Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 4

Morwasinke natu likidira efumadeko koupangeli?

Morwasinke natu likidira efumadeko koupangeli?

“Omu fumadeke vantu navenye.”—1 PETURUSA 2:17.

1, 2. (a) Ekondjo musinke atu ligwanekere nalyo pokulikida efumadeko koupangeli? (b) Mapuro musinke natu ka konakona?

WA MONA rumwe omu a kara munona nsene vana mu tantere a rugane yuma eyi ana dili sili kuhara kurugana? Ove kuvhura kumona nawa-nawa mosipara sendi asi ana kara nomarwaneso momutjima gwendi. Ta zuvhu ezwi lyomukurona, ntani ga diva asi age ga hepa kufumadeka upangeli wendi. Nye mosihorokwa esi, age kapi ana hara kulimburukwa. Ekondjo lyendi kuna kufanekesa eyi ayi tu horokere mpamwe natuvenye.

2 Ayo narunye kapisi ureru kwetu mokufumadeka upangeli. Nove poyiruwo yimwe kukukarera udigu mokufumadeka ava ava ku pangere ndi? Nsene yimo, kapisi nyovelike wa kara nekondjo lyangoso. Ose kuna kuparuka mosiruwo omu efumadeko koupangeli lina sesupa. Nampili ngoso, Bibeli kutanta asi twa hepa kulikida efumadeko kwava ava tu pangere. (Yisewe 24:21) Mousili, ayo mulyo unene kurugana ngoso nsene tuna hara kukara meharo lyaKarunga. Yipo nye, twa hepa kuzogera mapuro gamwe. Morwasinke nayi vhulira kukara kwetu udigu mokulikida efumadeko koupangeli? Morwasinke Jehova ana hepere kwetu tu yi rugane eyi, ntani yisinke ngayi tu vatera mokuyisikisa mo? Mokuhulisa, mononkedi musinke natu vhura kulikida efumadeko koupangeli?

EYI YA KARERA UDIGU KULIKIDA EFUMADEKO KOUPANGELI

3, 4. Ngapi omu nzo nokudira kusikilira mo ya tamekere, ntani morwasinke kudira kusikilira mo kwetu aku tu digopekesere mokulikida efumadeko?

3 Tu zeni tu ka tarurure nokonda mbali eyi ya karera udigu  kwetu mokulikida efumadeko kwava ava tu pangere. Zopomuhowo, ose kapi twa sikilira mo; zauvali, morwa ava ava tu pangere nawo kapi va sikilira mo. Nzo zovantu ntani kudira kusikilira mo kwa tamekere nare-nare mosikunino saEdeni apa oAdamu naEva va rwanesere upangeli waKarunga. Yipo nye nzo kwa tamekere nerwaneso. Nanaina ngesi, ose kwa tu reta nompepo zourwanesi.—Genesis 2:15-17; 3:1-7; Episarome 51:5; Varoma 5:12.

4 Morwa kudira kusikilira mo kwetu, ureru kulinenepeka, ano udigu kulinunupika, ntudi twa hepa kukondja mokutunga po nokukulika sikara esi. Nampili ose kwa karera Karunga noulimburukwi nomvhura dononzi, kuvhura tu linenepeke nokukara nondino. Pasihonena, tarurura sihonena saKora, ogu ga pitire momaudigu gomanzi noulimburukwi kumwe novantu vaJehova. Nye simpe ga nyenenene upangeli ntani ga rwanesere Mosesa, mugara gomulinunupiki. (Numeri 12:3; 16:1-3) Gazadara ko hena hompa Usiya, ogu elinenepeko lyendi lya mu twaredeserere a ka hwilire montembeli zaJehova nokukarugana sirugana sokupongoka esi sa tumbukilire vapristeli. (2 Histoli 26:16-21) Vagara ava kwa va tengekerere morwa erwaneso lyawo. Nye yihonena yawo eyi yoyidona kuna kara madiworokeso gomawa kwanatuvenye. Nose twa hepa kurwanesa elinenepeko eli ali tu digopekesere mokulikida efumadeko koupangeli.

