Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 12

Kuwapukurura nongendeseso dombunga ‘zaKarunga gombili’

Kuwapukurura nongendeseso dombunga ‘zaKarunga gombili’

OKU LYA DEMENENA EGAUNUNO

Jehova ta wapukurura nongendeseso dombunga zendi

1, 2. Erunduruko musinke lya monekere moRuhungu rwaMurongagona 1895, ntani ngapi lya kundamene vanavazinyetu?

APA Mulirongi goBibeli John A. Bohnet ga gwene Ruhungu rwaMurongagona 1895, age kwa tetukire pokumona erunduruko lyepe pontunda zosifo oso. Apo kwa kere po efano lyoruhungu omu mwa kere ramba zokuminikira masiku mefuta.

2 Munazinyetu Bohnet kwa mu kundamene unene makura ta tjangere mbilive munazinyetu Russell pokutanta asi: “Sifo soRuhungu kuna kumoneka sili nawa.” Mulirongi gumwe goBibeli gomulimburukwi John H. Brown kwa tjenge asi: “Yosili, ntunda zoRuhungu kukoka eharo lyovantu, etateko apa rwa kara ruhungu kwa kora, nampili mankupi nompepo nokuvhura si kuruganda.” Momvhura zoozo, konyima zomakwedi gongandi mwaMangundu kwa ya kweme erunduruko limwe hena.

3, 4. Udigu musinke va pwagesere moRuhungu 15 Mangundu 1895, ntani erunduruko musinke va divisire?

3 Sirongwa va pwagesere moRuhungu 15 Mangundu 1895 kwa horwere udigu ou wa donganesere mbili zomombunga zoValirongi woBibeli. Vanavazinyetu kwa litatanene asi yilye na kara mupitisili mwankenye mbungakriste. Mokuvatera vanavazinyetu va dimburure eyi ya hepa po mokuhonona po udigu ou, sirongwa kwa fanekesere mbunga zaJehova kosikepa ano vapitisili kovasingi sikepa ava va dilire kuwapaikira sikepa kekundungu. Yisinke va hepere kurugana?

4 Sirongwa kwa tente asi mupitisili gosikepa gomuwa kudivilisa asi ana kara noyiruganeso yokulipoperesa ano vantu ana va wapaikire kekundungu. Mokulifana, ava vana kupitisira mbunga zaJehova va hepa kudivilisa asi navenye womombungakriste vana liwapaikire komaudigu. Mokuyisikisa mo oyo, sirongwa kwa divisire erunduruko eli asi: “Mwankenye mbungakriste mwa hepa kuhorowora vakuronambunga” va “kare vasita wombungakriste zaKarunga.”—Yirug. 20:28.

5. (a) Ngapi kutulisa po vakuronambunga ya vaterere nombungakriste? (b) Mapuro musinke natu ka zogera?

 5 Kutulisa po vakuronambunga kwa vaterere nombungakriste di kore. Ayo kwa vaterere vanavazinyetu va pite momaudigu gomanene aga ya reteresere po yita yokuhova youzuni. Monomvhura da kweme ko, mawapukururo gomombunga zaJehova kwa vaterere vantu vaKarunga va wapere kumukarera. Mauporofete musinke goBibeli ga pumbire eyi? Marunduruko musinke gomombunga wa limonena? Ngapi wa gwanena mo uwa?

‘Vapangeli ngava pangera mombili’

6, 7. (a) Yisinke da tanta nonkango domwaJesaya 60:17? (b) Pokutumbura “vapangeli,” yisinke ga likidire Jehova?

6 Ngomu va yi zogera mEgaununo 9, Jesaya kwa pumbire asi Jehova nga tungika vantu vendi va vhuke. (Jes. 60:22) Mouporofete woowo Jehova kwa tumbwidilire hena asi: “Ngani ku retera ngorodo pevega lyongoporo, sisiliveli nongoporo pevega lyosivera nositji, ano sivera pevega lyemanya. Vapangeli woge kapi hena ngava ku hepeka; ngani va ninka va pangere mouhunga nomombili.” (Jes. 60:17) Yisinke wa tanta uporofete owo? Ngapi omu wa sika mo momazuva getu?

