Zende koyikaramo

Zende koyikaramo

Nombangi daJehova

Horowora eraka Rukwangali

 EGAUNUNO 17

“Litungireni ketateko lyepuro lyeni lyokupongokerera”

“Litungireni ketateko lyepuro lyeni lyokupongokerera”

“Litungireni ketateko lyepuro lyeni lyokupongokerera. . . . Omu kare meharo lyaKarunga.”—JUDA 20, 21.

1, 2. Mosirugana musinke setungo ono lihameke, ntani morwasinke sikara sosirugana soge sa karera nomulyo?

OVE kuna kurugana unene mokutunga. Etungo eli nare lya tameka ntani alyo simpe ngali twikira komeho. Sirugana sokutunga kwa kara udigu nye aso kuyahafesa. Ove wa tokoro asi nampili pa kare udigu kapi ngo hageka, morwa sikara sosirugana soge ngasi kundama eparu lyoge, nampili meho zoge. Morwasinke? Morwa etungo olyo nyove!

2 Murongwa Juda kwa nkondopekere asi twa hepa kulitunga nyamwetu. Apa ga tumangedere Vakriste asi va “kare meharo lyaKarunga,” age hena kwa horowere sininke somulyo esi nasi tu vatera mokuyirugana: “Litungireni ketateko lyepuro lyeni lyokupongokerera.” (Juda 20, 21) Nonkedi musinke dimwe omu no vhura kulitunga nyamoge, mokuninka epuro lyoge li nkondopare yipo o kare meharo lyaKarunga? Tu zeni tu demenene komaruha gatatu aga naga ku vatera o litunge nyamoge pampepo.

TUNGA EPURO LYOGE MONOMPANGO DOUHUNGA DAJEHOVA

3-5. (a) Magano musinke gepuko ana hara Satana o kare nago kuhamena nompango daJehova? (b) Ngapi omu natu tara nompango daKarunga ntani mutaro gwangoso ngapi omu nagu tu kundama? Yi fanekesa.

3 Pomuhowo, twa hepa kunkondopeka epuro lyetu moveta zaKarunga. Ngomu ono kulironga mobuke ezi, ono  koneke nompango dononzi douhunga daJehova kuhamena nkareso. Ngapi omu o di gazara ko? Satana kuna hara kukupukisa o tare noveta nonompango daJehova asi nondigu unene ntani nyanya. Age kwa ruganesa ngendeseso ezi kutundilira pena za rugene moEdeni. (Genesis 3:1-6) Ngendeseso zendi ngazi ku pukisa ndi? Ayo kwa korera omu o tara yininke.

4 Mokuyifanekesa: Ha wa za mokugenda to mono rugumbo rorure. Kesinya kwina lyorugumbo kuna kumoneka nawa. Pomuhowo, to gazara asi rugumbo kuna kukondera umanguruki woge. Ha wa za mokutara, to mono nyime gougara ana kuhondjavera. Makura to yi dimburura asi rugumbo kuna kara epopero lyeparu lyoge. Pwa kara sikasama sougara sina kukuhondjavera ngesi ndi? Nonkango daKarunga kuturondora asi: “Omu vangarare oku muna rungarara, yeeyi nkore zeni, Satana, kugendagura ngwendi nyime gokununga, a papare ogu na lipapagwira.”—1 Peturusa 5:8.

5 Satana kuna kara sikasama sonyanya. Morwa Jehova kapi ga hara a tu kwate Satana, ga tulisa po noveta mokutupopera ‘komakoto goumbudi’ goMuzonaguli. (Vaefeso 6:11) Nkenye apa natu teda konoveta daKarunga, twa hepa kudimona asi ngelikido lyeharo lyokutunda kwaGuhyetu gemeguru. Mokuditara ngoso, noveta daKarunga kuna kara egameno ntani nokureta ruhafo. Murongwa Jakopo kwa tjenge asi: “Ogu a tara mo nawa moVeta ezi za sikilira mo, ezi azi mangurura vantu, age hena a dire kudivara eyi ana zuvhu mo, . . . ogo nga ragopa mweyi a rugana.”—Jakopo 1:25.

