Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA SOKUHOVA | NGO TAMBURA UHWI WOUNENE WAKARUNGA NDI?

Morwasinke uhwi wounene waKarunga wa karera womulyo po?

Morwasinke uhwi wounene waKarunga wa karera womulyo po?

Yisinke ayi ninkisa uhwi u kare womulyo po? Pana kara nonkedi ne: (1) yilye ga gava uhwi owo koge?, (2) morwasinke ga u gavera?, (3) elizambero musinke lya hepere po?, ntani (4) wa kere hepero ndi? Kugazadara ko kononkedi odo kuvhura kutuvatera tu likide rupandu kouhwi wounene po waKarunga, sizoweseso.

YILYE GA GAVA UHWI OWO?

Mauhwi gamwe mulyo morwa kwa ga tu pa gumwe ogu ga kara nosipundi sokuzeruka ndi ogu ga fumana unene. Mauhwi gamwe nampili ngomu aga moneka asi mulyo musesu, ago kuhafesa morwa kwa tunda komuntu ogu twa hara ndi twa huguvara. Eyi kuna lifana nouhwi ou ga geve Russell kwaJordan, ogu vana tumbura mosirongwa sokuhova. Ngapi eyi ya liza nouhwi wosizoweseso?

Nkedi zokuhova, Bibeli kwa tanta asi Karunga kwa tu tumina “Munwendi thi asi tu parukire mwendi.” (1 Johanesa 4:9) Eyi kuninkisa uhwi ou u kare womulyo po. Kwato mupangeli gomunene kupitakana Karunga. Kuhamena Karunga, muepisarome kwa tjenge asi: “Ngava dive asi ove nyovelike HOMPA, mupangeli gomunene gouzuni mudima!” (Episarome 83:18) Ngano kapi twa wapera kugwana uhwi wokutunda komupangeli gomunene.

Zauvali, Karunga age “Guhyetu.” (Jesaya 63:15) Monkedi musinke? Age kwa tu pa eparu. Ntani hena, kutupakera mbili ngwendi moomu guhya a pakere mbili vana vendi. Pokuuyungisa vantu vendi vamwe vanare, Karunga kwa tente asi: “Israeli, ove munwange gomugara ogu na tokomena, ove muna ogu na hara unene. . . . Ame tani ku fire nkenda.” (Jeremiya 31:20) Karunga yimo a lizuvhu ngoso kuhamena vakareli vendi vanaina. Age kapisi Musiti gwetu tupu nye hena Guhyetu geharo naKaume ketu. Eyi yiyo uhwi wokutunda kwendi wa karera womulyo po.

 MORWASINKE GA U GAVERA?

Mauhwi gamwe mulyo morwa kwa ga gava kutundilira meharo kapisi komusininiko. Mugavi gwangoso kapi a ndindire ko asi va mu fute.

Karunga kwa tu pa Munwendi morwa kwa tu hara. Bibeli kwa tanta asi: “Karunga omu ga tu horwera eharo lyendi, mokututumina Munwendi thi.” Nositambo musinke? “Asi tu parukire mwendi.” (1 Johanesa 4:9) Karunga kwa mu sininikire mokutupa Munwendi ndi? Hawe. Sizoweseso esi ga futire Jesus Kristusa kuna kara “nkenda” zaKarunga.—Varoma 3:24.

Morwasinke uhwi waKarunga wa karera asi kwa u tu pera ‘konkenda’? Bibeli kwa tanta asi: “Karunga kwa tu likida asi kwa tu hara unene mwangesi asi, apa twa kere tu vananzo, Kristusa yipo ga tu fililire.” (Varoma 5:8) Eharo lyosili kwa tumangedere Karunga a rugane ko yuma koupirankondo wovantu nokononzo. Eharo olyo kapi twa li ruganena ntani kapi tatu vhuru kufuta Karunga. Uhwi ou kulikida eharo lyendi lyenene kovantu.

ELIZAMBERO MUSINKE LYA HEPERE PO?

