Zende koyikaramo

Zende koyikaramo

Nombangi daJehova

Horowora eraka Rukwangali

Awo kwa ligeve vene vanavazinyetukadi wovadike

Awo kwa ligeve vene vanavazinyetukadi wovadike

SINZI soNombangi edi adi zuvhisire moyirongo omu mwa hepa vazuvhisi woUhompa kuna kara vanavazinyetukadi wovadike. Vamwe vawo kwa zuvhisira moyirongo oyo nomvhura dononzi. Yisinke ya va ninkisa va dirukire koyirongo oyo? Yisinke va lironga morwa kukazuvhisira moyirongo oyo? Ngapi omu eparu lyawo lya runduruka? Ose kwa puragera vanavazinyetukadi vamwe. Nsene asi ove munazinyetukadi gomudike ogu ono hara kurugana sirugana esi, twa si huguvara asi no gwanena mo mauwa mweyi va simwitira. Yousili, vantu vaKarunga navenye kuvhura va gwanene mo mauwa mokugazadara ko kosihonena sawo.

KUFUNDA PO MASINGANYEKO

Anita

Ngomuzuhvisi gokukarera gomudike wa gazadara ko nsene asi kuvhura ngo yi sikise mo kukazuvhisira kosirongo sapeke ndi? Anita gonomvhura dokoyiha 75 kwa kere nomasinganyeko kweyi ga here kurugana. Age kwa kulilire moIngiranda omu ga tamekerere kurugana uzuvhisi wokukarerera age opo nomvhura dendi 18. Age kwa tanta asi: “Ame ngani hafere kuronga vantu kuhamena Jehova, nye kapi nayi gazarere asi ezuva limwe ngani ka zuvhisira kosirongo sapeke. Kapi na divire kuuyunga maraka gapeke ntani nayi pulire asi kapi ngani vhura kulironga eraka nampili limwe. Ame kwa tetukira apa va zigidire nge koSikora zaGiliyata. Kapi nayi ndindilire asi muntu ngwendi nyame ngava vhura kuzigida nge kosikora ozo. Nye tani uyunga momutjima asi: Nsene Jehova yiyo ana harere nge ni yi rugane tani hetekera ko.’ Eyi kwa horokere nomvhura 50 da ka pita. Dogoro ngesi ame kuna kara mutumwa moYapani.” Age kwa tanta hena asi : “Poyiruwo yimwe ame kukorangeda vadinkatukadi va honene nge tu likwatesekumwe mokukazuvhisira koyirongo yapeke. Ayo kuhafesa nge pokumona asi sinzi sawo va yi rugana.”

KUKARA NOURADI

Sinzi sovanavazinyetukadi ava va zuvhisira koyirongo nayopeke pomuhowo kwa kere nowoma wokudiruka. Yisinke ya va vaterere va kare nouradi wokuyirugana?

Maureen

Maureen gonomvhura dokoyiha 65 kwa tanta asi: “Apa na kulire ame kwa here kurugana sirugana esi ngasi vhura kuvatera wopeke.” Apa ga kere nonomvhura 20 yipo ga dirukilire kositata Quebec, mosirongo saKanada oku kwa hepere vazuvhisi wokukarerera. Age kwa tanta asi: “Konyima yipo va zigidire nge koSikora zaGiliyata nye na kere nowoma wokukatuma nge kevango lyapeke pwa hana vakaume  vange.” Ta tanta hena asi: “Ame kwa kere nosinka mokusiga oyina va pakere mbili otate ava ngava vere. Nkenye masiku ngani kanderere kwaJehova kuhamena yinka yange. Apa na tanterere vakondi vange kuhamena sinka sange, awo kwa korangeda nge ni zi koSikora zaGiliyata. Ntani na mwene hena omu womombungakriste ngava vatere vakondi vange. Pokumona omu Jehova ga pakerere mbili vakondi vange, ya pere nge ehuguvaro asi name nga pakera nge mbili. Makura yipo na tokwere kuza.” Kutundilira momvhura 1979 Maureen kwa kere mutumwa ure wonomvhura 30 moAfrika. Ngesi kuna kara muzuvhisi gosiruwo nasinye moKanada nampili ngomu ana kupakera mbili ozina. Pokuteda konomvhura edi nga ka zuvhisilire kosirongo sapeke age kwa tanta asi: “Jehova nkenye apa kwa pa nge eyi na hepa posiruwo esi nayi hepere.”

