Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 1

Yilye Karunga?

Yilye Karunga?

1, 2. Mapuro musinke atu lipura?

VANONA kwa hara kupura mapuro. Pamwe to va limburura nye simpe tava ku pura hena.

2 Kapisi vanona velike va hara kupura, nye novakondi nawo. Ose kulipura kuhamena eyi natu lya neyi natu dwara ntani neyi natu randa. Ndi pamwe kulipura mapuro gomulyo kuhamena eparu ndi meho zetu. Nye apa atu dili kugwana malimbururo komapuro ogo, ose pamwe kuhageka kupapara malimbururo.

3. Yisinke ayi ninkisa vantu va dire kupura mapuro?

3 Bibeli za kara nomalimbururo komapuro gomulyo aga atu lipura ndi? Vamwe va yi pura asi Bibeli za kara nomalimbururo, nye awo kugazara asi udigu kuzikwata egano. Awo kugazara asi vapitisili womaukarelikarunga yiwo velike va kara nomalimbururo. Ano vamwe kulizuvha asi kupura mapuro kuliswaukisa. Ove ngapi o lizuvhu?

4, 5. Mapuro musinke ava lipura vantu? Morwasinke no litulira mo kupapara malimbururo?

4 Vantu wovanzi kulipura mapuro aga asi: Morwasinke Karunga ga tu sitira? Apa a fu muntu, kupi a zi? Yikara musinke ga kara nayo Karunga? Jesus Kristusa kwa tente asi: “Omu hundire ngava mu pe, omu papare ngomu gwane, omu ngongore ngava mu zegurure.” (Rukasa 11:9) Twikira kupura dogoro ngo gwane malimbururo.

 5 Nsene o litura mo ‘mokupapara’ ngo gwana malimbururo moBibeli. (Yisewe 2:1-5) Malimbururo gamo, ureru kugakwata egano. MoBibeli ngo lironga mo omu no gwana ruhafo ngesi ntani kuhamena meho zongwa. Ngesi tatu ka konakona epuro eli ava lipura vantu wovanzi.

KARUNGA KUTUPAKERA MBILI NDI KWATO NKENDA?

6. Morwasinke vantu wovanzi ava gazarere asi Karunga mudona ntani kwato nkenda?

6 Vantu wovanzi kugazara asi Karunga mudona ntani kwato nkenda. Awo kutanta asi: ‘Nsene Karunga kutupakera mbili, morwasinke mouzuni muna karere yita nomalinyengo ntani vantu kuvera nokuhepa nokufa?’ Vamwe kutanta hena asi: ‘Nsene Karunga ga kara nonkenda, morwasinke a dilire kuhagekesa po yininke oyo?’

7. (a) Yisinke ava uyunga vapitisili womaukareli eyi ayi ninkisa vantu va pure asi Karunga mudona? (b) Ngapi omu tuna yi diva asi Karunga kapisi yige a retesa po yininke yoyidona?

7 Vapitisili womaukareli nawo kuninkisa vantu va pure asi Karunga mudona. Nsene vantu kuna kuligwanekera nomaudigu awo kuuyunga asi Karunga mwene ana yi panga. Vapitisili owo kurundira Karunga. Nye Bibeli kuronga asi Karunga kapi a rugana yininke yoyidona. Joba 34:12 kwa tanta asi: “Karunga Munankondo kapi a rugana yoyidona.” Eyi kutanta asi nampili ngomu Karunga a pulisire yininke yoyidona yi horoke, age kapisi yige a yi retesa po. Ntani age kapi a tu zeda tu rugane yoyidona. (Resa Jakopo 1:13.) Tu tareni sihonena.

8, 9. Morwasinke ya karera epuko kupa Karunga usima komaudigu getu? Gava sihonena.

 8 Tu ninke asi munona kwa tunga novakondi vendi. Oguhwe va mu hara unene ntani va mu ronga omu na tura po matokoro gomawa. Nye konyima, munona ogo ta rwanesa oguhwe nokutunda mo membo. Ta ka rugana yininke yoyidona nokukaligwanekera nomaudigu. Kuvhura nye o pe oguhwe usima morwa kapi va mu silikire apa ga tokwere kutunda membo ndi? Hawe. (Rukasa 15:11-13) Mokulifana, apa vantu va tokwere kurwanesa Karunga nokurugana yoyidona, age kapi ga va silikire. Yipo nye, apa yininke yoyidona ayi horoka Karunga kapisi yige a yi retesa po. Ayo epuko kupa Karunga usima.

9 Karunga ga kara nokonda zongwa zeyi ga dilira kuhagekesa po yininke yoyidona yi horoke. Ngatu ka yi lironga mEgaununo 11. Karunga ga tu hara ntani kapisi yige a retesa po maudigu getu. Nye age yige natu vhura kuhuguvara morwa yige gelike gokuvhura kugusa po maudigu getu.—Jesaya 33:2.

