Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 8

Yiruganeso yokuzuvhisa—Kuruganena vantu navenye yimbapiratjangwa

Yiruganeso yokuzuvhisa—Kuruganena vantu navenye yimbapiratjangwa

OKU LYA DEMENENA EGAUNUNO

Jehova kuna kutupa yiruganeso eyi twa hepa mokuronga vantu wokonomuhoko nomomarudi nomomaraka nagenye

1, 2. (a) Posiruwo sovapositoli, yisinke ya ninkisire mbudi zongwa zi lihane mosirongo saRoma? (b) Yisinke yina kulikida asi Jehova kuna kutuvatera mosiruwo setu? (Tara kakende “ Mbudi zongwa momaraka gokupitakana 670.”)

VANTU ava va zire koJerusarema momvhura 33 poPentekoste kwa ka tetukire, morwa Vagalireya kwa va uyungisire momaraka gawo, ano mbudi ezi va zuvhisire kwa va gumine komutjima. Varongwa kwa gwene uhwi wokuuyunga maraka gokulisiga-siga, ayo kwa likidire asi Karunga nawo ga kere. (Resa Yirugana 2:1-8, 12, 15-17.) Mbudi zongwa ezi va zuvhisire ezuva olyo kwa zi zuvhire vantu womomaraka gokulisiga-siga ntani kwa lihanene mosirongo saRoma.—Koros. 1:23.

2 Naina, vantu vaKarunga kapi ava uyunga pasitetu maraka gokulisiga-siga. Nampili ngoso, awo kuna kutoroka mbudi zoUhompa momaraka gokupitakana 670. (Yirug. 2:9-11) Vantu vaKarunga kwa rugana yimbapiratjangwa yoyinzi momaraka gomanzi yiyo mbudi zoUhompa za lihanena uzuni mudima. * Ayo kulikida asi Jehova kuna kuruganesa Hompa Jesus Kristusa mokupitisira sirugana sokuzuvhisa. (Mat. 28:19, 20) Apa natu ka tarurura yiruganeso yimwe eyi twa ruganesa monomvhura 100 da ka pita, koneka omu Hompa ga tu deura tu likide elituromo kovantu ntani nomu ga tu korangeda tu kare varongi woNonkango daKarunga.—2 Tim. 2:2.

Hompa ta deura vakareli vendi va kune mbuto zousili

3. Morwasinke atu ruganesere yiruganeso yokulisiga-siga mokuzuvhisa?

3 Jesus kwa fanekesere “nonkango doUntungi” ndi doUhompa kombuto, ano mutjima gomuntu kevhu. (Mat. 13:18, 19) Ngwendi moomu munasikunino a ruganesa yiruganeso yokulisiga-siga a wapaike evhu komeho a ka kune, vantu vaJehova kwa ruganesa yiruganeso yokulisiga-siga eyi ya va vatera va wapaike nomutjima dovantu wovanzi va tambure mbudi zoUhompa. Yiruganeso yimwe kwa yi ruganesere karuwogona. Yimwe ngwendi nobuke noyifo kuna kara simpe nomulyo. Yiruganeso eyi natu ka konakona kwa vatera vazuvhisi woUhompa va vhure kuuyunga  novantu nye kapisi ngwendi yina tuna zogere megaununo pita yokuzuvhisira nombunga dovantu.—Yirug. 5:42; 17:2, 3.

Kuna kurugana nongaramafona nomambako moToronto, moKanada

4, 5. Ngapi ngaramafona ngava zi ruganesa, nye yisinke za dilire kuvhura kusikisa mo?

