Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA 12

Simpumba saPaurusa kapi ga kere nowoma

Simpumba saPaurusa kapi ga kere nowoma

Ngesi tatu ka lironga kuhamena mumati ogu ga parwire hekurwendi. Hekurwendi kuna kara mupositoli Paurusa. Kapi twa diva edina lyomumati ogo, nye twa diva asi age kapi ga kere nowoma. Ono hara kuzuvha eyi ga rugene ndi?—

Paurusa kwa kere modorongo moJerusarema. Age kwa mu kwete morwa kuzuvhisa kuhamena Jesus. Ano vagara vamwe wovadona kwa nyengere Paurusa, makura tava tura po mawapaiko. Awo kwa tente asi: ‘Tu hundireni mupitisili govakwayita a tantere vakwayita vendi va rete Paurusa kompanguro. Makura ose tu vande konontere donzira, ano apa na ya pita Paurusa, tu ya mu dipage!’

Simpumba saPaurusa kwa tanterere Paurusa nomupitisili govakwayita eyi va here kurugana vagara vena wovadona

Simpumba saPaurusa ga zuvhire mbudi zokuhamena kuhara kudipaga Paurusa. Yisinke ga rugene ko? Age kwa zire kodorongo nokukayitantera Paurusa. Makura Paurusa ta mu tumu a ze komupitisili govakwayita a ka mu tantere mbudi ozo. Ya kere ureru kwasimpumba saPaurusa mokukauyunga nomupitisili govakwayita ndi?— Hawe, morwa mupitisili govakwayita kwa kere muntu gekuto. Nye simpumba saPaurusa kapi ga kere nowoma, ntani ga ka uyungire nomupitisili ogo.

Mupitisili ogo ga divire eyi na rugana ko. Age ta pongaike vakwayita 500 va popere Paurusa! Makura ta va tumu va tware Paurusa koKesareya googo masiku. Paurusa ga ka sikire oku va mu twere ndi?— Nhi, vagara wovadona kapi va vhulire kumudipaga! Morwa eyi va here kurugana kapi ya va tompokere.

Yisinke no lirongera ko kesimwititi eli?— Nove kuvhura kuhonena simpumba saPaurusa mokudira kukara nowoma. Kapisi tu kare nowoma nsene tatu uyunga novantu kuhamena Jehova. Ove ngo twikira kuuyunga kuhamena Jehova ndi?— Nsene ngo yi rugana, ove kuvhura kuparura vantu.