Zende koyikaramo

Zende koyikaramo

Nombangi daJehova

Horowora eraka Rukwangali

Kukwata egano yininke yimwe mepuko

Kukwata egano yininke yimwe mepuko

Mukadona gonomvhura 4 kwa mwene musi kuna kutunda mofabilika nokulihanena meguru ngwendi maremo. Makura ta gazara asi sitambo sofabilika kwa kere sokuretesa po maremo. Apa munona a dili kukwata egano yininke yongandi kukara ngwendi yizoresa. Nye, kukwata egano yininke mepuko kuvhura kukundama eparu lyetu. Pasihonena, kuresa mepuko epukururo eli va tjanga pomutji kuvhura kureta siponga sosinene.

Kukwata egano yininke yopampepo mepuko kuvhura kureta siponga sosinene. Pasihonena, vamwe kwa kwete egano marongo gaJesus mepuko. (Johanesa 6:48-68) Mevango lyokulironga yoyinzi, awo va nyokere nayinye eyi ga rongere Jesus. Awo va zumbanesere yoyinzi!

Nove kuresa Bibeli yipo zi ku vyukise ndi? Oyo kuyikupandadekera. Siponga kukwata egano yininke yimwe mepuko eyi ono resa. Eyi kuhorokera vantu wovanzi. Konakona yininke yitatu eyi ava kwata egano mepuko.

  • Vantu vamwe kukwata egano mepuko eyi za uyunga Bibeli asi “tjira Karunga.” Awo kugazara asi twa hepa kukankama Karunga. (Muudisi 12:13) Nye Karunga kapi ana hara ava ava mu karere va lizuvhe woma wangoso. Age kutanta asi: “Wa ha tjira – ame noge na kara! Ame nyame Karunga goge – patupu yokukutjilisa! Ngani ku nkondopeka tani ku kwafa.” (Jesaya 41:10) Kutjira Karunga kutanta asi kumufumadeka unene.

  • Evhu ngali pya komundiro ndi?

    Vamwe kwa kwata egano mepuko nonkango edi asi: ‘Nayinye eyi ayi horoka mouzuni ou, kuhoroka posiruwo esi ga horowora Karunga. Siruwo sehampuruko nosiruwo sokufa.’ Awo kugazara asi Karunga ga tokora nare siruwo esi nga fa nkenye muntu. (Muudisi 3:1, 2) Nye etjangwa eli kwa tamba omu lya kara eparu ntani kulikida asi nomfa yipo da kara. Nonkango daKarunga kuronga asi matokoro getu kuvhura kukundama ukaro wetu weparu. Pasihonena, Bibeli kutanta asi: “O limburukwe kwaHOMPA, makura ngo kare nomwenyo gomure.” (Yisewe 10:27; Episarome 90:10; Jesaya 55:3) Monkedi musinke? Pasihonena, kufumadeka Nonkango daKarunga ngayi tu tumangeda tu nyokere po eyi ayi kundama ukanguki wetu ngwendi unkorwe noruhonda.—1 Vakolinte 6:9, 10.

  • Vamwe kukwata egano pandanda apa Bibeli azi uyunga asi eguru nevhu kwa yi ‘ndindilisa ngayi pye komundiro,’ awo kugazara asi Karunga nga zonagura po eguru nevhu. (2 Peturusa 3:7) Nye Karunga kwa tumbwidira asi kapi nga pulisira evhu neguru va yi zonagure po. Karunga “kwa paka po uzuni, yiyo wa kora, awo kapi ngava u rundurura.” (Episarome 104:5; Jesaya 45:18) Yininke eyi ya kara mouzuni ou woudona yiyo ngayi ka zonauka po komundiro, nye kapisi evhu morwa alyo ngali karerera po. Ano eguru kwa tamba eguru lyonombungururu ndi meguru omu ga kara Karunga. Ayo kapi ngava yi zonagura po.

MORWASINKE BIBELI AVA ZI KWATERE EGANO MEPUKO POYIRUWO YIMWE?

Ngomu ono mono yihonena oyo, rorunzi vantu kukwata egano nonkango edi ava resa moBibeli mepuko. Nye morwasinke ayi horokere ngoso? Vamwe kutanta asi: ‘Nsene asi Karunga age nondunge ntani ga diva nayinye, ngano ga tu pa buke zoureru ezi na vhura kukwata egano nkenye gumwe. Morwasinke ga dilira kuyirugana oyo?’ Konakona nokonda ntatu deyi Bibeli pamwe ava zi kwatere egano mepuko.

