Zende koyikaramo

Zende koyikaramo

Nombangi daJehova

Horowora eraka Rukwangali

 EPURO 4

Ngapi nani kohonona po mapuko gange?

Ngapi nani kohonona po mapuko gange?

EYI YA KARERA NOMULYO

Kutambura mapuko goge ngayi ku ninkisa o kare muntu gokuhuguvara.

YISINKE NO RUGANA?

Tu tante asi Tim kuna kudana mbara novakwawo, makura ta zi sanga ta zi ka taura ekende lyonzugo zovamusinda.

Ngano nyove Tim, yisinke ngano no rugana?

GAZADARA KO!

PANA KARA MATOKORO GATATU:

  1. To duka.

  2. To rundire mukweni.

  3. To tantere vamusinda eyi yina horoka nokutambura nkenye eyi nava kufutisa.

Kuvhura yi ku ninkise o horowore Ruha A. Nye ya wapa kutambura mapuko goge, yi kare asi kuna taura ekende ndi kuna rugana yapeke.

 NOKONDA NTATU DEYI NO TAMBWIRA MAPUKO GOGE

  1. Ayo kuna kara yininke youhunga kurugana.

    Bibeli kutanta asi: “Ose kwa hara kuhungika mwanayinye.”—Vahebeli 13:18.

  2. Vantu kwa hara kugusira po ava ava tambura mapuko gawo.

    Bibeli kutanta asi: “Ove kapi ngo ragopa nsene o kambadara kuhoreka nonzo doge. Di sanseka ove o di sige, makura Karunga nga ku fira nkenda.”—Yisewe 28:13.

  3. Yomulyo po, ayo kuhafesa Karunga.

    Bibeli kutanta asi: “Yeeyi HOMPA kwa tonda ava ava rugana udona, nye vahungami ta va tura mougami wendi.”—Yisewe 3:32.

Karina gonomvhura 20 kwa horekere mbapira zefutiso va mu pere vaporosi morwa kupitakanesa kusinga. Nye kapi ya mu tompokere. Age kwa tanta asi: “Konyima zomvhura zimwe, otate va ya yi divire, ano eyi ya ninkisire nge ni ze moudigu wounene.”

Eyi natu lirongera ko? Karina, kwa tanta asi: “Kuhoreka mapuko goge kuna kara sininke sosidona. Kapi ngo vhura kuhenduka yitundwamo!”

OMU NO LIRONGERA KO KOMAPUKO GOGE

Bibeli kutanta asi: “Ose natuvenye kupuka popanzi.” (Jakopo 3:2) Kutambura mapuko goge kulikida asi wa linunupika ntani omukondi.

Lirongera ko komapuko goge. Mukadona gedina Vera kwa tanta asi: “Ame kutara mapuko gange ngonkedi zokulirongera ko yipo ngani dire kurugana hena yokulifana.” Tu konakoneni omu no yi rugana.

To hundire mbasikora zotate woge makura tazi ka teka. Yisinke no rugana?

  • To mwena nokuhuguvara asi otate woge kapi ngava yi dimburura.

  • To tantere otate woge nayinye eyi yina horoka.

  • To tantere otate woge eyi yina horoka nye to rundire mukweni.

To gu ekonakono morwa kapi wa lironga. Yisinke no rugana?

  • To tanta asi ekonakono udigu.

  • To tambura epuko lyoge morwa kapi wa lironga.

  • To rundire asi mitili kwa ku nyenga.

Kugazadara mapuko goge ganare kwa fana ngwendi kuna kusinga ove kuna kutara montarero zokonyima

 Ngesi koneka yihonena oyo makura nokugazara asi ngano nyove (1) guhya (2) mitili. Yisinke otate woge namitili goge nava kugazarera nsene o tambura mapuko goge? Yisinke nava kugazarera nsene o ga horeka?

Ngesi gazara epuko eli wa rugene mvhura za ka pita nokulimburura mapuro aga.

Epuko musinke wa rugene? Ngapi wa li kohwenene po?

  • Na li horekere.

  • Na rundilire mukwetu.

  • Na li tambwire.

Nsene kapi wa tambwire epuko lyoge, ngapi wa lizuvhire konyima zosiruwo?

  • Na hefe, morwa kapi va kwete nge.

  • Na lizuvhire unzoni, morwa kapi na uyungire usili.

Ngano ngapi wa kohwenene po nawa epuko lyoge?

Yisinke wa lirongera ko kepuko lyoge?

NGAPI ONO KUGAZARA?

Morwasinke vamwe ava dilire kutambura mapuko gawo?

Yisinke nava ku gazarera vantu nsene ove nkenye apa kapi o tambura mapuko goge ntani yisinke nava kugazarera nsene ove kugatambura?—Rukasa 16:10.