Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 26

Vagara 12

Vagara 12

Vaisraeli kwa tundire poNdundu zaSinayi va pite momburundu Parani va ze kevango Kadesi. Oko yiko Jehova ga ka tanterere Mosesa asi: ‘Tuma vagara 12, mwankenye rudi mu tunde gumwe, va ka tare sirongo saKanani esi ngani va pa.’ Mosesa ta horowora vagara 12 nokuvatantera asi: ‘Zendeni mu ka tare sirongo oso nsene siwa kulima. Ka tareni vantu vamo nsene vanankondo ntani nsene kwa tunga monotenta ndi moyitata.’ Josuwa naKarebu novakwawo 10 yipo va zire koKanani.

Konyima zomazuva 40, vagara owo tava ka tengura nomandjembere. Awo kwa ya tente asi: ‘Sirongo siwa, nye vantu vamo nonkondo unene ntani sitata kwa kara nomakuma gomare.’ Nye Karebu ta tanta asi: ‘Kuvhura tu ka va funde, tu zeni tupu tu ka va rwise!’ Morwasinke ga uyungilire ngoso? Morwa nage naJosuwa kwa huguvarere mwaJehova. Nye vakwawo 10, tava tanta asi: ‘Hawe, vantu vamo vare ntani marutu gawo manene. Ose kwawo ngwendi yimbumburu.’

Nonkango odo kwa tjilisire Vaisraeli. Tava tameke kusivana nokutanta asi: ‘Tu horoworeni mupitisili gwapeke tu tengure koEgipite. Morwasinke natu zira kosirongo oso va ka tu dipage?’  Josuwa naKarebu tava tanta asi: ‘Twa ha tjira ndi tu dire kulimburukwa Jehova. Age nga tu popera.’ Nye Vaisraeli kapi va limburukwire. Awo hena kwa here kudipaga Josuwa naKarebu.

Yisinke ga rugene Jehova? Age kwa tanterere Mosesa asi: ‘Ame kwa ruganena Vaisraeli yininke yoyinzi, nye simpe kapi vana kulimburukwa nge. Awo ngava kara momburundu nomvhura 40, ntani yimo ngava fira. Vana vawo ntani Josuwa naKarebu yiwo ngava za mosirongo esi na va tumbwidira.’

“Yisinke guna kumupwagera, one vanepurogona?”—Mateusa 8:26