4 Yiuyungwa yokukwateka. Koyiha yo-1930 yi tware dogoro koyiha yo-1945, vazuvhisi ngava ruganesa yiuyungwa yoBibeli eyi va kwatekere pokuruganesa nongaramafona. Yiuyungwa oyo kapi ngayi pitakana nominute ntano. Ayo kwa kere noyiparatjangwa yoyisupi ngwendi “Karunga mutatu-gumwe,” “Mundiro gwekuhuro,” ntani “Uhompa.” Ngapi ngava ruganesa makwateko ogo? Munazinyetu Clayton Woodworth, Jr., ogu ga gwene ekuho mo-1930 moAmerika, kwa tente asi: “Ame ngani simbi kofagona omu mwa kere ngaramafona, azo kwa kere ureru kuzipaturura. Apa ngani siki pevero lyembo tani paturura kofagona ozo makura tani ngongora kevero. Apa muntu nga zegurura evero ame ngani uyunga asi: ‘Nina kara nombudi zomulyo ezi nina hara mu zuvhe.’” Ngapi ngava limburura? Munazinyetu Woodworth kwa tente asi: “Yikando yoyinzi vantu ngava tambura mbudi. Pamwe, vantu ngava tu zedilire mavero. Ano pamwe ngava gazara asi kuna kurandesa nongaramafona.”

Apa za sikire 1940, awo vana rugana makwateko goyiuyungwa yokupitakana po-90 ntani kwa rugene nongaramafona dokupitakana pemiliyona

5 Apa za sikire 1940, awo vana rugana makwateko goyiuyungwa yokupitakana po-90 ntani kwa rugene nongaramafona dokupitakana pemiliyona. John E. Barr gomoBritania, ogu ga kere muzuvhisi gokukarerera posiruwo sina ano konyima ta ya kara gumwe gomoMbungagendesi, kwa tente asi: “Momvhura 1936 dogoro 1945, ame ngani simbi nkenye apa ngaramafona. Monomvhura dina kapi ngani lizuvhu  nawa nsene kapi nina zi simbi. Apa ngani zuvhu ezwi lyamunazinyetu Rutherford ngayi korangeda nge, ngani lizuvhu ngwendi nage nina kugenda mokuzuvhisa. Nye ngaramafona kapi za vhulire kuronga vantu yi va gume komutjima.”

6, 7. (a) Mauwa musinke ga kere mo mokuruganesa yikarata youmbangi, nye yisinke ya dilire kusikisa mo? (b) Monkedi musinke Jehova ga tu ronga?

6 Yikarata youmbangi. Kutamekera mo-1933, vazuvhisi kwa va korangedere va ruganese yikarata youmbangi pokuzuvhisira momambo. Sikarata oso sinunu sa kere. Kwa kere po mbudi zomoBibeli ntani nesingonono lyoyimbapiratjangwa eyi na vhura kugwana muntu. Muzuvhisi nga gava sikarata oso komuntu nokumuhundira a rese. Lilian Kammerud, ogu ga ya kere mutumwa mosirongo saPuerto Rico ntani Argentina, kwa tente asi: “Ame kwa haferere kuruganesa sikarata soumbangi.” Morwasinke? Age kwa tente asi: “Morwa kapisi natuvenye twa divire kuuyunga nawa. Aso sa vaterere nge ni yike kuhedera vantu.”

Sikarata soumbangi (moRuitalia)

7 Munazinyetu David Reusch, ogu ga gwene ekuho mo-1918, kwa tente asi: “Yikarata youmbangi ya vaterere vanavazinyetu, morwa kapisi navenye va kere nemanguruko lyokuuyunga.” Nye siruganeso esi kapi sa sikisire mo sitambo sokuzuvhisa. Munazinyetu Reusch kwa tente asi: “Poyiruwo yimwe vantu ngava gazara asi ose yipurupuru, morwa sinzi setu ngatu gava tupu yikarata. Nye Jehova kwa tu dewire ngovazuvhisi. Konyima ga ya tu rongere tu uyunge novantu pokuruganesa Matjangwa. Eyi kwa ya tompokere kupitira moSikora zoUkareli ezi za tamekere koyiha yo-1942.”—Resa Jeremiya 1:6-9.