5. Ngapi omu vantu wokudira kusikilira mo ava ruganesa nonkondo dawo momudona?

5 Mokulisiga, vantu wokudira kusikilira mo ava ava tu pangere kwa rugana yoyinzi mokuninkisa vantu va dire kufumadeka upangeli. Sinzi sawo kwa kara nonyanya. Mousili, ehisitoli lyovantu kwa horora eruganeso lyawo lyononkondo momudona. (Resa Muudisi 8:9.) Pasihonena, Sauru kwa kere mugara gomuwa gomulinunupiki apa ga mu horowere Jehova a kare hompa. Nye nampili ngoso, age ga ya linenepekere nokukara nomfudu; ntani kwa hepekere mugara gomulimburukwi Ndafita. (1 Samwere 9:20, 21; 10:20-22; 18:7-11) Konyima Ndafita kwa ya kere gumwe govahompa wovawa po  ava va pangerere Israeli, nye ga ya ruganesere nonkondo dendi momudona apa ga gusire mukadaUliya goMuheti ano Uliya ta mu tumu a ka sikame komeho moyita yipo va ka mu dipage. (2 Samwere 11:1-17) Yimo, kudira kusikilira mo kuninkisa vantu va dire kuruganesa nonkondo dawo monaruwa. Ano apa ava ava pangere ava dili kufumadeka Jehova, awo kuruganesa nye nonkondo dawo momudona unene. Konyima zokusingonona omu Vapapa woVakatolika va tulisire po ehepeko komavango gomanzi, munapolitika gumwe gomoBritaniya kwa tjenge asi: “Unankondo kupukisisa, ano unankondo wounene kupukisisa unene.” Pokudimburura eyi, tu zeni tu ka konakone epuro eli: Morwasinke natu fumadekera upangeli?

MORWASINKE NO FUMADEKERA UPANGELI?

6, 7. (a) Yisinke ali tu tumangeda eharo lyetu lyokuhara Jehova tu rugane, ntani morwasinke? (b) Yisinke wa kwatera mo ulimburukwi, ntani ngapi omu natu vhura kuulikida?

6 Nokonda domulyo dokufumadeka upangeli kuna kara eharo lyetu lyokuhara Jehova neli lyokovantu ntani neli lyokulihara nyamwetu. Ose tuna hara kuhafesa mutjima gwaJehova, morwa twa mu hara kupitakana nayinye. (Resa Yisewe 27:11; Marukusa 12:29, 30.) Ose twa yi diva asi upangeli nouhunga wendi wokupangera yininke nayinye kwa u homona pevhu kutunda perwaneso lyomosipata saEdeni, ntani asi konyara vantu navenye kwa hamena koruha rwaSatana nokunyoka upangeli waJehova. Ose kuhafa pokukwatesa ko upangeli waJehova. Apa atu resa nonkango donongwa demEhororo 4:11, ado kutuguma komutjima. Ayo kwa tu zerera nawa-nawa asi Jehova yige Mupangeli gouhunga goyininke nayinye! Ose kukwatesa ko upangeli waJehova pokuukwama meparu lyetu lyankenye ezuva.

7 Efumadeko lyangoso kwa hepa ulimburukwi. Ose kulimburukwa Jehova morwa twa mu hara. Nye nampili ngoso, ngapa kara yiruwo yimwe apa ngayi tu karera udigu mokulimburukwa. Poyiruwo yangoso, twa hepa kutunga po nkareso zokulifana nezi ga likidire Jesus Kristusa. Ose kuvhura tu  diworoke asi Jesus ga limburukwire kompango zaGuhwe nampili ngomu ya mu karere udigu mokuyirugana ngoso. Age kwa tente asi: ‘Nye kapisi moomu na panga ame, nye mpango zoge zi sike mo.’—Rukasa 22:42.

8. (a) Yisinke ya kwatera mo kulimburukwa koupangeli waJehova naina, ntani yinke ayi likida malizuvho gaJehova kombinga zeyi? (b) Yisinke nayi vhura kutuvatera mokupurakena komapukururo nokutambura episuro? (Tara kakende ‘ Purakena Mapukururo Ove O Ga Fire Mbili O Ga Lironge.’)

8 Yimo, Jehova kapi ana kutuuyungisa nkenye ogu pwagelike naina; age kuna kuruganesa Nonkango dendi ntani ava ga horowora ngovakarelipo apa pevhu. Yipo nye, ose kulikida ulimburukwi wetu koupangeli waJehova pokufumadeka vantu ava ga tura po, ndi ava ga pulisira va twikire mokutupangera. Nsene ngatu rwanesa vantu ava ga tura po, pasihonena pokunyokera kutambura mapukururo nomavyukiso gomoBibeli aga ava tu pe, ose ngano ngatu handukisa Karunga. Apa Vaisraeli va sivanene ntani nokurwanesa Mosesa, Jehova kwa tere eyi va rugene ngwendi kwendi va yi vyukisire.—Numeri 14:26, 27.

