Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 15

Ukareli ou a tambura Karunga

Ukareli ou a tambura Karunga

1. Yilye gokuvhura kututantera omu natu karera Karunga?

MAUKARELI gomanzi kutanta asi ago kuronga usili. Nye oyo kapisi usili, morwa ago kuronga yininke yokulisiga kuhamena Karunga ntani nomu natu mu karera. Ngapi natu diva ukareli ou a tambura Karunga? Jehova gelike gokuvhura kututantera omu natu mu karera.

2. Ngapi natu lironga omu natu karera Karunga?

2 Jehova kwa tu pa Bibeli yipo tu lironge omu natu mu karera. Lironga Bibeli, makura Jehova nga ku vatere o gwanene mo uwa morwa age kukupakera mbili.—Jesaya 48:17.

3. Yisinke ana tu harere Karunga tu rugane?

3 Vantu wovanzi kutanta asi Karunga kutambura maukareli nagenye, nye oyo kapisi yiyo ga rongere Jesus. Age kwa tente asi: “Kapisi nkenye ogu a tantere nge asi, ‘Hompa, Hompa’, yige nga za moUntungi weguru. Ano nye ogu nga za mo, googu a sikisa mo mpango zaTate.” Yipo nye twa hepa kulironga mpango zaKarunga nokuzisikisa mo. Jesus ga tente asi ava wokudira kusikisa mo mpango zaKarunga ‘kuvatuka Veta.’—Mateusa 7:21-23.

4. Yisinke ga uyungire Jesus ngayi horoka nsene tu sikisa mo mpango zaKarunga?

4 Jesus kwa uyungire asi nsene tu sikisa mo mpango zaKarunga ngatu ligwanekera nomaudigu. Age kwa tente  asi: “Omu hwililire mevero lyenunu, yeeyi evero kwa nenepa, ano nzira kwa ngwanyunuka, ezi azi twara kokudona. Sinzi sovantu yimo ava gendi. Nye evero ko enunu, ano nzira kwa likokera, ezi azi twara komwenyo, ano ava ava zi gendi vasesu.” (Mateusa 7:13, 14) Nzira zonunu ndi nkedi zongwa zokukarera Karunga kutwara komwenyo gwanarunye. Nye nzira zonene ndi nkedi zepuko zokukarera Karunga kutwara konomfa. Nye Jehova kapi ana hara nkenye gumwe nga ka zonauke. Age kuna kugava mpito kwankenye gumwe a lironge kumuhamena.—2 Peturusa 3:9.

OMU NATU KARERA KARUNGA

5. Ngapi natu dimburura ukareli ou a tambura Karunga?

5 Jesus kwa tente asi kuvhura tu dimburure ukareli ou a tambura Karunga pokutara kweyi va pura ntani yirugana yawo. Age kwa tente asi: “Koyiyimwa yawo yiko ngomu va divira.” Ntani asi ‘nkenye sitji sosiwa kuyima yiyimwa yoyiwa.’ (Mateusa 7:16, 17) Eyi kapi yina kutanta asi owo ava karere Karunga va sikilira mo, nye awo kuhetekera ko kurugana yoyiwa. Ngesi tatu ka konakona eyi nayi tu vatera tu dimburure ukareli ou a tambura Karunga.

6, 7. Morwasinke marongo goukareli wousili aga tundire moBibeli? Yisinke asi tu rongo sihonena saJesus?

6 Marongo getu ga hepa kutunda moBibeli. Bibeli kutanta asi: “Nkenye etjangwa, eli za retesa po Mpepo zaKarunga, kwa kara nomulyo gokuronga usili. Alyo kukorangeda nokupukurura nokurongesa uhungami, asi muntu gwaKarunga mokulimburukwa kwalyo, a sikilire mo, age a fire kurugana yirugana nayinye yoyiwa.” (2 Timoteusa 3:16, 17) Ntani mupositoli Paurusa  kwa tjangerere Vakriste asi: “Yeeyi apa twa mu reterere nonkango daKarunga, mwa di zuvhire, tomu di tambura, kapisi panonkango-nkango tupu, nye ado nonkango daKarunga.” (1 Vatesaronika 2:13) Marongo goukareli wousili kwa tunda moBibeli, nye kapisi magano govantu ndi nompo.

7 Nayinye eyi ga rongere Jesus kwa tundire moNonkango daKarunga. (Resa Johanesa 17:17.) Age nga temwinine Matjangwa. (Mateusa 4:4, 7, 10) Mokulifana, vakareli vaKarunga wousili marongo gawo nagenye kwa tunda moBibeli.