8. Ngapi no pulisira Kristusa a ku deure?

8 Nobuke. Kutundilira mo-1914, vantu vaJehova kwa rugana nobuke dokulisiga-siga dokupitakana 100 edi da zogera yirongwa yoBibeli. Nobuke dimwe kwa di wapaikira mokudeura vazuvhisi. Anna Larsen gomoDenemarke, ogu ga kara muzuvhisi nomvhura 70, kwa tente asi: “Jehova kwa tu vaterere yi tu tompoke ngovazuvhisi kupitira moSikora zoUkareli ntani nomonobuke edi twa gwene. Tani diworoka nobuke edi twa gwene ngwendi Theocratic Aid to Kingdom Publishers, ezi za pwege mo-1945. Taku ya kwama “Equipped for Every Good Work,” ezi za pwege mo-1946. Ngesi tuna kara nobuke Gwanena uwa moSikora zoUkareli, ezi za pwege mo-2001.” Sikora zoUkareli nonobuke dimwe kwa tu vatera tu gwane “unongo” ngomu Jehova ana kutudeura ngovazuvhisi. (2 Kol. 3:5, 6) Nove kulihameka mo moSikora zoUkareli ndi? Apa o zi komapongo nkenye sivike, ove kusimba buke zoge zoSikora zoUkareli ndi? Nsene yimo, ove kupulisira Kristusa a ku deure o kare muzuvhisi gomuwa.—2 Kol. 9:6; 2 Tim. 2:15.

9, 10. Ngapi nobuke da tu vatera mokukuna nokutekera nombuto dousili?

 9 Kupitira mombunga zendi Jehova kwa tu vatera pokutupa nobuke edi adi vatere vazuvhisi va faturure marongo gomoBibeli. Buke The Truth That Leads to Eternal Life kwa vaterere vazuvhisi. Apa va zi pwagesere mo-1968 kwa kundamene vantu. Simbapira Yirugana yetu yoUhompa saMangundu momvhura ozo kwa tente asi: “Vantu wovanzi kwa hundilire buke Truth yipo nye mberewa zomutayi moBrooklyn zokunduruka za hundilire va rugane nomasiku.” Simbapira kwa fatwilire asi: “Posikando simwe mwaSiwogedi kwa ndurukire nobuke dononzi, nye mahundiro kwa pitakanene sivaro oso noukahe wemiliyona.” Apa za sikire mvhura 1982, buke ozo vana zi nduruka kupitakana pomamiliyona 100 momaraka 116. Kutundilira mo-1968 dogoro 1982, buke Truth kwa vaterere sivaro sovazuvhisi woUhompa si ligwederere kupitakana emiliyona. *

10 Mo-2005, kwa pwagesere buke zompe, Yinke azi rongo Bibeli sili? Buke ozo kwa zi tokora momaraka 256, ano kwa zi nduruka sivaro sokusika pomamiliyona 200. Yitundwamo? Monomvhura ntambali tupu, kutundilira mo-2005 dogoro 2012, konyara vantu wokusika pemiliyona 1, 2 kwa ya kara vazuvhisi wombudi zongwa, ano varongwa woBibeli kwa pitakanene pomamiliyona 8,7. Yosili, Jehova kuna kutungika elituromo lyetu lyokukuna nokutekera nombuto dousili doUhompa.—Resa 1 Vakolinte 3:6, 7.

11, 12. Mokuliza nomatjangwa gomoparagarafu, wolye va tjangera yifo yetu?

11 Yifo. Sifo soRuhungu pomuhowo kwa si ruganenene “mbungagona,” ava ga “horowora Karunga.” (Ruk. 12:32; Heb. 3:1) Momazuva 1 Sikukutu 1919, mbunga zaJehova kwa pwagesere hena sifo simwe, esi va wapaikilire vantu navenye. Sifo oso ngava si ruganesa unene Valirongi woBibeli novantu navenye, ano nomvhura dononzi sifo oso kwa si ndurukire mosivaro sosinzi kupitakana sifo soRuhungu. Sifo oso pomuhowo ngava si tumbura asi The Golden Age. Mo-1937 tava si tumbura asi Consolation. Ano mo-1946, tava si tumbura asi Awake!

