Zende koyikaramo

Zende koyikaramo

Nombangi daJehova

Horowora eraka Rukwangali

MAGWEDEREROKO

Usili kuhamena Guhya noMunwa ntani noMpepo zoKupongoka

Usili kuhamena Guhya noMunwa ntani noMpepo zoKupongoka

VANTU ava va pura merongo lyoUtatu-umwe kutanta asi Karunga yige vantu vatatu—Guhya noMunwa ntani noMpepo zoKupongoka. Nkenye gumwe govantu vatatu ava kwa va uyunga asi munankondo nadinye, kwa hetakana, ntani kwato etameko. Kuliza nerongo lyoUtatu-umwe, Guhya yige Karunga, Munwa yige Karunga, ntani Mpepo zoKupongoka yizo Karunga, nye Karunga gumwe tupu.

Wovanzi ava va pura moUtatu-umwe kutanta asi awo kapi tava vhuru kufaturura erongo eli. Nye, awo simpe kulizuvha asi kulironga mo moBibeli. Mulyo kudimburura asi nkango “Utatu-umwe” narumwe si za moneka moBibeli. Nye egano lyoUtatu-umwe kuligwana mo ndi? Mokulimburura epuro eli, tu zeni tu tare ketjangwa eli vakwatesiko ava ruganesa mokukwatesa ko Utatu-umwe.

“NKANGO YIZO KARUNGA”

Johanesa 1:1 kutanta asi: “Nkango yizo za hovere kukara po. Ano ozo Nkango kwa kere naKarunga, ano Nkango yizo Karunga.” Megaununo lyooyo mupositoli Johanesa ga likida nawa-nawa asi “Nkango” yizo Jesus. (Johanesa 1:14) Mokumona asi Nkango kuzitumbura Karunga, vamwe kuhulisa asi, Munwa ntani Guhya va kona kukara ruha rwaKarunga gumwe.

Diworoka asi ruha oru roBibeli kwa ru tjenge pomuhowo moRugereka. Konyima, vatoroki va ya tjangwilire etjango lyoRugereka momaraka gapeke. Nampili ngoso, sinzi sovatoroki woBibeli kapi va ruganesa eyungo asi “Nkango yizo Karunga.” Morwasinke? Kuliza nediwo lyawo lyoRugereka oru va ruganesere mokutjanga Bibeli, vatoroki owo va ya hulisire asi euyungo olyo “Nkango yizo Karunga” lya kona kulitoroka mwapeke. Ngapi? Pana kara yihonena yoyisesu: “Logos [Nkango] kwa kere ngwendi Karunga.” (A New Translation of the Bible) “Nkango kwa kere karunga.” (The New Testament in an Improved Version) “Nkango kwa kere naKarunga ntani kwa kere noyikara yokulifana.” (The Translator’s New Testament) Kuliza nomatoroko aga, Nkango kapisi Karunga mwene.* Morwa ukaro wendi wokuzeruka moyisitwa yaJehova, Nkango kuzitumbura asi “karunga” (ndanda zonunu “k”). Nkango ezi “karunga” kutanta asi “munankondo.”

GWANA MAUSILI GOMANZI

Sinzi sovantu kapi va diva Rugereka oru va ruganesere mokutjanga Bibeli. Ngapi nye omu no divilisa asi eyi ga tembe sili mupositoli Johanesa? Gazadara kosihonena esi: Murongi ta fatwilire sirongwa kovarongwa vendi. Nye, varongwa kulisiga mokukwata egano efatururo olyo. Ngapi omu nava vhura varongwa kukohonona po udigu? Kuvhura va pure murongi komapukururoko gomanzi. Yimo, kulironga mausili gokugwederera ko kuvhura kuvavatera mokukwata egano sirongwa nawa. Mokulifana, mokukwata egano ntanto zaJohanesa 1:1, kuvhura o tare mEvangeli lyaJohanesa komapukururo gomanzi kuhamena ukaro waJesus. Kulironga mausili gokugwederera ko kosirongwa esi ngayi ku vatera mokusika kehuliso lyouhunga.

