Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 6

Vazuvhisi—Vantu tava ligava vene

Vazuvhisi—Vantu tava ligava vene

OKU LYA DEMENENA EGAUNUNO

Hompa ta pongaike mbunga zovazuvhisi

1, 2. Yisinke ga pumbire Jesus, ntani epuro musinke lyomulyo natu lipura?

NOMBUNGAPOLITIKA rorunzi kutura po matumbwidiro aga ava dili kusikisa mo. Nampili owo ava kara noyitambo yoyiwa pamwe kapi ava vhuru kusikisa mo matumbwidiro gawo. Mokulisiga, Hompa goUmesiyasa, Jesus Kristusa, age kusikisa mo nkenye eyi a tumbwidire.

2 Apa va mu tumbire ngaHompa mo-1914, Jesus ga liwapaikilire kusikisa mo uporofete ou ga pumbire konyara nomvhura 1 900 da ka pita. Komeho a ka fe, Jesus kwa pumbire asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima.” (Mat. 24:14) Esikiliromo lyononkango odo kuna kara ruha rosidiviso asi age kuna kupangera moUhompa. Nye pana kara epuro lyomulyo: Ngapi Hompa nga vhura kupongaika vazuvhisi wokuligava pomazuva gopouhura omu vantu vana kulikida nkareso zokulihara tupu vene ntani zoudinikarunga? (Mat. 24:12; 2 Tim. 3:1-5) Twa hepa kudiva elimbururo kepuro olyo, morwa kwa kundama Vakriste navenye wousili.

3. Ehuguvaro musinke ga kere nalyo Jesus, ntani kupi ga li gwene?

3 Tu tareni tanko nonkango daJesus. Nonkango “ngava zi divisa” kulikida asi Jesus ga kere nehuguvaro asi nga gwana wokumukwatesa ko pomazuva gopouhura. Kupi ga gwene ehuguvaro lyangoso? KoGuhwe. (Joh. 12:45; 14:9) Komeho a wize pevhu, Jesus ga mwene omu Jehova ga likidire ehuguvaro movakareli vendi ava va kere nonkareso zokuligava. Tu tareni omu Jehova ga likidire ehuguvaro olyo.

“Vantu woge ngava ligava”

4. Sirugana musinke Jehova ga pulire Vaisraeli va kwatese ko, ntani yisinke va rugene?

4 Diworokeni eyi ya horokere apa Jehova ga pangerere Mosesa a tunge nkongoronzugo ezi za kere evango lyoukareli womuhoko goVaisraeli. Kupitira mwaMosesa, Jehova kwa pulire vantu navenye va kwatese ko sirugana oso. Mosesa kwa va tanterere asi: “Gaveni nonzambo kwaHOMPA.  Ogu ana hara kuyirugana eyi, a rete nonzambo.” Yitundwamo? Mbunga “ngazi reta nonzambo nkenye ngurangura.” Awo kwa geve kupitakanesa dogoro tava va tantere ‘va hageke kutwara yuma.’ (Ex. 35:5; 36:3, 6) Vaisraeli va yi likidire asi Jehova ga hungikire mokuvahuguvara.

5, 6. Kuliza nEpisarome 110:1-3, nkareso musinke ga ndindilire ko Jehova naJesus kovakareli wousili pomazuva gopouhura?

5 Jehova ga yi ndindilire kugwana vantu wokuligava movakareli vendi pomazuva gopouhura ndi? Nhi! Nomvhura dokupitakana 1 000 komeho va hampuruke Jesus pevhu, Jehova kwa gendesere Ndafita a tjange kuhamena etameko lyepangero lyaMesiyasa. (Resa Episarome 110:1-3.) Hompa gomupe, Jesus, ga ya kere nononkore edi da mu rwanesere. Nye ga ya kere hena nava va mu kwatesere ko. Kapi va va sininikire mokukarera Hompa. Nampili vadinkantu ngava ligava va vhuke unene ngwendi eundu ndi eme lina kudumike evhu monongura. *

Vakwatesi ko woUhompa vanzi ngwendi eundu ndi eme (Tara paragarafu 5)

6 Jesus ga yi divire asi uporofete va tjanga mEpisarome 110 kwa tamba kwendi. (Mat. 22:42-45) Yipo nye ga kere nehuguvaro asi nga gwana vantu wokumukwatesa ko ava ngava ligava mokuzuvhisa mbudi zongwa evhu nalinye. Yisinke ya likida yihorokwa? Hompa ga vhura kupongaika vazuvhisi wokuligava pomazuva gopouhura ndi?

