Zende koyikaramo

Zende koyikaramo

Nombangi daJehova

Horowora eraka Rukwangali

 RUHA 1

Ruhafo romononkwara kutunda kwaKarunga

Ruhafo romononkwara kutunda kwaKarunga

“Ogu ga ungire muntu petameko, kwa va rugene va kare mugara nomukadi.”—Mateusa 19:4

Jehova * Karunga kwa kwarekere vantu wokuhova. Bibeli kututantera asi age kwa ungire mukadi gokuhova makura ‘ta mu reta’ komugara. Adamu kwa hefe unene ta tanta asi: “Ogu ntaantani damu-damu nyame nye, sisupa somoyisupa yange, nonyama zomonyama zange.” (Genesis 2:22, 23) Jehova simpe kuna hara valikwali va hafe.

Apa ngo kwara kuvhura ngo gazare asi nayinye ngayi genda po nawa. Nye nampili mugara nomukadi ava va lihara unene kuligwanekera nomaudigu. (1 Vakolinte 7:28) Mosimbapira esi kuna kara mo nompango doBibeli, nsene o di tura pasirugana ngo gwana ruhafo mononkwara nemepata lyoge.—Episarome 19:8-11.

 1 TAMBURA SITUMBUKIRA ESI GA KU PA JEHOVA

EYI ZA UYUNGA BIBELI: Mugara yige mupangeli ndi mutwe gepata.—Vaefeso 5:23.

Nsene ove mugarakwara, Jehova ana hara o pakere mbili mukadoge monkedi zongwa. (1 Peturusa 3:7) Age kwa ungire mukadi a kare muhameni goge ntani ana hara o mu tekure monkedi zefumadeko ntani zeharo. (Genesis 2:18) Ntani wa hepa kutura yihepwa yamukadoge muhowo kupitakana yoge.—Vaefeso 5:25-29.

Nsene ove mukadikwara, Jehova ana hara o fumadeke unene mugara goge nokumuvatera a sikise mo situmbukira sendi. (1 Vakolinte 11:3; Vaefeso 5:33) Kwatesa ko matokoro gendi nomutjima goge nagunye ntani ruganena kumwe nendi. (Vakorosi 3:18) Nsene o yi rugana, ngo wapa kosipara samugara goge nesi saJehova.—1 Peturusa 3:1-6.

EYI NO RUGANA:

  • Pura mulikwali goge eyi no vhura kurugana o ture po marunduruko yipo o kare mugara ndi mukadi gomuwa. Purakena nawa eyi na uyunga ntani tura po marunduruko

  • Lididimika. Ayo ngayi gusa siruwo yipo o dive omu nomu vhura kulitekura yipo mu hafe

2 PAKERA MBILI MALIZUVHO GOMULIKWALI GOGE

EYI ZA UYUNGA BIBELI: Pakera mbili yihepwa yomulikwali goge. (Vafilipi 2:3, 4) Tekura mulikwali goge ngwendi kamanya kondiro, morwa Jehova kuna hara vakareli vendi va kare “nombili kovantu navenye.” (2 Timoteusa 2:24) “Nonkango da hana mutwe nondungu kuwurura ngwendi rufuro, nye nonkango dounandunge kuverura.” Yipo nye ruganesa nonkango donongwa. (Yisewe 12:18) Mpepo zaJehova ngazi ku vatera o uyunge monkedi zombili ntani zeharo.—Vagarata 5:22, 23; Vakorosi 4:6.

EYI NO RUGANA:

  • Komeho mu ka zogere nomulikwali goge yuma yomulyo, kanderera yipo o dire kukahanduka

  • Gazadara ko unene eyi no ka uyunga ntani nomu no ka yi uyunga

 3 RUGANENENI KUMWE

EYI ZA UYUNGA BIBELI: Apa mugara nomukadi ava likwara awo kukara “rutu rumwe.” (Mateusa 19:5) Nye awo simpe vantu wokulisiga ntani magano gawo ga lisiga. Yipo nye mwa hepa kulironga omu nomu liza momagazaro nomomalizuvho. (Vafilipi 2:2) Kuruganena kumwe mulyo nsene kuna kutura po matokoro. Bibeli kutanta asi: “Tambura epukururo lyewa ngo ragope.” (Yisewe 20:18) Ruganeseni nompango doBibeli nsene kuna kutura po matokoro gomulyo.—Yisewe 8:32, 33.

EYI NO RUGANA:

  • Tantera mulikwali goge malizuvho goge nye kapisi nombudi ndi magano gongandi

  • Komeho o ture po mawapaiko gongandi, yi zogera nomulikwali goge

^ para. 4 Jehova kuna kara edina lyaKarunga.