Kapi ga pumbire asi yininke yoyidona ngava yi pinganesera po neyi yoyiwa, nye asi yoyiwa ngava yi pinganesere noyininke yoyiwa unene-nene

7 Uporofete waJesaya kwa tanta asi yininke ngava yi pinganesera po noyininke yapeke. Koneka asi kapi ga pumbire asi yininke yoyidona ngava yi pinganesera po neyi yoyiwa, nye asi yoyiwa ngava yi pinganesere noyininke yoyiwa unene-nene. Kupinganesera po ngoporo pongorodo kuna kara erunduruko lyewa, ntani kwa lifana noyininke yapeke eyi vana tumbura mouporofete. Jehova kwa likidire asi ukaro wovantu vendi ngau runduruka. Marunduruko musinke wa tamba uporofete ou? Pokutumbura “vapangeli,” Jehova kwa likidire asi ngapa kara marunduruko monkedi omu vantu vendi ngava va pakera mbili nokuvagendesa.

8. (a) Yilye ogu ga retesa po marunduruko aga va tumbura mwaJesaya? (b) Ngapi natu gwanena mo uwa momarunduruko ogo? (Tara hena kakende “ Age kwa tambwire mavyukiso nelinunupiko.”)

8 Yilye ogu nga retesa po marunduruko ogo? Jehova kwa tente asi: ‘Ngani ku retera ngorodo nosisiliveli’ ntani ‘vapangeli ngani va ninka va pangere mombili.’ Marunduruko aga kapi ga wiza po mononkondo dovantu nye mononkondo daJehova. Kutunda apa Jesus va mu tumbire ngaHompa, Jehova kwa reta marunduruko ogo kupitira mwaMunwendi. Ngapi natu gwanena mo uwa momarunduruko ogo? Jesaya kwa tente asi marunduruko ngaga reta ‘uhunga nombili.’ Apa atu tambura mavyukiso gaKarunga nokutura po marunduruko, ose kukara nombili ano eharo lyokuhara uhungami kututumangeda tu karere Jehova, ogu ga singonona Paurusa asi: “Karunga gombili.”—Fil. 4:9.

9. Kosinke va hepa kutatekera uumwe, ntani morwasinke?

 9 Paurusa kwa tjenge hena asi: “Karunga kapi ga hara epiyagano, mbili ga hara.” (1 Kol. 14:33) Paurusa kapi ga hetakanesere epiyagano nouumwe, nye kwa li hetakanesere nombili. Morwasinke? Konakona eyi: Uumwe pwawelike kapi au retesa po mbili. Pasihonena, mbunga zovakwayita kuvhura zi gende mouumwe, nye uumwe wawo kutwaredera koyita kapisi kombili. Yipo nye, ngoVakriste twa hepa kudiworoka asi uumwe ou va dira kutatekera kombili kapi ngau karerera. Nye mbili zaKarunga kuretesa po uumwe wanarunye. Ose tuna hafa pokukara mombunga ezi a gendesa nokukuhura “Karunga gombili.” (Rom. 15:33) Mbili zaKarunga yizo azi tu ninkisa tu kare nouumwe ou atu vhuru kuhafera monombungakriste uzuni mudima.—Epis. 29:11.

10. (a) Marunduruko musinke ga horoka mombunga zaJehova nomvhura da ka pita? (Tara kakende “ Omu va wapukwilire nkedi zokupitisira.”) (b) Mapuro musinke natu ka konakona?