6. Yisinke nkedi zongwa mokutunga epuro lyoge monoveta nomonompango douhunga daKarunga? Gava sihonena.

6 Kuparuka kuliza nonompango daKarunga kuna kara nkedi zongwa mokunkondopeka epuro lyetu moMugavi veta ntani nomounongo wonoveta dendi. Pasihonena,  “veta zaKristusa” kwa kwatera mo mpangera zaJesus zokuronga vapeke ‘nayinye eyi ga rekera.’ (Vagarata 6:2; Mateusa 28:19, 20) Vakriste kukwama hena mpangera zokuponga kumwe koukareli ntani zokulitunga-tunga. (Vahebeli 10:24, 25) Nompango daKarunga kwa kwatera mo hena etumangedo lyokukanderera nkenye apa kwaJehova kutundilira komutjima. (Mateusa 6:5-8; 1 Vatesaronika 5:17) Ngomu tuna kuparuka kuliza nonompango odo, ngatu mona nawa-nawa asi ado nompango donongwa sili. Mokudilimburukwa kuturetera ruhafo oru natu dira kugwana mouzuni ou womaudigu. Ngomu ono kuteda omu wa gwanena mo uwa pokuparuka kuliza nonoveta daKarunga, epuro lyoge ngali nkondopara.

7, 8. Ngapi omu Nonkango daKarunga da korangeda owo va kara nosinka asi nampo kapi ngava vhura kukara noulimburukwi ngomu dina kupita nomvhura?

7 Poyiruwo yimwe, vamwe kukara nosinka asi ngayi kara udigu mokulimburukwa konoveta daJehova ngomu dina kupita nomvhura. Awo kukara nowoma asi kuvhura pamwe ngayi va yipira. Nsene ngo li zuvha ngoso, diworoka nonkango edi asi: “Ame nyame HOMPA Karunga goge, ogu ga hara kukuronga morwauwa waamoge a ku likide  nzira ezi no genda. Ani ngano nye ngo purakene konompangera dangiee! Matungiko ngano ngaga ku powomokera ngwendi mukuro ogu agu dili kupwira! Efundo ngano lya ku gwana ngwendi mankupi aga aga yeraukire konontere defuta.” (Jesaya 48:17, 18) Wa gazadara ko rumwe kuhamena ekorangedo lyomononkango odo ndi?

8 Jehova kuna kutudiworokesa asi ose kugwanena mo uwa pokumulimburukwa. Age ga tu tumbwidira mauwa gavali nsene tu limburukwa. Uwa wokuhova kuna kara asi matungiko ngaga tu powomokera ngwendi mukuro ogu agu dili kupwira. Wauvali, efundo lyetu ngali kara ngwendi mankupi aga aga yeraukire konontere defuta. Nsene o sikama konontere defuta o tarere omu gana kuyerauka mankupi, ngo yi dimburura asi ngaga twikira kuyerauka narunye. Jehova kwa uyunga asi efundo lyoge ngorooro ngali kara. Moomu ono kukondja mokukara noulimburukwi, age kapi nga ku sigilira asi yi ku sumpire. (Resa Episarome 55:22.) Nonkango dangoso detumbwidiro kapi adi tungu epuro lyoge mwaJehova ntani nomonompango dendi douhunga ndi?

“KARENI SIKURONA”

9, 10. (a) Morwasinke ukurona wopampepo wa karera sitambo somulyo koVakriste? (b) Ngapi omu kukara nomutaro gopampepo agu tu vatere tu hafe?

9 Ruha rwauvali rwetungo lyoge kwa ru horora mononkango edi asi: “Monondunge kareni sikurona.” (1 Vakolinte 14:20) Ukurona kuna kara sitambo sosiwa koVakriste. Posiruwo esi, nokuvhura si kusikilira mo, nye kuvhura tu sike koukurona. Kugwederera ko, Vakriste kugwana ruhafo rorunene mokukarera Jehova ngomu vana kukura pampepo. Morwasinke ya karera ngoso?

