Zende koyikaramo

Zende koyikaramo

Nombangi daJehova

Horowora eraka Rukwangali

“Huguvara mwaJehova nokurugana uwa”

“Huguvara mwaJehova nokurugana uwa”

“Huguvara mwaJehova nokurugana uwa . . . ntani kara nepuro.”—EPIS. 37:3, NW.

MARUSUMO: 133, 63

1. Yikara musinke yoyiwa ga pa vantu Jehova?

JEHOVA kwa sita vantu noyikara yoyiwa. Age kwa tu pa nondunge mokutuvatera tu kohonone po maudigu ntani tu ture po yitambo meparu. (Yis. 2:11) Ntani ga tu pa hena nonkondo tu vhure kusikisa mo yitambo eyi twa tura po. (Fil. 2:13) Age ga tu pa hena ezwi lyokomutjima eli ali tu vatere tu nyokere po kurugana yoyidona nokutura po marunduruko nsene tuna zono.—Rom. 2:15.

2. Ngapi omu Jehova ana hara tu ruganese yikara eyi ga tu pa?

2 Jehova kuna hara tu ruganese nawa yikara eyi ga tu pa. Morwasinke? Morwa age kwa tu hara ntani ga diva asi yikara oyo kuturetera ruhafo apa atu yi ruganesa. MoBibeli, Jehova kututumangeda tu ruganese nawa yikara oyo. Pasihonena Matjangwa goRuhebeli kwa uyunga asi: “O faneke nawa yuma yoge ngo gwane mo yoyinzi”; ntani “o rugane unene paapa wa hulira.” (Yis. 21:5; Muud. 9:10) Matjangwa goRugereka kwa uyunga hena asi: “Paapa  tuna kareni nosiruwo, atu ruganeneni navenye uwa”; ntani “one kwa gwana nkenye ogu uhwi wendi wompepo. Omu yi ruganese mokulikwafa-kwafa.” (Gar. 6:10; 1 Pet. 4:10) Jehova kuna hara tu ruganese yikara eyi ga tu pa yipo tu gwanene mo mauwa nyamwetu ntani novakwetu.

3. Yisinke atu dili kuvhura kusikisa mo ose vantu?

3 Jehova ga diva asi ose vantu kapi tatu vhuru kusikisa mo yininke yoyinzi. Pasihonena, ose kapi tatu vhuru kugusa po kudira kusikilira mo nonzo nonomfa ntani kapi tatu vhuru kutokwera po vakwetu morwa natuvenye twa kara nemanguruko lyokutura po matokoro. (1 Vah. 8:46) Nampili tu kare nonondunge nediwo lyenzi, mokutuhetakanesa naJehova ose ngwendi vanonagona.—Jes. 55:9.

Nsene kuna kupita momaudigu “huguvara mwaJehova nokurugana uwa”

4. Yisinke natu ka konakona mosirongwa esi?

4 Momaukaro nagenye, twa hepa kupura mavyukiso kwaJehova nokuhuguvara asi age nga tu vatera nokuturuganena eyi atu dili kuvhura kusikisa mo nyamwetu. Nye hena Jehova ana hara tu gazare ko eyi natu vhura kurugana tu kohonone po maudigu getu nokuvatera wopeke. (Resa Episarome 37:3.) Mokuyikwatakanesa, twa hepa ‘kuhuguvara mwaJehova nokurugana uwa’ ntani twa hepa ‘kukara nepuro.’ Kombinga zoyo, tu konakoneni eyi natu vhura kulirongera ko kwaNowa naNdafita nokovakareli vamwe vaJehova wovalimburukwi ava va huguvarere mwendi. Ntani natu ka lironga eyi va dilire kuvhura kurugana ko ntani neyi va vhulire kurugana ko.

NSENE UDONA UNA VHUKA

5. Singonona moukaro ou ga parukire Nowa.

5 Nowa kwa parukire mouzuni omu mwa zulire “udona” noyirugana yoruhonda. (Gen. 6:4, 9-13) Age ga yi divire asi Jehova nga zonagura po uzuni owo woudona. Nampili ngoso, Nowa nampo za mu dompesere nkareso ozo zoudinikarunga. Moukaro owo, Nowa ga yi divire asi koyili yimwe ga dilire kuvhura kurugana ko ntani neyi ga vhulire kurugana ko.

