Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 22

Uhompa tau sikisa mo mpango zaKarunga pevhu

Uhompa tau sikisa mo mpango zaKarunga pevhu

OKU LYA DEMENENA EGAUNUNO

Uhompa tau sikisa mo matumbwidiro nagenye gaKarunga kuhamena vantu nevhu

1, 2. (a) Morwasinke ayi tu digoperere pamwe kumona Paradisa momagano getu? (b) Yisinke nayi tu vatera tu nkondopeke ehuguvaro lyetu momatumbwidiro gaKarunga?

MUNAZINYETUGARA gomulimburukwi ta ya siki kepongo, age ana roroka unene morwa yirugana. Muhona gwendi kumutekura momudona ntani ana kara nosinka sokupakera mbili epata lyendi nesi souvera wamukadendi. Ngomu musika guna kutameka, age ta lizuvhu rufuwo noruhafo morwa ana ya siki koSinyanga soUhompa oku kuna kara vapuli vakwaawo. Rusumo kuna kara rwehuguvaro lyoParadisa, ntani nonkango daro kuna kumuninkisa a ligazare ngwendi mouzuni woupe ana kara. Age kwa hara rusumo oro, ano ngomu ana kurudimba nepata lyendi, kuna kulizuvha ehengagwido.

2 Wa lizuvha rumwe ngoso ndi? Sinzi setu yimo atu lizuvhu. Nye yinka youzuni ou kutuninkisa yi tu digopere kumona Paradisa momagano getu. Eyi kuna kara “yiruwo yoyidigu,” ntani mouzuni ou kwato eyi ya lifana noparadisa. (2 Tim. 3:1) Yisinke nayi tu vatera tu nkondopeke ehuguvaro lyetu? Ngapi omu twa yi diva nawa-nawa asi Uhompa waKarunga ntaantani ngau ya pangere vantu navenye? Tu konakoneni mauporofete gamwe gaJehova aga ga sikilire mo mosiruwo sanare. Ntani natu ka konakona hena omu mauporofete ogo gana kusikilira mo ngesi. Ano moruhura, natu ka konakona omu mauporofete aga aga kundama ehuguvaro lyetu lyokomeho.

Omu Jehova ga sikisire mo matumbwidiro gendi mosiruwo sanare

3. Etumbwidiro musinke lya geve ehengagwido koVajuda ava va kere mounkwate waBabironi?

3 Gazara tupu omu eparu lya fene apa Vajuda va kere mounkwate waBabironi. Sinzi sawo kwa kulilire mounkwate novakurona vawo, ntani eparu kwa digopere. Vababironi kwa hepekere Vajuda morwa epuro lyawo mwaJehova. (Epis. 137:1-3) Nampili ngomu va kere mo nomvhura dononzi, Vajuda wovalimburukwi kwa kwatererere kehuguvaro lyawo asi Jehova nga va tengwida kosirongo sawo. Jehova kwa  tente asi ukaro ngau ka wapa. Age kwa hetakanesere sirongo saJuda koparadisa zomosikunino saEdeni! (Resa Jesaya 51:3.) Matumbwidiro gangoso kwa pere ehuguvaro vantu vaKarunga nokugusa po masinganyeko gawo. Monkedi musinke? Tatu ka konakona mauporofete gamwe.

4. Yisinke Jehova ga tumbwidilire Vajuda kuhamena mbili mosirongo sawo?

4 Mbili. Nonkwate dina kwa tengwire, kapisi moparadisa, nye mosirongo esi sa kere mapuku ure wonomvhura 70, sirongo esi va dilire kumona sinzi sawo. Mosirongo kwa kere mo vanyime nomambungu novangwe ntani noyikasama yimwe ngoso. Vanturagumbo nampo ngava lipura asi: ‘Ngapi ngani popera mukadange novana vange? Ngani vhura kupopera nonzwi nonongombe ndi?’ Yimo ya kara ngorooro kukara nosinka. Gazara kuhamena etumbwidiro lyaKarunga mwaJesaya 11:6-9 ntani nomu lya geve ehengagwido. (Resa.) Jehova kwa tumbwidilire nonkwate dina asi ngadi kara mombili kumwe noyimuna yado mosirongo saJuda. Pokutanta asi vanyime ngava lya wayi kwa tembe asi kapi ngava lya nongombe doVajuda. Valimburukwi kapi ngava tjira yikasama yangoso. Jehova kwa tumbwidilire asi nampili mosanzara ndi mowiza nga va popera.—Hes. 34:25.

