Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 34

Ngidiyona ta fundu Vamidiyani

Ngidiyona ta fundu Vamidiyani

Vaisraeli kwa sigire Jehova va karere hena yikarunga yoyimpempa. Monomvhura ntambali, Vamidiyani ngava vaka yimuna yoVaisraeli nokuzonagura nombuto dawo. Vaisraeli kwa tjilire Vamidiyani, makura ngava vanda momakombombo nomonondundu. Tava kanderere kwaJehova a va vatere. Jehova yipo ga tumine muengeli komugara gedina Ngidiyona. Muengeli ta mu tantere asi: ‘Jehova ana ku horowora ngo kare mugara gokufunda moyita.’ Ngidiyona ta pura asi: ‘Ame kapisi muntu gomulyo, ngapi nani vhura kupopera Vaisraeli?’

Ngapi ga divire Ngidiyona asi Jehova ana mu horowora? Age kwa tulire nohuki dononzwi porupare nokutantera Jehova asi: ‘Nsene ngali kara eme ponohuki pwelike, evhu nalinye ha lya kukutira, ntani ngani diva asi ono horowora nge ni zowore Israeli.’ Ngurangura za kweme ko, eme kwa kere tupu ponohuki nye evhu ha lya kukutira. Nye Ngidiyona ta pura hena Jehova asi eme ligwire pevhu, nye nohuki di kukute. Apa ya horokere oyo, Ngidiyona ga yi pulire asi Jehova ana mu horowora. Ta pongaike vakwayita vendi va ka rwise Vamidiyani.

 Jehova kwa tanterere Ngidiyona asi: ‘Ngani ku pa efundo. Nye vakwayita woge vanzi, kuvhura ngomu gazare asi mononkondo danyamweni mwa funda yita. Tantera nkenye ogu ana kara nowoma a tengure kembo.’ Makura vakwayita 22 000 yipo va tengwire, ano tapa hupu 10 000. Jehova ta tanta hena asi: ‘Simpe vakwayita vanzi. Zende komema o ka va tantere va nwe mema. Ka horowore mo ava nava ka nwa oku kuna kutarera nonkore dawo.’ Vagara owo kwa sikire 300. Jehova kwa va tumbwidilire asi ngava funda vakwayita 135 000 woVamidiyani.

Masiku ogo, Jehova ta tantere Ngidiyona asi: ‘Ngesi zende o ka rwise Vamidiyani.’ Ngidiyona kwa pere vakwayita vendi nombendo notukandimbe ntani noramba. Ta va tantere asi: ‘Tarereni nge, mu rugane moomu nina ku rugana.’ Ngidiyona ta fudu rumbendo rwendi nokutaura kandimbe, ta zerura ramba zendi nokuzigira asi: ‘Rufuro rwaJehova noru rwaNgidiyona!’ Vakwayita vendi 300 nawo tava yi rugana. Vamidiyani kwa tukukire, makura tava duka. Tava piyagana nokutameka kulidipaga vene navene. Jehova kwa vaterere Vaisraeli va funde nonkore dawo.

“Yi lihorore asi nonkondo edi dononene daKarunga, kapisi detu.”—2 Vakolinte 4:7