Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 8

Yisinke Uhompa waKarunga?

Yisinke Uhompa waKarunga?

1. Ekanderero musinke natu ka zogera?

VANTU wovanzi va diva ekanderero Guhyetu gemeguru. Jesus kwa ruganesere ekanderero eli mokuronga varongwa vendi omu nava kanderera. Yisinke ga tumbwire? Ntani morwasinke lya karera ekanderero eli nomulyo?

2. Yininke musinke yitatu yomulyo eyi ga tu rongere Jesus tu kanderere?

2 Jesus kwa tente asi: “Nsene tomu kanderere, omu kanderere ngesi asi: ‘Guhyetu gemeguru. Edina lyoge ava li pongore. Uhompa woge au wize. Mpango zoge ava zi sikise mo pevhu ngwendi meguru.’” (Resa Mateusa 6:9-13.) Morwasinke Jesus ga tu rongera tu kanderere koyininke yitatu eyi?—Tara Mauzera 20.

3. Yisinke natu ka lironga kuhamena Uhompa waKarunga?

3 Twa lironga asi edina lyaKarunga Jehova. Ntani twa zogera kuhamena sitambo saKarunga kovantu ntani kevhu. Nye yisinke ga tembe Jesus apa ga tente asi: “Uhompa woge au wize”? Natu ka lironga kuhamena Uhompa waKarunga neyi ngau ka rugana ntani nomu ngau ka pongora edina lyaKarunga.

YISINKE UHOMPA WAKARUNGA?

4. Yisinke Uhompa waKarunga, ntani yilye Hompa gwawo?

4 Jehova kwa tura po epangero meguru ntani ga horowora Jesus a kare Hompa gwalyo. Bibeli kutumbura epangero eli asi Uhompa waKarunga. Jesus  kumutumbura asi “mupangeli govapangeli, age hena Hompa gohompa.” (Ehororo 17:14) Eyi kutanta asi Jesus yige Hompa gomuwa ntani gononkondo po kovahompa navenye.

5. Kutundilira kupi ngau pangera Uhompa waKarunga? Kupi ngau pangera?

5 Apa va mu vhumbwire Jesus, pwa pitire mazuva 40, makura ta tengura meguru. Konyima, Jehova kwa ka mu tulire a kare Hompa goUhompa waKarunga. (Yirugana 2:33) Epangero lyaKarunga ngali pangera pevhu kutundilira meguru. (Ehororo 11:15) Eyi yiyo azi tumbwire Bibeli Uhompa waKarunga asi ‘Untungi weguru.’—2 Timoteusa 4:18.

6, 7. Yisinke ya ninkisa Jesus a pitakane vahompa navenye wovantu?

6 Bibeli kutanta asi Jesus ga pitakana vahompa navenye morwa “gelike thi a dili kufa.” (1 Timoteusa 6:16) Vahompa navenye wovantu kufa, nye Jesus kapi nga fa. Eyi kutanta asi yininke nayinye yoyiwa eyi nga tu ruganena Jesus ngayi karerera.

7 Bibeli kwa pumba asi Jesus nga kara Hompa gomuwa ntani gonkenda. “Mpepo zaHOMPA ngazi mu pa unongo nediwo nomayere gokupangera mbunga zendi. Age nga diva eharo lyaHOMPA oku ta mu fumadeke. Age nga hafera kumulimburukwa. Age kapi nga pangera moomu gana kumona meho gendi ndi yonguwire; nohepwe nga di pangura pauhunga ano valinunupiki vepevhu nga va tokwera nawa.” (Jesaya 11:2-4) Ono hara kukara nahompa gokufana ngoso ndi?

8. Ngapi twa diva asi Jesus kapi nga pangera gelike?

8 Karunga ga horowora vantu vamwe ngava ka pangere  kumwe naJesus mepangero eli lyemeguru. Pasihonena mupositoli Paurusa kwa tanterere Timoteusa asi: “Nsene tu didimika ngorooro, ngatu ka pangera kumwe nendi.” (2 Timoteusa 2:12) Vangapi ngava pangera kumwe naJesus?

9. Vangapi ngava ka pangera kumwe naJesus? Siruwoke ga varekere Karunga kuvahorowora?

9 Moomu twa lirongere mEgaununo 7, mupositoli Johanesa kwa mwene emoneko kuhamena Jesus ngaHompa meguru kumwe novahompa 144 000. Wolye owo 144 000? Johanesa kwa faturura asi “ava va tjangera edina lyendi [Jesus] neli lyoGuhwe poyipara yawo.” Ntani ga tente hena asi: “Awo kukwama Nzwigona [Jesus] nkenye oku zina vyuka. Awo yiwo va zowora mo movantu.” (Resa Ehororo 14:1, 4.) Vantu owo 144 000 kuna kara Vakriste wovalimburukwi ava ga horowora Karunga “ngava pangera ngohompa evhu nalinye.” Apa ava fu awo kuvapindwira keparu lyemeguru. (Ehororo 5:10) Posiruwo sovapositoli, Jehova kwa varekere kuhorowora Vakriste wovalimburukwi va kare womombunga zovahompa 144 000.

