Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 101

Paurusa tava mu tumu koRoma

Paurusa tava mu tumu koRoma

Rugendo rwaPaurusa rokuzuvhisa kwa hagerere moJerusarema. Yimo va mu kwaterere nokumutura modorongo. Memoneko, Jesus ta mu tantere asi: ‘To zi koRoma o ka udisire ko.’ Paurusa kwa mu gusire moJerusarema va mu tware koKesareya, oku ga ka kere nomvhura mbali modorongo. Apa Paurusa ga kere komeho zomupangeli Fesitusa, ta tanta asi: ‘Sigeni nge a ka pangure nge hompa gwaRoma.’ Fesitusa ta tanta asi: “Moomu ono tara kwahompa gwaRoma, kwahompa gwaRoma ngo za.” Paurusa kwa mu rondekere mosikepa sa vyukire koRoma naRukasa ntani naAresitarekusi.

Mefuta, tali va gwana emukundungu eli lya pepere mazuva gomanzi. Nkenye gumwe kwa gazarere asi ta fu. Nye Paurusa ta tanta asi: ‘One vagara, muengeli kuna tantere nge monzodi asi: “Neisi no tjilira, Paurusa. Ngo ka sika koRoma, ano navenye ava muna kugenda nawo, tava paruka.” Kareni nouradi! Kapi tatu fu.’

Emukundungu kwa kere mazuva 14. Konyima, tava mono sirudi. Aso sirudi saMalita. Sikepa kwa litoonene mosituntu sokonhi zomema, makura tasi tavauka, nye navenye 276 va ka sikire konontere vandjewa-ndjewa. Vamwe kwa zogere, ano vamwe kwa genderere poyipirangi makura tava ka sika konontere. Vantu woposirudi saMalita kwa pakerere mbili vanasikepa nokuvahwamekera mundiro va lidurure.

Konyima zomakwedi gatatu, vakwayita tava twara Paurusa koRoma nosikepa sapeke. Apa ga ka sikire, vapuli vakwawo tava mu simbagwire. Apa ga va mwene, ta pandura Jehova nokukara nouradi. Nampili ngomu Paurusa ga kere munadorongo, kwa mu pulisilire a kare monzugo zokufutira nomukwayita gwendi gokumunomena. Age kwa kere mo nomvhura mbali. Vantu ava ngava mu dingura, nga va zuvhisire Uhompa waKarunga nokuvaronga kuhamena Jesus. Paurusa kwa tjangerere nombilive nombungakriste domoAsia zonunu nedi domoJudeya. Jehova kwa ruganesere Paurusa a zuvhise mbudi zongwa konomuhoko nadinye.

“Moyininke nayinye eyi atu rugana, ose kumoneka asi tu vakereli vaKarunga: momalididimiko gomanene nomonompatakani nomomaudigu nomoyihuna nomomaupyakadi.”—2 Vakolinte 6:4