5. Mauporofete musinke ga vaterere nonkwate di kare nehuguvaro asi Jehova nga di pa nondya dononzi?

5 Nondya dononzi. Nampo va lipulire hena asi: ‘Ngani vhura kukarera epata lyange mosirongo esi tuna kutengura ndi? Kupi oku ngatu ka tunga? Ngaku kara yirugana yoyiwa kupitakana eyi tuna kurugana moupika ndi?’ Jehova ga divire yinka yangoso. Makura age ga tumbwidilire vantu vendi asi nga va rokesera mvhura va kare “nomuzangu gomunzi.” (Jes. 30:23) Kuhamena mararo noyirugana, Jehova kwa va tumbwidilire asi: “Ngava litungira mambo omu ngava kara – nagumwe si ogu nga va ruganesa. Awo ngava tapeka moyipata, tava lipanda vhinyu – azo kapi ngava zi nwa vapeke.” (Jes. 65:21, 22) Yosili, eparu lyawo lya ya wepe kupitakana eparu lyomounkwate waBabironi. Nye ngapi kuhamena maudigu gomanene aga ga va twaredesere mounkwate?

6. Moudigu musinke va kere vantu vaKarunga, ntani yisinke ga va tumbwidilire Jehova?

6 Elikwatakano lyewa naJehova. Komeho va ze mounkwate, vantu vaKarunga kwa tezere po elikwatakano lyawo naJehova. Kupitira momuporofete Jesaya, Jehova kwa tanterere vantu vendi asi: “Mutwe goge ove Israeli, nare vana gu kudumike yironda, ano mutjima goge nomagazaro goge kuna kuvera.” (Jes. 1:5) Awo kwa kere ngwendi vatwiku noyipurupuru, morwa kapi va purakenene komapukururo gaJehova nokumona mauzera aga ga va pere. (Jes. 6:10; Jer. 5:21; Hes. 12:2) Ngano asi ava va ka tengwire kounkwate kwa kere ngwendi vatwiku noyipurupuru, ngano va handukisire hena Jehova nokudira kukara nombili. Jehova kwa va hengagwidire  asi: “Ezuva olyo apa ngali sika mo, sipurupuru ngasi vhura kuzuvha ko apa ngava resa buke nezwi lyenene, ano vatwiku ava va kara modovera, meho gawo ngaga mahuka, makura tava mono ko.” (Jes. 29:18) Jehova kwa tumbwidilire asi nga tura po hena elikwatakano kumwe novantu wokulitezurura. Nsene asi ngano va twikilire kulimburukwa, Jehova ngano ga va pere mapukururo nomavyukiso aga ngano ga parwire nomwenyo dawo.

7. Ngapi omu matumbwidiro gaKarunga ga sikilire mo koVajuda, ntani morwasinke esikiliromo olyo ali nkondopekere epuro?

7 Jehova ga sikisire mo etumbwidiro lyendi ndi? Yimo. Vajuda ava va tengwire kosirongo sawo kwa va tungikire nombili nomuzangu gomunzi ntani nelikwatakano lyewa naJehova. Age kwa va poperere kononkore dawo dononzi dononkondo. Yikasama kapi ya dipagere yimuna yawo. Vajuda vena kwa mwene tupu esikiliromo lyenunu lyomauporofete goparadisa aga va tjenge vagara ngwendi Jesaya naJeremiya ntani Hesekiyeli, nye esikiliromo eli va mwene kwa va hafesere. Ngomu tuna kugazadara ko kweyi Jehova ga ruganena vantu vendi mosiruwo sanare, yimo ngali nkondopara epuro lyetu. Nsene asi esikiliromo lyenunu lyomauporofete kwa hafesere unene vantu, ngapi omu ngali ka kara esikiliromo lyene-lyene? Tu konakoneni eyi ga tu ruganena Jehova momazuva getu.