10 Muntu ga kura pampepo kutara yininke ngamoomu a yi tara Jehova. (Johanesa 4:23) Paurusa kwa tjenge asi: “Ava va hamena koukaro wopasintu, kutamba yopasintu. Ano  ava va hamena koukaro wopaMpepo, kutamba yopaMpepo.” (Varoma 8:5) Kukara nomutaro gopasintu kapi ayi reta ruhafo, morwa mutaro ogo kudemenena tupu koyininke yantaantani neyi yopanyama nokulihafesa nyamoge. Kukara nomutaro gopampepo kureta ruhafo, morwa ago kudemenena kwaJehova, Karunga goruhafo. Muntu gopampepo kwa kara neharo lyokuhafesa Jehova ntani kuhafa nampili momaheteko. Morwasinke? Maheteko kugava mpito mokulikida asi Satana munayimpempa ntani nokutulisa po ulimburukwi, ano eyi kuhafesa Guhyetu gemeguru.—Yisewe 27:11; resa Jakopo 1:2, 3.

11, 12. (a) Yisinke ga uyungire mupositoli Paurusa kuhamena Vakriste ‘wonondunge,’ ntani yinke azi tanta nkango ezi va toroka asi ‘kuyika’? (b) Eliyombereso musinke rwa hepa kurugana rutu yipo ru kure ntani nokuwapera?

11 Mokukara muntu ogu ga kura pampepo pwa hepa eliyombereso. Koneka velise ezi asi: “Nye nondyaandya dovakurona, dava wonondunge va yika kuhangura uwa koudona.” (Vahebeli 5:14) Apa Paurusa ga uyungire kuhamena ‘kuyika,’ age kwa ruganesere nkango zoRugereka ezi ngava ruganesa nsene kuna kutamba kovantu vana kuliyomberesa koudano. Gazara eyi ya hamena mo meliyombereso lyangoso.

12 Apa ava tu hampuruka, marutu getu kapi va ga yomberesa. Pasihonena, mukeke kapi a vhuru kuruganesa nawa mawoko ndi maguru gendi. Yipo nye, age kuruganesa mawoko gendi nkenye omu, mpamwe kulitoona mwene mosipara. Nye moomu ana kuliyomberesa, age ta lirongo kukokava nokugenda ntani nokuduka. * Nye ngapi kuhamena  muntu ogu a lihameke moudano? Pasihonena, nsene o mona mudani gombara kuna kugendesa nawa mbara, ove no nongonona asi age kwa liyomberesa. Udivi wendi kapi wa wiza po tupu ngorooro nye age ga hepere kuliyomberesa yikando yoyinzi. Bibeli kwa likida asi maliyombereso goparutu “mulyo gwago musesu.” Ayo kwa kara nomulyo unene mokuyomberesa nondunge detu.—1 Timoteusa 4:8.

13. Ngapi omu natu vhura kuyomberesa nondunge detu?

13 Mobuke ezi, twa zogera mo yoyinzi eyi nayi vhura kuyomberesa nondunge doge yipo o kare noulimburukwi kwaJehova ngomuntu gopampepo. Gazadara ko unene kuhamena nompangera nonoveta daKarunga ntani nokudikanderera ngomu ono kutura po matokoro goge gankenye ezuva. Mwankenye matokoro no tulisa po, lipura nyamoge asi: ‘Noveta ndi nompango musinke domoBibeli da likwatakana nago? Ngapi omu nani vhura kudisikisa mo? Nzira musinke nazi hafesa Tate gemeguru?’ (Resa Yisewe 3:5, 6; Jakopo 1:5.) Pokutura po matokoro monkedi ezi ngayi gwederera kevhuliko lyoge lyokudiva kuhangura uwa koudona. Eliyombereso lyangoso ngali ku vatera mokukara sili muntu gopampepo.

14. Nzara musinke natu kara nazo yipo tu kure pampepo, nye etakameso musinke twa hepa kudiworoka?

14 Nampili ngomu muntu kuvhura kukasika koukurona, ekuro pampepo kutwikira simpe. Ekuro kwa korera konondya. Paurusa ga tumbwire “nondyaandya dovakurona.” Nsapi zokutunga po epuro lyoge kuna kara mokulya nondyaandya dopampepo. Nsene o twikira kusikisa mo eyi ono kulironga, ou kuna kara unongo, ano Bibeli kutanta asi: “Kugwana unongo yiso sininke sosinene po.” Yipo nye, twa hepa kutunga po nzara komausili gomawa aga a tu pe Guhyetu. (Yisewe 4:5-7; 1 Peturusa 2:2) Mokukara nediwo nounongo kapisi yi tu ninkise tu linenepeke. Twa  hepa kulikonakona nyamwetu nkenye apa yipo tu dire kupulisira elinenepeko ndi yikara yimwe yoyidona yi kure monomutjima detu. Paurusa kwa tjenge asi: “Likonakoneni nsene asi mepuro muna kara; lihetekeni nyamweni.”—2 Vakolinte 13:5.

