Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 22

Ga kere mulimburukwi momaheteko

Ga kere mulimburukwi momaheteko

1, 2. Ehuguvaro musinke ga kere nalyo Peturusa apa Jesus ga udisilire moKaperenaumu, nye yisinke ya horokere?

PETURUSA ana kara noutjirwe kombunga zina kundurukida Jesus. Awo kuna kara posinagoge zaKaperenaumu. Peturusa kwa tunga modoropa ezi, yimo hena a ruganene ngesefa zendi zonomfi kEkurudiva lyaGalireya, ano vakaume nava vekoro lyendi nawo yimo va tunga moomu. Peturusa ga kere nehuguvaro asi vantu womoKaperenaumu ngava dimburura Jesus asi yige Mesiyasa ntani ngava hafa kulironga kuhamena Uhompa waKarunga komurongi gomunene. Nye kapisi yimo ya horokere ngoso.

2 Wovanzi kwa hagekere kupurakena Jesus. Ano vamwe ngava sivana marongo gendi nokugarwanesa. Nye eyi ya pere Peturusa sinka kuna kara nkareso zovarongwa vamwe vaJesus. Awo kapi va haferere mausili gamwe aga ga va rongere Jesus. Eyi kwa va ninkisire va handuke. Awo kwa tente asi nonkango dendi nondigu. Yipo va hagekere kumupurakena, nokupwaga mo mosinagoge nokuhageka kukara varongwa vendi.—Resa Johanesa 6:60, 66.

3. Epuro lyaPeturusa, yisinke lya mu vaterere a rugane yikando yoyinzi?

3 Aso kwa kere siruwo sosidigu kwaPeturusa novapositoli vakwawo. Peturusa kapi ga kwete nawa egano eyi ga uyungire Jesus ezuva lina. Ado kwa kere nonkango doudigu. Yisinke ga rugene Peturusa? Aso kapi sa kere sikando sokuhova kuheteka ulimburukwi wendi kwahekurwendi, ntani kapisi sikando sokuhulilira. Tu konakoneni omu epuro lyaPeturusa lya mu vaterere a kare ngorooro noulimburukwi nampili ngomu ga kere nomaudigu.

Peturusa kwa limburukwire apa vakwawo va nyokere

4, 5. Yisinke vantu va here Jesus a va ruganene, nye age yisinke ga rugene ko?

4 Peturusa nkenye apa ngayi mu tetukisa eyi nga rugana  Jesus nokuuyunga. Poyiruwo yimwe hekurwendi nga rugana nokuuyunga monkedi ezi vantu ngava dili kukwata egano. Tapa piti ezuva limwe, apa Jesus ga rugene sitetu sokukutika vantu mayovi. Makura tava hara kumutumba a kare hompa gwawo. Makura ta nyoka, ta tantere varongwa vendi va pite komeho nowato va ze koKaperenaumu. Momasiku ogo awo varongwa kuna kuduga wato, Jesus ta va tetukisa hena pokugenda pomema a vindakane Ekurudiva lyaGalireya, nokuronga Peturusa sirongwa somulyo sepuro.

5 Ngurangura tava dimburura asi mbunga zina rutu nomawato va va sikure. Unene po sitambo sawo kwa kere va gwane hena pasitetu nondya dopanyama kapisi dopampepo. Jesus makura ta nyokere nkareso zawo zokuhara yininke yopanyama. (Joh. 6:25-27) Nzogera ozo za ya twikilire hena kosinagoge zaKaperenaumu, apa Jesus ga ya rongere usili womulyo ou wa tukukisire vantu.

6. Sifanekeso musinke ga geve Jesus, ntani yisinke va uyungire ko vapurakeni vendi?

6 Jesus kapi ga here vantu va mu tare asi age kwa wizilire a ya gave nondya dopanyama. Karunga kwa mu tuminine a ya fire vantu yipo va gwane mwenyo gwanarunye. Makura ta gava sifanekeso. Ta lifanekesa mwene komana, mboroto ezi za tundire keguru momazuva gaMosesa. Apa vamwe va mu patanene, ta gava sifanekeso a faturure asi vantu va hepa kulya rutu rwendi nokunwa honde zendi yipo va ka gwane mwenyo gwanarunye. Makura vantu tava handuka unene. Vamwe tava tanta asi: “Nonkango edi nondigu, yilye na vhura kudipurakena?” *Joh. 6:48-60, 66.

7, 8. (a) Yisinke ga dilire kukwata egano Peturusa kuhamena Jesus? (b) Ngapi Peturusa ga limbwilire po vakwawo kepuro lyaJesus?