Omu Jehova ga tameka kusikisa mo matumbwidiro gendi momazuva getu

8. Yisinke guna kuhafera muhoko gwaKarunga naina?

8 Vantu vaJehova kapi va tunga mosirongo simwe ngwendi muhoko gumwe tupu. Nye Vakriste wovagwavekwa kwa tulisa po muhoko gopampepo, ndi ‘muhoko gwaKarunga.’ (Gar. 6:16) Vagwavekwa “nononzwi dapeke” kwa lipakerera mombunga zaJehova ezi za fana ngwendi “muhoko,” va karere Jehova Karunga mouumwe nomombili. Ukareli owo kuna kara ruha rweparu lyawo. (Joh. 10:16; Jes. 66:8) Vakareli vaJehova va mona esikiliromo limwe lyomauporofete kuhamena paradisa. Tu konakoneni yihonena yimwe.

9, 10. (a) Ngapi omu uporofete waJesaya 11:6-9 una kusikilira mo naina? (b) Yisinke ayi likida asi vantu vaKarunga kwa kara mombili?

9 Mbili. Mouporofete waJesaya 11:6-9, ose kuresa kuhamena mbili pokatji koyikasama novantu noyimuna yawo. Nonkango odo kuna kusikilira mo naina ndi? Yimo! Velise 9 kwa likida eyi yikorama ngayi dilira kukara siponga: Morwa “sirongo ngasi zura ediwo lyaHOMPA moomu lya zura efuta mema.” “Ediwo” lyaJehova kurundurura nkareso zoyikorama ndi? Hawe, alyo kurundurura vantu va dive Karunga gekEguru-guru ntani va lironge kuhonena nkareso zendi zombili. Eyi yiyo vantu vaKarunga vana karere nombili mokatji kawo naina, ntani ose kuna kumona omu uporofete ou una kusikilira mo. Mepangero lyoUhompa, vasikuli  vaKristusa kuna kulironga kusiga yikara yonyanya ngwendi yoyikasama, yipo va paruke mombili kumwe novapuli vakwaawo.

10 Pasihonena, mobuke ezi twa lironga nokonda dopatjangwa eyi Vakriste ava dilire kulihameka moupolitika nomoyita, ntani nomahepeko aga va ligwanekera nago morwa kudira kuyirugana. Ayo kutetukisa asi mouzuni ou wonyanya, mwa kara “muhoko” ogu agu dili kulihameka monyanya nampili va gu tjilise asi tava gu dipaga. Eyi kugava umbangi asi vantu ava a pangere Hompa goUmesiyasa kuna kuhafera mbili ezi va singonona mwaJesaya! Jesus kwa tente asi vasikuli vendi ngava va dimbwilira keharo eli ava lilikida vene navene. (Joh. 13:34, 35) Mombungakriste, Kristusa kuna kuruganesa “mukareli gokulimburukwa gonondunge” a ronge Vakriste wousili va kare nombili neharo ntani nonkenda.—Mat. 24:45-47.

11, 12. Nzara musinke zina vhuka mouzuni naina, nye ngapi omu Jehova a pe vantu vendi nondya dononzi?

11 Nondya dononzi. Uzuni kuna kuhepa konzara zopampepo. Bibeli kwa rondora asi: “Ruveze runa siki mo ni tume erumbu mosirongo. Vantu ngava fa nzara, nye kapisi zomboroto. Awo ngava fa enota, nye kapisi lyomema. Nye awo ngava fa nzara nenota lyononkango daHOMPA Mupangeli,  nyame na yi uyunga.” (Amosa 8:11) Vanamvharerwa woUhompa waKarunga nawo kuna kuhepa konzara ozo ndi? Jehova kwa pumbire malisigo pokatji kovantu vendi nononkore dendi asi: “Ava ava kerere nge, tava limburukwa nge ngava kara neyi yoyinzi yokulya nokunwa. Nye one ngomu fa nzara nenota. Awo ngava hafa, nye one ngomu swauka.” (Jes. 65:13) Wa mona esikiliromo lyononkango edi ndi?