Nsene vantu kapi vana kutupurakena (Tara paragarafu 6-9)

6, 7. (a) Yisinke ga dilire kuvhura kurugana ko Nowa? (b) Ngapi ukaro wetu una lifana nou waNowa?

6 Eyi ga dilire kuvhura kurugana ko Nowa: Nampili ngomu Nowa ga litulire mo  unene mokurondora vantu, age kapi ga vhulire kusininika vantu wovadona va litezurure va tambure mbudi zendi ndi asi a ninke Ruhanzo ru genderere kuwiza. Nowa ga hepere kuhuguvara mwaJehova asi nga sikisa mo etumbwidiro lyendi lyokuzonagura po vadinikarunga ntani ga kere nepuro asi Karunga nga yi rugana posiruwo souhunga.—Gen. 6:17.

7 Nose kuna kuparuka mouzuni ou una zura udinikarunga ou tuna diva asi Jehova nga ka u zonagura po. (1 Joh. 2:17) Nye ose kapi tatu sininike vantu va tambure ‘mbudi zongwa zoUhompa waKarunga.’ Ntani kapi tatu vhuru kugenderesa “udigu wounene” u tameke usimbu. (Mat. 24:14, 21) Ngwendi Nowa, twa hepa kukara nepuro lyokupama pokuhuguvara asi Karunga ntaantani nga rugane ko yuma. (Epis. 37:10, 11) Twa kara nepuro asi Jehova kapi nga pulisira udinikarunga u twikire siruwo sosire.—Hab. 2:3.

8. Kosinke Nowa ga demenenene? (Tara efano pepenuno 7.)

8 Eyi ga vhulire kurugana ko Nowa: Mevango lyokufa unye kweyi ga dilire kuvhura kurugana ko, Nowa kwa demenenene kweyi ga vhulire kurugana ko. ‘Ngomuudisi gouhungami,’ Nowa ga twikilire kugava mbudi zerondoro ezi va mu pere. (2 Pet. 2:5) Oyo ya mu vaterere a kare nepuro lyokupama. Kugusa ko kuudisa, age kwa ruganesere nonkondo nonondunge dendi mokusikisa mo sirugana esi ga mu pere Karunga sokutunga emuwato.—Resa Vahebeli 11:7.

9. Ngapi natu honena sihonena saNowa?

9 Ngwendi Nowa, ose kulitura mo tu kare “nomupampi moyirugana yaHompa.” (1 Kol. 15:58) Yirugana oyo kwa kwatera mo kutunga nokuwapukururura mavango getu goukareli nokuvatera koyigongi ndi kurugana koBeteli ndi komberewa zetoroko. Nye unene po, ose kulitura mo mokuzuvhisa morwa twa diva asi sirugana esi kunkondopeka ehuguvaro lyetu lyokomeho. Munazinyetukadi gomulimburukwi kwa uyunga asi: “Apa no tantera vantu kuhamena mauwa aga ngau ka reta Uhompa waKarunga, to dimburura asi awo kwato ehuguvaro ntani awo kumona maudigu gawo asi nga ga karerera.” Yipo nye, kulihameka mosirugana sokuzuvhisa kutuvatera tu kare nehuguvaro lyokomeho ntani kutunkondopeka  tu twikire ngorooro melirombero lyeparu.—1 Kol. 9:24.

NSENE TUNA ZONO

10. Singonona ukaro ou ga pitire Ndafita.

10 Jehova kwa tumbwire hompa Ndafita asi: “Mugara ga za nge komutjima.” (Yirug. 13:22) Nsene tu tarurura eparu lyaNdafita age kwa kere mulimburukwi. Nampili ngoso, siruwo simwe age kwa tulire nzo zonene. Age kwa honderere naBateseba. Mokugwederera konzo ozo, age kwa hetekerere ko kuzihoreka pokutura po mawapaiko mokudipaga moyita Uliya mugara gwaBateseba. Ndafita kwa tjenge mbilive mokugava mpangera zokudipaga Uliya, ano Uliya mwene yige ga simbire mbilive ozo. (2 Sam. 11:1-21) Moruhura, nonzo daNdafita kwa ya kere poruzera. (Mar. 4:22) Yisinke ga rugene Ndafita apa ya horokere oyo?