12 Mwa za nomvhura, rupe rosifo soRuhungu ntani Awake! kwa runduruka, nye sitambo ha sa karera ngorooro, sokudivisa Uhompa waKarunga nokuvatera vantu va ture epuro moBibeli. Naina, Ruhungu kururugana momarupe gavali, rwelirongo ntani rokuhanesa. Ruhungu rwelirongo kwa ru tjangera ‘vantu’ ava va hamena ‘kombungagona’ ntani ‘nonzwi dapeke.’ * (Mat. 24:45; Joh. 10:16) Ruhungu rokuhanesa kwa ru wapaikira unene po owo va dira kudiva usili nye va fumadeka Bibeli naKarunga. (Yirug. 13:16) Sifo Awake! kwa demenena kwava va dira kudiva nawa Bibeli ntani Karunga gosili, Jehova.—Yirug. 17:22, 23.

13. Yisinke ayi ku tetukisa kuhamena yifo yetu? (Zogereni karata “ Sivaro soyimbapiratjangwa mouzuni mudima.”)

 13 Kutamekera mo-2014, nkenye kwedi sifo Awake! kwa si ndurukire kupitakana pomamiliyona 44 ntani Ruhungu mamiliyona 46. Sifo Awake! kwa si torokere momaraka 100, ano Ruhungu kupitakana maraka 200, ayo kuna kara yifo ava toroka nokuhanesa unene evhu nalinye. Sivaro oso sinene, nye ngano kapisi yi tu tetukise, morwa moyifo oyo kwa kara mo mbudi ezi ga pumbire Jesus asi ngava zi divisa uzuni mudima.—Mat. 24:14.

14. Buke musinke zomulyo po atu hanesa, ntani morwasinke?

14 Bibeli. Mo-1896, munazinyetu Russell novakwaawo kwa rundwilire edina lyombunga zawo zokunduruka yimbapiratjangwa pokutura po nkango Bibeli, nokuyazitumbura asi Watch Tower Bible and Tract Society. Erundururo olyo lya wepe morwa Bibeli kuna kara buke zomulyo po mokuhanesa mbudi zongwa zoUhompa. (Ruk. 24:27) Kuliza nedina lyopaveta lyombunga zetu, vantu vaKarunga kwa litura mo unene mokuhanesa Bibeli nokukorangeda vantu va zi rese. Pasihonena, mo-1926, ose kwa ndurukire mehina lyetu Bibeli Emphatic Diaglott, etoroko lyoMatjangwa goRugereka goSikriste ezi ga rugene Benjamin Wilson. Kutundilira mo-1942, ose kwa ndurukire nokugavera matjangururo 700 000 goBibeli King James Version. Konyima zonomvhura mbali, tatu nduruka Bibeli American Standard Version omu mwa moneka edina lyaJehova pomavango 6 823. Apa za sikire mvhura 1950, ose tuna hanesa matjangururo goBibeli ozo gokupitakana po-250 000.

15, 16. (a) Yisinke ayi ku hafesa kuhamena Bibeli New World Translation? (Zogereni kakende “ Kugenderesa etoroko lyoBibeli.”) (b) Ngapi no pulisira Jehova a gume mutjima goge?

15 Mo-1950 yipo twa pwagesere Bibeli New World Translation of the Christian Greek Scriptures. Ano mo-1961 yipo twa pwagesere Bibeli nazinye zoNew World Translation of the Holy Scriptures. Etoroko olyo kwa fumadeka Jehova pokutura mo edina lyendi apa lya moneka momatjangwa goRuhebeli. Edina lyaKarunga kwa moneka hena yikando 237 moMatjangwa goRugereka goSikriste moBibeli New World Translation. Mokudivilisa asi ureru kuziresa nokuzikwata egano, kwa zi rundurura yikando yongandi, enduruko lyepe kwa pwege mo-2013. Apa za sikire mvhura 2013, Bibeli New World Translation azo vana zi pwagesa momaraka 121 ntani vana zi nduruka posivaro sokupitakana mamiliyona 201.