Wendy

Wendy gonomvhura dokoyiha 65 kwa tamekere uzuvhisi wokukarerera moAustralia age mudinkantu. Age kwa tanta asi: “Ame kwa kere muntu gonomuga ntani na kere nowoma kuuyunga novantu. Nye uzuvhisi wokukarerera wa vaterere nge ni uyunge novantu navenye, makura woma tau pu nge Uzuvhisi wokukarera wa rongere nge ni huguvare mwaJehova ntani na kere nouradi wokukazuvhisira koyirongo nayopeke. Munazinyetukadi gomudike ogu ga ka kere mutumwa moYapani ure wonomvhura 30, kwa zigidire nge tu ze kumwe koYapani ure womakwedigatatu. Apa na ka zuvhisire nendi ya ka pere nge mukumo mokudirukira kosirongo sapeke.” Koyiha yomvhura 1985 Wendy yipo ga dirukilire kosirudi saVanuatu, esi sa kara nokilometa 1 770 kutunda moAustralia.

Wendy simpe mweli moVanuatu kuna kurugana komberewa zetoroko. Age kwa tanta asi: “Ayo kuhafesa pokumona omu nombungakriste vana kuditulisa po monomukunda dokoure. Azo kuna kara mfumwa zonene mokulihameka mosirugana saJehova poyirudi eyi.”

Karen (pokatji)

Kumiko ngesi nomvhura dendi dokoyiha 65. Age kwa kere muzuvhisi gokukarera moYapani komeho muzuvhisi mukwawo a ka pure nsene asi kuvhura va dirukire koNepali. Kumiko kwa tanta asi: “Nkenye apa mukwetu nga pura nge tu ze nye ame ngani nyoka. Ame kwa kere nosinka sokukalironga eraka lyapeke nokukayika nkarapamwe zapeke. Ntani kapi na kere noyimaliwa yokugwanena po mokudirukira kosirongo oso. Ngomu na kondjere mokutura po etokoro, tani ya gwana ehudi lyosimoto makura tava ka kondera nge mosipangero. Apa na ka kere mosipangero tani ka lipura asi: ‘Kapi eyi nga yi horokera nge. Nampo ngau gwana nge uvera wounene makura kapi ngani gwana henampito mokukazuvhisira koyirongo yapeke. Nampo ni hetekere ko lipulire hena nsene asi ngani kazuvhisira koyirongo yapeke  nampili ure womvhura zimwe ndi?’ Ame ngani kanderere unene yipo Jehova a vatere nge.” Apa va mu dumbwire mo mosipangero ta ka dingura koNepali, ano konyima tava dirukire ko namukwawo zendi ogu ngava zuvhisa nendi.

Mokugazadara ko konomvhura edi ga zuvhisira moNepali, Kumiko kwa tanta asi: “Sinka esi na kere naso sa ya hege po. Ame nina hafa kweyi na tokwere kukazuvhisira oku va hepere vazuvhisi. Rorunzi apa ani zuvhisire membo limwe vantu wokusika pwavatano ndi ntanzimwe kuwiza va ya purakene. Nampili vanonagona nawo kuhundira nge ni va pe ko yitratate yoBibeli. Ayo kuhafesa sili mokuzuvhisira momukunda omu vantu ava purakene nawa.”

KULIDIDIMIKIRA MAUDIGU

Vanavazinyetukadi ava wouradi va ligwanekerere nomaudigu. Ngapi omu va ga lididimikilire?

Diane

Diane gomoKanada gonomvhura dokoyiha 60 kwa tanta asi: “Pomuhowo kwa digoperere ngekukara ure nekoro lyange.” Age ngesi kuna kara mutumwa mosirongo saIvory Coast (ngesi kuna kara Côte d’Ivoire) nomvhura 20. Age kwa uyunga asi: “Ame kukanderera kwaJehova a vatere nge yipo ni hare vantu ava ani zuvhisire. Gumwe goVarongi vetu koGiliyata munazinyetu Jack Redford kwa tu tanterere asi ngatu ka tetuka apa ngatu ka mona ruhepo rorunene koyirongo oku vana kututuma. Nye ga tente hena asi: ‘Mwa ha ka demenena koruhepo rovantu. Nye kakonekeni nkareso zovantu ezi vana kulikida apa muna kuvatantera mbudi zomoBibeli.’ Ano oyo yiyo na rugene, ntani kwa tompokere nge sili. Apa ngani zuvhisire vantu mbudi zehengagwido, awo kwa hefe sili.” Yisinke hena ya vaterere Diane yipo aka zuvhisire kosirongo naso peke? “Ame kwa tulisire po ukaume nava ngani lirongo nawo Bibeli ntani ngayi hafesa nge pokuvamona kuna kuyakara vakareli vaJehova wovalimburukwi. Ame kwa ya tunga mosirongo esi va tumine nge. Ngamoomu tupu ga tumbwidilire Jesus, ame naya gwana vazinya novaguhya novamumbya novakuru.”—Mar. 10:29, 30.

