Zende koyikaramo

Zende koyikaramo

Nombangi daJehova

Horowora eraka Rukwangali

Etwaromo

Etwaromo

“Omu honene wokupinga eyi ga tumbwidira Karunga epuro noudidimiki wawo moudigu.”—VAHEBELI 6:12.

1, 2. Ngapi mutareli gumwe gonombunga ga tere vantu vepuro ava va tumbura moBibeli, ntani morwasinke vantu vangoso nava karera vakaume wovawa?

KONYIMA zokupurakena kosiuyungwa ga geve mutareli gonombunga, munazinyetukadi kwa tente asi: “Age kuuyunga kuhamena vantu ava va tumbura moBibeli ngwendi vakaume vendi vene-vene.” Munazinyetugara ogo kwa lironga Bibeli nomvhura dononzi, makura apa a uyunga kuhamena ava va tumbura moBibeli age kuvatara ngwendi vakaume vendi vene-vene.

2 Ayo tayi wapa nsene o kara novakaume vangoso wovanzi ava va tumbura moBibeli. Awo vakaume woge ndi? Gazara omu ngayi ka kara nsene ngo ka genda nokuuyunga nokukadiva vagara novakadi ngwendi Nowa naAbirahamu naRutu naEliya ntani Esitera. Gazadara komapukururo nomakorangedo aga ngava ka ku pa.—Resa Yisewe 13:20.

3. (a) Ngapi natu gwanena mo uwa pokulironga kuhamena vagara novakadi vepuro ava va tumbura moBibeli? (b) Mapuro musinke natu ka konankona?

3 Ngatu ka tulisa po ukaume wouwa apa vantu ‘wovawa ngava va pindura koufe.’ (Yirug. 24:15) Naina kuvhura tu gwanene mo uwa pokulironga kuhamena vagara novakadi vepuro ava va tumbura moBibeli. Monkedi musinke? Mupositoli Paurusa kwa tente asi: “Omu honene wokupinga eyi ga tumbwidira Karunga epuro noudidimiki wawo moudigu.” (Heb. 6:12) Komeho tu ka lironge kuhamena vagara novakadi vepuro tanko tu konakone mapuro gamwe gononkango edi ga uyungire Paurusa: Yisinke epuro ntani morwasinke twa li hepera? Ngapi natu honena vantu vepuro ava va tumbura moBibeli?

Yisinke epuro ntani morwasinke twa li hepera?

4. Yisinke ava gazara vantu kuhamena epuro ntani morwasinke va karera mepuko?

4 Epuro kuna kara sikara esi va likidire vagara novakadi ava ngatu ka lironga mobuke ezi. Vantu wovanzi kapi va diva eyi ali tanta epuro, awo kugazara asi epuro kutanta asi kupura yininke eyi wa dira kukwata egano ndi ya hana maumbangi. Nye mepuko va kara. Epuro kapisi kukara tupu nomalizuvho. Morwa malizuvho kuwiza taga haga po ntani kombinga zokupura mwaKarunga  “nompepo donondona nado da yi pura, ado hena kukankama.”—Jak. 2:19.

5, 6. (a) Koyininke yivali musinke lya demenena epuro lyetu? (b) Ngapi omu lya fana epuro lyetu? Faturura.

5 Yinzi ya hamena mo mepuro lyene-lyene. Diworokeni omu Bibeli za singonona epuro. (Resa Vahebeli 11:1.) Paurusa kwa fatwilire asi epuro kwa demenena koyininke yivali eyi atu dili kumona. Sokuhova, kuna kara “undipo woyininke eyi atu dili kumona.” Eyi kwa kwatera mo yininke atu dili kumona nomeho getu ngwendi Jehova Karunga naMunwendi ndi Uhompa ou una kupangera ngesi meguru. Sauvali, kuna kara “ehuguvaro lya pama lyoyininke eyi twa ndindira.” Ose kuna kundindira uzuni woupe ou ngau ka retesa po Uhompa waKarunga. Ngoso kutanta asi epuro lyetu moyininke oyo kapi pwa kara maumbangi ndi?