8. Yisinke ga tu rongere Jesus kuhamena kukarera Jehova?

8 Twa hepa kukarera Jehova gelike. Bibeli kutanta asi: “Nyove, gedina Jehova, nyovelike Mupangeli gomunene gouzuni mudima.” (Episarome 83:18, NW) Jesus kwa here vantu va dive Karunga gosili ntani ga va rongere edina lyendi. (Resa Johanesa 17:6.) Jesus kwa tente asi: “Hompa Karunga goge gelike no tongamena no kerera a huru.” (Mateusa 4:10) Ngovakareli vaKarunga ose kukwama sihonena saJesus. Ose kukarera Jehova gelike nokuruganesa edina lyendi nokulironga vantu ntani nokuvatantera ko eyi nga ka rugana komeho.

9, 10. Ngapi omu atu likida eharo kovakwetetu?

9 Twa hepa kulihara-hara. Jesus kwa rongere varongwa vendi va lihara-hare. (Resa Johanesa 13:35.) Nampili ngomu twa tundilira moyirongo nomomarudi gokulisiga-siga, ndi asi tu kare nongawo ndi nohepwe, eharo lyetu kutureta mouumwe ngovantu namumbyendi. (Vakorosi 3:14) Yipo nye kapi atu zi koyita nokudipaga vantu. Bibeli kutanta asi: “Apa yipo nye ava va dimbwilire vana vaKarunga nava woMuzonaguli: ogu a  dili kurugana youhunga nogu ga dira kuhara mukwawo, kapisi munwaKarunga.” Za tanta hena asi: “Walye atu faneni Kaini, ogu ga hamenene koMuzonaguli, yiyo ga dipagere mumbyendi.”—1 Johanesa 3:10-12; 4:20, 21.

10 Ose kuruganesa yiweka nosiruwo nononkondo detu mokuvatera vakwetetu nokuvakorangeda. (Vahebeli 10:24, 25) Ose ‘kuruganena navenye uwa.’—Vagarata 6:10.

11. Morwasinke twa tambwira Jesus asi yige nzira zokomwenyo?

11 Twa hepa kulimburukwa Jesus morwa yige nzira zokomwenyo. Bibeli kutanta asi: “Eparu kuligwana mwendi mwelike, yeeyi kutupu hena nampili muntu gumwe gwapeke mouzuni mudima, ogu ga pa Karunga edina lyokutuparura.” (Yirugana 4:12) MEgaununo 5 mobuke ezi twa lirongere asi Jehova kwa tumine Jesus a ya gave mwenyo gwendi gu kara sizoweseso kovantu wovalimburukwi. (Mateusa 20:28) Jehova ga horowora Jesus a ya pangere ngaHompa pevhu. Eyi yiyo azi tu tanterere Bibeli asi twa hepa kulimburukwa Jesus ntani ngatu gwana mwenyo gwanarunye.—Resa Johanesa 3:36.

12. Morwasinke atu dilire kulihameka momaupolitika?

12 Kapisi tu lihameke momaupolitika. Jesus kapi ga lihamekere momaupolitika. Apa va mu pangwire, age kwa tanterere Piratusa mupangeli goVaroma asi: “Uhompa wange kapisi wouzuni ou.” (Resa Johanesa 18:36.) Nkenye oku twa tunga ose kuhonena Jesus pokukwatesa ko Uhompa waKarunga, kapi atu lihameke momaupolitika. Nampili ngoso Bibeli kutupangera asi tu limburukwe ‘mapangero.’ (Varoma 13:1) Ose kulimburukwa koveta zepangero mosirongo esi twa tunga. Nye  nsene veta zosirongo kuna kurwanesa veta zaKarunga, ose kuhonena vapositoli ava va tente asi: “Twa hepa po kulimburukwa unene Karunga, kupitakana vantu.”—Yirugana 5:29; Marukusa 12:17.

13. Yisinke atu rongo kuhamena Uhompa waKarunga?

13 Ose twa pura asi Uhompa waKarunga welike ngau kohonona po maudigu gomouzuni. Jesus kwa tente asi: “Mbudi zoNgwa ezi zoUntungi waKarunga” ngava zi divisa mwa za uzuni mudima. (Resa Mateusa 24:14.) Kwato epangero lyovantu eli ngali vhura kurugana eyi ngau tu ruganena Uhompa waKarunga. (Episarome 146:3) Yiyo Jesus ga rongerere tu kanderere asi: ‘Uhompa woge au wize. Mpango zoge ava zi sikise mo pevhu ngwendi meguru.’ (Mateusa 6:10) Bibeli kututantera asi Uhompa waKarunga ngau zonagura po mapangero nagenye govantu makura ngau “kara dogoro narunye.”—Ndaniyera 2:44.