“Aso situmbukira sange mokudivisa mbudi ozo”

7. Apa va mu tumbire ngaHompa, yisinke ga rugene Jesus mokuwapaikira vasikuli vendi kosirugana sosinene?

7 Apa va mu tumbire ngaHompa, Jesus kwa wapaikire vasikuli vendi kosirugana sosinene. MEgaununo 2, katu mwene asi age kwa rugene ekonakono nekuhuro kutundilira mo-1914 dogoro ketamekero lyo-1919. (Mara. 3:1-4) Mo-1919 yipo ga tumbire mukareli gokulimburukwa mokupitisira vasikuli vendi. (Mat. 24:45) Kutundilira momvhura  ozo, mukareli ogu kwa tamekere kugava nondya dopampepo kupitira moyiuyungwa yopoyigongi nomoyimbapiratjangwa eyi ngayi nkondopeke situmbukira sankenye Mukriste sokulihameka mokuzuvhisa.

8-10. Ngapi yigongi ya nkondopokere sirugana sokuzuvhisa? Gava sihonena. (Tara kakende “ Yigongi eyi ya nkondopekere kuzuvhisa.”)

8 Yiuyungwa yopoyigongi. Valirongi woBibeli kwa pongere moCedar Point, Ohio, moAmerika, kutundilira 1-8 Sitarara 1919, sigongi sawo sosinene sokuhova konyima zoyita yokuhova youzuni mudima. Mezuva lyauvali, munazinyetu Rutherford kwa geve siuyungwa esi sa vyukilire kutantera vakalimo asi: “Situmbukira soMukriste pevhu kuna kara . . . sokuzuvhisa mbudi kuhamena uhompa waHompa.”

9 Mezuva lyautatu lyosigongi munazinyetu Rutherford kwa geve siuyungwa sosiparajtangwa asi: “Siuyungwa sovarugani vakwetu,” esi sa ya pwege mosifo soRuhungu konhi zosiparatjangwa asi: “Kudivisa Uhompa.” Age kwa tente asi: “Mukriste ga hepa kulipura asi: Morwasinke na karera pevhu? Elimbururo lyendi lya hepa kukara asi: Hompa kwa tura nge ni kare mutumwa gokugava mbudi zokuninka vantu va litezurure, ntani aso situmbukira sange mokudivisa mbudi ozo.”

10 Mosiuyungwa oso, munazinyetu Rutherford kwa divisire asi sifo sosipe, The Golden Age (ngesi Awake!), ngava si pwagesa mokuvatera vantu va dive asi Uhompa yiwo welike ngau kohonona po maudigu govantu. Yipo ga pulire vakalimo nsene vana hara kulihameka mokuhanesa sifo oso. Ediviso posigongi kwa tente asi: “Navenye vakalimo wokusika po-6 000 kwa katukire mokulikida eharo lyawo lyokulihameka mo ntani eyi kwa tetukisire sili unene.” * Yosili, Hompa ga kere novakwatesiko ava va kere neharo lyokudivisa Uhompa wendi!

11, 12. Yisinke sa uyungire sifo soRuhungu somo-1920 kuhamena siruwo esi ngasi tameka sirugana esi ga pumbire Jesus?

11 Yimbapiratjangwa. Kupitira mosifo soRuhungu, sirugana esi ga pumbire Jesus sokuzuvhisa mbudi zongwa zoUhompa kwa si nkondopekere unene. Tu tareni yihonena yimwe kutundilira 1920.