9. Morwasinke eharo lyokuhara vakwetu nali tu tumangedera mokufumadeka ava ava tu pangere? Gava sihonena.

9 Ose hena kulikida efumadeko koupangeli morwa eharo lyokuhara vakwetu. Monkedi musinke? Ligazara nyamoge ngagumwe govakwayita. Mokuninka asi mu ka funde ndi mu ka paruke, ayo kwa korera meruganeno kumwe noulimburukwi ntani nefumadeko lyankenye mukwayita kovampitisili. Nsene o rwanesa ngendeseso, ove ngano no ka tura vakwayita vakweni mosiponga. Yimo, vakwayita wovantu kuna kuretesa po ezonauko naina mouzuni. Nye nampili ngoso, Jehova kwa kara novakwayita ava ava rugana eyi ayi retere vantu uwa. Bibeli kwa tumbura Jehova yikando yoyinzi asi “HOMPA gonombunga dovakwayita.” (Episarome 24:10) Age yige Mpitisili gonombunga dononene doyisitwa yononkondo yopampepo. Poyiruwo yimwe, Jehova kufanekesa vakareli vendi vepevhu kombunga zovakwayita. (Hesekiyeli 37:1-10) Nsene tu rwanesa vantu ava ga tura po Jehova mokutupangera, ose ngatu tura mosiponga vakwayita vakwetu  wopampepo. Nsene Mukriste a rwanesa vakuronambunga, vapeke mombungakriste kuvhura kuhepa. (1 Vakolinte 12:14, 25, 26) Nsene munona a rwanesa, epata nalinye kuvhura kuhepa. Yipo nye ose kulikida eharo kovakwetu pokutunga po nkareso zefumadeko ntani zeruganeno kumwe.

10, 11. Ngapi omu mauwa aga aga tundu mokufumadeka upangeli aga tu tumangeda mokulikida ulimburukwi?

10 Ose hena kufumadeka upangeli morwa uwa wanyamwetu. Apa Jehova a tu pura mokufumadeka upangeli, age kutumbura mauwa aga ngatu gwanena mo pokurugana ngoso. Pasihonena, age kutantera vanona va limburukwe kovakurona vawo yipo ngava paruke siruwo sosire ntani nokukara neparu lyoruhafo. (Deuteronomium 5:16; Vaefeso 6:2, 3) Age kututantera tu fumadeke vakuronambunga morwa nsene kapi ngatu yi rugana ngoso ngayi zonagwisa po elikwatakano lyetu naJehova Karunga. (Vahebeli 13:7, 17) Ntani age kututantera mokulimburukwa mapangero morwa egameno lyanyamwetu.—Varoma 13:4.

 11 No ka yi kwatesa ko asi kudiva konda zeyi ana tu harere Jehova tu limburukwe kutuvatera tu likide efumadeko koupangeli. Tu zeni tu ka konakone omu natu vhura kulikida efumadeko koupangeli momaruha gatatu geparu.

KULIKIDA EFUMADEKO KOUPANGELI WEMEPATA

12. Situmbukira musinke ga gava Jehova kovagara ndi kovaguhya mepata, ntani ngapi omu mugara na sikisa mo situmbukira sendi?

12 Jehova mwene yige ga tulisa po ewapaiko lyepata. Morwa age Karunga ogu ga dira kuhara epiyagano, yipo nye ga wapaika epata li vhure kugenda nawa. (1 Vakolinte 14:33) Age kwa gava situmbukirwa kovagara ndi kovaguhya mokukara vapangeli vemepata. Mugara nage kulikida efumadeko koMupangeli gwendi, Jesus Kristusa, pokuhonena omu Jesus a ruganesa upangeli wendi kombungakriste. (Vaefeso 5:23) Yipo nye, mugara kapisi a ncenune situmbukira sendi nye ga hepa kusisikisa mo; mevango lyokukara nonyanya, ga hepa kukara neharo nonondunge nombili. Age hena ga hepa kudiworoka asi Jehova yige mupangeli gomunene, kapisi yige.

