Zende koyikaramo

Zende koyikaramo

Unongo ou twa hepa kuugwana tupu moBibeli

Unongo ou twa hepa kuugwana tupu moBibeli

TU NINKE ASI: Ove kuna kudingura nzugo zoupungwiro zoyininke yanare. Sinzi soyininke kwa tavauka nokutomauka ntani ya kurupa. Yimwe maruha gamwe ga zumbana. Ano simwe aso simpe si waawa ntani mauzera nagenye pogeli. Kuvhura o pure ogu ana kukulikida mevango olyo asi: “Sininke esi yiso sosipe po koyikwawo nayinye ndi?” Age ta limburura asi: “Hawe, yiso sosikurukuru po ntani kapi va si wapukurura rumwe.” To pura hena asi: “Kokuli oku mwa si pungwire ndi?” Ta tanta asi: “Hawe, aso kwa rokwera komvhura. Ntani varwanesi kwa hetekera ko kusizonagura po.” Makura kuvhura o lipure asi: ‘Kosinke va si ruganesa?’

Bibeli kwa fana ngwendi sininke oso. Azo buke zanare-nare konobuke nadinye. Nye pwa kara hena nobuke dimwe danare. Ado da kurupa ntani sinzi seyi va tjenge mo ya zonauka. Pasihonena, magano gomonobuke odo kuhamena unsitwe kapi ga liza nomausili gomape. Mapukururo gamo gokuhamena uhaku kumoneka asi siponga unene. Sinzi sonobuke odo danare maruha gamo gamwe ga zumbana ntani ga zonauka.

Nye Bibeli za lisiga. Ngesi pana piti nomvhura 3 500 kutunda apa va tamekere kuzitjanga, nye simpe kapi za zonauka. Nampili ngomu va hetekera ko kuzihwika nokuzisilika, nye magano gazo simpe mulyo. Nampili ngomu ava zi gazara asi Bibeli kapi twa zi hepa ngesi, nye azo kwa hova kutumbura yininke komeho va ya yi dive vantu.—Tara kakende “Bibeli za pwa mulyo ndi?

NAINA SIMPE TWA HEPA MAGANO GOMOBIBELI

Kuvhura o lipure asi: ‘Eyi azi rongo Bibeli, simpe twa yi hepa momazuva getu ndi? Mokugwana elimbururo, lipura asi: ‘Maudigu musinke vana kuligwanekera nago vantu naina? Pomaudigu ogo, upi wopo wokutjilisa unene?’ Kuvhura o tante asi yita ndi enyateko evhu ndi ukorokotji ndi kuhepekera mo wopeke. Ngesi tatu ka zogera magano gamwe aga azi rongo Bibeli. Ngomu no ka resa, lipura asi: ‘Nsene vantu va kwama magano ogo, uzuni ou ngano tau wapa ndi?’

KUKARA NOMBILI

“Vanerago vava ava retesa po mbili movantu, yeeyi ngava va tumbura asi vana vaKarunga.” (Mateusa 5:9) “Kombinga zeni, one kareni nombili kovantu navenye ntani.”—Varoma 12:18.

NKENDA NOKUGUSIRA PO

“Vanerago vava wonkenda, yeeyi ngava va fira nkenda nawo.” (Mateusa 5:7) “Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa.”—Vakorosi 3:13.

KUKARA MOUUMWE

Karunga “yige ga panga asi nomuhoko nadinye depevhu nalinye di tunde momuntu gumwe tupu.” (Yirugana 17:26) “Karunga kapi ga paka mpongo, nye mwankenye muhoko nkenye ogu a mu tjira, nye ta rugana youhunga, ta mu tambura.”—Yirugana 10:34, 35.

KUPAKERA MBILI EVHU

“Karunga yipo nye ga damwine muntu, ta mu tura mosikunino saEdeni a si rugane a si pakere mbili.” (Genesis 2:15) Karunga nga ‘zonagura ava wokuzonagura evhu.’—Ehororo 11:18.