12 Mbudi musinke ngava divisa mokusikisa mo Mateusa 24:14? Siruwoke sirugana oso ngava si rugana? Mosifo soRuhungu 1 Pembankuru 1920, mosirongwa “Evangeli kuhamena Uhompa,” kwa fatwilire asi: “Mbudi zongwa kuna kara kuhamena uhura wouzuni ntani netulisopo lyouhompa woUmesiyasa.” Sirongwa sa fatwilire siruwo esi ngava divisa mbudi ozo asi: “Mbudi ezi ngava zi divisa kutundilira posiruwo soyita yoyinene mouzuni [Yita yokuhova youzuni] dogoro posiruwo ‘soudigu wounene.’” Aso kwa  uyungire hena asi: “Siruwo sina siki . . . sokudivisa mbudi ezi zongwa monongereka nadinye.”

13. Ngapi sifo soRuhungu somo-1921 sa tumangedere Vakriste wovagwavekwa va kare nonkareso zokuligava?

13 Vantu vaKarunga ngava va sininika mokurugana sirugana esi ga pumbire Jesus ndi? Hawe. Mosifo soRuhungu 15 Nsinano 1921 mwa pwege sirongwa “Kara nouradi,” esi sa tumangedere Vakriste wovagwavekwa va kare nonkareso zokuligava. Nkenye ogu kwa mu korangedere a lipure asi: “Ame kulizuvha asi aso situmbukira sange ntani mfumwa mokulihameka mosirugana esi ndi?” Sirongwa kwa twikilire asi: “Ose twa kara nehuguvaro asi nsene o lihameka mo ngo fana ngwendi Jeremiya ogu ga lizuvhire asi nonkango daHompa kwa fene ‘ngwendi mundiro guna kutwera mwendi,’ mokumutumangeda a twikire kuuyunga.” (Jer. 20:9) Ekorangedo olyo kwa likidire ehuguvaro eli ga kara nalyo Jehova naJesus movakwatesiko woUhompa.

14, 15. Mo-1922, monkedi musinke sa tumangedere sifo soRuhungu Vakriste wovagwavekwa va twarere vantu mbudi?

14 Ngapi Vakriste wousili va vhulire kutwarera vantu mbudi zoUhompa? Mosifo soRuhungu, 15 Siwogedi 1922, mwa pwege sirongwa asi: “Kuzuvhisa mulyo,” aso kwa korangedere Vakriste wovagwavekwa va lihameke mo “nomupampi mokutwarera vantu mbudi zomoyimbapiratjangwa nokukauyunga nawo momambo gawo, mokugava umbangi asi uhompa wemeguru pepi una kara.”

15 Kutundilira 1919, Kristusa kwa ruganesa mukareli gokulimburukwa gonondunge mokunkondopeka asi aso situmbukira nomfumwa koMukriste mokudivisa pevhu mbudi zoUhompa. Ngapi Valirongi woBibeli va tere ekorangedo lyokulihameka mosirugana sokudivisa Uhompa?

“Vantu wovalimburukwi ngava ligava”

16. Ngapi vakuronambunga vamwe va tere egano lyokuninka asi navenye va lihameke mokuzuvhisa?

16 Pokatji konomvhura 1920 dogoro 1940, vamwe va nyokere egano lyokuninka asi Vakriste navenye wovagwavekwa va lihameke mokuzuvhisa. Sifo soRuhungu, 1 Mangundu 1927 kwa faturura eyi ya horokere asi: “Poveli vamwe mongereka [mombungakriste] ava va kara nositumbukirwa soukuronambunga . . . ava ava dili kukorangeda vanazinyawo va lihameke mosirugana sokuzuvhisa ntani nawo vene kunyoka kulihameka mo. . . . Awo kusensa egano lyokuzuvhisa tunda embo zende embo mokutwarera vantu mbudi zokuhamena Karunga naHompa gwendi ntani uhompa.” Sifo kwa vyukilire kuuyunga asi: “Siruwo sina siki kovalimburukwi mokudidilika nokunyokera po vantu owo ntani nokuvatantera asi kapi ngava gwana yitumbukira youkuronambunga.” *

17, 18. Ngapi sinzi sava womonombungakriste va tere evyukiso lyomukareli gokulimburukwa, ntani yisinke mamiliyona govantu ga rugana monomvhura 100 da ka pita?