10 Kakende “ Omu va wapukwilire nkedi zokupitisira” kwa likida marunduruko gomombunga zaJehova nomvhura da ka pita. Ngapi ga retere Jehova ‘ngorodo mevango lyongoporo’ kupitira mwaHompa gwetu? Ngapi marunduruko ogo ga pameka mbili nouumwe monombungakriste uzuni mudima? Ngapi gana kukuvatera o karere “Karunga gombili”?

Omu a pitisire Kristusa mbungakriste

11. (a) Marunduruko musinke lya retere po ekonakono lyoBibeli? (b) Yisinke za here kurugana mbungagendesi?

11 Kutunda mo-1964 dogoro 1971, mbungagendesi kwa lirongere Bibeli va konakone omu nombungakriste domosiruwo sovapositoli ngava di gendesa. * Awo kwa ya dimbwilire asi nombungakriste dina ngava di gendesa mbunga zovakuronambunga kapisi mukuronambunga gumwe tupu. (Resa Vafilipi 1:1; 1 Timoteusa 4:14.) Mbungagendesi za yi dimbwilire asi Hompa Jesus yige ana kuvagendesa mokutura po marunduruko megendeso lyombunga zaKarunga ntani azo kwa here kukwama mavyukiso gaHompa. Makura yipo za tulire po marunduruko va kwame ngendeseso zomoMatjangwa zokuhorowora vakuronambunga. Marunduruko musinke gamwe va tulire po?

12. (a) Erunduruko musinke va tulire po mombungagendesi? (b) Faturura omu va zi wapaika Mbungagendesi. (Tara kakende “ Omu Mbungagendesi azi gendesa yirugana yoUhompa.”)

12 Erunduruko lyokuhova kwa kundamene mbungagendesi. Posiruwo sina mombungagendesi kwa hamenene mo vanavazinyetu ntambali ava va karerere po mbunga zopaveta zoNombangi daJehova Watch Tower Bible and Tract Society of Pennsylvania. Nye momvhura 1971, womombungagendesi kwa ya ligwederere va kare 11, ntani kapi va karerere po hena mbunga ozo zopaveta. Awo va yi nongwenene asi navenye womombungagendesi kwa  hetakana, yipo va tamekere kulipa marufo gokukara munasipundi.

13. (a) Ngapi ngava pitisire nombungakriste kutundilira mo-1932 dogoro 1972? (b) Yisinke za rugene Mbungagendesi mo-1972?

13 Erunduruko lyokukwama ko kwa kundamene nombungakriste. Monkedi musinke? Mo-1932 dogoro 1972, mwankenye mbungakriste kwa kere mo mupitisili gumwe tupu. Mwa za nomvhura madina goyitumbwisiso yawo kwa rundurukire ano moruhura ngava va tumbura asi vatareli wombungakriste. Awo kwa kere nomupampi gokupakera mbili womonombungakriste dawo. Nye, mwankenye mbungakriste, mutareli nga tura po matokoro ga hana kupura ko vanavazinyetugara womombunga zawo. Momvhura 1972, Mbungagendesi kwa tulire po erunduruko. Erunduruko musinke?

14. (a) Ngendeseso musinke va tulire pasirugana 1 Sikukutu 1972? (b) Ngapi muwapaiki govakuronambunga a sikisa mo epukururo lyomoVafilipi 2:3?

14 Mevango lyokukara nomupitisili gumwe mombunga, vanavazinyetu vamwe ava va sikisire mo yihepwa yomoMatjangwa nawo kwa va horowere va kare vakuronambunga. Awo ngava ruganene kumwe ngombunga zovakuronambunga. Ngendeseso ezi zompe kwa zire pasirugana 1 Sikukutu 1972. Naina, muwapaiki govakuronambunga kapi a litara mwene asi ga pitakana vakwawo nye  “mununu po.” (Ruk. 9:48) Ee, uwa musi wokukara novanavazinyetu wokulinunupika!—Fil. 2:3.