12 Mawapaiko gopampepo kuna kupupa ngwendi mukuro. Yimbapiratjangwa yetu yoBibeli nomakwateko nonovidiyo nomapongo noyigongi yetu ntani noyimbapiratjangwa yokoIntaneta kuna kara nkedi omu atu gwana nondya mouzuni ou wonzara zopampepo. (Hes. 47:1-12; Jow. 3:18) Ayo kukuhafesa mokumona omu matumbwidiro gaJehova gana kusikilira mo meparu lyoge ndi? Ove kulya nkenye apa kositafura saJehova ndi?

Nombungakriste detu kutuvatera tu kare nombili nelikwatakano lyewa naJehova

13. Monkedi musinke wa mona vatwiku kuna kumona ntani yipurupuru kuna kuzuvha ko?

13 Elikwatakano lyewa naJehova. Naina, utwiku noupurupuru wopampepo una vhuka. (2 Kol. 4:4) Nampili ngoso, Kristusa kuna kuverura vantu wovanzi mouzuni mudima. Wa mona omu vatwiku vana kumona nomu yipurupuru yina kuzuvha ko ndi? Nsene wa mona vantu kuna kutambura ediwo lyosili lyoNonkango daKarunga nokunyokera po yimpempa yomaukarelikarunga eyi ayi va ninkisa va kare vatwiku noyipurupuru, ove ngoso wa mona esikiliromo lyetumbwidiro eli asi: “Ezuva olyo apa ngali sika mo, sipurupuru ngasi vhura kuzuvha ko apa ngava resa buke nezwi lyenene, ano vatwiku ava va kara modovera, meho gawo ngaga mahuka, makura tava mono ko.” (Jes. 29:18) Uzuni mudima mayovi govantu nkenye mvhura kuna kuveruka pampepo. Nkenye muntu ogu a tundu moBabironi zonene nokuyalipakerera nose koukareli wousili, kulikida asi matumbwidiro gaJehova kuna kusika mo meparu lyendi.

14. Kosinke natu teda yipo tu nkondopeke epuro lyetu?

14 Nkenye egaununo lyobuke ezi kugava umbangi asi Kristusa kwa reta vasikuli vendi mouumwe va hafere mbili momazuva aga gopouhura. Tu twikireni kuteda ko omu va tu tungika mouumwe wangoso. Moomu tuna kuyirugana, epuro lyetu momatumbwidiro gaJehova gokomeho ngali twikira kunkondopara.

“Uhompa woge au wize”

15. Ngapi tuna yi diva asi evhu ngali kara paradisa?

15 Sitambo saJehova kuna kara asi evhu nalinye li kare paradisa. Age kwa tulire Adamu naEva mosikunino soparadisa ntani kwa va pangerere asi va livhare va zwide evhu nokupakera mbili yinamwenyo nayinye yepevhu. (Gen. 1:28) Nye Adamu naEva kwa kwatesere ko Satana mokurwanesa  Karunga, ano eyi kwa retera ruvharo rwawo nonzo nonomfa ntani nokudira kusikilira mo. Nye sitambo saKarunga kapi sa runduruka. Nonkango dendi nkenye apa kusika mo. (Resa Jesaya 55:10, 11.) Ose twa yi diva asi ruvharo rwaAdamu naEva ngaru zwida evhu nokulipangera, ntani nokupakera mbili yinamwenyo nayinye moparadisa uzuni mudima. Posiruwo oso, mauporofete aga va geve koVajuda ava va kere mounkwate kuhamena eparu lyewa ngaga ka sikilira mo momunene. Tu konakoneni yihonena hena yimwe.

16. Mbili musinke za singonona Bibeli ezi ngatu ka hafera moParadisa?

16 Mbili. Nonkango daJesaya 11:6-9 ngadi ka sikilira mo momunene. Vagara novakadi novanona ngava kara mombili nomompora nkenye oku ngava tunga. Kwato yinamwenyo ngayi kara siponga koyikwawo, va kare asi vantu ndi yikorama. Gazara tupu siruwo apa ngo ka mona evhu eli nalinye ngembo lyoge, nokuzogana monomukuro nomomadiva nomomafuta, nokuronda konondundu ntani nokugendagura mosanzara wa hana woma. Nampili masiku, kapi ngo kara noutjirwe. Nonkango daHesekiyeli 34:25 ngadi sikilira mo, vantu vaKarunga ngava ‘kara mombili mosanzara, tava rara mowiza.’