KUNYENGA EDOWO LYEMONA NORUHONDA

‘Omu rungarare kedowo lyemona, yeeyi asi, mwenyo gomuntu kapi agu paruka kemona lyendi, mpili li kare lyenzi unene.’ (Rukasa 12:15) “Vapongoki va likare ure noruhonda nonyata nazinye nomawore gemona. Nampili kuuyunga yangoso ku dime mo nye mweni.”—Vaefeso 5:3.

KUHUNGIKA NOKURUGANA UNENE

“Ose kwa hara kuhungika mwanayinye.” (Vahebeli 13:18) “Muwidi a zumbe widi wendi, a rugane nomawoko gendi.”—Vaefeso 4:28.

KUVATERA AVA VANA HEPA EKWAFO

‘Korangedeni wompwagetjima, kwafeni varupiranonkondo, omu didimikire navenye.’ (1 Vatesaronika 5:14) “Kukatarera po nonsigwe novafisavaya vawo moudigu wawo.”—Jakopo 1:27.

Bibeli kapi tupu za tumbura magano ogo, nye kuturonga eyi natu rugana ntani nomu natu yi rugana. Nsene vantu va kwama magano ogo vana tumbura, awo ngano kapi ngava ligwanekera nomaudigu gomanzi. Yosili, magano gomoBibeli ngesi twa ga hepa unene kupitakana pwanare! Ngapi no gwanena mo uwa mweyi azi rongo Bibeli?

OMU NO GWANENA MO UWA MWEYI AZI RONGO BIBELI

Jesus kwa tente asi: “Ukonentu waKarunga kumoneka moyirugana yawo.” (Mateusa 11:19) Nove no yi kwatesa ko ndi? Eyi a rugana muntu kulikida asi ga kara noukonentu. Kuvhura o lipure asi: ‘Nsene asi Bibeli sili mulyo, kuvhura zi vatere nge meparu ndi? Ngapi za kara nomulyo komaudigu aga nina kuligwanekera nago ngesi?’ Koneka sihonena esi sina kukwama ko.

Delphine * kwa haferere eparu lyewa, hararasi tupu, ta ligwanekere nomaudigu. Ta fisa munwendi gomukadona. Ntani tava lizumbu namugara gwendi. Ta ya kara hena noudigu woyimaliwa. Age kwa tanta asi: “Ame kwa zumbanesere ehuguvaro, morwa kapi na kere nomuna nomugara ntani nembo. Ame kwa lizuvhire asi kwato mulyo morwa kapi na kere nositambo meparu.”

Delphine ga limonenene usili wononkango edi asi: “Nomvhura nomurongo ntano-nambali yido detu ko makura, nomvhura nomurongo ntano-nantatu, nsene twa pama; nye eyi adi reta woowo upyakadi noudigu; ukaro kugenderera kupwa, makura nare tuna pepe.”—Episarome 90:10.

Bibeli kwa vaterere Delphine apa ga ligwanekerere nomaudigu. Age ga gwanenene mo mauwa. Ngomu nava ka yi zogera moyirongwa yitatu yina kukwama ko, vamwe nawo kwa gwanena mo mauwa moBibeli apa va ruganesere mapukururo gamo yipo va didimikire maudigu gawo. Awo va ya lizuvhire asi Bibeli kwa fana ngwendi sininke sosiwa vana tumbura ketamekero lyosirongwa esi. Azo kapi za lifana nonobuke edi adi kurupa nokupwa mulyo. Morwasinke? Morwa magano gamo kapisi nonkango-nkango tupu, nye nonkango daKarunga.—1 Vatesaronika 2:13.

Ove nampo wa yi dimburura asi eparu esupi ntani maudigu manzi. Kupi no gwana ehengagwido nevatero ntani nomavyukiso gomawa nsene kuna kuligwanekera nomaudigu?

Ngesi tatu ka konakona nonkedi ntatu omu Bibeli za kara nomulyo meparu lyoge. Azo ngazi ku vatera o

  1. nyokere po maudigu.

  2. kohonone po maudigu aga ono kuligwanekera nago.

  3. lididimikire maudigu aga no dira kuvhura kukohonona po.

Yirongwa eyi yina kukwama ko tayi ka zogera nonkedi edi ntatu.

^ para. 24 Mosirongwa esi ntani noyirongwa yitatu yina kukwama ko, madina gamwe kwa ga rundumuna.