15. Morwasinke eharo mulyo kekuro lyopampepo?

15 Etungo lyonzugo kuvhura li pwe, nye sirugana sokuzitakamesa nokuziwapukurura simpe kutwikira. Yinke twa hepa yipo tu sike koukurona ntani nokukunga upampepo wetu? Sosinene po, eharo. Twa hepa kutwikira kukura meharo lyokuhara Jehova novapuli vakwetetu. Nsene tu dira eharo, ediwo lyetu neyi atu rugana ngayi kara yomawoko-woko. (1 Vakolinte 13:1-3) Neharo, ose kuvhura tu sike koukurona nokutwikira kukura pampepo.

DEMENENA MAGANO GOGE KEHUGUVARO ELI A GAVA JEHOVA

16. Magazaro musinke a korangeda Satana, ntani silipopereso musinke ga tu pa Jehova?

16 Tu zeni tu konakone hena ruha rumwe rosirugana soge setungo. Mokuninka asi o litunge nyamoge ngomurongwa gosili gwaKristusa, wa hepa kutakamesa omu o gazara. Satana, mupangeli gouzuni ou, age ga diva nawa-nawa mokuninka vantu va ligave komagazaro gokudompesa ndi gomasinganyeko ndi geguwo. (Vaefeso 2:2) Magazaro gangoso kuvhura kuzonagura Vakriste ngwendi moomu ayi zonagura yimbumburu yitji yonzugo. Jehova ga tu pa silipopereso, aso kuna kara ehuguvaro.

17. Ngapi omu da likida Nonkango daKarunga mulyo gwehuguvaro?

17 Bibeli za tumbura maruha gokulisiga-siga goyirwiso yopampepo eyi twa hepa merwo lyetu kumwe naSatana nouzuni ou. Sirwiso somulyo kuna kara ekoli, “ehuguvaro lyeparu.” (1 Vatesaronika 5:8) Mukwayita moyiruwo yanare ga divire asi kapi na paruka moyita pwa hana ekoli lyendi.  Ekoli eli kontunda kwa kere lyosivera ano monda sipapa, alyo ngali ninkisa yikutji eyi ngava tambesere komutwe yi litoone mo ayo ya hana kuremeka. Ngamoomu ekoli ali popere mutwe, ehuguvaro nalyo kuvhura kupopera magano nomagazaro goge.

18, 19. Sihonena musinke sehuguvaro ga tulire po Jesus, ntani ngapi omu natu vhura kumuhonena?

18 Jesus ga tulisire po sihonena sosinene sehuguvaro. Gazadara ko kweyi ga lididimikilire momasiku gendi gokuhulilira pevhu. Gumwe govakwawo vendi wovanene kwa mugombekere noyimaliwa. Gumwe kwa patanene asi kapi ga mu diva. Ano vapeke kwa mu zumbire nokutjwauka. Novantu womosirongo sawo kwa mu nyokere, nokusininika vakwayita woVaroma va mu dipage momudona. Yosili Jesus kwa ligwanekerere nomaheteko gomanene kupitakana aga atu ligwanekere nago. Yisinke ya mu vatetere? Vahebeli 12:2 kulimburura asi: “Age kwa lididimikira nomfa [dokositji, NW] morwehafo eli lya mu kere komeho, ga hana kufira mbili nomuga edi da mu reterere.” Jesus kapi ga zumbanesere ‘ruhafo oru rwa mu kererere komeho.’