7 Yisinke ga rugene Peturusa? Nampo nage ga kere nepiyagano kweyi ga uyungire Jesus. Kapi ga kwete egano asi Jesus ga hepere kufa yipo a sikise mo sitambo saKarunga. Peturusa nage ga here kuhageka kukwama Jesus, ngwendi moomu va yi rugene varongwa vamwe ndi? Hawe, Peturusa ga kere nosikara sosiwa sa mu ninkisire a lisige novagara vena.

8 Jesus ta piruka a tantere vapositoli vendi asi: “None kuna hara kuza?” (Joh. 6:67) Age kwa uyungisire vapositoli 12, nye  Peturusa yige ga limbwilire. Age nga pwagesa magano gendi usimbu kupita vakwawo. Nampo yige ga kere mukondi kwawo. Eyi ya kere momagano gendi yeeyi asi: “Hompa, kwalye natu za? Ove nyove wa kara nononkango domwenyo gwanarunye.”—Joh. 6:68.

9. Ngapi Peturusa ga likidire ulimburukwi kwaJesus?

9 Nonkango daPeturusa kuguma nomutjima detu. Epuro lyendi mwaJesus lya mu vaterere a tunge po sikara somulyo soulimburukwi. Peturusa ga yi mwene asi Jesus yige gelike Muzowoli ntani asi erongo lyendi lyokuhamena Uhompa waKarunga kugava eparu. Ntani Peturusa ga divire hena asi nampili ngomu ga dilire kukwata egano yuma yimwe, kwato kwapeke oku ga vhulire kuza yipo Karunga a mu hafere nokugwana mwenyo gwanarunye.

Twa hepa kulimburukwa komarongo gaJesus nampili yi kare udigu

10. Ngapi natu honena ulimburukwi waPeturusa?

10 Nove yimo o lizuvhu ngoso ndi? Sinzi sovantu mouzuni kuuyunga asi va hara Jesus, nye kapi ava mu limburukwa. Kukara noulimburukwi kwaJesus, twa hepa kuhara marongo gendi ngwendi moomu ga yi rugene Peturusa. Twa hepa kugalironga nokugakwata egano nokuparuka kuliza nago nampili yi kare udigu. Kukara noulimburukwi yiko tupu ngaku tu vatera tu kare nehuguvaro lyokukagwana mwenyo gwanarunye ogu ga tu harera Jesus.Resa  Episarome 97:10.

Peturusa ga kere noulimburukwi apa Jesus ga mu vyukisire

11. Kupi ga twere Jesus vasikuli vendi? (Tara hena nonkango dokonhi.)

11 Kapi pwa pitire siruwo konyima zosihorokwa oso, Jesus ta zi novapositoli novarongwa vendi vamwe morugendo rorure koMuzogo. Tava tundu kEkurudiva lyaGalireya, koure tava mono Ndundu zaHeremoni nomaterengenze kondungu zazo ezi za kere komururani goSirongo sEtumbwidiro. Tava siki monomukunda daKasareya Filipi, * pedi lyondundu. Makura Jesus ta pura vasikuli vendi epuro lyomulyo.

12, 13. (a) Morwasinke Jesus ga harerere kudiva omu ava mu tara vantu? (b) Melimbururo lyendi, ngapi Peturusa ga likidire epuro lyokupama?

12 Ta va pura asi: “Vantu omu ava tanta asi nyame yilye?” Peturusa tara Jesus momeho, ana yi diva asi Jesus mugara gonkenda nonondunge. Jesus kwa here kudiva omu vantu va mu  tere. Varongwa tava limburura epuro pokutemwinina magano govantu gepuko gokuhamena Jesus. Nye Jesus ga here kudiva ko yoyinzi. Vasikuli nawo va kere nomagano gepuko kumuhamena ndi? Makura ta va pura asi: “One nye no omu omu gazara asi nyame yilye?”—Ruk. 9:18-20.

13 Peturusa ta limburura hena usimbu. Ta tumbura nomukumo eyi ya kere monomutjima dawo. Ta tanta asi: “Nyove sa Mesiyasa, MunwaKarunga goMunamwenyo.” Elimbururo lyaPeturusa lya hafesere Jesus, makura ta mu pandadeke. Jesus makura ta diworokesa Peturusa asi kapisi nkenye muntu nye Jehova Karunga mwene yige a horora usili ou womulyo kovantu ava ava likida epuro. Peturusa ga kwete egano usili ou Jehova ga horwere asi Jesus yige Kristusa ndi Mesiyasa getumbwidiro!—Resa Mateusa 16:16, 17.

