Zende koyikaramo

Zende koyikaramo

Nombangi daJehova

Horowora eraka Rukwangali

 Egaununo 2

Bibeli buke zokutunda kwaKarunga

Bibeli buke zokutunda kwaKarunga

1, 2. Yisinke ya kara mo moBibeli?

GA KU PA rumwe muntu sininke sosiwa ndi? Ngapi omu wa lizuvhire? Sininke oso kwa likidire asi muntu ogo ga ku hara. Ano ove wa mu pandwire kweyi ga ku pere.

2 Karunga kwa tu pa sininke sosiwa, Bibeli. Mobuke ozo kwa kara mo yininke yoyinzi eyi natu vhura kulironga. Kwa tumbura mo omu Karunga ga sitire eguru nevhu ntani Adamu naEva. Amo hena kwa kara mo nompango edi nadi tu vatera tu lididimikire maudigu. Bibeli za faturura hena omu Karunga nga ka sikisa mo sitambo sendi kevhu. Yosili Bibeli buke zongwa ga tu pa Karunga.

3. Yisinke ngo dimburura ngomu ono kulironga Bibeli?

3 Ngomu ono kulironga Bibeli, ngo yi dimburura asi Karunga ana hara o kare kaume kendi. Nsene ngo twikira kulironga kumuhamena, ukaume weni ngau nkondopara.

4. Momaraka gangapi va zi toroka Bibeli?

4 Nobibeli mabiliyona kwa di rugana. Kwa zi toroka momaraka konyara 2 600 ntani sinzi sovantu kuvhura kuziresa meraka lyawo. Nobibeli dokupitakana emiliyona kudigavera nkenye sivike kovantu. Kwato hena buke zimwe ezi ava gavere ngwendi Bibeli.

5. Mbudi zalye za kara moBibeli?

 5 Bibeli kwa ‘zi retesa po mpepo zaKarunga.’ (Resa 2 Timoteusa 3:16.) Monkedi musinke? Azo kwa tanta asi: “Vantu ava ngazi gendesa Mpepo zoKupongoka, yiwo ngava uyunga yokutunda kwaKarunga.” (2 Peturusa 1:21) Pasihonena, tu ninke asi mukurupe kapi ga diva kutjanga makura ta tantere munwendi a mu tjangere po mbilive. Magano ogo na tjanga ogo munona kapisi gendi nye gomukurupe. Mokulifana, mbudi ezi za kara moBibeli zaKarunga kapisi zovagara vena va zi tjenge. Bibeli nazinye  sili “nonkango daKarunga.”—1 Vatesaronika 2:13; tara Mauzera 2.

Nombangi daJehova kwa toroka Bibeli momaraka gomanzi

BIBELI USILI

6, 7. Eyi va tjanga moBibeli ya lilimba ndi?

6 Bibeli kwa gusire nomvhura 1 600 mokuzitjanga. Vantu ava va zi tjenge kapi va parukire posiruwo simwe tupu. Vamwe kwa kere valirongi ano vamwe vantuuntu tupu. Gumwe kwa kere ndokotora. Vamwe vanandima novakwati wonomfi novasita woyiunda novaporofete novapanguli ntani vahompa. Nampili ngomu va kere vantu wokulisiga-siga, eyi va tjenge kapi ya lilimba.

7 Buke zaGenesis kututantera omu ga tamekere maudigu govantu. Ano buke zEhororo kwa uyunga mo omu evhu ngava ka li ninka li kare hena paradisa. Bibeli kwa tumbura ehistoli lyovantu nokulikida asi Karunga nkenye apa kusikisa mo sitambo sendi.

8. Yihonena musinke yina kulikida asi Bibeli kuuyunga usili kuhamena unsitwe?

8 Bibeli kuuyunga usili kuhamena unsitwe morwa azo buke zokutunda kwaKarunga. Pasihonena, mwaLevitikus kwa kara mo noveta edi ga geve Karunga koVaisraeli mokudira kuhanesa mauvera. Posiruwo sina vantu kapi va kwete egano asi mauvera kuvhura kugakagura. Ntani Bibeli kwa vyukilira kuuyunga hena asi evhu kwa kara “pevega lya hana yuma.”—Joba 26:7.

9. Morwasinke natu huguvarera Bibeli?

9 Yihorokwa yomoBibeli usili. Ava va tjenge  nobuke dohistoli zomouzuni kapi va tjenge nkenye apa usili. Pasihonena, apa va fundire muhoko gwawo moyita kapi va yi tjenge monobuke dawo. Nye vatjangi woBibeli va tjenge nayinye nampili apa Vaisraeli va va fundire moyita. Awo hena va tjenge mapuko ganyamwawo. Pasihonena, mwaNumeri, Mosesa ga tjenge mapuko gendi nomu ga mu handukilire Karunga. (Numeri 20:2-12) Vatjangi woBibeli kwa hungikire, eyi kulikida asi Bibeli buke zokutunda kwaKarunga. Ntani ose kuvhura tu zi huguvare.

BUKE ZOMAGANO GOMAWA

10. Morwasinke Bibeli za karera nomagano gomawa?

10 Bibeli ‘kwa zi retesa po mpepo zaKarunga, azo kwa kara nomulyo gokuronga usili nokukorangeda nokupukurura.’ (2 Timoteusa 3:16) Azo buke azi gava magano gomawa kwetu, morwa azo kwa tunda kwaJehova ogu ga tu sita. Ga diva nawa magazaro nomalizuvho getu. Age ga tu diva nawa kupitakana omu twa lidiva nyamwetu ntani ana hara tu hafe. Jehova hena ga diva eyi nayi tu retera uwa ndi udona.