19 Ruhafo musinke rwa kere komeho zaJesus? Age ga divire asi pokulididimika, nga lihameka mo mokupongora edina lyaJehova lyokupongoka. Age ga geve umbangi wounene asi Satana munayipempa. Kwato ehuguvaro lyapeke lya vhulire kupa Jesus ruhafo rorunene. Age ga divire hena asi Jehova nga tungika momunene sirugana sendi soulimburukwi, ntani komeho zendi kwa kere meho zokutetukisa apa nga ka lipakerera noGuhwe meguru. Jesus kwa tulire ehuguvaro lina momagano gendi moyiruwo nayinye yoyidigu. Nose twa hepa kurugana yokulifana. Twa kara nose noruhafo oru rwa tu karera komeho. Jehova kwa pa nkenye gumwe gwetu mfumwa zokuvatera mokupongora edina lyendi lyenene. Ose kuvhura tu likide asi Satana munayimpempa pokuhorowora asi Jehova yige  Mupangeli gwetu ntani nokukara meharo lyaGuhyetu yi kare asi maheteko ndi mahepeko musinke tuna kuligwanekera nago.

20. Yisinke nayi vhura kukuvatera mokukara nomagazaro gomawa nehuguvaro?

20 Jehova kapi tupu ana liwapaikire mokufuta vakareli vendi nye age kuna kuyindindira nononkondo. (Jesaya 30:18; resa Marakiya 3:10.) Age kwa hara kupa vakareli vendi eyi da tokomena nomutjima dawo eyi ya hungama. (Episarome 37:4) Yipo nye, demenena magano goge kehuguvaro eli lya ku karera komeho. Wa ha lisigilira momagazaro gomadompeso gomadona gokunyata gouzuni ou waSatana. Nsene o nongonona asi mpepo zouzuni ou kuna kuwiza momagazaro ndi momutjima goge, kanderera unene kwaJehova ‘kombili zaKarunga ezi za pitakana unene nondunge nadinye.’ Mbili ozo zaKarunga ngazi gamena mutjima nomagazaro goge.—Vafilipi 4:6, 7.

21, 22. (a) Meho musinke zouyerere ava hafere ‘vemukurumbunga’? (b) Ruha musinke rwehuguvaro lyoVakriste rwa kara nomulyo koge, ntani yinke ono tokomene kurugana?

21 Ee, meho musi zokutetukisa wa hepa kugazadara ko! Nsene ove gumwe ‘gemukurumbunga,’ eli ngali “tunda  momahepeko gomanene,” gazadara ko keparu eli lina kukundindira. (Ehororo 7:9, 14) Apa Satana nonompepo dendi donondona ngadi ka pira kukakara po hena, ove ngo ka lizuvha rufuwo rorunene oru no dira kugwana ngesi apa atu ligwanekere nomakondjeso gaSatana gokupukisa. Pwa hana makondjeso ogo, aro ngaru ka kara ruhafo rokukarugana mokukapirura evhu li ka kare paradisa mepitisiro lyaJesus ntani nava ngava ka pangera nendi meguru, 144 000. Ose kuhafa pokundindira siruwo apa ngava gusa po mauvera nagenye, nokukatambura vahali vetu ava va fa, nokukaparuka monkedi omu ga yi harera Karunga. Apa ngatu ka sika kesikiliromo ngatu ka gwana etungiko lyenene, etumbwidiro lyomoVaroma 8:21: ‘Ezowoko lyouyerere wovana vaKarunga.’

22 Jehova kuna hara o ka gwane emanguruko lyenene eli no dira kuvhura kugazara. Nzira zekemanguruko lina kwa korera moulimburukwi. Nani kapi ya kara nomulyo mokulitura mo ngesi mokulimburukwa Jehova nkenye ezuva ndi? Mwanayinye, litungireni ketateko lyepuro lyeni lyokupongokerera, yipo mu kare meharo lyaKarunga narunye nanarunye!

^ para. 12 Vadivi usintwe kwa tanta asi vantu kutunga po evhuliko yipo rutu ru dive oku ga karera mawoko ntani nomaguru. Pasihonena, evhuliko eli kukuninkisa o sakerere mawoko goge ove ono ferere. Muveli gumwe gomukurona ogu ga zumbanesere evhuliko eli, kapi ga vhulire kugenda ndi kusikama ndi kuhingira kuvyukilira.