Pasihonena, tarurura eyi ga tjenge Johanesa simpe megaununo 1, velise 18: “Nagumwe si ga mona Karunga [Munankondo nadinye] nampili rumwe.” Nampili ngoso, vantu va mwene Jesus, Munwa, morwa Johanesa ga uyunga asi: “Nkango [Jesus] yizo za kara muntu, makura yiyo za tungire mokatji ketu. Ose yiyo twa mona uyerere wendi.” (Johanesa 1:14) Ngapi, nye, ngano Munwa na kara ruha rwaKarunga Munankondo nadinye? Johanesa hena ga likida asi Nkango kwa kere ‘naKarunga.’ Ngapi nye omu na vhura gumwe a kara kumwe nagumwe ntani posiruwo sooso a kare hena googo gumwe? Kugwederera ko, moomu va yi tjanga mwaJohanesa 17:3, Jesus ga tura po nawa-nawa malisigo pokatji kamwene ntani noGuhwe vemeguru. Age kwa tumbwire oGuhwe asi “nyovelike Karunga gosili.” Ntani kehagero lyEvangeli lyendi, Johanesa kwa yi kwatakanesere pokuuyunga asi: “Eyi kwa yi tjangera, mu pure asi Jesus yige Kristusa, MunwaKarunga.” (Johanesa 20:31) Koneka asi Jesus kuna kumutumbura, kapisi Karunga, nye MunwaKarunga. Nombudi edi dokugwederera ko edi va gava mEvangeli lyaJohanesa kulikida omu ngano natu kwata egano Johanesa 1:1. Jesus, Nkango, age “karunga” moukaro ou asi age kwa kara pontambo zokuzeruka nye kapisi mokulifana ngwendi naKarunga Munankondo nadinye.

KUKWATESA KO MAUSILI

Gazara hena sihonena sokuhamena murongi ntani novarongwa. Walye konyima zokupurakena kefatururo lyokugwederera ko lyomurongi, vamwe simpe kukara nomasinganyeko. Yinke nava vhura kurugana? Awo kuvhura va hundire murongi gwapeke komapukururo gamwe kuhamena sirongwa oso. Nsene murongi gwauvali a kwatesa ko efatururo lyogwina gokuhova, masinganyeko govarongwa wovanzi kuvhura kugakohonona po. Mokulifana, nsene kapi ono kara nousili kweyi mutjangi goBibeli Johanesa ga uyungire kuhamena malikwatakano pokatji kaJesus ntani naKarunga Munankondo nadinye, kuvhura o tare komutjangi gwapeke goBibeli konombudi dimwe. Pasihonena, tarurura eyi ga tjenge Marukusa. Kuhamena uhura wouzuni ou, age kwa tjenge ngwendi moomu ga uyungire Jesus asi: “Nagumwe si ga diva asi ezuva nosiruwo apa ngasi sika mo, novaengeli si vemeguru noMuna si, ntudi Guhya ntani.” (Marukusa 13:32) Nonkango edi ngapi omu adi kwatesa ko asi Jesus kapisi Karunga Munankondo nadinye?

Jesus ga uyungire asi Guhya ga diva yoyinzi kupitakana Munwa. Ngano si Jesus kwa kere ruha rwaKarunga Munankondo nadinye, ngano ga diva mausili gokulifana ngwendi oGuhye. Yipo nye, Munwa ntani Guhya kapi tava hetakana. Nye, vamwe ngava uyunga asi: ‘Jesus kwa kere noyikara yivali. Apa age kuna kuuyunga ngwendi muntu.’ Nye nampili ngoso, ngapi kuhamena mpepo zokupongoka? Nsene si azo ruha rwaKarunga gumwe ngwendi Guhya, morwasinke a dili kuuyunga Jesus asi nazo za diva eyi ga diva Guhya?

Moomu no twikira nelirongo lyoge lyoBibeli, ngo ya diva matjangwa gomanzi goBibeli aga ga gavera umbangi kosirongwa esi. Ago kukwatesa ko usili kuhamena Guhya noMunwa ntani nompepo zokupongoka.—Episarome 90:2; Yirugana 7:55; Vakorosi 1:15


*  Kelirongo lyonoveta dondongeraka doRuhebeli edi da liza naJohanesa 1:1, tara Ruhungu rwezuva 1 rwaMangundu 2008, pepenuno 24-25 oru va nduruka Nombangi daJehova.

← Tara egaununo eli