Zende koyikaramo

Zende koyikaramo

Nombangi daJehova

Horowora eraka Rukwangali

Mbilive zokutunda kombungagendesi

Mbilive zokutunda kombungagendesi

Kovazuvhisi vakwetetu woUhompa wokuhara:

GAZARA asi nove kuna kara mepata lyoBeteli zomoBrooklyn moUtano, ngurangura, 2 Sikukutu 1914. Ono hingire posipundi soge nokundindira munazinyetu C. T. Russell. Hararasi, munazinyetu Russell ta hwilire mosiliro. Ta morora epata lyoBeteli asi: “Morokeni namuvenye.” Mevango lyokuhingira, ta sakerere nokuuyunga asi: “Siruwo sovapagani sina haga; vahompa vawo kapi hena ngava kara nononkondo!” Ono hafa unene morwa kwa ndindira siruwo oso nomvhura dononzi! Namuvenye vemepata lyoBeteli tomu sakerere morwa mbudi ozo zoruhafo.

Nomvhura dononzi dina piti po kutunda apa munazinyetu Russell ga uyungire nonkango odo dokuhafesa. Yisinke Uhompa  wa sikisa mo kutunda pena? Yininke yoyinzi! Kupitira moUhompa, Jehova kwa deura vantu vendi, kutundilira mo-1914 vazuvhisi kwa ligwederera nokusika komamiliyona ntambali noukahe. Ngapi omu wa gwanena mo uwa medeuro olyo?

Naina ose kuzuvha vanavazinyetu kuna kuuyunga asi: “Etemba lyaJehova kuna kugenda!” ano ayo usili. Nye kutundilira mo-1914, etemba eli ali fanekesa ruha rombunga zaJehova zemeguru, kuna kugenderera unene, ngomu nazi ka yi likida buke ezi. Mokuzuvhisa mbudi uzuni mudima, vazuvhisi woUhompa kwa ruganesa nonkedi dokulisiga-siga ngwendi nosaitunga noyidanauka noyikarata nonongaramafona noradio ntani Intaneta.

Nevatero lyaJehova mosirugana esi, ose ngesi kunduruka yimbapiratjangwa yoBibeli momaraka gokupitakana 670 nokuyigavera kovantu navenye pwa hana mfuto. Valizambeli kutunga Yinyanga yoUhompa noYinyanga yoyigongi ntani nomatungo goBeteli moyirongo youngawo neyi yoruhepo. Apa ayi horoka yimpagwa, vanavazinyetu kulizambera mokuvatera ava yina kundama mokulikida asi ‘kwa karera po va likwafe moudigu.’—Yis. 17:17.

Pamwe, vampitisili womaukarelikarunga novarwanesi vamwe “ava ava hakanene mokupangura,” kwa hetekerere ko kuhagekesa mbudi zongwa nye ayo kunkondopeka epuro lyetu mokumona asi marwaneso gawo kapi ga tompoka nye ‘mbudi zongwa kwa lihanena nakunye.’—Epis. 94:20; Fil. 1:12.

Azo mfumwa mokuruganena kumwe none vakwetetu ‘ngovantu’ vaKarunga. Ose twa mu hara unene. Buke ezi ngazi mu vatera mu kare norupandu komarongo aga twa gwana.—Mat. 24:45.

Kuna kumuharera uwa

Vanavazinyeni

Mbungagendesi zoNombangi daJehova