 17 Sinzi sava womonombungakriste kwa tambwire nehafo evyukiso lyomukareli gokulimburukwa. Awo kwa lizuvhire mfumwa mokudivisa mbudi zoUhompa. Sifo soRuhungu, 15 Nsinano 1926, kwa tanta asi: “Vantu wovalimburukwi ngava ligava, . . . mokutantera vantu mbudi ezi.” Valimburukwi owo va sikisire mo nonkango douporofete demEpisarome 110:3 pokuligava vene va kwatese ko Hompa goUmesiyasa.

18 Monomvhura 100 da ka pita, mamiliyona govantu kwa ligava mokusikisa mo sirugana sokudivisa Uhompa. Momagaununo gokukwama ko, ngatu ka zogera omu ngava zuvhisa noyiruganeso eyi ngava ruganesa ntani noyitundwamo. Pomuhowo tu tareni eyi vantu wovanzi va lihamekera mo mokudivisa Uhompa nampili ngomu va kara mouzuni wokulinenepeka. Ngomu tuna kuyikonakona. lipura asi: ‘Morwasinke ani tanterere ko vantu mbudi zongwa?’

‘Kuhova tanko kupapara Uhompa waKarunga’

19. Morwasinke atu tambwire epukururo lyaJesus ‘mokuhova tanko kupapara Uhompa waKarunga’?

19 Jesus kwa pukwilire vasikuli vendi ‘mokuhova tanko kupapara Uhompa waKarunga.’ (Mat. 6:33) Morwasinke atu tambwire epukururo olyo? Morwa twa dimburura mulyo goUhompa asi kuna kara ruha romulyo rositambo saKarunga. Egaununo lya ka pita kali likidire asi mpepo zokupongoka kwa horwere kanunu-kanunu usili kuhamena Uhompa. Apa usili kuhamena Uhompa au tu gumu komutjima, ayo kututumangeda tu hove kuupapara.

Ngwendi gwina mugara ga hefe pokugwana ugawo wokuhorama, Vakriste nawo kuhafa morwa va gwana usili woUhompa (Tara paragarafu 20)

20. Ngapi sifanekeso saJesus sougawo wokuhorama asi likida omu vasikuli vendi ngava tara epukururo lyokupapara tanko Uhompa?

20 Jesus ga yi divire omu ngava tambura epukururo lyokupapara tanko Uhompa. Tu tarureni sifanekeso sendi sougawo wokuhorama. (Resa Mateusa 13:44.) Ha ga za mokurugana, mugara gomosifanekeso ta gwana ugawo wa horoma ta nongonona mulyo gwawo. Yisinke ga rugene? “Ta zi nehafo a ka randese nayinye eyi ga wekere, ta ya randesesa ko epya olyo.” Yisinke natu lirongera ko? Apa atu lirongo usili woUhompa nokunongona mulyo gwawo, ose kutura po malizambero yipo tu ture muhowo Uhompa meparu lyetu. *

21, 22. Ngapi ava ava kwatesa ko Uhompa ava yi likida asi awo kuna kuhova kupapara Uhompa? Gava sihonena.

21 Ava ava kwatesa ko Uhompa kuyilikida kupitira moyirugana yawo asi awo kuna kuhova kuupapara. Awo kuruganesa eparu lyawo nononkondo dawo noyiweka yawo mosirugana sokuzuvhisa Uhompa. Wovanzi kwa tura po malizambero gomanene yipo va lihameke mo unene mokuzuvhisa. Valizambeli navenye va limonena asi Jehova kutungika owo ava tura muhowo Uhompa meparu. Tu tareni sihonena sanare.

