Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 96

Jesus ta horowora Sauru

Jesus ta horowora Sauru

Sauru kwa kere Muroma ogu va hampurukilire moTaruso. Age kwa kere Mufalisayi ogu ga divire veta zoVajuda, ntani kwa nyengere Vakriste. Age nga purututa Vakriste wovagara nava wovakadi momambo gawo nokuvatura modorongo. Age yipo ga kere apa mbunga zonyanya za dipagere Sitefanesa nomamanya.

Sauru kapi ya mu gwanene po tupu yokukwata Vakriste womoJerusarema. Makura ta hundire epulisiro komupristeli gomunene asi a ze koDamasikusi a ka papare Vakriste. Apa Sauru ga kere pepi nokusika mositata, ga liharuka ko, uzera wokutunda meguru tau mu temene, ta ligandere pevhu. Makura ta zuvhu ezwi lina kutanta asi: ‘Sauru, yinke ono kuhepekera nge?’ Age ta pura asi: ‘Nyove yilye?’ Ezwi tali limburura asi: ‘Nyame Jesus. Zende koDamasikusi, yiko nava ka ku tantera eyi no rugana.’ Sauru ta twika, makura tava mu kwata kokuwoko, va mu tware koDamasikusi.

MoDamasikusi, mwa kere Mukriste gedina Ananiyasa. Jesus ta mu tantere memoneko asi: ‘Katuka o ze konzira ezi ava tumbura asi Nzira zoKuvyuka, o ka pure membo lyaJudasa, mugara gedina Sauru.’ Ananiyasa ta limburura asi: ‘Hompa, na zuvha nayinye kuhamena mugara ogo! Age kutura varongwa woge modorongo!’ Nye Jesus ta mu tantere asi: ‘Zende, yige nina horowora a udise mbudi zongwa konomuhoko nadinye.’

Ananiyasa makura ta ka gwana Sauru nokumutantera asi: ‘Mukwetu Sauru, Jesus ana tumu nge ni ya mahure meho goge.’ Poopo ngoso, Sauru ta tameke kumona hena. Age ga lirongere kuhamena Jesus nokukara musikuli gwendi. Sauru tava mu kuhu ngoMukriste, ta tameke  kuudisira monosinagoge noVakriste vakwawo. Gazara tupu omu va tetukire Vajuda pokumona Sauru kuna kuronga vantu kuhamena Jesus! Tava tanta asi: ‘Nani kapisi yige mugara ogu nga papara varongwa vaJesus?’

Sauru kwa udisilire vantu ava va kere moDamasikusi nomvhura ntatu. Vajuda tava nyenge Sauru nokuliyonga asi va mu dipage. Varongwa ava va zuvhire eliyongo lyawo tava mu vatere a duke. Tava mu tura mosikumba nokumuhegumwisira kekuma.

Apa Sauru ga zire moJerusarema, kwa hetekere kulipakerera novarongwa. Nye varongwa kwa mu tjilire. Murongwa Baranabasa yige ga mu kwefe, a mu tware kovapositoli nokukavatantera asi Sauru ana litjindji. Sauru makura ta twikire kuudisa nomupampi mbudi zongwa kumwe nombungakriste moJerusarema. Ano konyima kwa ya divikwire asi Paurusa.

“Jesus Kristusa kwa wizira mouzuni asi a ya parure vananzo. Ano ame, nyame munanzo gomunene po nye.”—1 Timoteusa 1:15