Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 3

Jehova ta horora sitambo sendi

Jehova ta horora sitambo sendi

OKU LYA DEMENENA EGAUNUNO

Jehova kuhorora kanunu-kanunu sitambo sendi nye kowo tupu ava mu limburukwa

1, 2. Ngapi Jehova ga horora sitambo sendi kovantu?

VAKURONA wovawa nsene tava zogere yemepata kuhamesera mo novana vawo. Nye awo kugazadara ko mauzera aga nava vhura kutantera vana vawo. Awo kuhorora tupu nombudi edi nava vhura kukwata egano vana vawo kuliza nonomvhura dawo.

2 Mokulifana, Jehova kwa horora kanunu-kanunu sitambo sendi kovantu. Age kwa yi rugana posiruwo souhunga. Tu tareni omu Jehova ga horora usili kuhamena Uhompa mwa za nomvhura.

Morwasinke pwa karerere hepero zoUhompa?

3, 4. Jehova ga tokwere eyi ngayi horokera vantu ndi? Faturura.

3 Uhompa woUmesiyasa kapi wa kere ruha rositambo saJehova apa ga sitire uzuni. Morwasinke? Morwa Jehova kapi ga tokwere eyi ngayi horokera vantu, age kwa va ungire nemanguruko lyokutura po matokoro. Age kwa tanterere Adamu naEva sitambo sendi kovantu asi: “Livhareni mu zwide evhu, makura ruvharo rweni ngaru li pangere.” (Gen. 1:28) Jehova kwa va harerere hena va fumadeke nompango dendi kuhamena yoyiwa neyi yoyidona. (Gen. 2:16, 17) Adamu naEva va vhulire kutokora kumulimburukwa. Ngano awo novana vawo va limburukwire, ngano kapi twa hepa Uhompa omu na pangera Kristusa mokusikisa mo sitambo saKarunga. Uzuni mudima ngesi ngano kuna kara novantu wokusikilira mo wokukarera Jehova.

4 Urwanesi waSatana naAdamu naEva kapi wa kondera Jehova a dire kusikisa mo sitambo sendi sokuzwida evhu novantu wokusikilira mo. Jehova ga tulire po nzira zapeke mokusisikisa mo. Sitambo sendi kapi sa fana ehina lyorutenda oru aru gendere monzira zimwe tupu yipo ru ka sike nye nsene silimbikiso si kara monzira taru kandoma. Jehova nsene ana tokora yuma, kwato gokuvhura kukondera  sitambo sendi si sike mo. (Resa Jesaya 55:11.) Nsene pana kara yilimbikiso monzira zimwe, Jehova kuruganesa nzira zapeke. * (Ex. 3:14, 15) Posiruwo souhunga, ta pukurura vakareli vendi wovalimburukwi nzira zompe ezi na ruganesa mokusikisa mo sitambo sendi.

5. Yisinke ga rugene ko Jehova konyima zourwanesi womoEdeni?

5 Konyima zourwanesi womoEdeni, Jehova yipo ga tokwere kutulisa po Uhompa. (Mat. 25:34) Posiruwo sina, Jehova yipo ga tamekere kuhorora eyi nga ruganesa a tengwide vantu keparu lyokusikilira mo nokugusa po maudona aga ga retesa po Satana. (Gen. 3:14-19) Nye, Jehova kapi ga geve mauzera nagenye sikando simwe kuhamena Uhompa.

Jehova ta tameke kuhorora usili kuhamena Uhompa

6. Yisinke ga tumbwidilire Jehova, ntani yisinke ga dilire kuhorora?

6 Mouporofete wokuhova, Jehova kwa tumbwidilire asi ‘ruvharo’ ngaru myona ezoka. (Resa Genesis 3:15.) Nye posiruwo sina Jehova kapi ga horwere asi yilye nga ya kara ruvharo oro ntani noru rwezoka. Apo pwa pitire nomvhura 2 000, ntani ga ya horwere mauzera gamwe. *

7. Morwasinke Abirahamu va mu horowere, ntani yisinke natu lirongera ko?

7 Konyima, Jehova kwa horowere Abirahamu asi kupitira mwendi yimo ngaru tunda ruvharo rwetumbwidiro. Abirahamu kwa mu horowere morwa ga ‘purakenene ezwi’ lyaJehova. (Gen. 22:18) Tatu lirongere ko sininke somulyo asi Jehova kuhorwera sitambo sendi kowo tupu ava mu limburukwa.—Resa Episarome 25:14.

8, 9. Usili musinke ga horwere Jehova kuhamena ruvharo rwetumbwidiro kwaAbirahamu naJakopo?

