Zende koyikaramo

Zende koyikaramo

Nombangi daJehova

Horowora eraka Rukwangali

Etwaromo

Etwaromo

“Ame kwa kulira mokadoropa momukunda gokomuzogo,” yimo ana kusanseka Dauda gomoSierra Leone. “Siruwo simwe, apa na kere ni mumatigona, pwa kere nompata dokuhamena kevhu pokatji kepata lyetu nepata lyopeke. Navenye kwa kere nononkondo pokaruha kamwe kevhu. Makura tava zigida nganga ziya kohonone po nompata. Ta gava ntarero komugara gumwe, makura tamu kudumike ekehe lyezera. Kapi pwa pitire siruwo makura mugara ogu ga kere mekehe ta vareke kukankama nokutjimpuka. Hagaza mokutarera montarero, ta zigire asi: ‘Tani mono mugara gokukurupa ta hedere pepi! Age kuna dwara yikoverero yoyizera. Age mure ga kurupa, nonomvhi dendi oku ta gendi kukukura kanunu.’

“Age kwa singwenene Omama-gara! Makura ta kara ana piyagana nokuzigira asi: ‘Wizeni muya tare nyamweni nsene kapi muna kupura eyi nina kutanta!’ Yosili, nagumwe si gwetu ga kere nomukumo gokuyirugana! Nganga tazi mu ninki a liture pokumusansa yivhongangwidi younganga yomahako nomema eyi ga tulire mohupa.

“Nokana komugara gontarero, ‘Omama-gara’ kwa tente asi karuha kevhu kwa hamenene kepata lyetu. Age kwa tanterere omama-kadi asi va vhure kurugana evhu va hana kulipakera ko sinka. Vepata lyopeke tava tambura etokoro. Nompata dina pu kukohonona.”

 Yihorokwa yangesi kuhoroka rorunzi moAfrika zoUtokero. Omo, ngwendi momaruha gamwe gouzuni, mamiliyona ga hana sivaro kwa pura asi vafe kuza kouzuni wonompepo, oku ava kanomenena maparu govantu pevhu nokugapangera. Epuro lyangesi kwa kara mousili? Vafe kutwikira kuparuka nawa-nawa? Nsene asi hawe, ava ava lininkisa asi yiwo nompepo dovafe nani wolye? Eyi kuna kara nomulyo unene mokuninka asi tu dive malimbururo gouhunga pomapuro aga. Esi kuna kara sininke sina kutanta mwenyo ndi nomfa.