gazare asi kapi ngo kara hena noruhafo, nye kanunu-kanunu ruguwo kuyahaga.”

Nampili ngomu ngo dira kudivara gumwe gemepata ogu ga fa, diworoka asi simpe eparu mulyo. Nevatero lyaKarunga, ove ngo hafera vakaume nokukara nositambo meparu. Ntani Karunga ntaantani nga ka vhumbure vafe. Age ana hara o ka mone hena vekoro lyoge ava va fa. Ano kukora ngava ka ku gusa po narunye nanarunye!