14. Omu ono kugazara, wolye ava rugana ukareli wousili?

14 Kuliza neyi tuna tarurura ngesi, lipura asi: ‘Wolye ava gusa marongo gawo nagenye moBibeli? Wolye ava divisa edina lyaKarunga? Wolye va lihara-hara, ntani va pura asi Jesus yige nzira zokomwenyo? Wolye ava dili kulihameka momaupolitika? Wolye ava rongo asi Uhompa waKarunga yiwo welike ngau ya kohonona po maudigu govantu?’ Nombangi daJehova.—Jesaya 43:10-12.

YISINKE NGO RUGANA?

15. Yisinke twa hepa kurugana nsene tuna hara Karunga a tambure ukareli wetu?

15 Kapi ya gwanena tupu kupura asi Karunga yipo ga kara. Nampili nompepo donondona da pura asi Karunga yipo ga kara, nye kapi adi mu limburukwa. (Jakopo  2:19) Nsene tuna hara Karunga a tambure ukareli wetu, kapisi tu pure tupu asi yipo ga kara nye hena tu mu limburukwe.

16. Morwasinke twa hepera kunyokera po ukarelikarunga woyimpempa?

16 Mokutambura Karunga ukareli wetu, twa hepa kutunda mo moukarelikarunga woyimpempa. Muporofete Jesaya kwa tjenge asi: “Likuhureni nyaamweni mu tunde mo.” (Jesaya 52:11; 2 Vakolinte 6:17) Twa hepa kunyokera po yininke nayinye eyi ya hamena koukarelikarunga woyimpempa.

17, 18. Yisinke “Babironi zonene,” ntani morwasinke natu genderera kutunda mo?

17 Yisinke ukarelikarunga woyimpempa? Awo kuna kara nkenye ukareli au rongo yininke yokulisiga noNonkango daKarunga. Bibeli kutumbura ukarelikarunga woyimpempa asi “Babironi zonene.” (Ehororo 17:5) Morwasinke? Konyima zoRuhanzo romomazuva gaNowa, marongo gomaukareli goyimpempa kwa tamekere mositata saBabironi. Marongo ogo kwa lihanena mouzuni mudima. Pasihonena, Vababironi ngava karere yikarunga mutatu-gumwe. Naina, maukareli gomanzi kuronga asi Karunga mutatu-gumwe. Nye Bibeli kuronga asi Karunga gumwe gosili, Jehova, ntani Jesus Kristusa Munwendi. (Johanesa 17:3) Vababironi kwa pulire hena asi mpepo ndi mwenyo gomuntu kapi agu fu ntani ago kukahepa momundiro gwanarunye. Erongo olyo kapisi usili.—Tara Mauzera 14, 17, ntani 18.

18 Karunga kwa pumba asi ntaantani a ka zonagure po maukarelikarunga nagenye goyimpempa. (Ehororo 18:8) Ono mono nye eyi ya karera nomulyo kutunda usimbu momaukareli goyimpempa ndi? Jehova Karunga  kuna hara o pwage mo usimbu paapa sina kara ko siruwo.—Ehororo 18:4.

Kukarera Jehova kumwe novantu vendi, ngo hamena kepata lyenene lyouzuni mudima

19. Nsene o tokora kukarera Jehova, ngapi nga ku vatera?

19 Nsene o tokora kutunda moukareli woyimpempa, vakaume woge ndi vekoro kuvhura va ku rwanese. Nye Jehova kapi nga ku siga. Ngo hamena kepata lyenene lyouzuni mudima lyovantu ava va lihara-hara ntani ngo kara nehuguvaro lyokukaparuka narunye mouzuni woupe. (Marukusa 10:28-30) Nampo komeho, ava va rwanesere etokoro lyoge lyokukarera Jehova ngava tokora kulironga Bibeli.

20. Morwasinke ya karera nomulyo kukarera Karunga monkedi ezi a tambura?

20 Ntaantani Karunga nga ka zonagure po udona makura Uhompa wendi ngau ka pangera uzuni mudima. (2 Peturusa 3:9, 13) Azo kuna kara meho zongwa! Nkenye gumwe nga ka karera Jehova. Mulyo unene koge o ture po etokoro ngesi o karere Karunga monkedi ezi a tambura.