8 Apa ga uyungire nakaume kendi Abirahamu kupitira momuengeli, Jehova ga horwere usili womulyo kuhamena ruvharo rwetumbwidiro asi ngaru kara muntu. (Gen. 22:15-17; Jak. 2:23) Nye ngapi muntu ogo nga ya myona ezoka? Yilye ezoka? Malimbururo komapuro ogo kwa ya ga horwere konyima.

9 Jehova kwa tokwere asi ruvharo rwetumbwidiro ngaru tunda mwaJakopo, mutekurwaAbirahamu, mugara ga kere nepuro lyenene mwaKarunga. (Gen. 28:13-22) Kupitira mwaJakopo, Jehova kwa horwere asi gEtumbwidiro nga tunda mwaJuda munwaJakopo. Jakopo kwa pumbire asi ogu nga tunda moruvharo rwaJuda ngava mu pa “mpango zouhompa,” ntani “nomuhoko nadinye ngadi zuvha mwendi.” (Gen. 49:1, 10) Kupitira mononkango odo, Jehova yipo nye ga likidire asi gEtumbwidiro nga kara hompa ndi mupangeli.

10, 11. Morwasinke Jehova ga horwere sitambo sendi kwaNdafita naNdaniyera?

10 Konyima zonomvhura 650, Jehova kwa ya horwere mauzera gamwe gositambo sendi kwahompa Ndafita, gomoruvharo rwaJuda. Jehova kwa tumbwire Ndafita asi “mugara ga za nge komutjima.” (1 Sam. 13:14; 17:12;  Yirug. 13:22) Morwa Ndafita ga kere mulimburukwi, Jehova yipo ga tulire po egwanekero nendi pokumutumbwidira asi gumwe gomoruvharo rwendi nga pangera narunye.—2 Sam. 7:8, 12-16.

11 Konyima zonomvhura 500, Jehova kwa ruganesere muporofete Ndaniyera a horore mvhura ezi ga ya monekere pevhu Mugwavekwa ndi Mesiyasa. (Ndan. 9:25, NW) Jehova ‘kwa here’ Ndaniyera. Morwasinke? Morwa age kwa fumadekere Jehova nokutwikira kumukarera.—Ndan. 6:16; 9:22, 23.

12. Yisinke Ndaniyera va mu tanterere a rugane, ntani morwasinke?

12 Nampili ngomu Jehova ga ruganesere vaporofete wovalimburukwi ngwendi Ndaniyera va tjange mauzera gomanzi kuhamena Mesiyasa ndi ruvharo rwetumbwidiro, simpe kapi sa kere siruwo saJehova mokuhorwera vakareli vendi va kwate nawa egano eyi va tjenge. Pasihonena, konyima apa Ndaniyera ga mwene emoneko lyokutulisa po Uhompa waKarunga, age kwa mu tanterere a ture ko sinongweneso dogoro si sike siruwo esi ga tulire po Jehova. Apa sa sikire siruwo oso, ediwo lyousili “kwa vhukire.”—Ndan. 12:4NW.

Jehova kwa ruganesere vagara wovalimburukwi ngwendi Ndaniyera va tjange mauzera gomanzi kuhamena Uhompa woUmesiyasa

Jesus ta horora sitambo saKarunga

13. (a) Yilye ruvharo rwetumbwidiro? (b) Ngapi Jesus ga horwere usili kuhamena uporofete va tjanga mwaGenesis 3:15?

13 Jehova kwa tumbwire asi Jesus yige ruvharo rwetumbwidiro, gemezimo lyaNdafita ogu nga pangera ngaHompa. (Ruk. 1:30-33; 3:21, 22) Apa Jesus ga tamekere kuzuvhisa, kwa fene ngwendi ezuva lina kupumina povantu yipo va dive sitambo saKarunga. (Mat. 4:13-17) Pasihonena, Jesus kwa ya horwere usili kuhamena “ezoka” eli va tumbura mwaGenesis 3:14, 15, pokutumbura Muzonaguli “mudipagi” ntani ‘guhya yimpempa.’ (Joh. 8:44) Mehororo eli ga geve kwaJohanesa, Jesus kwa horwere “ezoka lyanare” asi “Muzonaguli ndi Satana.” * (Resa Ehororo 1:1; 12:9.) Mehororo lyoolyo, Jesus ngoruvharo rwetumbwidiro, ga likidire omu nga ka sikisa mo uporofete womoEdeni pokukamyona po Satana.—Ehor. 20:7-10.

14-16. Varongwa vaJesus va kwete egano poopo mausili aga ga va horwere ndi? Faturura.