Morwa ga divire asi vantu wovanzi ngava wiza konombungakriste, Hompa gwetu yipo ga tulire po vagendesi posiruwo souhunga

15. (a) Mauwa musinke lya reta ewapaiko lyombunga zovakuronambunga? (b) Morwa kudiva asi vantu wovanzi ngava wiza konombungakriste, yisinke ga rugene Hompa gwetu?

15 Ewapaiko lyokugava yitumbukira kovakuronambunga wokulisiga-siga kwa retere mauwa gomanzi. Koneka mauwa gatatu: Wokuhova, ewapaiko eli kwa vatera vakuronambunga navenye yi kare asi yitumbukira musinke va kara nayo va dimburure asi Jesus yige Mutwe gombungakriste. (Efe. 5:23) Wauvali, ngomu va yi tumbura moYisewe 11:14 asi: “Vapukuruli wovanzi kuninka asi eparu.” Pokuzogera kumwe nokulipa magano, vakuronambunga kutura po matokoro kuliza nonompango doBibeli. (Yis. 27:17) Jehova kutungika matokoro gawo, makura tayi va tompoka. Wautatu, mokukara novakuronambunga wovanzi, awo kuvhura kupakera mbili vantu womonombungakriste edi dina kuligwederera. (Jes. 60:3-5) Mo-1971 kwa kere po nombungakriste 27 000 ano mo-2013 kwa pitakanene 113 000! Morwa ga divire asi vantu wovanzi ngava wiza konombungakriste, Hompa gwetu yipo ga tulire po vagendesi posiruwo souhunga.—Mika 5:5.

 “Kareni sihonena kombunga”

16. (a) Situmbukira musinke va kara naso vakuronambunga? (b) Ngapi Valirongi woBibeli va tere epukururo lyaJesus ‘lyokukunga nonzwi’?

16 Mosiruwo soValirongi woBibeli, vakuronambunga va kwete egano asi va kere nositumbukira sokuvatera vapuli vakwawo va karere Karunga. (Resa Vagarata 6:10.) Mo-1908, sirongwa somoRuhungu kwa konakonene etumangedo lyaJesus asi: “Kunga nonzwi dange.” (Joh. 21:15-17) Sirongwa kwa tente asi: “Ayo ya kara nomulyo asi tu tare situmbukira sokupitisira asi mulyo unene.” Mo-1925, Ruhungu kwa nkondopekere mulyo gokukara vasita pokudiworokesa vakuronambunga asi: “Ezi ngereka zaKarunga mwene, . . . ntani age kundindira ko yoyinzi kowo ava zi pitisire.”

17. Ngapi vakuronambunga va va vatera va kare vasita wovawa?

17 Ngapi omu mbunga zaJehova za vatera vakuronambunga va wapukurure ediwo lyawo ngwendi ‘sisiliveli pevega lyosivera’? Pokugava edeuro. Mo-1959, kwa kere sikando sokuhova kurugana Sikora zoYirugana yoUhompa zovakuronambunga. Ruha rumwe rosikora kwa demenene kosiparatjangwa “Kupakera mbili vazuvhisi.” Vakuronambunga kwa va korangedere va tulise po “elikwamo lyokudingura vazuvhisi momambo gawo nokuvakorangeda.” Sikora kwa zogerere nonkedi dokulisiga-siga omu vakuronambunga nava gava ekorangedo lyewa medinguro lyawo. Mo-1966, Sikora zoYirugana yoUhompa kwa zi wapukwilire. Kwa zogerere mo sirongwa “Mulyo gomadinguro gekorangedo.” Yisinke va demenene mosirongwa oso? Owo ava pitisire “va hepa kukara neharo lyokupakera mbili siunda saKarunga nye va hana kuncenuna yitumbukira yawo yepata noyirugana yawo yokuzuvhisa.”  Monomvhura edi, nosikora dovakuronambunga kuna kudirugana. Yitundwamo musinke ya kara morwa kugwana edeuro lyomombunga zaJehova? Naina, nombungakriste kwa kara novagara mayovi wokuwapera ava ava takamesa siunda.

