Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 11

Ga vangararere nokundindira

Ga vangararere nokundindira

1, 2. Komeho Eliya a humburuke kondundu a ka kanderere, yisinke ga hepere kurugana, ntani ngapi ga lisigire nahompa Ahaba?

ELIYA kwa here kuza gelike a ka kanderere kwaKarunga. Nye vantu kwa mu kundurukidire morwa va mwene omu ga hundilire mundiro gu tunde meguru ano awo kwa here kulihenga kwendi a va tungike. Komeho a humburuke ko kondundu zaKarumeli a ka kanderere kwaJehova Karunga pwagelike, poyili yimwe ga hepere kurugana. Age ga hepere kuuyungisa hompa Ahaba.

2 Ahaba naEliya kwa kere vantu wokulisiga. Ahaba kwa dwere yikoverero yoyiwa yosiuhompa, nye Eliya kwa dwere erwakani lyosipapa songameru ndi sosikombo. Ahaba kwa kere muntu ga here emona, nga rwanesa Jehova ntani nga pulisire vantu va mu tokwere po. Ano Eliya kwa kere mugara gependa gomulimburukwi gepuro.

3, 4. (a) Yisinke ya horokerere Ahaba novakareli vaBara? (b) Mapuro musinke natu ka konakona?

3 Ahaba novakareli vaBara ya va sumpililire. Ukarelikarunga woyimpempa ou Ahaba namukadendi Jesebeli va hanesere mosirongo saIsraeli kwa ya u tulire poruzera. Bara kapi ga vhulire kutuma mundiro apa vaporofete va kandererere nokudana nokuligeragura vene. Kapi hena ga vhulire kupopera vaporofete vendi 450 ava va dipagere. Poyili hena yimwe ga dilire kuvhura kurugana karunga Bara. Nomvhura ntatu vaporofete vaBara ngava kanderere kwendi a rokese mvhura, nye kapi ya va tompokere. Nye Jehova ga yi likidire asi age Karunga gosili pokurokesa mvhura.—1 Vah. 16:30–17:1; 18:1-40.

4 Siruwoke Jehova na rugana ko yuma? Yisinke na rugana Eliya siruwo esi ana kundindira Jehova a rugane ko  yuma? Yisinke natu lirongera ko kepuro eli ga kere nalyo Eliya? Tu tareni eyi ya horokere.—Resa 1 Vahompa 18:41-46.

Eliya ta kanderere

5. Yisinke Eliya ga tanterere Ahaba, ntani Ahaba ga lirongerere ko kweyi ya horokere ezuva olyo ndi?

5 Eliya ta tantere Ahaba asi: “Zende o ka lye oku to nu, yeeyi ame kuna kuzuvha sipupiro somvhura sina kuwiza.” Hompa Ahaba gomudona ga lirongerere ko kweyi ya horokere ezuva olyo ndi? Bibeli kapi za tumbura asi ga litezwilire, ndi asi a hundire muporofete a mu kanderere kwaJehova va mu gusire po. Nye Ahaba kwa zire ‘a ka lye oku ta ka nwa.’ (1 Vah. 18:41, 42) Yisinke ga rugene Eliya?

6, 7. Morwasinke Eliya ga kandererere?

6 “Eliya ta rondo kondungu zondundu zaKarumeli, makura ta nyongama, mutwe gwendi ta gu tura pokatji konongoro.” Age Ahaba ta zi a ka lye nokukanwa, makura Eliya ta gwana mpito zokukanderera. Eliya kwa linunupikire  pokunyongeka mutwe gwendi makura ta gu tura pokatji konongoro. Morwasinke ga yi ruganene Eliya? MwaJakopo 5:18 kutanta asi kwa kanderere yipo mvhura zi roke. Age kwa kanderere kondungu zondundu zaKarumeli.

Ekanderero lyaEliya kwa likidire asi age kwa here mpango zaKarunga zi sike mo

7 Komeho yi ka horoke eyi, Jehova kwa tente asi: “Ngani gava mvhura.” (1 Vah. 18:1) Eliya kwa kandererere yipo sitambo saJehova si sike mo, ngwendi moomu Jesus ga ya rongere vasikuli vendi va kanderere.—Mat. 6:9, 10.

8. Yisinke asi tu rongo sihonena saEliya kuhamena makanderero?

8 Sihonena saEliya kuturonga yoyinzi kuhamena makanderero. Age sinka sendi sosinene kwa kere asi mpango zaKarunga zi sike mo. Nose nsene tatu kanderere twa hepa kudiworoka asi: “[Karunga] ta tu zuvhu ntene tu mu hundira eyi yokuliza nompango zendi.” (1 Joh. 5:14) Mokuninka asi Karunga a tambure makanderero getu, twa hepa kulironga Bibeli nkenye apa yipo tu dive mpango zendi. Eliya ga here rukukutu ru hage morwa vantu vendi kwa kere moruhepo rorunene. Ntani ga here hena kupandura Jehova kositetu esi ga rugene sokutuma mundiro. Nose nsene tatu kanderere twa hepa kupandura Karunga nokukanderera po vakwetetu.—Resa 2 Vakolinte 1:11; Vafilipi 4:6.