10. Morwasinke natu huguvarera asi Karunga nga ka gusa po udona naunye?

10 Karunga kwa pongoka. (Jesaya 6:3) Nkenye eyi a rugana yiwa. Ose kuvhura tu mu huguvare. Nye vantu kapi tatu vhuru kuvahuguvara morwa pamwe awo kulipuka. Nampili vapangeli ava va hara kugusa po udona kapi ava yi vhuru morwa kapi va kara nononkondo. Nye Karunga ga kara nononkondo dononene dokugusa po udona naunye.—Resa Episarome 37:9-11.

 NGAPI KARUNGA A LIZUVHU APA VANTU AVA HEPA?

11. Ngapi a lizuvhu Karunga kuhamena maudigu goge?

11 Ngapi a lizuvhu Karunga apa a mono eyi yina kuhoroka mouzuni ntani nomaudigu goge? Bibeli kwa uyunga asi Karunga “kwa hara eyi ya hungama.” (Episarome 37:28) Eyi kulikida asi ga nyenga yininke yoyidona. Age kwa nyenga kumona vantu kuna kuhepa. Pwanare apa udona wa vhukire mouzuni, Bibeli kutanta asi Karunga “ta guwu unene.” (Genesis 6:5, 6) Karunga kapi ga runduruka. (Marakiya 3:6) Bibeli kuuyunga asi age kukupakera mbili.—Resa 1 Peturusa 5:7.

Bibeli kuronga asi Jehova Musiti gwanayinye geharo

12, 13. (a) Kwalye twa gwana yikara yoyiwa ngwendi eharo, ntani ngapi atu lizuvhu apa atu mono vantu kuna kuhepa? (b) Morwasinke natu yi pulira asi Karunga nga ka gusa po udona?

12 Bibeli kuuyunga asi ose kwa tu unga tu fane Karunga. (Genesis 1:26) Eyi kutanta asi Karunga kwa tu unga noyikara yoyiwa ngwendi yendi. Nsene ose kulizuvha udona apa atu mono vantu kuna kuhepa, Karunga nage kulizuvha udona unene. Ngapi omu twa yi diva oyo?

13 Bibeli kuronga asi: “Karunga yige eharo.” (1 Johanesa 4:8) Nayinye eyi a rugana Karunga kuyirugana neharo. Nose kwa pinga sikara oso kwendi. Ngano twa kara nononkondo dokuhagekesa po udona, ngano twa u hagekesa po morwa twa kara neharo. Karunga ogu ga kara nononkondo neharo lyenene nga ka hagekesa po udona nokukasikisa mo matumbwidiro vana tumbura pepenuno lyaune neli lyautano. Mokupura asi Karunga nga ka yi sikisa mo, wa hepa kumudiva.

 KARUNGA KUNA HARA O MU DIVE

Pokutulisa po ukaume nomuntu wa hepa kudiva edina lyendi. Karunga kututantera edina lyendi moBibeli

14. Edina lyaKarunga yilyo yilye, ntani ngapi tuna yi diva asi twa hepa kuliruganesa?

14 Pokutulisa po ukaume nomuntu wa hepa kudiva edina lyendi. Karunga ga kara nedina ndi? Maukareli gomanzi kuronga asi edina lyendi Karunga ndi Hompa nye ogo kapisi madina. Ayo yitumbwisiso ngwendi “foromani” ntani “peresidente.” Bibeli kuronga asi edina lyendi Jehova. Azo kwa uyunga asi: “Ngava dive asi ove nyovelike Jehova, mupangeli gomunene gouzuni mudima!” (Episarome 83:18, NW) Owo va tjenge Bibeli kwa ruganesere edina lyaKarunga yikando mayovi. Jehova kuna hara o dive edina lyendi nokuliruganesa yipo o kare kaume kendi.

15. Yisinke ali tanta edina lyaKarunga, Jehova?

15 Yisinke ali tanta edina lyaKarunga, Jehova? Alyo kutanta asi Karunga kusikisa mo nkenye eyi a tumbwidire ntani nkenye eyi ana hara kurugana. Kwato yokumukondera. Yipo nye Jehova gelike lya fira edina olyo. *

16, 17. Yisinke a yi tanta (a) “Munankondo nadinye”? (b) “Hompa gwanarunye”? (c) “Musiti”?

 16 Episarome 83:18 kwa uyunga kuhamena Jehova asi: ‘Ove nyovelike mupangeli gomunene.’ Ehororo 15:3 kwa tanta asi: “Yirugana yoge yinene, ayo hena kutetura, ove Hompa Karunga Munankondo nadinye.” Yisinke asi tanta situmbwisiso “Munankondo nadinye”? Kutanta asi Jehova yige munankondo po kwanayinye, kwato gokuvhura kuhetakana nendi. Mwa-1 Timoteusa 1:17 Jehova kumutumbura asi  “Hompa gwanarunye.” Eyi kulikida asi age kwa karerera po narunye. Episarome 90:2 kufaturura asi kapi ga kara netameko nouhura. Nonkango odo kutetukisa sili!