14. Yitumbukira musinke yomulyo Jesus ga pere Peturusa?

14 Kristusa yige emanya eli va pumbire mouporofete asi ngava li zumba vatungi. (Epis. 118:22; Ruk. 20:17) Jesus kwa tente asi Jehova nga tungira mbungakriste penyama olyo kutanta asi, Kristusa. Makura Jesus ta pe Peturusa yitumbukira yomulyo mombungakriste ozo. Jesus kwa pere tupu Peturusa yitumbukira nye kapi ga mu ninkire a pitakane vapositoli vakwawo. Age kwa pere Peturusa “nonsapi doUntungi weguru.” (Mat. 16:19) Yige ga zegwilira mpito konombunga ntatu di ze moUhompa waKarunga. Pomuhowo Vajuda, konyima Vasamaliya ano moruhura vapagani ndi ava va hana asi Vajuda.

15. Yisinke ya ninkisire Peturusa a kave Jesus, ntani yisinke ga uyungire?

15 Jesus kwa tente asi owo ngava gwana yitumbukira yoyinzi va hepa kurugana unene, ano oyo yiyo ga ya rugene Peturusa. (Ruk. 12:48) Jesus ta twikire kuhorora mausili gomulyo kuhamena Mesiyasa, kukwatera mo omu ngava mu hepeka nokumudipaga moJerusarema. Peturusa kapi da mu hafesere nonkango odo. Makura ta twara Jesus kompengi ta ka mu kava asi: “Karunga ngano ta kwafa tupu yi ka fire mo Hompa, ya ha ku horekera ngano!”—Mat. 16:21, 22.

16. Ngapi Jesus ga pukwilire Peturusa, ntani mapukururo musinke natu gwana mo mononkango daJesus?

16 Peturusa kwa here kuvatera Jesus, yipo nye lya mu tetukisire elimbururo lyaJesus. Jesus ta piruka ta tara varongwa  vendi ava va kere nomagazaro gokulifana, makura ta tanta asi: “Tunda po pwange, Satana. Kwange ove o muzapukisi, yeeyi ove kapi wa kara nomagazaro gaKarunga, gosintu ntani wa kara nago.” (Mat. 16:23; Mar. 8:32, 33) Tatu gwana mo mapukururo mononkango odo daJesus. Ayo ureru kukwama magazaro gosintu mevango lyokukwmaa magazaro gaKarunga. Pamwe kuvhura yi kare asi tuna hara kuvatera muntu nani nye kuna kumukorangeda a rugane eyi nayi hafesa Satana, kapisi Karunga. Yisinke ga limbwilire Peturusa?

17. Yisinke ga tembe Jesus apa ga tanterere Peturusa asi “tunda po pwange, Satana”?

17 Peturusa ga yi dimbwilire asi Jesus kapi ga tembe asi age sili Satana Muzonaguli. Morwa monkedi omu Jesus ga uyungisire Peturusa kwa lisigire nomu ga uyungisire Satana. (Mat. 4:10) Jesus kapi ga nyokere Peturusa, age ga mwene yikara yoyiwa mwendi, kwa here tupu kuvyukisa magazaro gendi gepuko. Peturusa ga hepere kukwatesa ko Jesus, kapisi a mu pukise.

Nsene tu linunupika tu tambure mapukururo nokugatura pasirugana, ntani ngatu hedera pepi naJesus Kristusa noGuhwe, Jehova Karunga

18. Ngapi Peturusa ga likidire ulimburukwi, ntani ngapi natu mu honena?

18 Peturusa ga handukire ndi ga fundukire? Hawe, age kwa tambwire evyukiso nelinunupiko. Age kwa likidire hena ulimburukwi. Navenye ava ava kwama Kristusa va hepa mapukururo. Nsene tu linunupika tu tambure mapukururo nokugatura pasirugana ntani ngatu hedera pepi naJesus Kristusa noGuhwe, Jehova Karunga.—Resa Yisewe 19:20.

Peturusa kwa kere noulimburukwi nampili apa va mu vyukisire

Peturusa kwa mu tungikire morwa ulimburukwi wendi

19. Nonkango musinke domulyo ga uyungire Jesus, ntani yisinke ga gazarere Peturusa?

19 Jesus ta uyunga hena nonkango dimwe domulyo asi: “Yosili nina kumutantera asi, poveli vamwe paapa tuna sikama ngesi, ava ngava dira kumakera nomfa, awo va hana kumona MunwaMuntu ta wiza mouhompa wendi.” (Mat. 16:28) Peturusa ga here kudiva eyi ga tembe Jesus. Peturusa nampo ga gazarere asi kapi nga mona Munwamuntu ta wiza mouhompa wendi, morwa mapukururo aga ga mu pere Jesus.