Anne gokoyiha yonomvhura dokoyiha 45 kuzuvhisira moAsia mosirongo omu vasilika sirugana setu. Age kwa tanta asi: “Ngomu na rugana nomvhura dononzi komavango gokulisiga-siga ame kwa paruka novanavazinyetukadi wonontundiliro noyikara yokulisiga-siga. Eyi pamwe ngayi reta madiro kulizuvha nokukoresa komutjima. Apa ngayi horoka oyo, ngani hetekere ko kuvadiva nawa nokukwata egano mpo zawo. Ntani ngani kondjo unene mokuvahara nokukara nombili nawo. Ame nina hafa morwa elituromo lyange, ose twa ya kara vakaume wovanene  ntani eyi ya vatera nge ni lididimikire mosirugana sange.”

Ute

Momvhura 1993, Ute gokoNdovesiranda ogu ana kara nonomvhura dokoyiha 50 kwa kere mutumwa moMadagascar. Age kwa tanta asi: “Pomuhowo nga yi digopere nge kulironga eraka ntani kuyika mukaro mpepo gomosirongo oso, nokulidimikira mauvera ngwendi malaria amuba ntani mauvera aga adi reta nokime. Nye na gwene evatero. Vanavazinyetu womosirongo oso novana vawo ntani varongwa vange woBibeli va vaterere nge ni dive eraka. Mutumwa mukwetu nga pakere nge mbili apa ngani vere. Nye unene po Jehova nga vatere nge. Ame nkenye apa ngani mu pe yinka yange kupitira mekanderero. Makura ngani ndindire pamwe mazuva ndi makwedi yipo a limburure makanderero gange. Jehova ga vaterere nge mwankenye maudigu.” Ute ngesi kwa zuvhisira moMadagascar nomvhura 23.

KWA VA TUNGIKIRE

Vanavazinyetukadi ava ava ka zuvhisira komavango oku va hepa va zuvhisi kwa simitira mauwa aga va gwanena mo. Matungiko musinke va gwana?

Heidi

Heidi gomoNdovesiranda gonomvhura dokoyiha 70 kwa kara mutumwa moIvory Coast (ngesi kuna kara Côte d’Ivoire) kutundilira momvhura 1968. Age kwa tanta asi: “Ruhafo rorunene na gwana kuna kara pokumona vana vange wopampepo kuna kutwikira kukwama usili. Varongwa vange vamwe vanare awo ngesi kuna kara vazuvhisi wokukarerera novakuronambunga. Sinzi sawo kuzigida nge asi yina ndi mama. Gumwe govakurongambunga namukadendi novana vendi kutara nge ngwendi ekoro lyawo. Jehova kwa pa nge munange nangumweyi zange novatekuru vange.”—3 Joh. 4.

Karen (pokatji)

Karen gomoKanada gonomvhura dokoyiha 70 kwa rugana nomvhura dokupitakana 20 moAfrika. Age kwa tanta asi: “Sirugana soutumwa kwa ronga nge ni kare nonkareso zokulizambera neharo nelididimiko. Ntani mokurugana novakwetu wokoyirongo yoyinzi ya vatera nge ni kare nomutaro gomuwa. Na lironga asi pwa kara nonkedi dokulisiga-siga mokurugana yininke. Alyo etungiko mokukara novakaume wovanene uzuni mudima. Nampili ngomu mparukiso zetu noyitumbukira yetu ya runduruka ukaume wetu simpe pouli.”

Margaret gomoIngiranda gonomvhura dokoyiha 75 age kuna kara mutumwa moLaos. Age kwa tanta asi: “Mokuzuvhisira koyirongo yapeke ya vatera nge ni mone omu Jehova a kokere vantu womarudi nonontundiliro dokulisiga-siga kombunga zendi. Yilimonena oyo kwa nkondopeka epuro lyange. Ayo kupa nge ehuguvaro asi Jehova kuna kupitisira mbunga zendi ntani sitambo sendi nga sisika mo.”

Yosili vanavazinyetukadi wovadike ava vazuvhisira koyirongo yapeke kwa tura po sihonena sosiwa koVakriste. Va hepa kuyivapandwira. (Vap. 11:40) Sivaro sawo kuna kuligwederera. (Epis. 68:11) Kuvhura o ture po marunduruko nokukwama sihonena sovanazinyetukadi ava woupampi va simwitira mosirongwa esi ndi? Nsene ngo yi rugana, ngo ‘heteka o tare asi HOMPA ngapi omu ga wapa.’—Epis. 34:8.