17 Jehova yige gelike Musiti. Ehororo 4:11 kutanta asi: “Ove Hompa Karunga gwetu, uyerere nefumano nononkondo yoge, yeeyi nyove wa sita nayinye, ano mpango zoge yizo za pakesa po nayinye, yi pwe kusita.” Jehova yige ga sita yininke nayinye, vaengeli nonombungururu nenyango noyitji nonomfi ntani efuta.

 KUVHURA O KARE KAUME KAJEHOVA NDI?

18. Morwasinke vamwe ava lizuvhire asi kapi tava vhuru kukara kaume kaJehova? Nye yisinke azi rongo Bibeli?

18 Vamwe kulizuvha asi kapi tava vhuru kukara kaume kaJehova morwa age Munankondo nadinye, Hompa gwanarunye, Musiti ntani ure ga kara. Nye ngapi a lizuvhu Karunga? Age ana hara a tu hedere pepi. Bibeli kutanta asi: ‘Kapi ga kara ure nose.’ (Yirugana 17:27) Karunga ana hara tu mu hedere pepi, ntani ga tumbwidira asi ‘nage nga tu hedera pepi.’—Jakopo 4:8.

19. (a) Ngapi no vhura kutulisa po ukaume naKarunga? (b) Yikara musinke yaJehova ono hafere?

19 Ngapi no vhura kutulisa po ukaume naKarunga? Jesus kwa tente asi: “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.” (Johanesa 17:3) Nsene o twikira kulironga ngo diva Jehova naJesus, makura ngo ka gwana mwenyo gwanarunye. Tuna lirongo hena asi “Karunga yige eharo.” (1 Johanesa 4:16) Age ga kara hena noyikara yoyiwa. Bibeli kumutumbura asi: “Karunga goMufenkenda, age Karunga gombili noMudidimiki. Uwa wendi unzi, age Mulimburukwi.” (Exodus 34:6) Jehova “muwa, hena kudongonona po nonzo.” (Episarome 86:5) Nsene ngo twikira kulironga Bibeli, ngo lironga yikara yoyinzi yaJehova.

20, 21. Ngapi natu vhura kukara kaume kaKarunga ose kapi atu mu mono?

20 Ngapi natu vhura kukara kaume kaKarunga ose kapi atu mu mono? (Johanesa 1:18; 4:24; 1 Timoteusa 1:17) Kuvhura tu mu dive pokulironga Bibeli.  (Episarome 27:4; Varoma 1:20) Nsene ngo twikira kulironga kuhamena Jehova yimo ngo ya mu diva nokumuhara nokutura po ukaume nendi.

Guhya ga hara vana vendi, nye Guhyetu gemeguru ga tu hara unene

21 Mwaza siruwo ngo ya kwata egano asi Jehova Guhyetu. (Mateusa 6:9) Age kwa tu pa eparu ntani kwa tu harera eparu lyewa, ngwendi moomu guhya geharo ga harera vana vendi eparu lyewa. (Episarome 36:9) Bibeli kuronga asi ove kuvhura kutulisa po ukaume naJehova. (Jakopo 2:23) Gazara tupu, Jehova, Musiti gwanayinye ana hara o kare kaume kendi!

22. Yisinke ngo rugana nsene ngava ku tantere asi o hageke kulironga Bibeli?

22 Vamwe ngava hara asi o hageke kulironga Bibeli. Morwa ngava kara nosinka asi kuvhura ngo sige ukareli woge. Nye wa ha pulisira muntu a ku hagekese kutulisa po ukaume naJehova. Age yige kaume gomuwa po.

23, 24. (a) Morwasinke no twikilira kupura mapuro? (b) Yisinke ngatu ka lironga megaununo lyokukwama ko?

23 Pomuhowo kapi ngo kwata egano yininke nayinye eyi ngo lironga. Wa ha lifa nomuga kupura mapuro. Jesus ga uyungire asi twa hepa kulinunupika ngwendi vanona. (Mateusa 18:2-4) Vanona kwa hara kupura mapuro gomanzi. Karunga ana hara o gwane malimbururo. Konakona nawa eyi ono kulironga moBibeli yipo o dive nsene asi yimo sili.—Resa Yirugana 17:11.

24 Nkedi zongwa mokudiva kuhamena Jehova kuna kara pokulironga Bibeli. Egaununo lyokukwama ko ngatu ka lironga eyi Bibeli za lisigira nonobuke dapeke.

^ para. 15 Nsene moBibeli zoge mwato edina Jehova ntani nsene ono hepa ko nombudi dimwe kuhamena eyi ali tanta edina lyaKarunga, tara Mauzera 1.