Nsene kuna kulipangura morwa nonzo detu danare (Tara paragarafu 11-14)

11, 12. (a) Yisinke ga dilire kuvhura kurugana ko Ndafita konyima apa ga zonene? (b) Yisinke Jehova ngatu ruganena nsene tu litezurura?

11 Eyi ga dilire kuvhura kurugana ko Ndafita: Age kapi ga vhulire kugusa po eyi ga rugene. Ntani kapi ga vhulire kuhenduka yitundwamo yononzo dendi. Yitundwamo yimwe kwa ya mu kundamene eparu lyendi nalinye. (2 Sam. 12:10-12, 14) Yipo nye age ga hepere kukara nepuro. Age ga hepere kukara nehuguvaro asi nsene a litezurura kutundilira komutjima, Jehova nga mu gusira po nokumuvatera a lididimikire yitundwamo yononzo dendi.

12 Natuvenye kuzona, morwa kapi twa sikilira mo. Nonzo dimwe edi atu tura nonene unene kupitakana nonkwawo. Momaukaro gamwe, kapi tatu vhuru kugusa po mapuko aga tuna rugana, twa hepa tupu kutambura yitundwamo eyi twa rugana. (Gar. 6:7) Nye twa hepa kuhuguvara mwaJehova asi nsene tu litezurura age nga tu vatera momaudigu getu nampili nyamwetu twa ga li retera.—Resa Jesaya 1:18, 19; Yirugana 3:19.

13. Ngapi Ndafita ga tengwidilire po elikwatakano lyendi naJehova?

13 Eyi ga vhulire kurugana ko Ndafita: Age kwa pulisilire Jehova a mu vatere mokutengwidira po elikwatakano nendi. Nkedi zimwe ga yi rugene oyo, pokutambura mavyukiso gaJehova kupitira momuporofete Natana. (2 Sam. 12:13) Ndafita kwa kanderere hena kwaJehova pokutongonona nonzo dendi nokupwagesa malizuvho gendi gokuhara kukarera Jehova. (Epis. 51:1-17) Mevango lyokufa unye morwa unzoni wendi, Ndafita ga lirongerere ko kononzo dendi. Age kapi ga rugurukire kurugana hena nonzo dina. Ndafita kwa ya fire noulimburukwi ntani Jehova kapi ga divara yirugana yendi youlimburukwi.—Heb. 11:32-34.

14. Yisinke natu lirongera ko kosihonena saNdafita?

14 Yisinke natu lirongera ko kosihonena saNdafita? Nsene tuna tura nzo zonene, twa hepa kulitezurura kutundilira komutjima nokuhundira Jehova a tu gusire po. Twa hepa kutongonona nonzo detu kwaKarunga. (1 Joh. 1:9) Ntani twa hepa kuhedera vakuronambunga ava ngava tu vatera pampepo. (Resa Jakopo 5:14-16.) Nsene tu ruganesa mawapaiko ogo ga tura po Jehova, ose kulikida asi twa huguvara etumbwidiro lyendi lyokutuverura pampepo nokutudongwenena po nonzo detu. Ntani twa hepa kulirongera ko komapuko getu nokulitura mo mosirugana saJehova ntani nokukara nehuguvaro lyokupama.—Heb. 12:12, 13.

MOMAUKARO GAPEKE

Nsene kuna kuvera (Tara paragarafu 15)

15. Yisinke natu lirongera ko kosihonena saHana?

15 Pwa kara hena vakareli vamwe vaJehova vanare wovalimburukwi ava va huguvarere mwendi nokurugana ko eyi va vhulire kurugana. Pasihonena Hana kapi ga vhulire kugusa po ukaro wendi wounganze. Nye ga huguvarere asi Jehova na mu vatera, makura age nga  twikire kuza konkongoronzugo a ka kanderere. (1 Sam. 1:9-11) Hana kwa tulire po sihonena sosiwa. Nsene tuna kara nouvera ndi nomaudigu aga natu dira kuvhura kugusa po nyamwetu, twa hepa kupa Jehova yinka yetu nokukara nehuguvaro asi age nga tu pakera mbili. (1 Pet. 5:6, 7) Ntani twa hepa kurugana ko yuma tu gwanene mo mauwa momapongo nomomawapaiko gamwe ga tura po Jehova.—Heb. 10:24, 25.