Guhya goMukriste kuhonena omu Kristusa a ruganesa upangeli

13. Ngapi omu mukadi ndi zinya na sikisa mo situmbukira sendi semepata monkedi ezi azi hafesa Jehova?

13 Mukadi ndi zinya ga hepa kukara mukwafi gwamugara gwendi. Nage kwa mu pa ko upangeli mepata, morwa Bibeli kwa pangera vana ‘mokupurakena eyi vana kuvatantera ozina.’ (Yisewe 1:8) Nye, upangeli womukadi kapi  wa pitakana wamugara gwendi. Mukadi goMukriste kulikida efumadeko koupangeli wamugara gwendi pokumuvatera mokusikisa mo situmbukira sendi ngomupangeli gepata. Age kapisi a sense eyi a rugana yendi ndi a hetekere kumupangera ndi kugusa upangeli wendi. Nye age nga mu kwatesa ko ntani nokuruganena kumwe nendi. Nsene matokoro gayendi ga lilimba nomagano gendi, age kuvhura kugava magano gendi nefumadeko, nye simpe ga hepa kulimburukwa. Mukadi kuvhura kuligwanekera nomaudigu nsene mugara gwendi kapisi mupuli, nye nkareso zendi zoulimburukwi kuvhura ngazi tumangede mugara mokupapara Jehova.—Resa 1 Peturusa 3:1.

14. Ngapi omu nava vhura vanona kuhafesa vakurona vawo ntani naJehova?

14 Apa vanona ava limburukwa vakurona vawo, ayo kuhafesa mutjima gwaJehova. Awo hena kureta mfumwa noruhafo kovakurona vawo. (Yisewe 10:1) Momapata govakurona wovadike, vanona simpe va hepa kulimburukwa vakurona vawo, nokudiva asi vakurona vawo va hepa unene evatero  ntani neruganeno lyawo kumwe. Momapata omu navenye ava sikisa mo yitumbukira yawo eyi ga va pa Karunga, ayo kureta mbili noruhafo mepata. Ano eyi kureta efumadeko kwaJehova Karunga, Mutoti gomapata.—Vaefeso 3:14, 15.

KULIKIDA EFUMADEKO KOUPANGELI WOMOMBUNGAKRISTE

15. (a) Ngapi omu natu vhura kulikida mombungakriste asi ose kufumadeka upangeli waJehova? (b) Nompango musinke nadi vhura kutuvatera mokulikida ulimburukwi kwava ava pitisire mombungakriste? (Tara kakende “ Omu limburukwe oku tomu zuvhu vapitisili veni.”)

15 Jehova kwa tura Munwendi a kare Mupangeli gombungakriste. (Vakorosi 1:13) Jesus nage yiyo ga pa situmbukira ‘komukareli gwendi gokulimburukwa gonondunge’ mokufira sinka yihepwa yopampepo yovantu vaKarunga apa pevhu. (Mateusa 24:45-47) Mbungagendesi zoNombangi daJehova yizo “mukareli gokulimburukwa gonondunge.” Ngwendi moomu ya kere monombungakriste domouye wokuhova, yi kare asi kuvyukilira ndi kupitira mwava va zi karera po ngwendi vatareli woruhamukunda, vakuronambunga naina kugwana nombudi nomapukururo koMbungagendesi. Apa atu fumadeke upangeli wovakuronambunga, ose kuna kulikida ulimburukwi kwaJehova.—Resa 1 Vatesaronika 5:12; Vahebeli 13:17.

16. Monkedi musinke vakuronambunga azi va tulisa po mpepo zokupongoka?

16 Vakuronambunga novakwafimbunga kapi va sikilira mo. Nawo kutura mapuko ngwendi nyose. Nye nampili ngoso, vakuronambunga kuna kara ‘mauhwi govantu,’ aga va gava mokuvatera mbungakriste zi pame pampepo. (Vaefeso 4:8) Vakuronambunga kuvatulisa po mpepo zokupongoka. (Yirugana 20:28) Monkedi musinke? Morwa awo pomuhowo va hepa kusikisa mo yihepwa eyi va tjanga moNonkango daKarunga edi za retesa po mpepo zendi. (1 Timoteusa 3:1-7, 12; Titusa 1:5-9) Mokugwederera ko, pokutara nsene asi gumwe kuna kusikisa mo yihepwa eyi, vakuronambunga kukanderera nelituromo kepitisiro lyompepo zokupongoka zaJehova.

17. Morwasinke poyiruwo yimwe vakadi ava dwarere yikayiwa komutwe nsene kuna kurugana yirugana yomombungakriste?

 17 Poyiruwo yimwe mombungakriste, kuvhura pa pire vakuronambunga novakwafimbunga mokurugana yirugana eyi ya va tumbukira, ngwendi kupitisira epongo lyoyirugana yomomapya. Poyiruwo yangoso, vanavazinyetu wovagara ava va kuhwa kuvhura kupitisira. Nsene awo pwato, vanavazinyetu wovakadi wokuwapera kuvhura va pitisire. Nye nampili ngoso, nsene mukadi a rugana sirugana esi sa tumbukira mugara ogu va kuhwa, ga hepa kutura ko sikayiwa komutwe. * (1 Vakolinte 11:3-10) Sihepwa esi kapi asi swaukisa vakadi. Nye aso kugava mpito kovakadi mokulikida efumadeko kewapaiko lyaJehova lyoupangeli wemepata ntani nou womombungakriste.

