Zende koyikaramo

Zende koyikaramo

Nombangi daJehova

Horowora eraka Rukwangali

 EPURO 5

Ngapi nsene kuna kuhepeka nge kosure?

Ngapi nsene kuna kuhepeka nge kosure?

EYI YA KARERA NOMULYO

Monkedi omu o limburura kuvhura yi guse po udigu owo ndi u ligwederere.

YISINKE NO RUGANA?

Tu tante asi Thomas kapi hena ana hara kuza kosure morwa makwedi gatatu gana ka pita vakwawo wokosure kwa hanesa yimpempa kumuhamena. Awo hena kwa mu rundumuna madina. Poyiruwo yimwe awo kumutoona kewoko yipo nombapira dendi di gwire pevhu ndi gumwe ta mu zundura ano apa na setuka kapi na diva ogu ana yi rugana. Ano gumwe ka mu tuminine mbudi zokumutjilisa . . .

Ngano nyove Thomas, ngano yisinke no rugana?

GAZADARA KO!

Kuvhura o rugane ko yuma. Nye kapi wa hepa kurwana mokunyokera po vahepeki. Ngapi no yi rugana?

  •   WA HA HANDUKA. Bibeli kutanta asi: “Nompote kulikida ehandu lyado poruzera, nye vanandunge kulididimika tava li horeke.” (Yisewe 29:11) Nsene o moneka asi kapi ono handuka, wokukuhepeka kuvhura yi va ninkise va hageke kukuhepeka.

  • WA HA TENGWIDA KUWOKO. Bibeli kutanta asi: “Walye omu likwatere-kwatere nonkoko.” (Varoma 12:17) Kurugwida kuwoko ngayi ninkisa va ku hepeke unene.

  • HENDUKA UDIGU. Bibeli kutanta asi: “Vantu wonondunge kumona udigu tau wiza, makura tava u henduka.” (Yisewe 22:3) Nyokera po vantu ava nava vhura kukuhepeka ndi mavango oku nayi vhura kukuhorokera.

  • HETEKA NONKEDI DIMWE. Bibeli kutanta asi: “Elimbururo lyombili, kumweneka ehandu.” (Yisewe 15:1) Kuvhura o rugane yokuzoresa. Pasihonena, nsene muntu ta ku ninki asi wa neta unene, kuvhura o ninke asi: “Awe, yosili na hepa kutongama ko!”

  • TUNDA PO. Nora gonomvhura 19 kwa tanta asi: “Kumwena kulikida asi omukondi ntani asi ove nonkondo unene kupitakana ogu ana kukuhepeka. Ntani kulikida asi ove kulididimika.”—2 Timoteusa 2:24.

  • WA HA KARA NOWOMA. Wokuhepeka kuvhura kudimburura nsene asi ove woma ntani asi kapi to vhuru kurugana ko yuma. Nye awo kapi tava ku danene nsene asi ove kwato woma.

  • TANTERA KO WOPEKE. Mitili gumwe kwa tanta asi: “Ame kukorangeda vanasure va tantere nge nsene kuna kuvahepeka. Ayo kuna kara yininke youhunga kurugana ntani kupopera vapeke va dire kuvahepeka.”

Kudira woma ngayi ku pa nonkondo o funde wokukuhepeka