10. Morwasinke Jehova ga horowere Jesus nava 144 000 ngava pangere vantu?

10 Jehova kwa tu hara yiyo ga horowora vantu va ka pangere kumwe naJesus. Ntani Jesus ga diva ukaro wovantu morwa ga kere muntu ntani nage ga hepere. Yipo nye age nga kara mupangeli gomuwa. Paurusa kwa tente asi Jesus kufira nkenda “maupirankondo getu, yeeyi nage kwa mu hetekere moomu ose.” (Vahebeli 4:15; 5:8) Owo 144 000 nawo va diva ukaro wovantu. Nawo kwa kere vantu wokudira kusikilira mo  ntani ngava vere. Yipo nye, Jesus nava 144 000 ngava kwata egano malizuvho nomaudigu getu.

YISINKE NGAU KA RUGANA UHOMPA WAKARUNGA?

11. Morwasinke Jesus ga rongerere varongwa vendi va kanderere asi mpango zaKarunga va zi sikise mo meguru?

11 Jesus kwa rongere varongwa vendi va kanderere asi mpango zaKarunga va zi sikise mo meguru. Morwasinke? Twa lirongere mEgaununo 3 asi Satana Muzonaguli kwa rwanesere Jehova. Kutunda opo, Jehova kwa pulisilire Satana novaengeli wovadona va kare meguru posiruwo songandi. Yipo nye, vamwe meguru kapi ngava sikisa mo mpango zaKarunga. MEgaununo 10, ngatu ka lironga yoyinzi kuhamena Satana novaengeli wovadona.

12. Yihorokwa musinke yivali yomulyo va faturura mEhororo 12:10?

12 Bibeli kutanta asi konyima tupu zapa va mu tulire Hompa goUhompa waKarunga, Jesus kwa rwire yita naSatana. (Resa Ehororo 12:7-10.) Velise 10 kwa faturura yihorokwa yivali yomulyo. Uhompa waKarunga tau tameke kupangera naJesus ngaHompa, ntani Satana tava mu zugumine pevhu. Ngomu ngatu ka lironga, oyo ya horoka nare.

13. Yisinke ya horoka meguru kutunda apa Satana va mu zuguma mo?

13 Bibeli kwa faturura ruhafo rovaengeli wovalimburukwi meguru konyima zapa va zugumine mo Satana novaengeli vendi. Azo kutanta asi: “Hafa ove eguru nava va kara mo!” (Ehororo 12:12) Ngesi meguru kuna kara mo mbili nouumwe morwa nkenye ogu kuna kusikisa mo mpango zaKarunga.

Apa Satana novaengeli vendi va va zugumina pevhu, maudigu kwa ligwederera. Maudigu ogo ntaantani ngaga ka hage po

14. Yisinke ya horoka pevhu morwa Satana va mu zuguma mo meguru?

 14 Nye pevhu kuna kara po maudigu gomanene ‘yeeyi Muzonaguli ga hegumuka’ ntani ana kara “nehandu lyenene, morwa ana diva asi siruwo sendi esi sina hupu ko, sisupi!” (Ehororo 12:12) Satana kuna kara nehandu lyenene. Va mu zuguma mo meguru ntani ga diva asi ntaantani ngava mu zonagure po. Age kuna kurugana paapa ga hulira mokureta maudigu nokukora noruhepo pevhu.

15. Yisinke sitambo saKarunga kevhu?

15 Nye sitambo saKarunga kevhu kapi sa runduruka. Age kuna hara vantu wokusikilira mo ngava paruke pevhu moparadisa narunye. (Episarome 37:29) Ngapi ngau ka yi sikisa mo Uhompa waKarunga?

16, 17. Yisinke azi tu tantere Ndaniyera 2:44 kuhamena Uhompa waKarunga?

16 Uporofete mwaNdaniyera 2:44 kutanta asi: “Posiruwo sohompa owo Karunga gemeguru nga dika sirongo esi ngasi kererera narunye. Aso kapi ngava si funda nampili kanunu, nye ngasi hanagura yirongo oyo nayinye, makura tasi kara dogoro narunye.” Yisinke au tu rongo uporofete ou kuhamena Uhompa waKarunga?