17. Ngapi tuna yi diva asi Jehova nga ka tu pa nondya dononzi apa Uhompa ngau pangera evhu nalinye?

17 Nondya dononzi. Gazara siruwo apa ruhepo nonzara nouvera ngayi dira kukakara ko. Nondya dononzi dopampepo edi vana kuhafera ngesi vantu vaKarunga kulikida asi Hompa goUmesiyasa nga ka kutika vantu vendi koyihepwa yawo nayinye. Apa ga kere Jesus pevhu, age kwa yi likidire asi nga ka sikisa mo matumbwidiro ogo, morwa kwa kutikire vantu mayovi nonomboroto nonomfi dongandi tupu. (Mat. 14:17, 18; 15:34-36; Mar. 8:19, 20) Apa Uhompa waKarunga ngau pangera evhu nalinye, uporofete ou ngau ka sikilira mo: “Nkenye apa ngo kuna mbuto zoge, HOMPA nga zi rokesera mvhura zi kure, makura ngo kare nomuzangu gomunzi, ano yimuna yoge ngayi kara nomauliro gomanene.”—Jes. 30:23.

18, 19. (a) Ngapi uporofete waJesaya 65:20-22 wa kara nomulyo koge? (b) Monkedi musinke ngatu ka “kara nomwenyo gomure ngwendi yitji”?

18 Naina vantu kuvadigopera kukara nembo lyewa ndi kukara noyirugana eyi nava hafera. Mouzuni ou woudona, wovanzi kurugana novili dononzi nye kugwana tupu mfeto zonunu, siruwo oso nongawo kuna kugwana yoyinzi. Gazara tupu omu ngayi ka fana apa uporofete ou ngau ka sikilira mo uzuni mudima: “Vantu ngava litungira mambo omu ngava kara – nagumwe si ogu nga va ruganesa. Awo ngava tapeka moyipata, tava lipanda vhinyu – azo kapi ngava zi nwa vapeke. Vantu vange, ngava kara nomwenyo gomure ngwendi yitji. Awo ngava hafera unene yininke eyi va rugana vene.—Jes. 65:20-22.

 19 Yisinke ayi tanta asi vantu ngava “kara nomwenyo gomure ngwendi yitji”? Apa o sikama pedi lyemutji, ove kulipura asi nomvhura dokuhura kupi lya kara po, nampo nare-nare komeho va hampuruke onyokokuru ndi? Kuvhura yi kare asi ove kuvhura ngo fe nye oso sitji aso simpe kuna kutwikira kuparuka. Ee, omu tupu ayi tu hafesa pokudiva asi Jehova kwa tumbwidira Paradisa omu ngatu ka kara nomwenyo gomure ngwendi yitji! (Epis. 37:11, 29) Siruwo tasi wiza apa ngatu ka mona yitji eyi ya kara nomwenyo gomure kuna kuhaga po ngwendi wayi, nye ose siruwo oso kuna kutwikira kuparuka narunye nanarunye!

20. Ngapi omu valimburukwi ngava ka hafera ukanguki wokusikilira mo?

20 Ukanguki wokusikilira mo. Naina, mauvera nonomfa kuna kukundama vantu navenye. Natuvenye kuvera, morwa kwa pinga nzo. Nzambo zaKristusa zosizoweseso yizo zelike zokuvhura kutuverura. (Rom. 3:23; 6:23) MEpangero lyoNomumvho eyovi, Jesus nava nga ka pangera kumwe nawo ngava ka vatera vantu va ka gwanene mo uwa monzambo zendi, makura kanunu-kanunu vantu wovalimburukwi ngava ka veruka konzo ozo. Uporofete ou waJesaya ngau ka sikilira mo: “Nagumwe si gomosirongo esi twa kara nga sivana asi ta vere, ano nonzo nadinye ngava di dongonona po.” (Jes. 33:24) Gazara tupu siruwo apa ngaku dira kukakara vatwiku noyipurupuru noyirema. (Resa Jesaya 35:5, 6.) Jesus nga ka verura mauvera nagenye, ga kare asi goparutu ndi gopamagazaro ndi gopamalizuvho. Vantu wovalimburukwi ngava ka hafera ukanguki wokusikilira mo!