Sikora zoYirugana yoUhompa moFilipine 1966

18. (a) Sirugana musinke va va pa vakuronambunga? (b) Morwasinke Jehova naJesus va harera vakuronambunga wokurugana unene?

18 Vakuronambunga navenye kwa va horowora Jehova kupitira mwaHompa Jesus, va sikise mo sirugana sendi. Sirugana musinke oso? Sirugana sokupitisira nonzwi daKarunga mosiruwo esi soudigu. (Efe. 4:11, 12; 2 Tim. 3:1) Jehova naJesus kwa hara vakuronambunga morwa vanavazinyetu owo kulimburukwa etumangedo lyoMatjangwa asi: “Kareni vasita wosiunda saKarunga esi ga mu pa, si takameseni neharo . . . kareni sihonena kombunga.” (1 Pet. 5:2, 3) Tu konakoneni nonkedi mbali omu vakuronambunga va kara sihonena kosiunda nomu ava gwederere kombili noruhafo romombungakriste.

Omu vasita ava pakere mbili siunda saKarunga

19. Ngapi omu o lizuvhu kurugana novakuronambunga moyirugana yokuzuvhisa?

19 Nkedi zokuhova, vakuronambunga kuzuvhisa kumwe novanavazinyetu womombungakriste. Rukasa kwa uyungire kuhamena Jesus asi: “Ta zi mwa za yitata a udise Mbudi zoUntungi waKarunga. Owo murongo navavali awo kumwe nendi.” (Ruk. 8:1) Ngomu tupu Jesus nga zuvhisa novapositoli vendi, vakuronambunga nawo kuzuvhisa kumwe novapuli vakwaawo. Awo va yi dimburura asi pokurugana oyo kugwederera kombili noruhafo mombungakriste. Ngapi omu mbungakriste azi lizuvhu kuhamena vakuronambunga owo? Jeannine,  munazinyetukadi gonomvhura dokoyiha 90, kwa tanta asi: “Kurugana kumwe nomukuronambunga mokuzuvhisa kupa nge mpito mokuzogera nendi ntani nokumudiva nawa.” Steven, munazinyetugara gonomvhura dokoyiha 35, kwa tanta asi: “Apa ani rugana nomukuronambunga moyirugana ya tunda embo zende embo, kuninkisa nge ni lizuvhe asi ana hara kuvatera nge. Kugwana evatero lyangoso kuhafesa nge.”

Ngwendi moomu tupu musita a papara nzwi zokuzumbana, vakuronambunga nawo kulitura mo mokupapara owo ava tengura monyima

20, 21. Ngapi vakuronambunga nava honena musita gomosifanekeso saJesus? Gava sihonena. (Tara hena kakende “ Madinguro gokureta ruhafo.”)

20 Nkedi zauvali, mbunga zaJehova kwa deura vakuronambunga va kare neharo kowo va hageka kuwiza komapongo. (Heb. 12:12) Morwasinke vakuronambunga nava vaterera ava vana tengura monyima ntani ngapi nava yi rugana? Elimbururo kuligwana mosifanekeso saJesus kuhamena musita nonzwi zokuzumbana. (Resa Rukasa 15:4-7.) Apa musita ga dimbwilire asi nzwi zendi zina zumbana, ta zi a ka zi papare ngwendi asi zelike ga wekere. Ngapi omu vakuronambunga naina ava temwinine sihonena somusita gwina? Ngwendi moomu tupu nzwi zina za kere nomulyo komusita, owo ava hageke kuwiza komapongo mulyo kovakuronambunga. Awo kutara ava va tengura monyima ngwendi nonzwi dokuzumbana. Ngwendi moomu tupu musita ga tokwere ‘kuza a ka papare zokuzumbana dogoro noku ga ka zi gwene,’ vakuronambunga nawo kulitura mo mokupapara nokuvatera owo ava tengura monyima.

