Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 78

Jesus ta zuvhisa mbudi zoUhompa

Jesus ta zuvhisa mbudi zoUhompa

Konyima zekuho lyendi, Jesus ta tameke kuudisa asi: ‘Uhompa waKarunga pepi una kara.’ Makura varongwa vendi tava mu kwama ngomu ga zire koGalireya nokoJudeya. Apa Jesus ga tengwire kembo lyawo koNasareta, kwa zire mosinagoge, ta penuna buke zaJesaya, ta zi resa kuziguruka asi: ‘Jehova ana pe nge mpepo zokupongoka yipo ni udise mbudi zongwa.’ Yisinke ga tembe? Kwa tembe asi nampili ngomu vantu va here kumona Jesus a rugane yitetu, nye konda zeyi va mu perere mpepo zokupongoka yipo a zuvhise mbudi zongwa. Ta tantere vapurakeni vendi asi: ‘Naina uporofete ou una siki mo.’

Jesus makura ta zi kEfuta lyaGalireya, ta gwana varongwa vendi vatatu, ava va kere vakwati wonomfi. Ta va tantere asi: ‘Wizeni, tu ya zeni, mu ka kare vakwati wovantu.’ Awo yiwo Peturusa naAndiliyasa naJakopo ntani Johanesa. Poopo makura tava sigi makwe gawo nokumukwama. Awo kwa zire moGalireya nazinye, nokuudisa Uhompa waJehova. Awo ngava udisire monosinagoge nopomarandesero nomononzira. Mbunga zonene kwa va kweme nkenye oku va zire. Mbudi zokuhamena Jesus tazi lihana nakunye dogoro nomoSiliya.

Sikando simwe, Jesus kwa pere varongwa vendi nonkondo dokuverura nokutjida nompepo donondona movantu. Ano vamwe kwa zire nage va ka udise mwankenye sitata nankenye mukunda. Vakadi wovalimburukwi ngwendi Mariya Mangadarena, Johana, Susana ntani navamwe ava ngava kwafa Jesus novarongwa vendi, nawo kwa zire nendi.

Apa Jesus ga mene kudeura varongwa vendi tava tumu va ka udise. Ngomu va zire moGalireya, wovanzi tava ya kara varongwa nokuvakuhwa. Wovanzi kwa here kukara varongwa eyi yiyo Jesus ga va fanekesere kepya eli lina fire etezo. Age ta va tantere asi: ‘Kanderereni kwaJehova a tume varugani momuzangu gwendi.’ Makura ta horowora varongwa 70, tava tumu vavali-vavali va ka udisire moJudeya  nazinye. Awo kwa ka rongere vantu navenye kuhamena Uhompa. Apa varongwa va ka tengwire, awo kwa hefe nokutantera Jesus eyi ya ka horokere. Muzonaguli kapi ya mu tompokere kuhagekesa sirugana sokuzuvhisa.

Jesus ga yi divire asi varongwa vendi ngava twikira nosirugana esi somulyo apa nga tengura meguru. Ta va tantere asi: ‘Zuvhiseni mbudi zongwa mouzuni mudima. Rongeni vantu nonkango daKarunga nokuvakuhwa.’

“Ame nyame tupu kukaudisira hena moyitata peke Mbudi zoNgwa zoUntungi waKarunga, yeeyi yiyo va tumina nge.”—Rukasa 4:43