21. Yisinke ngayi ka horokera nomfa, ntani morwasinke etumbwidiro olyo ali hengagwidire?

21 Yisinke ngayi ka horokera nomfa edi za retesa po nzo? Nomfa, ‘nkore zetu zokuhulilira,’ kufunda vantu navenye wokudira kusikilira mo. (1 Kol. 15:26) Nkore ezi kutjindira Jehova ndi? Koneka eyi ga pumbire Jesaya asi: “HOMPA Mupangeli nga hanagura po nomfa dogoro narunye! Navenye ngava kokota mahodi.” (Jes. 25:8) Gazara kuhamena siruwo oso! Kapi ngaku ka kara mahoreko nomayendo ntani mahodi goruguwo! Nye ngapa ka kara mahodi goruhafo ngomu Jehova nga ka sikisa mo etumbwidiro lyendi lyokukapindura vafe! (Resa Jesaya 26:19.) Yosili, kukora konomfa ngava ka ku gusa po.

22. Yisinke ngayi ka horoka apa Uhompa woUmesiyasa ngau ka mana kukasikisa mo mpango zaKarunga pevhu?

22 Kehagero lyoNomumvho eyovi, Uhompa ngau ka mana kukasikisa mo mpango zaKarunga pevhu, makura Kristusa nga ka gava epangero koGuhwe. (1 Kol. 15:25-28) Vantu wokusikilira mo ngava ka liwapaikira eheteko lyokuhulilira apa Satana ngava ka mu mangurura monomango dendi. Konyima zoyo, Kristusa nga ka myona mutwe gwezoka ntani novakwatesiko valyo navenye. (Gen. 3:15;  Ehor. 20:3, 7-10) Nye navenye ava va hara Jehova ngava gwana eparu lyewa. Bibeli kulikida asi valimburukwi ngava za “mezowoko lyouyerere wovana vaKarunga.”—Rom. 8:21.

Uhompa ngau ka sikisa mo matumbwidiro gaJehova nagenye kuhamena vantu nevhu

23, 24. (a) Morwasinke tuna karere nehuguvaro asi matumbwidiro gaKarunga ngaga sika mo? (b) Yisinke ono tokomene kurugana?

23 Matumbwidiro ogo kapisi gomawoko-woko. Kwato eyi ngayi kondera matumbwidiro gaJehova mokusika mo. Morwasinke? Diworoka nonkango daJesus edi twa zogerere megaununo lyokuhova lyobuke ezi. Age kwa rongere vasikuli vendi va kanderere kwaJehova asi: ‘Uhompa woge au wize. Mpango zoge ava zi sikise mo pevhu ngwendi meguru.’ (Mat. 6:9, 10) Uhompa waKarunga kapi wa kara momutjima gomuntu. Awo epangero eli lina kupangera ngesi meguru. Awo kwa sikisa mo matumbwidiro gaJehova ure wonomvhura efere, ano eyi kuyimonenena mombungakriste. Yosili, matumbwidiro gaJehova nagenye ngaga sikilira mo apa Uhompa waKarunga ngau tameka kupangera evhu!

24 Ose twa yi diva asi Uhompa waKarunga ngau wiza. Ntani twa kara nehuguvaro asi nkenye etumbwidiro lyaJehova ngali sika mo. Morwasinke? Morwa UHOMPA WAKARUNGA KUNA KUPANGERA! Ya wapa tu lipure asi: ‘Uhompa kuna kupangera nge ndi?’ Tu tokomeneni kuparuka ngovanamvharerwa woUhompa yipo ngatu gwanene mo uwa mepangero olyo narunye nanarunye!