Kuhuguvara nokuvangarara

9. Yisinke Eliya ga tanterere mukareli gwendi, ntani yikara yendi yivali musinke natu konakona?

9 Eliya ga yi divire asi Jehova na rokesa mvhura, nye kapi ga divire siruwo esi nayi horoka. Yisinke ga rugene Eliya? Bibeli kutanta asi: ‘Age makura ta tantere mukareli gwendi asi: “Ko rondo si o tare kefuta.” Age ta rondo, ta tara ko makura ta zigire asi: “Nayimwe si ko.” “Eliya ta mu tantere a ze ko rutano-naruvali.”’ (1 Vah. 18:43) Sihonena saEliya kuturonga yininke yivali. Age kwa kere nehuguvaro. Ntani ga vangararere.

Eliya ga paparere sidiviso esi nasi likida asi Jehova na rokesa mvhura

10, 11. (a) Monkedi musinke Eliya ga likidire ehuguvaro metumbwidiro lyaJehova? (b) Morwasinke natu karera nehuguvaro lyangoso?

10 Eliya ga kere nehuguvaro metumbwidiro lyaJehova,  yiyo ga paparerere sidiviso esi nasi likida asi Jehova na rokesa mvhura. Yipo ga tumine mukareli gwendi kondungu zondundu a ka tare nsene sidiviso ko. Apa ga ka tengwire mukareli ta ya tanta asi: ‘Nayimwe si ko.’ Keguru kapi kwa kere nampili karemo kamwe. Nye diworoka asi Eliya ga tanterere hompa Ahaba asi: “Ame kuna kuzuvha sipupiro somvhura zina kuwiza.” Morwasinke Eliya ga yi uyungilire oyo ako kapi kwa kere maremo?

11 Eliya kwa kere muporofete gwaJehova, age ga kere nehuguvaro asi etumbwidiro lyaJehova nali sika mo. Morwa ga kere nehuguvaro asi nazi roka, momagano gendi ga zuvhire sipupiro somvhura. Eyi kutudiworokesa eyi za uyunga Bibeli kuhamena Mosesa asi: “Age kwa kere nouradi ngwendi gogu ana kutara Karunga ogu ga ha moneka.” Nove yimo o lizuvhu ngoso kuhamena Karunga ndi? Karunga ga tu pa maumbangi gomanzi aga naga tu vatera tu kare nepuro nehuguvaro momatumbwidiro gendi.—Heb. 11:1, 27.

12. Monkedi musinke Eliya ga vangararere, ntani yisinke ga uyungire apa mukareli gwendi ga mu tanterere kuhamena karemo?

12 Eliya ga vangararere, age kwa tumine mukareli gwendi yikando yitano-nayivali. Gazareni tupu eroroko eli ga lizuvhire mukareli gwina, nye Eliya kwa here kumona sidiviso. Ano sikando sautano-nauvali mukareli makura ta zigire asi: “Na mono karemo kana kutunda ko kokuhura posikandeko somugara.” Gazareni tupu omu mukareli ana kulikida Eliya apa kana huru karemo. Mukareli kwa mwene karemo oko asi kwato mulyo. Nye kwaEliya kwa kere mulyo yipo ga tanterere mukareli asi: “Zende kwahompa Ahaba, o ka mu tantere a ronde mokarukara kendi a ze kembo, neisi nazi mu kondera mvhura.”—1 Vah 18:44.

13, 14. (a) Ngapi natu vangarara ngwendi Eliya? (b) Morwasinke natu vangararera?

13 Eliya ga vangararere. Nose kuna kuparuka posiruwo apa Karunga nga ka sikisa mo sitambo sendi. Eliya ga ndindililire mvhura zi roke, ano vakareli vaKarunga nawo kuna kundindira ezonauko lyouzuni ou. (1 Joh. 2:17) Ngwendi Eliya, nose twa hepa kundindira dogoro siruwo oso ngasi sike mo. Jesus, MunwaKarunga kwa tantererere vasikuli vendi asi: “Rungarareni, yeeyi kapi mwa diva asi Hompa gweni  ezuvake nga wiza.” (Mat. 24:42) Ngoso Jesus kwa tembe asi vasikuli vendi kapi ngava yi diva asi uhura pepi una kara ndi? Hawe, morwa age ga tumbwire yihorokwa eyi ngayi likida asi uhura pepi. Nkenye gumwe gwetu kuna kumona esikiliromo lyosidiviso “souhura wouzuni.”—Resa Mateusa 24:3-7.

