Zende koyikaramo

Zende koyikaramo

Nombangi daJehova

Horowora eraka Rukwangali

Yisinke nga ka rugana komeho?

Yisinke nga ka rugana komeho?

Nsene moudigu ono kara, ove kundindira kaume goge a rugane ko yuma mokukuvatera. Eyi yiyo ayi ninkisa vamwe va tante asi Karunga kapisi kaume gomuwa morwa awo kulizuvha asi kapi ava vatere. Karunga kapi tupu ga rugana yininke yoyinzi tu gwanene mo uwa nye hena nga ka rugana ko yuma komeho mokukagusa po maudigu noruhepo narunye oru tuna kuligwanekera naro ngesi. Yisinke nga ka rugana Karunga?

KUHAGEKESA PO UDONA

Karunga nga ka hagekesa po ntundiliro zomaudona nagenye. Bibeli kusingonona ntundiliro ozo apa azi uyunga asi: “Uzuni mudima kwa kara mepangero lyoMuzonaguli.” (1 Johanesa 5:19) ‘Muzonaguli’ ogo kuna kara googu ga tumbwire Jesus asi “mupangeli gouzuni ou,” age yige Satana. (Johanesa 12:31) Satana yige ntundiliro zomaudona nagenye aga aga horoka pevhu. Yisinke nga ka rugana Karunga?

Jehova Karunga ntaantani nga ka ruganese Munwendi, Jesus Kristusa, a ka ‘hanagure po ogu ga kara nepangero lyonomfa, Satana.’ (Vahebeli 2:14; 1 Johanesa 3:8) Bibeli kulikida asi Satana ga diva asi “siruwo sendi esi sina hupu ko, sisupi” sokumuzonagura po. (Ehororo 12:12) Karunga nga ka gusa po hena udinikarunga naunye ntani nanavenye ava ava u retesa po.—Episarome 37:9; Yisewe 2:22.

KUNINKA EVHU LI KARE PARADISA

Konyima zapa nga ka gusa po udinikarunga naunye apa pevhu, Musiti gwetu nga ka rugana ko yuma mokukasikisa mo sitambo sendi kovantu ntani kevhu. Yisinke ono hara kukamona?

Mbili nompora zanarunye. “Valinunupiki yiwo ngava hingira sirongo, awo ngava hafera mpora zonene.”—Episarome 37:11.

Nondya dononzi doukanguki. “Ewogo lyoyisima ngano tali kara mosirongo; nondundu ngano tadi zura muzangu.”—Episarome 72:16.

Mambo noyirugana yoyiwa. “Vantu ngava litungira mambo omu ngava kara. . . . Awo ngava tapeka moyipata, tava lipanda vhinyu. . . . Awo ngava hafera unene yininke eyi va rugana vene.”—Jesaya 65:21-22.

Ono hara kukalimonena mauwa gangoso ndi? Vantu navenye ntaantani va ka hafere mauwa ogo.

KUGUSA PO MAUVERA NONOMFA

Naina, nkenye muntu kuvera konyima ta fu, nye oyo kapi ngayi ka kara ko komeho. Karunga ntaantani a ture pasirugana nzambo zaJesus zosizoweseso yipo “nkenye ogu a mu pura a dire kuzonauka, nye a kare nomwenyo gwanarunye.” (Johanesa 3:16) Yitundwamo musinke ngayi kara?

Mauvera kapi ngaga ka kara ko. “Nagumwe si gomosirongo esi twa kara nga sivana asi ta vere, ano nonzo nadinye ngava di dongonona po.”—Jesaya 33:24.

Vantu kapi ngava ka fa hena. “HOMPA Mupangeli nga hanagura po nomfa dogoro narunye! Navenye ngava kokota mahodi.”—Jesaya 25:8.

Vantu ngava ka paruka narunye. “Uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.”—Varoma 6:23.

Ava va fa ngava ka pinduka koufe. “Vantu navenye, va kare vawa ndi vadona, ngava va pindura koufe.” (Yirugana 24:15) Awo ngava ka gwanena mo uwa mouhwi waKarunga wosizoweseso.

Ngapi Karunga nga ka yi sikisa mo nayinye eyi?

 KUTULISA PO EPANGERO LYOKUSIKILIRA MO

Karunga nga ka sikisa mo sitambo sendi kovantu nekevhu kupitira mepangero lyemeguru, omu Jesus Kristusa ga kara Mupangeli. (Episarome 110:1, 2) Alyo epangero ndi uhompa ou Jesus ga tanterere vasikuli vendi va kanderere asi: “Guhyetu gemeguru. . . . Uhompa woge au wize.—Mateusa 6:9, 10.

Uhompa waKarunga ngau pangera evhu nalinye ntani nokukagusa po kukora noruhepo narunye. Epangero eli yilyo lyewa po komapangero nagenye! Eyi yiyo Jesus ga litulilire mo unene mokuudisa “mbudi zongwa zoUntungi waKarunga” apa ga kere pevhu ntani ga tanterere varongwa vendi va rugane yokulifana.—Mateusa 4:23; 24:14.

Morwa eharo eli ga kara nalyo kovantu, Jehova Karunga kwa tumbwidira kukaruganena vantu yininke nayinye oyo yoyiwa. Kapi yina kukutumangeda oyo o hare kudiva Karunga nokumuhedera pepi ndi? Uwa musinke no gwanena mo pokudiva Karunga? No ka gwana elimbururo mosirongwa sokukwama ko.

YISINKE NGA KA RUGANA KARUNGA? Karunga nga ka gusa po mauvera nonomfa, nokukaninka vantu navenye va ka kare mepangero lyendi, ntani evhu li ka kare paradisa