16 Yisinke vamwe va uyungire ko apa va resere Bibeli New World Translation meraka lyavene? Mugara gomoNepali kwa tente asi: “Ngayi tu digopere kuresa etoroko lyanare lyoBibeli lyoVanepali morwa kwa ruganesere nonkango doudigu. Nye ngesi kuna kukwata egano Bibeli, morwa kwa ruganesa eraka eli twa diva nawa.” Apa mukadi gomosirongo Central African Republic ga resere etoroko lyoBibeli moRusango, age kwa lilire nokutanta asi: “Eli yilyo eraka ali  gumu nge komutjima.” Ngwendi ogo mukadi, nkenye gumwe gwetu kuvhura a pulisire Jehova a mu gume komutjima pokuresa Nonkango dendi nkenye ezuva.—Epis. 1:2; Mat. 22:36, 37.

Kuhafera yiruganeso nedeuro

17. Yisinke no rugana mokulikida rupandu koyiruganeso nekedeuro eli wa gwana, ntani yitundwamo musinke ngo gwana?

17 Ove kulikida rupandu koyiruganeso nedeuro eli ana kugava Hompa Jesus Kristusa ndi? Ove kulitulira po siruwo sokuresa yimbapiratjangwa zina kugava mbunga zaKarunga ntani nokuyiruganesa mokuvatera wopeke ndi? Nsene yimo, ove no kwatesa ko eyi ga uyingire Opal Betler, ogu ga gwene ekuho momazuva 4 Sikukutu 1914. Opal kwa tente asi: “Mwa za nomvhura name namugara gwange [Edward] ngatu ruganesa ngaramafona noyikarata youmbangi. Ngatu zuvhisire tunda embo zende embo pokuruganesa nobuke noyifo noyimbapira. Ngatu zuvhisa pokuruganesa maplakate. Konyima tava ya tu deura kurugana matengwiropo nokulironga Bibeli nava ngava likida elituromo. Twa kere noyirugana yoyinzi nye twa hefe.” Jesus ga tumbwidilire asi vantu vendi ngava kara nosirugana sokukuna nokuteza nokuhafa kumwe. Ngwendi Opal, wovanzi va limonena usili wetumbwidiro olyo.—Resa Johanesa 4:35, 36.

18. Mfumwa musinke twa kara nazo?

18 Vantu ava vana dili simpe kukara vakareli vaHompa kuvhura va tare vantu vaKarunga asi “vantuuntu tupu.” (Yirug. 4:13) Nye Hompa kwa ruganesa vantuuntu tupu va rugane nobuke edi va toroka momaraka gomanzi nokudihanesa. Yomulyo po, age kwa tu deura nokutukorangeda tu ruganese yiruganeso oyo mokuhanesa mbudi zongwa kovantu wonomuhoko nadinye. Ee, mfumwa musi twa kara nazo zokurugana kumwe naKristusa mokukuna mbuto zousili nokuzangura varongwa!

^ para. 2 Monomvhura murongo da ka pita tupu, vantu vaJehova kwa rugana yimbapiratjangwa yoBibeli yokupitakana pomabiliyona 20. Ntani hena, aderesi zetu zokoIntaneta jw.org, ngesi kuvhura kuziruganesa vantu wokupitakana pomabiliyona 2,7 uzuni mudima.

^ para. 9 Yimbapiratjangwa yimwe yoBibeli eyi ya vatera vazuvhisi va ronge usili woBibeli kuna kara The Harp of God (kwa zi pwagesere mo-1921), “Let God Be True” (kwa zi pwagesere mo-1946), You Can Live Forever in Paradise on Earth (kwa zi pwagesere mo-1982), ntani Ediwo eli ali twara komwenyo gwanarunye (kwa zi pwagesere mo-1995).

^ para. 12 Tara sirongwa “Yilye nani mukareli gokulimburukwa gonondunge?” moRuhungu 15 Pembankuru 2013 pepenuno 23 paragarafu 13, omu va zogera ekwatogano lyetu kuhamena “vantu.”