17 Sokuhova, awo kwa pumbire asi Karunga nga tura po sirongo ndi Uhompa wendi “komazuva govahompa owo,” kutanta asi ago mapangero gepevhu simpe kuna kupangera. Sauvali, Uhompa waKarunga ngau karerera dogoro narunye. Sautatu, ngapa kara yita pokatji koUhompa waKarunga nomapangero gouzuni ou. Uhompa waKarunga ngau hanagura  po mapangero nagenye makura yiwo welike ngau pangera pevhu. Vantu ngava kara nepangero lyewa eli ngava hafera.

18. Ngapi ava yi tumbura yita yokuhulilira pokatji kaKarunga nomapangero gouzuni?

18 Ngapi ngau ka gusa po Uhompa waKarunga mapangero gepevhu? Komeho zoyita yokuhulilira yaHarumagedoni, nompepo donondona ngadi pukisa ‘vahompa womouzuni naunye, asi di ka va pongaike va ya rwe yita mezuva olyo lyenene lyaKarunga Munankondo.’ Mapangero govantu ngaga rwa yita noUhompa waKarunga..—Ehororo 16:14, 16; tara Mauzera 10.

19, 20. Morwasinke tuna hepere Uhompa waKarunga?

19 Morwasinke tuna hepere Uhompa waKarunga? Morwa nokonda ntatu. Zokuhova, ose vananzo ntani kuvera nokufa. Nye Bibeli kutanta asi mepangero lyoUhompa waKarunga ngatu ka paruka narunye. Johanesa 3:16 kutanta asi: “Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.”

20 Zauvali, mouzuni kwa zura mo vadinikarunga. Vantu wovanzi kukumbagera nokuhondera. Kwato eyi natu vhura kurugana ko, nye Karunga nga ya va zonagura po poyita yaHarumagedoni. (Resa Episarome 37:10.) Zautatu, mapangero govantu kurugana udona ntani ufuki. Ago kapi aga korangeda vantu va limburukwe Karunga. Bibeli kutanta asi pwa kara “vanankondo ava ava hepekere mo vakwaawo.”—Muudisi 8:9.

21. Ngapi ngau sikisa mo Uhompa mpango zaKarunga pevhu?

 21 Konyima zaHarumagedoni, Uhompa waKarunga ngau sikisa mo mpango zaKarunga pevhu. Satana nonompepo dendi donondona ngava ka di gusa po. (Ehororo 20:1-3) Kwato hena ogu nga ka vera nokufa. Morwa Jesus ga tu fira, vantu navenye wovalimburukwi ngava ka paruka moParadisa narunye. (Ehororo 22:1-3) Uhompa ngau ka pongora edina lyaKarunga. Kutanta asi apa ngau ka pangera Uhompa waKarunga nkenye gumwe nga ka fumadeka edina lyaKarunga.—Tara Mauzera 21.

SIRUWOKE JESUS VA MU TUMBIRE A KARE HOMPA?

22. Ngapi twa diva asi Jesus kapi ga tamekere kupangera apa ga kere pevhu ntani apa tupu ga tengwire meguru?

22 Jesus kwa rongere vasikuli vendi va kanderere asi: “Uhompa woge au wize.” Kwa likidire asi Uhompa kapi wa wizire posiruwo sina. Jehova pomuhowo ga hepere kutura po Uhompa nokutumba Jesus a kare Hompa. Jesus kwa mu tulire Hompa paapa tupu ga tengwire meguru ndi? Hawe, age kwa ka ndindilire. Peturusa naPaurusa kwa tente asi konyima  zapa va mu vhumbwire Jesus, nonkango demEpisarome 110:1 kwa sikilire mo mwendi. Jehova kwa mu tanterere asi: “Yo hingire oku korulyo rwange, dogoro noku ngani tura nonkore doge konhi zonompadi doge.” (Yirugana 2:32-35; Vahebeli 10:12, 13) Siruwo sokuhura kupi ga ndindilire komeho zokumutumba ngaHompa?

Uhompa waKarunga ngau ka sikisa mo mpango zendi pevhu

23. (a) Mvhura musinke ga varekere Jesus kupangera ngaHompa? (b) Yisinke ngatu ka lironga megaununo lyokukwama ko?

23 Komeho zomvhura 1914, kambunga koVakriste wovalimburukwi ka kwete egano asi ngazi kara mvhura zomulyo. Eyi ya horokere kutundilira 1914 kwa likidire asi mouhunga va kere. Jesus kwa tamekere kupangera ngaHompa momvhura zoozo. (Episarome 110:2) Konyima tupu zoyo Satana yipo va mu zugumine pevhu, ngesi “siruwo sendi esi sina hupu ko, sisupi!” (Ehororo 12:12) Megaununo lyokukwama ko ngatu lironga yihorokwa eyi yina kulikida asi ose kuna kuparuka mosiruwo oso. Ngatu ka lironga hena asi ntaantani Uhompa waKarunga ngau ka sikise mo mpango zaKarunga pevhu.—Tara Mauzera 22.