20, 21. (a) Emoneko musinke ga mwene Peturusa? (b) Ngapi ya vaterere Peturusa eyi ga zogerere Jesus naMosesa naEliya?

 20 Konyima zosivike simwe, Jesus ta gendi nokilometa 25 kumwe naJakopo naJohanesa naPeturusa tava rondo “kondundu zonde” zaHeremoni. Kwa kere masiku, ano vagara vatatu ava tadi va kwata nompofu. Apa ga kanderere Jesus, koyili yimwe ya va pindwire.—Mat. 17:1; Ruk. 9:28, 29, 32.

21 Jesus ta lisitunuka awo kuna kutara. Sipara sendi tasi tameke kuvembera dogoro tasi paima ngwendi ezuva. Yikoverero yendi nayo tayi vembera vayi-vayi. Makura tapa moneka vagara vavali, ava va fanekesere Mosesa naEliya. Tava uyunga naJesus kuhamena eyi “nga ka sikisa mo Jesus pokukafa moJerusarema.” Makura Peturusa ta yi dimburura asi mepuko ga kere apa ga hetekerere kukava Jesus a dire kukahepa nokufa.—Ruk. 9:30, 31.

22, 23. (a) Ngapi Peturusa ga likidire nkareso zokuvatera zonkenda? (b) Masiku googo, etungiko musinke ga gwene Peturusa naJakopo naJohanesa?

 22 Peturusa kwa here kulihameka mo memoneko olyo, age kwa here asi ngano li twikire ngorooro. Ayo kwa monekere ngwendi asi Mosesa naEliya kwa here kutunda po pwaJesus. Peturusa yipo ga tente asi: “Hompa, apa pawa kukara apa. Tu dikeni po marutambo gatatu: limwe lyoge, limwe lyaMosesa, ano eli limwe lyaEliya.” Alyo kwa kere emoneko tupu, kapi pwa hepere kudika po marutambo ndi notenta. Peturusa kapi ga divire eyi ana kuuyunga. Nye ga kere nonkareso zokuvatera zonkenda.—Ruk. 9:33.

Jakopo naJohanesa naPeturusa kwa va tungikire nemoneko lyokutetukisa

23 Masiku googo, Peturusa naJakopo ntani Johanesa kwa gwene etungiko limwe hena. Eremo tali wiza makura tali va kudumike kondundu. Makura tamu tundu ezwi lyaJehova Karunga! Age kwa tente asi: “Ogu Munwange ogu ga za nge komutjima, omu mu zuvhe!” Emoneko tali pu, makura tava kara velike naJesus kondundu.—Ruk. 9:34-36.

24. (a) Ngapi Peturusa ga gwanene mo mauwa melisintunuko lyaJesus? (b) Ngapi natu gwanena mo mauwa melisintunuko lyaJesus?

24 Elisintunuko lyaJesus kwa kere nomulyo kwaPeturusa ntani mulyo kwetu. Konyima zonomvhura dononzi, Peturusa ga tjenge kuhamena mfumwa zendi zokumona uyerere waJesus ngaHompa meguru nokukara gumwe ‘gonondipo dokutara nomeho efumano lyendi lyenene.’ Emoneko olyo kwa pamekere mauporofete gomanzi goNonkango daKarunga ntani kwa nkondopekere epuro lyaPeturusa yipo a lididimikilire mahepeko. (Resa 2 Peturusa 1:16-19.) Ngwendi Peturusa, elisintunuko lyaJesus kunkondopeka epuro lyetu momauporofete gokuhamena Jesus noUhompa waKarunga. Ngatu hafera matungiko goUhompa nsene tu limburukwa kwaJesus nokulirongera ko kwendi nokutambura mapukururo gendi nokutwikira kumukwama nelinunupiko.

^ para. 6 Vantu kwa likidire nkareso zokulisiga, apa Jesus ga va pere mboroto awo kwa mu tumbwire muporofete gwaKarunga, nye ezuva lyokukwama ko kosinagoge awo va mu nyokere.—Joh. 6:14.

^ para. 11 Kutunda kEkurudiva lyaGalireya dogoro koKasareya Filipi nokilometa 50, muntu ga hepa kuronda monondundu.