6 Hawe. Paurusa kwa fatwililire asi epuro lyosili kwa pama. Nkango ezi ga ruganesere “ehuguvaro lya pama,” kuziruganesa hena mokutamba kosimbapira soumbangi. Tu ninke asi gumwe ana tokora kukupa nzugo. Kuvhura a ku pe simbapira soumbangi nokutanta asi: “Ezi nzugo zoge.” Kapi yina kutanta asi ove ngo tunga posimbapira oso, nye age kuna tamba asi simbapira oso kuna kukara umbangi asi ozo nzugo zoge. Ya lifana, epuro lyetu kuna kara umbangi wokupama.

7. Yisinke ya hamena mo mepuro lyene-lyene?

7 Epuro lyene-lyene kwa hamena mo maumbangi gokupama ntani nehuguvaro mwaJehova Karunga. Epuro kutuninkisa tu tare Karunga ngaGuhyetu geharo ntani nokuhuguvara asi matumbwidiro gendi ngaga sika mo. Nye yinzi simpe ya hamena mo mepuro lyene-lyene. Epuro kwa fana ngwendi sinamwenyo esi sa hepa nondya nomema yipo si paruke. Epuro nsene li pira yirugana tali fu.—Jak. 2:26.

8. Morwasinke epuro lya karera nomulyo?

8 Morwasinke epuro lya karera nomulyo? Paurusa ga geve elimbururo. (Resa Vahebeli 11:6.) Twa hana epuro kapi tatu vhuru kuza Jehova komutjima ndi tu mu hedere. Epuro kuna kara nomulyo yipo tu sikise mo sitambo seyi va tu sitira: sokuhedera nokuhamberera Guhyetu gemeguru, Jehova.

9. Ngapi Jehova ga yi likida asi age ga diva asi ose twa hepa epuro?

9 Jehova ga diva asi twa hepa epuro, yipo ga tu pa yihonena yi tu ronge omu natu tunga po epuro nokulilikida. Mombungakriste ga tura mo vagara vepuro ava ava pitisire. Bibeli kutanta asi: “Tomu honene epuro lyawo.” (Heb. 13:7) Nye pwa kara hena yihonena yimwe yoyinzi. Paurusa kwa  tjenge kuhamena ‘mbunga zonene zonondipo,’ zovagara novakadi vanare ava va tu sigira sihonena sosiwa sepuro. (Heb. 12:1) Kugusa ko tupu vantu vepuro ava ga tumbwire Paurusa moVahebeli egaununo 11, pwa kara hena vakareli vaJehova wovanzi vepuro. MoBibeli kwa tumbura mo vagara novakadi novanona novakondi wokonontundiliro dokulisiga-siga ava va likidire epuro ntani ava natu honena mouzuni ou wokudira epuro.

Ngapi natu honena epuro lyovakwetetu?

10. Ngapi elirongo lyanyamwetu ngali tu vatera tu honene vagara novakadi vepuro ava va tumbura moBibeli?

10 Kapi to vhuru kuhonena muntu wa hana tanko kutara eyi ana kurugana. Apa ngo resa mobuke ezi, ngo dimburura asi mapaparo manzi va rugana va ku vatere yipo o tare eyi va rugene vagara novakadi vepuro. Nove kuvhura o rugane ko mapaparo gamwe kuhamena vagara novakadi owo vepuro. Melirongo lyanyamoge, ruganesa Bibeli noyimbapiratjangwa yimwe yipo o rugane mapaparo. Apa ngo teda ko kweyi ngo lironga, hetekera ko kutura momagano mavango nonontundiliro dawo. Hetekera ko kuvamona momagano goge nokuzuvha mazwi gawo nokufumbwira edumba ngwendi nove yipo ono kara. Yomulyo po, hetekera ko kukara nomalizuvho aga va kere nago. Apa ngo litura mo moyihorokwa oyo, vagara novakadi vepuro nga va kara ngwendi vakaume woge vene-vene.