Mauhwi gamwe mulyo morwa mugavi kutura po elizambero lyenene. Apa muntu a kara neharo lyokutupa sininke esi sa kara nomulyo kwendi, ose kutara uhwi owo asi mulyo morwa elizambero eli ana tura po.

Karunga kwa geve “Munwendi gelike a huru.” (Johanesa 3:16) Age kwa tu pa Munwendi ogu ga hara po unene. Monomvhura dononzi apa Karunga ga sitire uzuni mudima, Jesus nga rugana kumwe noGuhwe ntani kwa kere ‘ntundiliro zoruhafo’ roGuhwe. (Yisewe 8:30) Jesus age MunaKarunga “ogu ga hara” ntani “sihwi saKarunga ogu a dili kumoneka.” (Vakorosi 1:13-15) Jesus naKarunga kwa kara nelikwatakano lyenene kupitakana nkenye muntu.

Nampili ngoso, Jehova Karunga ‘kapi ga ruvire Munwendi.’ (Varoma 8:32) Age kwa tu pa sosiwa po unene. Awo uhwi wondiro po.

WA KERE HEPERO NDI?

Mauhwi gamwe mulyo morwa ga kara hepero unene. Pasihonena, ove no pandura ogu ana lizambere kukufutira uhaku ou nau ku parura ou ono dili kuvhura kulifutira nyamoge! Uhwi owo ngau kara nomulyo sili koge, ndi ngapi?

“Moomu ava fu vantu navenye morwa yiwo ruvharo rwaAdamu, yimo ngorooro hena ngava va tura navenye mwenyo morwa yeeyi awo kwa likwatakana naKristusa.” (1 Vakolinte 15:22) Ngoruvharo rwaAdamu, natuvenye ‘kufa,’ kapi atu vhuru kuhenduka uvera nonomfa ndi tu likwatakane naKarunga ndi tu dire kukara vananzo kosipara sendi. Ngovantu, ose nokuvhura si kulipa nyamwetu “mwenyo” ndi nkenye ogu. Bibeli kulikida asi: “Muntu nokuvhura si a zowore mukwawo, nokuvhura si hena kufutira Karunga yizoweseso. . . . Yokuvhura kufuta age nokugwaneka si.” (Episarome 49:7, 8) Yosili, ose twa hepa evatero morwa nokuvhura si kufutira sizoweseso. Mokutusigilira, tatu kara twa hana sikwafo.

Morwa eharo lyendi lyenene, Jehova ga lizambera mokufutira “uhaku” womwenyo ogu twa hepa, yipo nye kupitira mwaJesus ‘navenye ngava ka gwana mwenyo.’ Ngapi sizoweseso sa yi sikisa mo eyi? ‘Honde zaMunwendi Jesus kwa tu kuhura kononzo  nadinye.’ Yosili, kutura epuro mohonde zaJesus kugava mpito zokudongonona po nonzo nokukagwana mwenyo gwanarunye. (1 Johanesa 1:7; 5:13) Yisinke hena sizoweseso ngasi ruganena ava va fa? “Moomu da kara po nomfa mouzuni morwamuntu gumwe, nevhumbuko lyovafe nalyo kwa kara po morwamuntu gumwe [Jesus].”—1 Vakolinte 15:21. *

Kwato uhwi wa tundilira rumwe komupangeli gomunene ndi li mu tumangede eharo lyenene wa hana asi nzambo zaJesus. Kwato gumwe ga gava uhwi wounene ngoso ga hana asi Jehova Karunga. Ntani kwato uhwi twa hepa unene wa hana asi nzambo ezi za tu mangurura kononzo nokonomfa. Kwato uhwi ou wa kara nomulyo unene wa hana asi wosizoweseso.

 

^ para. 19 Komauzera gomanzi kuhamena sitambo saKarunga sokukavhumbura vafe, tara egaununo 7 mobuke Yisinke azi rongo Bibeli? va rugana Nombangi daJehova ntani kuzigwana hena www.jw.org/kwn.