Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 62

Sitji esi sa fanekesa Uhompa

Sitji esi sa fanekesa Uhompa

Ezuva limwe, Nebukadenesara kwa rotere nzodi zokutjilisa. Ta zigida vanandunge vendi va ya mu tantere eyi azi tanta. Nye kapi va vhulire kuzifaturura. Makura ta uyunga naNdaniyera.

Nebukadenesara ta tantere Ndaniyera asi: ‘Ame kuna roto sitji. Yiyo sina repa dogoro keguru. Sitji oso kusimona nkenye ogu mouzuni. Yihako yaso yiwa ntani enyango lyaso enzi. Yikorama kupwizumukira momundwire gwaso, ano yidira kutunga yikorogo yayo konomutayi daso. Muengeli makura ta tundu meguru. Ta zigire asi: “Komangereni sitji mu tetagure ko nomutayi daso. Nye sisindi si sigeni mevhu, aso kuna si manga nomalyenge gosivera songoporo. Nomvhura ntano-nambali kapi ngasi kara nononduge dosintu, nye dosiukorama. Vantu navenye ngava dive asi Karunga yige mupangeli ntani age kuvhura kugava uhompa kwankenye ogu ana horowora.”’

Jehova kwa likidire Ndaniyera eyi za tente nzodi. Ndaniyera kwa tukukire apa ga divire eyi za tente nzodi, age kwa tente asi: ‘Hompa, nzodi nefatururo lyazo ngano tali hamene kononkore doge, kapisi koge. Sitji sosire esi vana tetagura, nyove. Ngava ku gusa uhompa woge, ntani ngo lya wayi mowiza ngwendi sikorama. Nye morwa muengeli ga tente asi sisindi va si sige mevhu nonondandani daso, ngo kara hena hompa.’

Konyima zomvhura zimwe, Nebukadenesara kwa gendere keguru lyombara zendi nokutara omu za wapa Babironi. Ta tanta asi: ‘Tara tupu omu ga nenepa Babironi! Ame kwa mu tunga a kare nkurusitata zange.’ Age simpe kuna kuuyunga, ezwi tali tundu meguru asi: ‘Nebukadenesara, nonkondo doge dosiuhumpa ngesi vana di kugusa.’

Poopo ngoso, Nebukadenesara ta zumbanesa nondunge dendi dosintu, makura ta kara ngwendi sikorama. Age makura ta ka kara mowiza noyikorama. Nohuki daNebukadenesara kwa repere ngwendi dekangakodi, ano mambwara gendi ngwendi goyidira.

 Konyima zonomvhura ntambali, Nebukadenesara ta di mu tengwire nondunge dendi ano Jehova ta mu tura a kare hena hompa. Nebukadenesara ta tanta asi: ‘Tani pandura Jehova karunga gekeguru-guru. Ngesi nina diva asi Jehova yige Mupangeli. Age kununupika wokulinenepeka ntani kuvhura kugava uhompa kwankenye ogu ana horowora.’

“Elinenepeko kureta ehanauko, ano elitumbo kureta epunduko.”—Yisewe 16:18