Zende koyikaramo

Zende koyikaramo

Nombangi daJehova

Horowora eraka Rukwangali

 RUHA 4

Ruganesa nawa yimaliwa

Ruganesa nawa yimaliwa

“Tambura epukururo lyewa ngo ragope.”—Yisewe 20:18

Natuvenye twa hepa yimaliwa mokurera mapata getu. (Yisewe 30:8) ‘Yimaliwa kupopera.’ (Muudisi 7:12) Ngovalikwali kuvhura yi kare udigu kuzogera kuhamena yimaliwa nye mwa ha yi pulisira yi rete maudigu mononkwara deni. (Vaefeso 4:32) Valikwali va hepa kulihuguvara nokuruganena kumwe nsene tava tokora omu nava ruganesa yimaliwa.

 1 VARURENI NAWA

EYI ZA UYUNGA BIBELI: “Muntuke gokuhara kutunga ruhungu a dili kuhova tanko kuhingira a varure eyi ngaru pita, a tare ntene si ana kara neyi yokurutungisa dogoro ru pwe.” (Rukasa 14:28) Ya kara nomulyo mu varure kumwe omu nomu ruganesa yimaliwa yeni. (Amosa 3:3) Tokoreni eyi muna hepa ntani yimaliwa eyi nomu vhura kuruganesa. (Yisewe 31:16) Kapi yina kutanta asi nsene ono kara noyimaliwa to randanga tupu. Nyokereni po makongo.—Yisewe 21:5; 22:7.

EYI NO RUGANA:

  • Nsene kouhura wokwedi simpe muna kara noyimaliwa yimwe, tokoreni kumwe eyi nomu yi ruganesa

  • Nsene yimaliwa yisesu, sesupikeni yihepwa yeni eyi omu randanga. Pasihonena, mevango lyokukarandanga nondya dokupya nare, kuvhura mu tereke edi muna kara nado membo

 2 UYUNGENI USILI

EYI ZA UYUNGA BIBELI: “Nkenye ogu a uyunge namukwawo yosili.” (Vaefeso 4:25) Tantera mulikwali goge usili kuhamena yimaliwa eyi o tambura neyi o yi ruganesa.

Komeho o gave yimaliwa ndi o rande yininke yina kukosa yimaliwa yoyinzi, pomuhowo yi zogera nomulikwali goge. (Yisewe 13:10) Kuzogera kuhamena yimaliwa ngayi mu vatera mu kare nombili mononkwara deni. Yimaliwa eyi o tambura kapisi yoge tupu nye yepata.—1 Timoteusa 5:8.

EYI NO RUGANA:

  • Lizuvheni yimaliwa eyi na vhura kuruganesa nkenye gumwe gweni ga hana kupura epulisiro kwamukwawo

  • Mwa ha ndindira dogoro pana horoka udigu ntani muna kuzogera kuhamena yimaliwa