Zende koyikaramo

Zende koyikaramo

Nombangi daJehova

Horowora eraka Rukwangali

 RUHA 2

Sikisa mo mugano goge gononkwara

Sikisa mo mugano goge gononkwara

“Eyi ga mangakana Karunga, muntu walye a yi mangurura.”—Marukusa 10:9

Jehova kwa gava mpangera asi: “Nokuteza si etumbwidiro lyoge lyokukara gehuguvaro.” (Marakiya 2:16) Mulyo unene kusikisa mo mugano goge gononkwara, morwa ayo kupameka eharo lyomononkwara.

Momazuva getu, nonkwara kuna kuteka po morwa vantu kapi vana kusikisa mo mugano gwawo gononkwara. Mokugamena nonkwara doge, wa hepa kurugana yininke yivali.

 1 NONKWARA DOGE DI KARE SININKE SOMULYO PO

EYI ZA UYUNGA BIBELI: “Mu wape kuhorowora yoyiwa po,” ndi yomulyo po. (Vafilipi 1:10) Nonkwara doge kuna kara sininke somulyo po meparu lyoge.

Jehova kuna hara o demenene komulikwali goge ntani mu ‘hafe’ kumwe. (Muudisi 9:9) Age ga uyunga asi wa hepa kupakera mbili mulikwali goge ntani papara nonkedi omu nomu litekura yipo mu hafe. (1 Vakolinte 10:24) Likida mulikwali goge asi wa mu hara ntani wa mu hepa meparu lyoge.

EYI NO RUGANA:

  • Litulira po siruwo sokukara kara nkenye apa nomulikwali goge

  • Wa ha ligazara tupu nyamoge

 2 TAKAMESA MUTJIMA GOGE

EYI ZA UYUNGA BIBELI: “Nkenyogu a tara mukadi, nye a mu dovaukire, nare ana mu honderere momutjima.” (Mateusa 5:28) Nsene mulikwali kugazadara nkenye apa yininke yoruhonda, age ngoso kuna kuteza po mugano gwendi gononkwara.

Jehova kuuyunga asi wa hepa kutakamesa “mutjima” goge. (Jeremiya 17:9; Yisewe 4:23) Mokuyirugana oyo, wa hepa kupangera meho goge. (Mateusa 5:29, 30) Kwama sihonena saJoba ogu ga tulire po mugano mokudira kutara mukadona a mu dovaukire. (Joba 31:1) Tokomena mokudira kutara mafano goruhonda. Ntani tokomena mokudira kulikida malizuvho geharo komuntu ga hana asi mulikwali goge.

EYI NO RUGANA:

  • Yi likida kovantu asi ove wa kwara

  • Gazadara ko malizuvho gomulikwali goge nokuteza po nkenye ukaume ou au ninkisa mulikwali goge a rwe esupa