14 MEgaununo 1 lyobuke ezi, kwa likida asi Jesus nga uyunga unene kuhamena Uhompa. Nye age pamwe kapi nga horora mauzera aga va here kudiva varongwa vendi. Nampili apa ga horwere mauzera gamwe, pa pitire siruwo ntani va yi kwete egano vasikuli vendi. Tu tareni yihonena yimwe.

15 Momvhura 33, Jesus ga divisire asi ava ngava ka pangera nendi moUhompa waKarunga ngava tunda pevhu nokuvavhumbwira keparu ngoyisitwa yopampepo  meguru. Varongwa vendi kapi va yi kwete egano poopo. (Ndan. 7:18; Joh. 14:2-5) Momvhura zoozo, kupitira moyifanekeso, Jesus ga likidire asi apa nga tengura meguru, ngapa pita siruwo sosire ntani ngava tura po Uhompa. (Mat. 25:14, 19; Ruk. 19:11, 12) Varongwa kapi va kwete egano sitwa oso somulyo, ano apa Jesus ga vhumbukire tava mu pura asi: “Ntaantani tupu ngesi o tengwidire Vaisraeli nonkondo dokupangera vene sirongo sawo ndi?” Jesus kapi ga horwere hena mauzera posiruwo sina. (Yirug. 1:6, 7) Jesus kwa rongere hena asi ngapa kara ‘nonzwi dapeke,’ nye kapisi ‘domombungagona’ ezi ngazi ka pangera nendi. (Joh. 10:16; Ruk. 12:32) Konyima apa va tulire po Uhompa mo-1914, pa pitire nomvhura dononzi ntani vasikuli vaKristusa va kwete egano nombunga odo mbali.

16 Jesus ga kere neyi yoyinzi yokukatantera varongwa vendi, nye ga yi divire asi tayi va vhukire. (Joh. 16:12) Yosili, ediwo lyenzi lyokuhamena Uhompa kwa ya li horwere mosiruwo sovapositoli. Nye oso kapi sa kere siruwo sokuvhuka ediwo.

Ediwo lyousili tali vhuka “pehagero lyouzuni”

17. Yisinke twa hepa kurugana yipo tu kwate egano usili kuhamena Uhompa, ntani yisinke hena ya hepa po?

17 Jehova kwa tumbwidilire Ndaniyera asi “pehagero lyouzuni” wovanzi ngava “yi konakona” ntani ediwo lyousili lyositambo saKarunga ngali vhuka. (Ndan. 12:4) Owo vana hara ediwo va hepa kukondja mokuligwana. Nye nampili tu konakone Bibeli unene, kapi ngatu kwata egano usili kuhamena Uhompa ntudi Jehova a tu vatere.—Resa Mateusa 13:11.

18. Ngapi owo ava limburukwa Jehova ava likida epuro nelinunupiko?

18 Ngwendi moomu tupu Jehova ga horwere kanunu-kanunu usili kuhamena Uhompa komeho zomvhura 1914,  age kuna kutwikira kuyirugana pehagero lyouzuni. MEgaununo 4 neli 5, ngatu ka mona asi monomvhura 100 da ka pita vantu vaKarunga va hepere kurundurura ekwatogano lyawo yikando yongandi. Ngoso kulikida asi Jehova kapi a vatere vantu vendi ndi? Hawe. Age kuvavatera. Morwasinke? Morwa ava ava limburukwa Jehova kulikida yikara yivali eyi ga hara, epuro nelinunupiko. (Heb. 11:6; Jak. 4:6) Vakareli vaJehova va kara nepuro asi matumbwidiro nagenye gomoNonkango dendi ngaga sika mo. Awo kulikida elinunupiko apa ava dimburura asi awo va kere nekwatogano lyepuko kuhamena omu ngaga ka sika mo matumbwidiro ogo. Nkareso ozo zelinunupiko kwa zi likida mosifo soRuhungu, 1 Nsinano 1925, esi sa tente asi: “Twa yi diva asi Hompa yige mufaturuli, age nga faturura Nonkango dendi kovantu vendi moomu ga yi harera ntani kuliza nosiruwo esi ga tura po.”

“Hompa . . . age nga faturura Nonkango dendi kovantu vendi moomu ga yi harera ntani kuliza nosiruwo esi ga tura po”

19. Yisinke ga tu vatera Jehova tu kwate egano, ntani morwasinke?

19 Apa va tulisire po Uhompa mo-1914, vantu vaKarunga kwa kere nediwo lyesesu kuhamena omu mauporofete goUhompa ngaga sika mo. (1 Kol. 13:9, 10, 12) Morwa upampi wetu wokuhara kumona matumbwidiro gaKarunga kuna kusika mo, poyikando yongandi twa kere nekwatogano lyepuko. Mwa za nomvhura, nonkango dina domoRuhungu tuna tumbura kwa sika mo. Sirongwa kwa tente asi: “Ayo ya wapa kuyitambura asi kapi tatu kwata egano uporofete ntudi dogoro una siki mo ndi dogoro mokusika mo una karere.” Ngesi ose kuna kuparuka pehagero lyouzuni, mauporofete gomanzi goUhompa kuna kusika mo. Morwa vantu vaJehova Karunga kwa linunupika ntani awo kutambura mapukururo, age ga tu vatera tu kwate nawa egano sitambo sendi. Ediwo lyousili kuna kuvhuka!