KULIKIDA EFUMADEKO KEPANGERO

18, 19. (a) Ngapi omu no faturura nompango edi da kara moVaroma 13:1-7? (b) Ngapi omu atu likida ulimburukwi kepangero?

18 Vakriste wousili kukwaterera nawa konompango edi va tumbura moVaroma 13:1-7. (Resa.) Ngomu no ka resa monovelise odo, ove no ka mona asi amo kwa tumbura mo ‘mapangero’ govantu. Mokumona asi Jehova kwa pulisira mapangero aga mokukara po, ago kurugana yirugana yomulyo, nokuhetekera ko kuvyukisa yininke ntani nokutura po yiruganeso eyi twa hepa. Ose kulikida efumadeko lyetu komapangero aga pokulimburukwa konoveta dago. Ose kudivilisa asi kuna kufuta nkenye mutero, nokuzwida mouhunga nkenye noforoma edi lina tu hundire epangero tu zwide, ntani nokusikisa mo nkenye noveta edi da tu hamena nomapata getu nonongesefa detu ndi noyiweka yetu. Nampili ngoso, ose kapi atu limburukwa komapangero nsene kuna kutupura mokuteza po mpango zaKarunga. Nye ose ngatu limburura ngwendi moomu va yi rugene vapositoli asi: “Ose twa hepa po kulimburukwa unene Karunga, kupitakana vantu.”—Yirugana 5:28, 29; tara kakende “ Upangeli walye na hepa kulimburukwa?

 19 Ose kulikida hena efumadeko kovapangeli kupitira monkedi omu atu ruganene kumwe nawo. Poyiruwo yimwe, ose kuvhura tu uyunge kumwe navanamakuto vemepangero. Mupositoli Paurusa ga uyungire kumwe novapangeli vangoso ngwendi hompa Herodesa Agilipa ntani mupangeli Fesitusa. Awo kwa kere vagara va kere nomapuko gomanene, nye Paurusa ga va likidire efumadeko. (Yirugana 26:2, 25) Yi kare asi ose kuna kuuyunga nomupangeli ndi nomuporosi, twa hepa kutemwinina sihonena saPaurusa. Kosure, vadinkantu woVakriste kukondjera mokulikida efumadeko lyokulifana kovarongi nokovakurona wosure ntani kwava ava rugana posure. Yimo, kapi tupu atu fumadeke owo ava pulisire ukareli wetu, nye ose hena kufumadeka ava ava rwanesa Nombangi daJehova. Yosili, vahapuli va hepa kudimburura asi ose twa kara nefumadeko.—Resa Varoma 12:17, 18; 1 Peturusa 3:15.

20, 21. Mauwa gamwe musinke aga tundu mokulikida efumadeko koupangeli?

20 Kapisi tu likata-kate mokulikida efumadeko koupangeli. Mupositoli Peturusa kwa tjenge asi: “Omu fumadeke vantu navenye.” (1 Peturusa 2:17) Apa ava dimburura vantu asi ose kuna kuvalikida efumadeko lyosili, ayo kuvhura kuvatetukisa. Morwa sikara esi kapi sa hwa kusilikida naina. Yipo nye, pokusilikida kuna kara nkedi zimwe omu natu kwama mpango zaJesus asi: “Nosite seni naso yimo nasi temena vantu, asi ava mone yirugana yeni yoyiwa, ava fumadekere po Guhyeni gemeguru.”—Mateusa 5:16.

21 Mouzuni ou womundema, uzera wopampepo kuna kukoka vantu wonomutjima donongwa. Yipo nye, pokulikida efumadeko noulimburukwi mepata nomombungakriste ntani nekepangero kuvhura kukoka vamwe ntani nokuvatumangeda mokugenda mouzera kumwe nose. Ano eyi nayi tu hafesa unene! Nampili kapi natu koka vamwe, twa hepa kudiworoka asi efumadeko lyetu kovantu kuhafesa Jehova Karunga ntani kutuvatera tu kare meharo lyendi. Kwato mfeto zimwe hena zokupitakana pwezi.

^ para. 17 KoMagwederereko “Morwasinke ntani siruwoke nava dwara yikayiwa?”, kwa likida maruha gamwe gongandi oku nava ruganesa mpango ezi.