11, 12. (a) Ngapi no diva nawa Abiramu naSarayi? (b) Ngapi no gwanena mo uwa mosihonena saHana naEliya naSamwere?

11 Apa ngo va diva nawa, ngo ya hara kuvahonena. Pasihonena, tu ninke asi ove kuna kuteda kuhamena sirugana sosipe. Nampo vana ku hundire o lihameke morupe rwapeke royirugana yokuzuvhisa. Tava ku pura o dirukire komukunda oku kuna kara hepero zovazuvhisi ndi o lihameke morupe royirugana yokuzuvhisa wa dira kudiva nawa ndi wa dira kuhara. Apa no teda ko nokukanderera kuhamena sirugana oso, nayi wapa o gazadare ko kosihonena saAbiramu. Nage naSarayi va sigire eparu lyewa mositata saUru ano konyima vava tungikire. Nsene o rugana eyi va rugene, ove ngo lizuvha asi ono va diva nawa kupita pwanare.

12 Ngapi nsene gumwe kuna kukutekura momudona makura to dompo mutjima o tokore kukara kembo o dire kuza komapongo? Nsene o teda kosihonena saHana nomu ga dilire kupulisira nkareso zondona zaPenina zi mu kondere kukarera Jehova, ngayi ku vatera o ture po etokoro lyewa  ntani Hana nga kara ngwendi kaume koge mwene-mwene. Ntani hena, nsene ono dompo mutjima o lizuvhe asi kwato mulyo, pokulironga maudigu gaEliya nomu Jehova ga mu hengagwidire, age nga kara ngwendi kaume koge. Vadinkantu ava vana kupita momakondjeso gomadona gokosure ngava lirongera ko yoyinzi kwaSamwere omu ga nyokerere po mapukiso gomadona govana vaEli aga ngava rugana konkongoronzugo.

13. Kuhonena epuro lyowo va tumbura moBibeli kuninkisa Jehova a tare epuro lyoge asi kwato mulyo ndi? Faturura.

13 Kuhonena epuro lyowo va tumbura moBibeli kuninkisa Jehova a tare epuro lyoge asi kwato mulyo ndi? Hawe! Diworokeni asi Bibeli kutukorangeda tu honene vantu vepuro. (1 Kol. 4:16; 11:1; 2 Tes. 3:7, 9) Vantu vamwe ava ngatu lironga mobuke ezi nawo kwa honenene epuro lyovantu ava va va hoverere. Pasihonena, mobuke ezi mEgaununo 17, Mariya kwa temwininine nonkango daHana. Ngoso epuro lyaMariya kapi lya peme ndi? Hawe! Epuro lyaHana lya vaterere Mariya a tunge po epuro yipo a kare nedina lyewa naJehova Karunga.

14, 15. Yisinke ya kara mo mobuke ezi, ntani ngapi omu natu zi ruganesa nawa?

14 Buke ezi kwa zi tjangera zi ku vatere o nkondopeke epuro lyoge. Magaununo gamo kwa tunda moyirongwa eyi ya moneka moRuhungu kutundilira momvhura 2008 dogoro 2013 yosiparatjangwa asi: “Honena epuro lyawo.” Nye kwa gwederera mo hena nombudi dimwe donompe. Nkenye egaununo kwa kara nomapuro aga naga tu vatera tu zogere nokutura pasirugana eyi tuna kulironga. Mwa kara hena mafano gomawa aga va nenepeka. Va tura mo hena nokarata mokutuvatera. Buke Honena epuro lyawo kwa zi wapaikira zi tu vatere melirongo lyanyamwetu neli lyemepata neli lyomombungakriste. Mapata gomanzi ngaga yi hafera pokuresa kumwe masimwititi gamo.

15 Ngano buke ezi zi ku vatere o honene epuro lyovakareli vaJehova vanare. Ntani ngano zi ku vatere o nkondopeke epuro lyoge ngomu ono kuhedera pepi naGuhyetu gemeguru, Jehova!