Zende koyikaramo

Zende koyikaramo

Nombangi daJehova

Horowora eraka Rukwangali

 RUHA 4

Unzoni—‘Zeresa nge kononzo dange’

Unzoni—‘Zeresa nge kononzo dange’

Martha kwa tente asi: “Apa na gwene yirugana yoyipe, epata lyetu kwa parukire nawa, nye yirugana oyo ya twaredesere nge ni lihameke moyininke ya lilimba nonompango daJehova. Tani tameke kudana yipito yomouzuni nokulihameka moupolitika ntani kuza konongereka dapeke. Ame kwa hagekere kuzuvhisa nokuza komapongo ure wonomvhura 40. Ngomu sa pitire siruwo ame kwa lizuvhire asi Jehova kapi nga gusira nge po. Ame kwa lizuvhire sili unzoni wounene, morwa na divire usili komeho ni ya rugane yininke yoyidona.”

KULIZUVHA unzoni kurorora muntu. Hompa Ndafita kwa tjenge asi: “Ame na pwire mo mononzo dange, mukumo gwado gomudigu guna ganda nge.” (Episarome 38:4) Vakriste vamwe kulizuvha unzoni wounene, morwa kulizuvha asi Jehova kapi nga va dongwenena po. (2 Vakolinte 2:7) Yimo ga kara ngoso Jehova ndi? Nsene wa tura nonzo dononene, kuvhura a ku dongwenene po ndi? Nhi.

“Wizeni tu ya wapaikeni nonkango”

Jehova kapi a sigilire vananzo ava ava litezurura. Age kuvatambura. Mosifanekeso somumati gokuzumbana, Jesus kwa fanekesere Jehova kwaguhya gonkenda ga kere nomunwa ogu ga tundire membo nokukaparuka eparu lyedona. Konyima, mumati ogu ta tokora kutengura kembo lyawo. “Ano age simpe ure ga kere, guhwe nare ana mu mono, ta mu retere nkenda. Makura ta duka a ka gwanekere nendi, ta mu lidingire, ta mu ncumita unene.” (Rukasa 15:11-20) Ono hara kuhedera kwaJehova nye kuna kulizuvha asi “simpe ure” ono kara nage ndi? Ngwendi guhya gomosifanekeso saJesus, Jehova kuna kukufira nkenda. Ntani ana liwapaikire kukutambura.

Ngapi nsene ove kulizuvha asi nonzo doge nonene ndi nonzi ano Jehova kapi ta ku dongwenene po? Koneka eyi ga uyunga Jehova mwaJesaya 1:18 asi: “Wizeni tu ya wapaikeni nonkango. Nonzo deni nampili di gehe ngwendi honde, ngadi zera ngwendi yiterengenze.” Nonzo nampili di gehe ngwendi honde, Jehova kuvhura kudidongonona po.

Jehova kapi ana hara o hepe kokulizuvha unzoni. Yisinke no rugana nsene ono hara Karunga a ku dongwenene po yipo o gwane mbili nokufunda po kulizuvha unzoni? Tarurura yininke yivali eyi ga rugene hompa Ndafita. Sokuhova, age kwa tente asi: “Makura yipo na tunda nye ni tongonone nonzo dange koge.” (Episarome 32:5) Diworoka asi Jehova kuna kukuzigida o kanderere kwendi mu ya “wapaike nonkango” nendi. Tambura ezigido olyo. Tongonona nonzo doge kwaJehova nokumutantera malizuvho goge. Ndafita ga yi divire asi Jehova kukwafa, yiyo ga kandererere asi: ‘Zeresa nge kononzo dange. . . . mutjima gokuligava gokulimburukwa kapi wa gu nyenga.’—Episarome 51:2, 17.

Sauvali, Ndafita kwa gwene evatero komuporofete Natana. (2 Samwere 12:13) Naina  Jehova kuruganesa vakuronambunga mokuvatera vananzo wokulitezurura mokutengura kwendi. Nsene o hedera vakuronambunga ngava ruganesa Matjangwa nokukanderera nove yipo o funde po kulizuvha unzoni ntani o tengwidire po elikwatakano lyoge naJehova.—Jakopo 5:14-16.

Jehova kuna hara o nyokere po kulizuvha unzoni yipo o kare noruhafo

“Gerago googu va dongwenena po nonzo dendi”

Kapisi ureru kutongonona nonzo doge kwaJehova nokuhedera vakuronambunga. Ndafita nage yimo ga lizuvhire. Pomuhowo, kapi ga ‘tongwenene’ nonzo dendi. (Episarome 32:3) Nye konyima apa ga ya tongwenene nonzo dendi age kwa gwanenene mo uwa.

Uwa wounene ga gwene kuna kara ruhafo. Age kwa tjenge asi: “Gerago googu va dongwenena po nonzo dendi.” (Episarome 32:1) Age hena kwa kanderere asi: “HOMPA, uyungisa kana kange, nkumwe ngani ku pandure.” (Episarome 51:15) Morwa ga tongwenene nonzo dendi ntani Jehova ga mu dongwenene po, Ndafita ya mu tumangedere a tantere ko vakwawo kuhamena Jehova.

Jehova kuna hara o nyokere po kulizuvha unzoni yipo o kare noruhafo. Age ana hara o tantere ko wopeke kumuhamena nositambo sendi, nye o yi rugane noruhafo kapisi nezwi lyedona lyokomutjima. (Episarome 65:1-4) Diworoka ezigido lyendi eli asi ‘tengureni kwaKarunga, nonzo deni ngadi dongonoke po.’—Yirugana 3:19.

Oyo yiyo ya horokerere Martha. Age kwa tente asi: “Munwange gomugara nga tumine nge yifo yoRuhungu naAwake. Kanunu-kanunu tani tengwire kwaJehova. Sininke sa digoperere nge unene kutengwira kwaJehova kwa kere kupura egusiropo lyononzo nadinye edi na rugene. Nye nampili ngoso, na kandererere kwaKarunga nokumupura egusiropo. Ayo udigu kuyipura asi kwa pitire po nomvhura 40 ntani na tengwire kwaJehova. Ame na yi pura nawa-nawa asi nampili pa pite nomvhura dononzi muntu simpe kuvhura kutengura kwaJehova.”