11, 12. (a) Magano musinke gomawa ga geve Jesus mwaMateusa egaununo 5 dogoro 7? (b) Yisinke hena a tu rongo Jehova moBibeli?

11 MwaMateusa egaununo 5 dogoro 7, Jesus kwa geve magano gomawa kuhamena omu natu vhura kugwana ruhafo, nomu natu kara nombili novantu, nomu natu kanderera ntani nomu natu tara emona. Nonkango odo ga uyungire Jesus da kara nomulyo  nomomazuva getu, nampili ngomu va di tjenge nomvhura 2 000 da ka pita.

12 MoBibeli Jehova kuturonga omu natu kara nombili mepata nokukara varugani wovawa ntani nomu natu tekura nawa vakwetetu. Nompango domoBibeli kuvatera vantu navenye.—Resa Jesaya 48:17; tara Mauzera 3.

HUGUVARA MAUPOROFETE GOMOBIBELI

Jesaya ga pumbire ezonaguro lyaBabironi

13. Yisinke ga pumbire Jesaya kuhamena Babironi?

13 Mauporofete gomanzi gomoBibeli ga sika mo nare. Pasihonena, Jesaya kwa pumbire asi sitata saBabironi ngava si zonagura po. (Jesaya 13:19) Age kwa fatwilire hena omu ngava si zonagura po. Sitata kwa kere nomarungavero gomanene ntani kwa si kundurukidire mukuro. Nye Jesaya ga pumbire asi mukuro ngava gu pwilika, marungavero kapi ngava ga zedira, ntani sitata ngava si funda va hana kurwa. Jesaya ga pumbire hena asi mugara gedina Koresi yige nga funda Babironi.—Resa Jesaya 44:27–45:2; tara Mauzera 4.

14, 15. Ngapi wa ya sikire mo uporofete waJesaya?

14 Konyima zonomvhura 200, vakwayita yipo va wizire koBabironi. Yilye ga va pitisilire? Hompa goVaperesiya gedina Koresi, moomu va yi pumbire. Nayinye eyi va pumbire ya sikire mo.

15 Vakwayita kwa wizire masiku awo Vababironi kuna kara nosipito. Vababironi kapi va kere nosinka morwa makuma gomanene nomukuro ogu gwa va kundurukidire. Koresi novakwayita vendi va  simine mukanko va pwilike mukuro yipo va vhure kuruta. Ngapi va vhulire kuhwilira mositata aso kwa kere nomakuma gomanene? Masiku gena mavero gomositata kapi va ga zedilire, makura va fundire sitata va hana kurwa.

16. (a) Yisinke hena ga pumbire Jesaya kuhamena Babironi? (b) Ngapi omu da sikilire mo nonkango daJesaya?

 16 Jesaya kwa pumbire hena kuhamena Babironi asi: “Nagumwe si googu nga tunga mo hena.” (Jesaya 13:20) Nonkango odo da sikilire mo. Nsene o tunda moBaghdad, moIraq o gende konyara nokilometa 80 no ka gwana erunda lyositata saBabironi. Dogoro nanaina, kwato ogu ga tunga mo. Jehova kwa kombere Babironi “norukwateko oru aru vhuru kukomba nkenye aka.”—Jesaya 14:22, 23.

Erunda lyaBabironi

17. Morwasinke natu huguvarera matumbwidiro nagenye gaKarunga?

17 Esikomo lyomauporofete gomoBibeli kulikida asi ose kuvhura kuhuguvara eyi za pumba Bibeli kuhamena meho. Ose kuvhura kuhuguvara asi Jehova nga sikisa mo etumbwidiro lyendi lyokuninka evhu li kare paradisa. (Resa Numeri 23:19.) Twa kara  nehuguvaro “lyomwenyo gwanarunye. Karunga ogu a dili kutanta yimpempa, yige ga gu tu tumbwidira nare-nare.”—Titusa 1:2. *

BIBELI KUVHURA KURUNDURURA EPARU LYOGE

18. Yisinke ga tjenge Paurusa kuhamena “nonkango daKarunga”?

18 Tuna lirongo asi Bibeli za lisiga nonobuke dapeke. Eyi va tjanga mo kuhamena unsitwe nohistoli usili, ntani kapi za lilimba. Azo kugava magano gomawa, ntani mauporofete gomanzi ga sika mo nare. Kugusa ko oyo, mupositoli Paurusa ga tjenge asi: “Nonkango daKarunga kwa kara nomwenyo nononkondo.” Yisinke ga tembe?—Resa Vahebeli 4:12.

19, 20. (a) Ngapi omu Bibeli nazi vhura kukuvatera? (b) Ngapi no likida rupandu roge kobuke ezi ga ku pa Karunga?

19 Bibeli kuvhura kurundurura eparu lyoge. Azo kuvhura zi ku vatere o likonakone nyaamoge, nokuhorora malizuvho nomagazaro goge gokomutjima. Pasihonena, ose kuvhura tu gazare asi twa hara Karunga, nye mokuyilikida oyo, twa hepa kusikisa mo eyi azi uyunga Bibeli.

20 Bibeli sili buke zokutunda kwaKarunga. Age ana hara tu zi rese nokuzilironga nokuzihara. Likida rupandu roge kobuke ezi pokutwikira kuzilironga. Nsene ngo yi rugana, ngo kwata egano sitambo saKarunga kovantu. Ngatu ka lironga yoyinzi kuhamena sitambo oso megaununo lyokukwama ko.

^ para. 17 Kugusa ko ezonaguro lyositata saBabironi, pwa kara hena mauporofete gamwe aga ga sika mo. Komauporofete aga ga ya sikilire mo mwaJesus Kristusa tara Mauzera 5.