Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 24

Vaisraeli tava teza po etumbwidiro

Vaisraeli tava teza po etumbwidiro

Jehova kwa tanterere Mosesa asi: ‘Wiza kondundu. Ni ya ku tjangere noveta poyitafura nokuyadikupa.’ Mosesa ta rondo kondundu nokukakara ko mazuva 40 mutenya nomasiku. Apa ga kere kondundu, Jehova ta tjanga Yipango Murongo poyitafura yivali nokuyipa Mosesa.

Apa pwa pitire siruwo, Vaisraeli tava gazara asi Mosesa ana va zumbu. Tava tantere Arona asi: ‘Tuna hepa gokutupitisira. Tu ruganena ko karunga!’ Arona ta va tantere asi: ‘Peni nge ngorodo.’ Makura ta zi hemuna, ta rugana ntana. Vantu tava tanta asi: ‘Ntana ezi yige karunga gwetu ga tu gusa moEgipite.’ Tava tameke kukarera ntana zongorodo, nokurugana sipito. Eyi kwa kere epuko ndi? Nhi, Morwa vantu va tumbwidilire asi ngava karera Jehova gelike. Nye awo kwa tezere po etumbwidiro lyawo.

Jehova ga mwene eyi yina kuhoroka, makura ta tantere Mosesa asi: ‘Gurumuka o ze kovantu. Awo kapi vana  kulimburukwa nge ntani kuna kukarera karunga goyimpempa.’ Mosesa ta genderere kuhumburuka ko kondundu, age ana simbi yitafura yivali.

Apa ga hederere pepi nokamba, ta zuvhu vantu omu vana kudimba. Ta mono mbunga zina kudana ntani kuna kutongamena ntana. Mosesa ta handuka unene. Ta zugumine yitafura yivali pevhu, ta yi tavauka. Makura ta hwike ntana ozo. Ta pura Arona asi: ‘Ngapi vantu vana ku zedagwire o rugane sininke sosidona ngesi?’ Arona ta limburura asi: ‘Wa ha handuka. Wa diva nkareso zovantu ava. Awo kava here karunga, yipo kava ninkire nge ni va ruganene ntana.’ Arona ngano kapi ga hepere kuyirugana. Mosesa ta zi hena kondundu a ka likwambere kwaJehova a gusire po vantu.

Jehova ga gusilire po vantu ava va litezwilire nokumulimburukwa. Ono dimburura eyi ya karerere nomulyo koVaisraeli va limburukwe komapukururo gaMosesa ndi?

“Ano nsene to gava etumbwidiro kwaKarunga, li sikisa mo usimbu. Age nayimwe si negova. Rugana eyi ono tumbwidire kurugana.”—Muudisi 5:4