Karemogona ka pere Eliya umbangi wokupama asi Jehova ta rokesa mvhura. Sidiviso somazuva gopouhura kututumangeda tu rugane ko yuma

14 Nkenye sihorokwa somosidiviso kuna kulikida asi uhura pepi una kara. Ayo kuna kututumangeda tu vangarare ndi? Karemogona ka pere Eliya umbangi wokupama asi Jehova ta rokesa mvhura. Yisinke ya horokere?

Jehova ta rokesa mvhura

15, 16. Apa mukareli gwaEliya ga zire kwaAhaba, yisinke ya horokere ntani yisinke Eliya ga ndindilire eyi ngano Ahaba na rugana?

15 Bibeli kutanta asi: “Ngapa katu popi, eguru nare kudi-kudi maremo, ano mpepo nazo zina pinduka, mvhura zonene tazi wiza. Ahaba ta rondo mokarukara kendi koyita a ze koJesereli.” (1 Vah. 18:45) Haga za mukareli gwaEliya a ka tantere mbudi Ahaba, maremo taga ligwederere keguru taku sovagana. Mpepo tazi pepe unene, makura mvhura tazi roko. Evhu eli lya kukutire tali nengena. Mukuro gwaKisoni tagu furu, makura mema taga kuhura honde zovaporofete vaBara. Eyi ya pere mpito Vaisraeli va kuhure mo mosirongo nyata zoukareli waBara.

“Mvhura zonene tazi wiza”

16 Eliya ga ndindilire asi Vaisraeli nava yi rugana. Age ga ndindilire asi Ahaba nampo na litezurura a sige ukarelikarunga waBara wokunyata. Sihorokwa somundiro gokutunda meguru ntani nesi somvhura ngano ya mu tumangedere a litezurure. Nye kapi tuna diva eyi ya kere momagano gaAhaba. Bibeli kutanta asi: “Ta rondo mokaruka kendi koyita a ze koJesereli.” Ga lirongerere ko yuma koyihorokwa oyo ndi? Ga litezwilire ndi? Yihorokwa ya kweme ko kwa likida asi age kapi ga litezwilire.

17, 18. (a) Yisinke ya horokerere Eliya monzira zokuza koJesereli? (b) Morwasinke sa karere sitetu asi Eliya ga dukire kutunda kondundu zaKarumeli dogoro koJesereli? (Tara nonkango dokonhi.)

 17 Makura Eliya ta tameke kugenda monzira ezi ga pitire Ahaba. Nye mvhura kwa rokere unene. Tapa horoka sitetu.

18 “Kuwoko kwaHOMPA kwa kere kwaEliya, age kwa limangere mukata, makura ta duka a pite komeho zaAhaba dogoro koJesereli.” (1 Vah. 18:46) Yosili, “kuwoko” kwaJehova yiko kwa vaterere Eliya a duke morwa age mukurupe ga kere ntani Jesereli kwa kere ure wonokilometa 30. * Gazara tupu omu muporofete ana kumanga erwakani lyendi yipo a wape kuduka nawa, ta duka momvhura dogoro ta piti karukara kahompa Ahaba.

19. (a) Mokumona asi Eliya ga dukire ngwendi mudinkantu, kosinke ayi tu diworokesa? (b) Apa Eliya ga dukire koJesereli, yisinke ga divire?

19 Eliya ga lizuvhire uwaawa, pokuduka unene ngwendi mudinkantu. Eyi kutudiworokesa eyi za tumbwidira Bibeli kuhamena ukanguki wouwa owo ngava ka gwana vantu wovalimburukwi moParadisa pevhu. (Resa Jesaya 35:6; Ruk. 23:43) Apa Eliya ga dukire momvhura, age ga yi divire asi ana mu hafere Karunga gosili, Jehova.

20. Ngapi natu vhura kugwana matungiko gaJehova?

20 Jehova ana hara kututungika. Twa hepa kulitura mo unene yipo nga tu tungike. Ngwendi Eliya, twa hepa kuvangarara nokukonakona maumbangi aga gana kulikida asi Jehova nga rugana ko yuma mosiruwo esi somaudigu. Ngwendi Eliya, twa kara nehuguvaro lyenene momatumbwidiro gaJehova ‘Karunga goMunasili.’—Deut. 32:4.

^ para. 18 Konyima zoyihorokwa eyi, Jehova ga tanterere Eliya a ronge Elisa ogu ga ya divikwire asi “mukwafi gwaEliya.” (2 Vah. 3:11) Elisa nga vatere Eliya, morwa mukurupe ga kere.