21 Yisinke musita ga rugene apa ga ka gwene nzwi? Ta zi damuna “ta zi likambeke komapepe,” nokuzitwara kosiunda. Mokulifana, nonkango dovakuronambunga dekorangedo kuvhura kutumangeda ogu ga tengura monyima nokumuvatera a tengure mombungakriste. Eyi yiyo ya horokerere Victor, munazinyetugara gomoAfrika ogu ga hagekere kuwiza komapongo. Age kwa tanta asi: “Monomvhura ntantatu edi na tengwire monyima, vakuronambunga ngava hetekere ko kuvatera nge.” Yisinke ya mu kundamene? Age kwa tente asi: “Ezuva limwe, John, mukuronambunga ogu na ka kere nendi koSikora zoVazuvhisi wokukarerera, kwa litulilire posiruwo sokudingura nge nokulikida nge mafano aga ga tu fanekere kosikora. Ago kwa diworokesere nge yininke yoyiwa yoyinzi makura tani tameke kurongora ruhafo oru na kere naro apa ngani karere Jehova.” Konyima zedingura lyaJohn, Victor ga tengwire kombunga. Age ngesi kuna kara muzuvhisi gokukarerera hena. Yosili, vakuronambunga ava va tu hara kugwederera koruhafo rwetu.—2 Kol. 1:24. *

 Vakuronambunga kunkondopeka uumwe wovantu vaKarunga

22. Ngapi uhungami nombili ayi nkondopeke uumwe womombungakriste? (Tara hena kakende “ Ya tu tetukisire.”)

22 Jehova kwa pumbire asi uhungami nombili ngayi vhuka mokatji kovantu vendi. (Jes. 60:17) Yikara nayinye eyi kunkondopeka uumwe wonombungakriste. Mononkedi musinke? Kuhamena uhungami, ‘Karunga a huru yige gelike HOMPA.’ (Deut. 6:4) Nompango dendi douhungami kapi da lisiga monombungakriste domoyirongo yapeke. Nompango dendi da lifana “monombungakriste nadinye dokupongoka.” (1 Kol. 14:33) Mbungakriste ngazi kura nsene zi kwama nompango daKarunga. Kuhamena mbili, Hompa gwetu kapi tupu ga tu harera tu hafere mbili mombungakriste nye hena tu ‘retese po mbili.’ (Mat. 5:9) Yipo nye ose ‘kukondjera eyi ayi reta mbili.’ Ose kulitura mo mokukohonona po nkenye maudigu. (Rom. 14:19) Monkedi zangoso ose kugwederera kombili nouumwe wombungakriste.—Jes. 60:18.

23. Ngovakareli vaJehova, yisinke tuna kuhafera naina?

23 MwaMangundu 1895, apa Ruhungu rwa divisire mawapaiko gokutulisa po vakuronambunga, vanavazinyetu ava va kere vapitisili nawo va yi haferere. Awo kwa kanderere kwaKarunga asi ngano mawapaiko ogo ga vatere vantu vendi va kare “mouumwe wepuro.” Ose tuna kara norupandu asi mawapukururo gokuhamena vapitisili aga ga retesa po Jehova kupitira mwaHompa gwetu kwa nkondopeka uumwe moukareli wetu. (Epis. 99:4) Ngoyitundwamo, naina vantu vaJehova uzuni mudima kuna kara ‘mompepo zimwe nomoyikara yimwe,’ nokukarera “Karunga gombili” “nomutjima gumwe.”—2 Kol. 12:18; resa Vafilipi 1:27.

^ para. 11 Yitundwamo yekonakono kwa yi pwagesere mobuke Aid to Bible Understanding.

^ para. 21 Tara sirongwa “Vakuronambunga ‘kurugana nose morwauwa wanyamwetu,’” mosifo soRuhungu 15 Murongagona 2013, pepenuno 27-31.