 22 Avery naLovenia Bristow kwa rugene kumwe uzuvhisi wokukarerera moAmerika kutamekera koyiha yo-1930. Konyima zonomvhura dongandi, Lovenia kwa tente asi: “Name naAvery twa haferere nomvhura dononzi mosirugana souzuvhisi wokukarerera. Poyiruwo yimwe kapi twa divire oku natu gwana yimaliwa yomaholi nonondya. Nye Jehova nkenye apa nga tu pakere mbili. Ose twa twikilire nosirugana setu. Ngatu gwana nkenye apa eyi twa hepere.” Lovenia ta diworoka sikando simwe apa ngava zuvhisire mositata saPensacola, Florida, ano kapi va kere noyimaliwa nonondya. Apa va ka tengwire kembo tava ya gwana nondjato mbali donondya kumwe nokambapira va tjenge asi: “Eharo lyokutunda kombungakriste zaPensacola. Pokugazara konomvhura nadinye va kere mosirugana oso, Lovenia kwa tente asi: “Jehova kapi ga tu sigilira. Morwa twa mu huguvara.”

23. Ngapi omu o lizuvhu kuhamena usili woUhompa ou wa gwana, ntani yisinke ono tokomene kurugana?

23 Natuvenye kapi tatu zuvhisa novili dokulifana. Maukaro getu ga lisiga. Nye, natuvenye kulizuvha mfumwa zokudivisa mbudi zongwa nomutjima nagunye. (Koros. 3:23) Morwa twa dimburura mulyo gousili woUhompa ou twa gwana, twa hara kuligava nokutura po malizambero yipo tu rugane paapa twa hulira. Yiyo ono tokomene kurugana ndi?

24. Sininke musinke somulyo una kusikisa mo Uhompa pomazuva gopouhura?

24 Yosili, Hompa ga sikisa mo nonkango douporofete mwaMateusa 24:14. Age kwa yi rugana oyo ga hana kusininika muntu. Pokuligusa ko kouzuni wokulinenepeka, vasikuli vendi va ligava neharo mokuzuvhisa. Ezuvhiso lyawo lyombudi zongwa uzuni mudima kuna kara ruha rosidiviso asi Jesus kuna kupangera moUhompa ntani kuna kara simwe soyininke yomulyo una kusikisa mo Uhompa pomazuva gopouhura.

^ para. 5 MoBibeli, eundu ndi eme kwa lifanekesa kevhuko lyoyininke.—Gen. 27:28; Mika 5:7.

^ para. 10 Simbapira To Whom the Work Is Entrusted kwa fatwilire asi: “Sifo The Golden Age kusiruganesa tunda embo zende embo mokudivisa mbudi zouhompa . . . Nsene ono mana kudivisa mbudi, siga sifo The Golden Age mwankenye embo, yi kare asi vana tura mo ehundiro va si gwane nkenye kwedi ndi hawe.” Nomvhura da ya kweme ko, vanavazinyetu kwa va korangedere mokupura vantu va ture mo mahundiro goyifo The Golden Age ntani Ruhungu. Ketamekero 1 Murongankuru 1940, vantu vaJehova kwa va korangedere va gave yifo kovantu nokudidilika sivaro sayo.

^ para. 16 Posiruwo sina, nombungakriste yido ngadi horowora vakuronambunga. Yipo nye, nombungakriste da vhulire kunyoka kuhorowora vagara ava va nyokere kuzuvhisa. Marunduruko gongedeseso zokuhorowora vakuronambunga ngava ka ga zogera mEgaununo 12.

^ para. 20 Jesus ga tumbwire sitwa sokulifana mosifanekeso sendi somurandi ogu ga zire a ka papare mbamba zomulyo. Apa ga ka zi gwene, ta zi ta ka randesa emona lyendi nalinye a ka zi rande po. (Mat. 13:45, 46) Yifanekeso oyo yivali kuturonga asi kuvhura tu lironge usili woUhompa mononkedi dokulisiga-siga. Vamwe kuulituntika ano vamwe kuupapara. Yi kare asi monkedi musinke twa gwana usili, ose tuna hara kutura po malizambero yipo tu ture muhowo Uhompa meparu.