Zende koyikaramo

Zende koyikaramo

Kupapara usili

Kupapara usili

Kudiva usili kuna kara sininke somulyo unene kwetu. Pasihonena, konakona epuro eli ava lipura vantu wovanzi: Ngapi mauvera gomukagu aga lihana?

Monomvhura dononzi da ka pita, kwato ogu ga divire elimbururo kepuro eli. Ntani mahamba gomukagu kwa dipaga mamiliyona govantu. Konyima zeyi, vadiviunsitwe va ya gwene elimbururo lyousili. Awo kwa ya gwene asi yimbumburugona ngwendi nokime, yiyo ayi retesa po mauvera aga. Pokugwana usili wangesi, ayo kwa vatera vantu wovanzi va kandane po mauvera, eyi ya vatera vantu va paruke siruwo nokukara vana kanguka.

Ngapi kuhamena mapuro gamwe gomulyo? Ngapi kugwana malimbururo komapuro aga gana kukwama ko nayi kukundama?

  • Yilye Karunga?

  • Yilye Jesus Kristusa?

  • Yisinke Uhompa waKarunga?

  • Ngapi eparu ngali ka fana komeho?

Mamiliyona govantu va gwana malimbururo komapuro aga ntani ya rundurura eparu lyawo monaruwa. Nove kuvhura o gwanene mo uwa.

KUVHURA O GWANE USILI NDI?

Kuvhura o lipure asi: ‘Ngapi no vhura kugwana usili woyininke yokulisiga-siga?’ Kugwana usili woyininke yokulisiga-siga, kapisi ureru. Morwasinke?

Vantu wovanzi kapi va huguvara eyi aga va tantere mapangero ndi vanangesefa ndi vantu ava ava gava nombudi. Awo kuvadigopera kudimburura eyi ava uyunga vantu nsene asi usili ndi yimpempa, morwa nombudi doyimpempa dina vhuka. Ngomu tuna kuparuka mouzuni ou una vhuka yimpempa, vantu kapi vana kupura nkenye nombudi.

Nampili ngoso, kuvhura kugwana usili komapuro gomulyo po meparu. Ngapi natu yi rugana? Pokuruganesa nkedi zokulifana nezi atu ruganesa mokupapara malimbururo.

PAPARA USILI

Meparu, ove kupapara usili nkenye ezuva. Konakona sihorokwa saJessica. Age kwa tanta asi: “Munange kwa kara noudigu, nsene a makera nampili nauke nkenye eyi va ruganesa konondongo, kumuretera uvera.” Jessica ga hepa kudiva mauzera nagenye gonondya komeho adi rande yipo a dire kutura munendi mosiponga. Age kwa tanta asi: “Pomuhowo ame kuresa nkenye eyi va ruganesa nondya odo. Makura tani rugana mapaparo nokupura nokampani donondya ni divilise asi kapi va tura mo nondongo. Ntani ame hena kupapara mauzera gamwe kuhamena omu nokampani odo adi wapaike nondya dado.”

Pamwe usili ou o papara kapisi mulyo nawa-nawa ngwendi waJessica, nye kuvhura o rugane yokulifana mokupapara usili komapuro aga o lipura:

  • Gwana mauzera.

  • Rugana ko mapaparo.

  • Divilisa asi ntundiliro zomauzera ogo kuvhura o zi huguvare.

Nkedi ezi, ngazi ku vatera o gwane malimbururo kuhamena mapuro gomulyo meparu. Ngapi no yi rugana?

BUKE ZOKULIKARERA

Apa Jessica ga paparere usili kuhamena Bibeli, age kwa ruganesere nkedi zokulifana nezi ga ruganesere apa nga paparere munendi nondya douhunga. Age kwa tanta asi: “Kuresa nawa nokurugana unene mapaparo kwa vatera nge ni dive usili womoBibeli.” Ngwendi Jessica, mamiliyona govantu va lironga eyi azi uyunga ko Bibeli komapuro aga:

  • Morwasinke Karunga ga tu sitira?

  • Apa a fu muntu, kupi a zi?

  • Morwasinke pana karere ruhepo?

  • Ngapi Karunga nga ka gusa po ruhepo?

  • Ngapi no gwana ruhafo mepata lyoge?

Pokuresa moBibeli nokurugana mapaparo koIntaneta www.jw.org, kuvhura o gwane malimbururo komapuro aga.