Zende koyikaramo

Zende koyikaramo

Nombangi daJehova

Horowora eraka Rukwangali

 RUHA 2

Sinka—“Ose mompatakani twa kara”

Sinka—“Ose mompatakani twa kara”

June kwa tente asi: “Ose kwa lizumbire namugara gwange konyima zokulikwara nomvhura 25. Vana vange nawo tava hageke kukarera Jehova. Tau ya gwana nge uvera wounene makura tani dombo mutjima. Tani zumbanesa mukumo mwanayinye. Makura tani hageke kuza komapongo nomokuzuvhisa.”

NKENYE OGU kukara nosinka, nampili vakareli vaKarunga. Mutjangi gemepisarome kwa tente asi: “Nina kara noyinka momutjima gwange.” (Episarome 94:19) Jesus ga uyungire asi posiruwo souhura ‘yinka youzuni’ ngayi digopesera vantu mokukarera Jehova. (Rukasa 21:34) Ove ngapi? Ono kara nosinka soyimaliwa ndi sepata ndi soukanguki? Ngapi Jehova na ku vatera o lididimikire?

‘Nonkondo dononene daKarunga’

Kapi tatu vhuru kulididimikira sinka pwanyamwetu. Mupositoli Paurusa kwa tjenge asi: “Ose mompatakani twa kara . . . , ose kwa kara momalimbiliro . . . , kuturugana momudona.” Nye ga tente hena asi “kapi va tu diinina po,” “kapi twa lisigilira,” ntani “kapi va tu zonagura po.” Yisinke ayi tu vatere tu lididimikire? ‘Nonkondo dononene daKarunga,’ Jehova munankondo nadinye.—2 Vakolinte 4:7-9.

Gazadara ko omu wa gwene nare ‘nonkondo dononene daKarunga.’ To diworoka siuyungwa esi sa ku korangedere o dimburure eharo eli ga kara nalyo Jehova koge ndi? Apa wa tanterere ko vantu kuhamena Paradisa, ayo ya nkondopekere epuro lyoge momatumbwidiro gaJehova ndi? Pokuza komapongo nokulihameka mokuzuvhisa, kutupa nonkondo tu lididimikire yinka ntani tu gwane mbili zomomutjima nokukarera Jehova noruhafo.

“Hetekeni mu tare asi HOMPA ngapi omu ga wapa!”

Yiruwo yimwe kuvhura o lizuvhe asi kapi to yi sikisa mo. Pasihonena, Jehova kuna hara asi tu hove tanko kupapara Uhompa ntani tu liture mo unene mokumukarera. (Mateusa 6:33; Rukasa 13:24) Ngapi nsene marwaneso nouvera ndi maudigu gemepata kuna kukurorora? Ndi ngapi nsene yirugana kukurorora, kapi ayi ku pe siruwo sokuza komapongo? Maukaro gangoso kuvhura ga ku retere sinka sosinene. Pamwe kuvhura o lizuvhe asi Jehova kuna kukupura yoyinzi.

Jehova kukwata egano maukaro getu. Age kapi a tu pura tu rugane eyi natu dira kuvhura kusikisa mo. Age ga yi diva asi nsene tuna roroka morwa yinka yetu, ayo kugusa siruwo kwetu mokutengwdira po upampi ou twa kere nawo nare.—Episarome 103:13, 14.

Tarurura sihonena omu Jehova ga pakerere mbili Eliya. Apa Eliya ga kere nowoma nokudomba mutjima, age kwa dukilire momburundu. Jehova ga mu handukilire nokumusininika a tengura kosirugana sendi ndi? Hawe. Jehova kwa tumine muengeli a mu pindure nokumupa nondya yikando yivali. Nye konyima zomazuva 40, simpe Eliya ga kere nosinka nowoma. Yisinke Jehova ga rugene a mu vatere? Pomuhowo Jehova kwa mu likidire asi kuvhura a mu popere.  Makura Jehova ta hengagwida Eliya ‘nokazwi kokampepo kokurerekeda.’ Moruhura Jehova ta mu tantere asi pana kara mayovi gava vana kukarera Karunga noulimburukwi. Makura Eliya ga gwene nonkondo dokutwikira sirugana sendi noupampi. (1 Vahompa 19:1-19) Yisinke natu lirongera ko? Apa Eliya ga kere nosinka sosinene, Jehova ga mu tekwire nonkenda neharo. Jehova kapi ga runduruka. Age kutupakera mbili.

Jehova kapi a ndindire ko yoyinzi kwetu. Kapisi o hetakanese eyi ngo vhuru kumuruganena nare neyi ono kuvhura kurugana ngesi. Pasihonena: Nsene muduki a hageka kuliyomberesa makwedi ndi nomvhura, apa nga ka tameka ga ha ndindira asi ta duka ngwendi moomu nga duka nare. Ga hepa kuliyomberesa kanunu-kanunu yipo a gwane nonkondo. Vakriste kwa lifana novaduki. Nawo va hepa kuliyomberesa. (1 Vakolinte 9:24-27) Litulira po sitambo esi no vhura kusikisa mo ngesi. Kuvhura o litulire po sitambo sokuza komapongo. Hundira Jehova a ku vatere o sikise mo sitambo oso. Apa ngo gwana nonkondo, ngo mona omu ‘HOMPA ga wapa.’ (Episarome 34:8) Diworoka asi nkenye eyi no rugana eyi ayi likida eharo lyoge kwaJehova, ayo mulyo kwendi.—Rukasa 21:1-4.

Jehova kapi a tu pura tu rugane eyi natu dira kuvhura kusikisa mo

“Ekorangedo eli na hepere”

Ngapi Jehova ga nkondopekere June a tengure kwendi? June kwa tente asi: “Ngani kanderere kwaJehova a vatere nge. Makura ngumweyi zange ta tantere nge kuhamena sigongi sa kere modoropa zetu. Yipo na zire kosigongi oso. Ame kwa hefe pokukakara novantu vaJehova! Kosigongi na ka gwene ko ekorangedo eli na hepere. Ngesi kuna kuhafera kukarera hena Jehova. Nina kara nositambo meparu. Ntani na yi dimburura asi na hepa evatero lyovanavazinyetu. Nina hafa kweyi na tengura usimbu kwaJehova.”