Zende koyikaramo

Zende koyikaramo

Nombangi daJehova

Horowora eraka Rukwangali

Bibeli ntani nehuguvaro lyoge lyokomeho

Bibeli ntani nehuguvaro lyoge lyokomeho

GAZARA asi ove kuna kugenda monzira zomundema masiku. Nampili ngomu kuna sovagana, nye simpe ono kara nehuguvaro morwa ono kara notose. Nsene o minikira opo ono kara, to mona nawa nayinye eyi yina kara po. Ano nsene o minikira komeho, ta zi gava site yipo o mone nayinye yina kara koure.

Mokulifana, Bibeli kwa fana ngwendi tose. Ngomu ono yi resa moyirongwa yina ka pita, Bibeli kutuvatera kweyi yina tu karere komeho, ngwendi maudigu aga tuna kuligwanekera nago mouzuni ou. Nye moBibeli yinzi ya kara mo. Azo hena kuhorora yokomeho nokutuvatera tu mone nokukwama nzira zokutwaredesa koruhafo rwanarunye. (Episarome 119:105) Monkedi musinke?

Tu konakoneni nonkedi mbali domoBibeli edi adi tu pe ehuguvaro lyewa lyokomeho: 1 Azo kuturonga omu natu hafera eparu, ntani 2 nomu natu tunga po ukaume wounene noMusiti gwetu.

1 OMU NATU HAFERA EPARU

Bibeli kugava mavyukiso omu natu kohonona po maudigu getu, kapisi ngwendi nobuke edi va tjanga asi “Kuvatera vantu komaudigu gawo.” Mevango lyokutukorangeda tu demenene koyinka yetu, azo kuturonga tu kare nehuguvaro lyokomeho. Ntani kutuvatera tu hafere eparu.

Pasihonena, koneka magano gomoBibeli aga asi: “Kugava kwa kara nerago, kwa pitakana kutambura.” (Yirugana 20:35) Kuvhura o gazare apa wa vaterere gumwe ogu ga hepere yuma ndi? Nampo wa purakenene kwakaume koge ogu ga pwagesere malizuvho gendi. Tuna huguvara asi ove kwa hefe kweyi wa vaterere muntu ezuva olyo.

Ose kugwana ruhafo rorunene apa atu gava twa hana kundindira ko yuma. Mutjangi gumwe kwa tjenge asi: “Kapi ya horoka rumwe asi o gave sininke ngo dire kugwana, nampili o kare negano asi  kapi ono hara ngava ku tengwidire kuwoko.” Yosili, nsene o ligava nyamoge, unene po mokuvatera ava va dira kukara noyuma, ngo gwana ruhafo. Kapi ngava divara eyi ono va ruganene. Monkedi zangoso, ose kuna kuruganena kumwe noMusiti gwetu, ogu a tara yirugana oyo ngwendi yige ono kuyiruganena. (Yisewe 19:17) Age kutara eyi atu ruganene vahepwe asi mulyo ntani ga tu tumbwidira kukatufuta mwenyo gwanarunye moparadisa, yosili alyo ehuguvaro lyewa lyokomeho!—Episarome 37:29; Rukasa 14:12-14. *

Yomulyo po, Bibeli kuturonga asi kuvhura tu hafere eparu pokukarera Karunga gosili, Jehova. Nonkango dendi kutukorangeda tu mu hamberere nokumuyererepeka ntani tu mu limburukwe. (Muudisi 12:13; Ehororo 4:11) Apa atu yi rugana oyo, ose kusikisa mo sininke sokutetukisa: Aso kukundama Musiti gwetu monkedi zongwa. Age kutukorangeda asi: “Munwange kara munongo, makura ame tani hafa.” (Yisewe 27:11) Apa atu tura po matokoro gomawa kuliza nomagano atu gwana moBibeli, ose kuhafesa mutjima gwaGuhyetu gemeguru. Morwasinke? Morwa age kutupakera mbili ntani ana hara tu gwanene mo uwa mokukwama mavyukiso gendi. (Jesaya 48:17, 18) Yosili, sitambo sosiwa po kuna kara kukarera Musiti gwanayinye nokuparuka monkedi ezi azi mu hafesa.

2 UKAUME NOMUSITI GWETU

Bibeli kuturonga tu tunge po ukaume noMusiti gwetu. Azo kutanta asi: “Hedeni Karunga pepi, nage a mu hede pepi.” (Jakopo 4:8) Pamwe kuvhura tu kare nomasinganyeko nsene kuvhura tu tunge po ukaume noMusiti gwanayinye. Nye Bibeli kutupa ehuguvaro asi nsene tu ‘papara Karunga,’ nga tu “mu gwana” morwa kapi ga kara “ure nose natuvenye.” (Yirugana 17:27) Evyukiso lyomoBibeli lyokukara vakaume vaKarunga kwa kara nomulyo kehuguvaro lyetu lyokomeho. Monkedi musinke?

Koneka eyi: Nampili ngapi omu ngatu kondja, kwato gumwe gwetu gokuvhura kuhenduka nkore zonene, nomfa. (1 Vakolinte 15:26) Nye Karunga kapi a fu. Age kuparuka narunye ntani ana hara vakaume vendi nawo ngava paruke narunye. Bibeli kwa horora eyi Jehova ga harera ava ava mu papara asi: “Ngano tava kererere narunye-narunye!”—Episarome 22:26.

Ngapi no tunga po ukaume wounene naKarunga? Twikira kulironga kumuhamena kupitira moNonkango dendi, Bibeli. (Johanesa 17:3; 2 Timoteusa 3:16) Papara evatero lyendi o kwate egano Matjangwa. Bibeli kwa tu tumbwidira asi nsene tu twikira ‘kuhundira nondunge kwaKarunga,’ age nga di tu pa. * (Jakopo 1:5) Ntani kondja mokukwama eyi ono kulironga nokupulisira Nonkango daKarunga di kare ‘uzera wokukupitisira’ ntani “uzera womonzira” zoge, ngesi dogoro narunye.—Episarome 119:105.

^ para. 8 Komauzera gomanzi ketumbwidiro lyaKarunga kuhamena mwenyo gwanarunye moParadisa, tara egaununo 3 Yisinke azi rongo Bibeli? va rugana Nombangi daJehova.

^ para. 13 Nombangi daJehova kugava elirongo lyoBibeli lyomawoko-woko eli nali ku vatera o kwate egano Matjangwa. Mokudiva elirongo eli, tara vidiyo Ngapi ava rugana elirongo lyoBibeli? Kuvhura kuzigwana ko-jw.org/kwn, diva po apa va tjanga asi Papara, makura tjanga mo siparatjangwa sovidiyo.

Karunga kapi a fu ntani ana hara vakaume vendi ngava paruke narunye