Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 91

Jesus ta vhumbuka

Jesus ta vhumbuka

Konyima zapa ga fire Jesus, mugara gongawo gedina Josefa ta pura Piratusa a mu pulisire a guse simpu saJesus kositji. Josefa ta si dingire mekehe lyezera kumwe noyidumba yorupekwa nokusirangeka montoko zompe. Makura ta sindumwine ko emumanya kevero lyontoko. Vapristeli wovanene tava tanta asi: ‘Tuna kara nowoma asi nampo varongwa vaJesus nava ya vaka mo simpu sendi nokutanta asi ka vhumbukire koufe.’ Piratusa ta va limburura asi: ‘Ka tureni ko sinongweneso kontoko, mu ka zi nomene.’

Konyima zomazuva gatatu, vakadi vamwe tava zi kontoko ngurangura zonene, tava ka gwana emanya vana li gusa ko. Muengeli ogu va ka gwene montoko, ta tantere vakadi owo asi: ‘Mwa ha tjira. Jesus ana vhumbuka. Zendeni mu ka tantere varongwa vendi va ka mu gwane koGalireya.’

Mariya Mangadarena ta duka a ze kwaPeturusa naJohanesa. Ta va tantere asi: ‘Pweli ogu ana gusa mo rutu rwaJesus!’ Peturusa naJohanesa tava duka va ze kontoko. Apa va mwene asi montoko mwato simpu saJesus, tava tengura komambo gawo.

Apa Mariya ga tengwilire kontoko, ta ka gwana vaengeli vavali, ta va tantere asi: ‘Vana gusa mo Hompa gwange, nye kapi nina diva oku vana ka mu tura.’ Mariya ta mono mugara, ta gazara asi nampo murugani gosikunino, ta mu pura asi: ‘Ove mugara, tantera nge oku ono mu twara.’ Nye mugara apa ga uyungire asi: “Mariya!” poopo ta mu dimburura asi yige Jesus. Makura ta zigire asi: “Murongi!” Jesus ta mu tantere asi: ‘Zende o ka tantere vamumbya vange asi ono mono nge.’ Poopo ngoso, Mariya tazi a ka tantere varongwa asi ana mono Jesus.

Konyima, varongwa vavali tava tundu moJerusarema va ze koEmausi. Makura mugara gumwe ta gendi nawo nokuvapura eyi vana kuzogera. Tava mu limburura asi: ‘Kapi ko yi zuvhire? Mazuva gatatu gana piti, vapristeli wovanene ka va dipagesere Jesus. Nye vakadi vamwe kuna kutanta asi ana vhumbuka!’ Mugara ta va pura asi: ‘Ngoso kapi mwa pura eyi va uyunga vaporofete ndi? Awo kwa  tanta asi Kristusa ngava mu dipaga ntani ngava mu vhumbura.’ Makura ta tameke kuvafatwilira Matjangwa. Apa va ka sikire koEmausi, varongwa tava pura mugara a kare kumwe nawo. Ngurova, ta gusa mboroto ta kanderere, yipo va yi dimbwilire asi yige Jesus. Makura ta dongonoka.

Poopo ngoso, varongwa vavali tava tengura koJerusarema oku va pongere vapositoli nokukavatantera eyi ya horokere. Hava za mokuuyunga, Jesus ta va monekere navenye. Pomuhowo, vapositoli kapi va yi pulire asi yige Jesus. Makura ta va tantere asi: ‘Tareni komawoko gange, gumeni nge, yeeyi kwa tjanga asi Kristusa nga vhumbuka koufe.’

“Nyame nzira nousili nomwenyo. Nagumwe si a wiza kwaTate, age ga hana kupitira pwange.”—Johanesa 14:6