  1. Bibeli kwa zi wapaika va zi kwate egano ava va linunupika ntani ava va hara kuzilironga. Jesus kwa tanterere oGuhwe asi: “Nyove nina kupanda, Tate, Hompa geguru nevhu, yeeyi  wa horeka yininke eyi vakonentu novanandunge, yiyo wa yi horwera vantuuntu tupu.” (Rukasa 10:21) Bibeli kwa zi tjanga monkedi omu nava vhura kuzikwata egano ava va kara nomutaro gouhunga. Vantu wonkareso zokulinenepeka, ava ava limono asi “vakonentu novanandunge”, kukwata egano Bibeli mepuko. Nye “vantuuntu tupu” ava va kara nonkareso zelinunupiko ntani va hara kulironga, apa ava resa Bibeli awo kuzikwata nawa egano. Omu tupu Karunga ga wapaika Bibeli monkedi zokutetukisa!

  2. Bibeli kwa zi tjangera vantu ava ava hundire evatero kwaKarunga yipo va zi kwate egano. Jesus kwa likidire asi vantu ngava hepa evatero mokukwata nawa egano marongo gendi. Ngapi ngava gwana evatero olyo? Jesus kwa fatwilire asi: “Mukwafi, Mpepo zoKupongoka, ezi nga tumina Tate medina lyange, yizo ngazi ya mu ronga nayinye.” (Johanesa 14:26) Yipo nye, Karunga kugava mpepo zendi zokupongoka ndi nonkondo dendi di vatere vantu va kwate egano eyi vana kuresa moBibeli. Nye Karunga kapi a gava mpepo zendi kovantu ava va dira kuhuguvara mevatero lyendi, eyi yiyo ava kwatere egano Bibeli mepuko. Mpepo zokupongoka kutumangeda Vakriste ava va kara nediwo va vatere vantu ava vana hara kukwata egano Bibeli.—Yirugana 8:26-35.

  3. Nonkango dimwe domoBibeli vantu kudikwata tupu egano posiruwo souhunga. Pasihonena, muporofete Ndaniyera kwa mu tanterere a tjange mbudi zokomeho. Muengeli kwa tente asi: “Ndaniyera, kudumika buke o ture ko sinongweneso dogoro pehagero lyouzuni.” Mosiruwo sina, vantu wovanzi ngava resa buke zaNdaniyera nye kapi va zi kwete egano nawa-nawa. Nampili Ndaniyera mwene nage kapi ga kwete egano yininke yimwe eyi ga tjenge. Age kwa tente asi: “Eyi ga tente na yi zuvhire, nye nokuyikwata si egano.” Konyima, vantu va ya kwete egano uporofete waKarunga ou ga tjenge Ndaniyera, nye posiruwo esi ga horowere Karunga. Muengeli kwa tente hena asi: “Zende, Ndaniyera, morwa nonkango edi demehoramo, ado kwa pungukwa dogoro ehagero ngali wize.” Wolye wokuvhura kukwata egano mbudi zaKarunga? Bibeli kutanta asi: “Vadinikarunga kapi ngava yi zuvha, . . . vaava wonondunge velike yiwo ngava yi kwata egano.” (Ndaniyera 12:4, 8-10) Yipo nye, Karunga kapi ga horwere eyi da tente nonkango dimwe domoBibeli dogoro paapa sa ya sikire mo siruwo.

Oyo ya ninkisire Nombangi daJehova di kwate egano Bibeli mepuko ndi? Nhi. Nye apa siruwo saKarunga sa sikire mo sokuzeresa yininke, Nombangi kwa tura po mawapukururo mekwatogano lyawo. Awo va yi pura asi awo kuhonena vapositoli vaKristusa, ava va linunupikire pokuwapukurura magazaro gawo apa nga va vyukisa Jesus.—Yirugana 1:6, 7.

Egano lyomukadonagona kuhamena oku aga tundu maremo kuna kara kukwata egano mepuko yininke yongandi. Nye, eyi azi rongo Bibeli mulyo unene koge. Mbudi zomoBibeli mulyo unene kwankenye gumwe ana kuhetekera ko kukwata egano Bibeli pokuziresa. Yipo nye, papara evatero o kwate egano eyi ono kuresa. Papara vantu ava ava lirongo Bibeli va kara nonkareso zelinunupiko, awo kwa huguvara mompepo zaKarunga zokupongoka yipo va kwate egano Bibeli ntani va yi pura nawa-nawa asi kuna kuparuka posiruwo esi Karunga ana hara vantu va kwate egano Bibeli kupitakana pwanare. Zogera noNombangi daJehova ndi gwana mauzera koIntaneta jw.org. Bibeli kwa tumbwidira asi: ‘Likwambera unongo . . . ngo dive asi yinke ayi tanta kulironga yokuhamena kwaKarunga.’—Yisewe 2:3-5.