Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 48

Muna mufisayendi ta kara nomwenyo

Muna mufisayendi ta kara nomwenyo

Posiruwo sorukukutu, Jehova kwa tanterere Eliya asi: ‘Zende koSarefata. Mufisayendi gokositata oso na ka ku pa nondya.’ Pevero lyositata, Eliya kwa mwene mufisayendi ana kutjava yitare. Ta mu hundire mema. Apa ga zire a ka rete mema, Eliya ta mu zigire asi: ‘Ka pitwire nge ko kamboroto.’ Mufisayendi ta limburura asi: ‘Kapi na kara nokamboroto. Ame kuna kara tupu nokausura notugadi otu natu manesa namunwange.’ Eliya ta mu tantere asi: ‘Wa ha tjira. Jehova kuna tumbwidire asi nsene no kangera nge ko kamboroto usura nomagadi kapi ngayi pwa dogoro mvhura ngazi roke.’

Mufisayendi ta zi kembo ta ka kangera mboroto muporofete gwaJehova. Moomu ga yi tumbwidilire Jehova, mufisayendi namunendi va kere nonondya posiruwo sorukukutu. Usura nomagadi kapi ya pwire mo moyikandimbe.

Nye pwa horokere udigu umwe hena. Muna mufisayendi kwa verere makura ta fu. Mufisayendi ta likwambere Eliya a mu vatere.  Eliya ta damuna munona a mu tware konzugo zekeguru. Ta mu rangeke pombete ta kanderere asi: ‘Jehova, tengwidira mo mwenyo googu munona.’ Aso kwa kere sitetu esi ga rugene Jehova, ono diva asi morwasinke? Morwa siruwo sina kwato gumwe ogu va pindwire koufe. Ntani mufisayendi namunendi kapisi Vaisraeli va kere.

Mumati ta kara hena nomwenyo ta tameke kuhesera! Eliya ta tantere mufisayendi asi: ‘Tara munoge nomwenyo ana kara.’ Mufisayendi kwa hefe unene ta tantere Eliya asi: ‘Ove muntu gwaKarunga. Morwa ove kuuyunga tupu nonkango edi a ku tantere Jehova.’

“Komu tara si komakorova: ago kapi aga kunu, ago hena kapi aga zangura, kapi ga paka nzugo zokupungwira ndi sihete, nye Karunga kugarera. Amesi one mwa pitakana yidira mekuto?”—Rukasa 12:24