 Mawapukururo kuheteka vantu vaKarunga

20, 21. Ngapi marunduruko ga kundamene Vakriste womomazuva govapositoli?

20 Apa Jehova a wapukurura ekwatogano lyetu lyousili, ayo kutuheteka. Epuro nelinunupiko ngali tu tumangeda tu tambure marunduruko ndi? Vakriste womomazuva govapositoli va ligwanekerere neheteko olyo. Pasihonena, gazadara asi ove Mukriste goMujuda wa parukire posiruwo sina. Ove wa fumadeka unene Veta zaMosesa nokulizuvha mfumwa zokukara Mujuda. Konyima to ya gwana nombilive dokutunda komupositoli Paurusa dina kutanta asi Veta kapi zina kara hena nomulyo ano Jehova ana nyoka Vaisraeli, ngesi kuna kupongaika Vaisraeli wopampepo omu mwa hamena Vajuda novapagani. (Rom. 10:12; 11:17-24; Gar. 6:15, 16; Koros. 2:13, 14) Yisinke ngano no rugana?

21 Vakriste wokulinunupika va tambwire epukururo lyaPaurusa ano Jehova ga va tungikire. (Yirug. 13:48) Vamwe va nyokere marunduruko ogo ntani kwa here kukwaterera kekwatogano lyavene. (Gar. 5:7-12) Ngano kapi va rundwilire nkareso zawo, awo ngano kapi va gwene mpito zokukapangera kumwe naKristusa.—2 Pet. 2:1.

22. Ngapi omu o lizuvhu kuhamena marunduruko gekwatogano lyetu lyositambo saKarunga?

22 Monomvhura edi, Jehova kwa wapukurura ekwatogano lyetu lyoUhompa. Pasihonena, ga tu vatera tu kwate nawa egano siruwo esi ngava hangura owo ngau ka pangera Uhompa ngononzwi kowo ava dili kulimburukwa ngoyikombo. Age ga tu ronga hena siruwo esi ngasi sika mo sivaro sovantu 144 000, neyi ayi tanta yifanekeso yaJesus yoUhompa ntani siruwo esi mugwavekwa gokuhulilira ngava mu vhumbwira keparu lyemeguru. * Ngapi o tara marunduruko ogo? Epuro lyoge kunkondopara ndi? Ove kutara marunduroko ogo ngoumbangi asi Jehova kuna kutwikira kuronga vantu vendi wokulinunupika ndi? Nsene yimo, mauzera gomobuke ezi ngaga nkondopeka epuro lyoge asi Jehova kanunu-kanunu kuna kuhorora sitambo sendi kowo ava mu limburukwa.

^ para. 4 Edina Jehova kwa li gusa konkangorugano zoRuhebeli “kukara.” Edina Jehova kutanta asi age kusikisa mo matumbwidiro gendi. Tara kakende pepenuno 43 “Eyi ali tanta edina lyaKarunga.”

^ para. 6 Kwetu kumoneka ngwendi siruwo sosire, nye twa hepa kudiworoka asi nare vantu ngava paruka nomvhura dononzi. Adamu ga ya parukire posiruwo simwe naRameki, oguhwe vaNowa. Rameki ga ya parukire kumwe naSema, munwaNowa. Sema ga ya parukire kumwe naAbirahamu.—Gen. 5:5, 31; 9:29; 11:10, 11; 25:7.

^ para. 13 Nkango “Satana,” kwa moneka moMatjangwa goRuhebeli yikando 18. Nye “Satana,” kwa moneka yikando 30 moMatjangwa goRugereka goSikriste. Matjangwa goRuhebeli kapi ga demenene unene kwaSatana nye kwa demenene kwaMesiyasa. Apa Mesiyasa ga ya sikire, age kwa tulire poruzera Satana, ayo kwa yi tjanga moMatjangwa goRugereka goSikriste.

^ para. 22 Komauzera gamwe kuhamena marunduruko aga, tara Ruhungu: 15 Sikukutu 1995, pepenuno 23-28; 15 Murongagona, 2008, pepenuno 20-24; 15 Pembankuru 2008, pepenuno 17-21; 15 Pembankuru 2013, pepenuno 9-14.