Nsene munona ana hageke kukarera Jehova (Tara paragarafu 16)

16. Yisinke vareti nava lirongera ko kwaSamwere?

16 Yisinke nava vhura kurugana vareti wovalimburukwi ava vana vawo va hageka kukarera Jehova? Apa Samwere ga ya kurupire kapi ga sininikire vana vendi wovakondi va limburukwe nompangera edi ga va rongere. (1 Sam. 8:1-3) Yininke eyi va rugene vana vendi age kwa yi sigilire momawoko gaJehova. Nampili ngoso, Samwere ga twikilire kulimburukwa nokuhafesa Jehova Guhyetu gemeguru. (Yis. 27:11) Naina, vareti woVakriste nawo kuna kupita moukaro wokulifana. Ngwendi gwina guhya gomosifanekeso somumati gokuzumbana, awo kukara nehuguvaro asi Jehova ga liwapaikira kutambura vananzo ava ava litezurura. (Ruk. 15:20) Ntani awo hena kutwikira kulimburukwa Jehova, nokukara nehuguvaro asi sihonena sawo nga si tumangeda vana vawo va tengure kombunga zaJehova.

Nsene tuna kara noyimaliwa yoyisesu (Tara paragarafu 17)

17. Ekorangedo musinke tuna gwana mo mosihonena somufisayendi gohepwe?

17 Tu tareni hena sihonena somufisayendi gomuhepwe posiruwo saJesus. (Resa Rukasa 21:1-4.) Mufisayendi ogo, kwato eyi ga vhulire kurugana ko kuhamena yirugana yoyidona eyi ngayi horoka montembeli. (Mat. 21:12, 13) Ntani kwato eyi ga vhulire kurugana ko kuhamena ruhepo rwendi. Nye age kwa geve nomutjima gwendi nagunye “tumalivagona tuvali” otu ‘ga wekere tokumuparura.’ Mukadi gwina gomulimburukwi ga huguvarere mwaJehova nomutjima gwendi nagunye asi nsene a tura muhowo yininke yopampepo, Jehova nga mu pa yihepwa yendi yopanyama. Ehuguvaro eli ga kere nalyo gwina mukadi lya mu tumangedere a kwatese ko ukareli wousili pokugava yigava. Mokulifana, tu kareni nehuguvaro asi nsene tu papara muhowo Uhompa, Jehova nga tu pa nayinye eyi twa hepa.—Mat. 6:33.

18. Gava sihonena sanaina sagumwe ogu ga kere nomutaro gomuwa.

18 Sinzi sovapuli vakwetetu naina nawo kwa huguvara mwaJehova nokurugana ko eyi va vhura. Tu tarurureni sihonena saMalcolm, ogu ga kere mulimburukwi dogoro konomfa dendi momvhura 2015. Monomvhura nadinye edi va karera Jehova nage namukadendi, awo kwa pitire momaudigu. Age kwa tente asi: “Poyiruwo yimwe kapi to divire eyi nayi kuhorokera meparu ntani udigu kulididimikira maudigu. Nye Jehova kutungika owo ava mu huguvara.” Ekorangedo musinke ga geve Malcolm? Age kwa tente asi: “Kanderera kwaJehova a ku vatere o liture mo paapa wa hulire mosirugana sendi. Demenena kweyi no vhura kurugana ko nye kapisi kweyi no dira kuvhura kurugana ko.” *

19. (a) Morwasinke lina karere nomulyo etjangwa lyetu lyomvhura 2017? (b) Ngapi ngo tura pasirugana meparu lyoge etjangwa lyomvhura 2017?

19 Ngomu uzuni una ‘kudonapa’ unene, twa hepa kundindira asi ngatu ligwanekera nomaudigu gomanene. (2 Tim. 3:1, 13) Yipo nye yina karere nomulyo unene asi kapisi tu pulisire maudigu ogo ga tu fise unye. Nye, twa hepa kuhuguvara unene mwaJehova ngomu tuna kurugana ko eyi tuna kuvhura. Yiyo nye lina karere nomulyo etjangwa lyetu lyomvhura 2017 asi: “Huguvara mwaJehova nokurugana uwa”!—Epis. 37:3.

Etjangwa lyetu lyomvura 2017: “Huguvara mwaJehova nokurugana uwa nkumwe ngo paruke narunye pevhu ntani kara nepuro.”Episarome 37:3

^ para. 18 Tara Ruhungu 15 Sikukutu 2013 pepenuno 17-20.