Zende koyikaramo

Zende koyikaramo

Nombangi daJehova

Horowora eraka Rukwangali

MAGWEDEREROKO

1914—Mvhura zontanto mouporofete woBibeli

1914—Mvhura zontanto mouporofete woBibeli

NOMVHURA nomurongo ne komeho yi ka moneke, valirongi woBibeli kwa divisire asi ngano ngaku kara yihorokwa yomulyo mo-1914. Yihorokwa musinke ya kere, ntani silikido musinke asi likida 1914 ngwendi mvhura zomulyo?

Moomu va yi tjanga mwaRukasa 21:24, Jesus kwa uyungire asi: “Jerusarema ngava zi lyatagura vapagani dogoro noku ngasi sika mo siruwo sawo.” Jerusarema kwa kere nkurusitata somuhoko goVajuda—sipundi soupangeli wovahompa kutundilira membo lyahompa Ndafita. (Episarome 48:1, 2) Vahompa ava kwa kere wokulikerera movapangeli wonomuhoko. Awo kwa pangerere “mouhompa ou ga tulire po HOMPA” ngovakarelipo vaKarunga mwene. (1 Histoli 29:23) Yipo nye Jerusarema kwa fanekesere upangeli waJehova.

Ngapi ntani siruwoke va varekere ‘kulyatagura vapagani’ upangeli waKarunga? Eyi kwa horokere mo-607 K.S.N. apa Jerusarema va zi fundire Vababironiya. Vahompa womoruvharo rwaNdafita ava va kererere po Karunga va va hagekesere, ntani kwato gumwe ga pangerere “mouhompa ou ga tulire po HOMPA.” (2 Vahompa 25:1-26) Ngava u “lyatagura” narunye ndi? Hawe, morwa muengeli Ngabiliyera ga tanterere Mariya asi Jesus ngava “mu pa uhompa wazinakuru Ndafita.” (Rukasa 1:32, 33) Yipo nye ‘elyatango’ ngano lya hege apa Jesus ga ya kere Hompa.

Siruwoke ngano ngayi horoka eyi yomulyo? Jesus ga likidire asi Vapagani ngano ngava pangera posiruwo sokuhetekera tupu. Etjango lyaNdaniyera egaununo 4 kwa kara nelikido mokuvarura asi siruwo sokusika kupi ngano ngayi kara. Alyo kusingonona nzodi zouporofete ezi ga rotere hompa Nebukadenesara gwaBabironi. Age kwa mwene etji lyenene eli va tetere. Sisindi salyo kapi sa vhulire kumena morwa kwa si menge nomalyenge gosivera songoporo. Ngava si manga “nomvhura ntano-nambali.”

MoBibeli, yitji pamwe kuyiruganesa mokufanekesa upangeli. (Hesekiyeli 17:22-24; 31:2-5) Eteto lyositji sosifanekeso, aso kulikida omu upangeli waKarunga, ou va likidire kupitira movahompa womoJerusarema, ngano ngava u hagekesa. Emoneko kudivisa asi eli ‘elyatango lyaJerusarema’ ngano ngali kara karuwogona—“nomvhura ntano-nambali.” Edi kapisi nomvhura dene-dene, nye douporofete. Nomvhura dokuhura kupi?

Ehororo 12:6, 14 kulikida asi nomvhura ntatu noharufa douporofete kusika po “mazuva eyovi nomafere gavali nomazuva nomurongo ntano-nazimwe.” “Nomvhura ntano-nambali” (3 1 ⁄ 2 + 3 1 ⁄ 2) douporofete kwa kara mazuva 2 520 (1 260 + 1 260). Nye nomuhoko doVapagani kapi da hagekere ‘mokulyatanga’ upangeli waKarunga mazuva 2 520 tupu konyima zegwo lyaJerusarema. Yipo nye, ya zera asi uporofete ou kwa kara siruwo soruveze rorure. Kuliza naNumeri 14:34 ntani Hesekiyeli 4:6, kuuyunga kuhamena “mvhura zimwe mwankenye ezuva,” “nomvhura ntano-nambali” douporofete ngano kusika po nomvhura 2 520.

Nomvhura 2 520 kwa tamekere mwaSikukutu 607 K.S.N. apa za gwire Jerusarema koVababironiya ntani uhompa wemembo lyaNdafita ou wa kererere po Karunga kwa u zonagwire po. Siruwo kwa hagere mwaSikukutu 1914. Poruveze oro, ‘siruwo sovapagani’ kwa hege, ntani Jesus Kristusa kwa mu tulire ngoHompa gwaKarunga meguru.*—Episarome 2:1-6; Ndaniyera 7:13, 14.

Moomu tupu ga yi pumbire Jesus, ‘ewizo’ ndi ekaropo lyendi ngoHompa gemeguru kwa li nongwenesa koyihorokwa yokutetukisa youzuni—yita nerumbu nekankamo lyevhu nehamba lyomukagu. (Mateusa 24:3-8; Rukasa 21:11) Yihorokwa oyo kugavera umbangi wononkondo kousili asi 1914 yosili kwa nongwenesere ehampuruko lyoUhompa waKarunga wemeguru ntani etameko ‘lyomazuva gopouhura’ gouzuni ou woudona.—2 Timoteusa 3:1-5.


*  Kutundilira mwaSikukutu 607 K.S.N. dogoro mwaSikukutu 1 K.S.N. ado nomvhura 606. Moomu pwa pira kukara mvhura zeuta, kutundilira mwaSikukutu 1 K.S.N. dogoro mwaSikukutu 1914 S.N. ado nomvhura 1 914. Pokugwederera nomvhura 606 ntani nomvhura 1 914, ose kugwana nomvhura 2 520. Konombudi kegwo lyaJerusarema mo-607 K.S.N., tara etjango “Chronology” moInsight on the Scriptures, ezi va nduruka Nombangi daJehova.

“NOMVHURA NTANO-NAMBALI”
Nomvhura 2 520
Nomvhura 606 1/4
Sikukutu 607 K.S.N. dogoro
Sindimba 31, 1 K.S.N.
Nomvhura 1 913 3/4
Murongagona 1, 1 S.N. dogoro
Sikukutu 1914
607

“Jerusarema ngava zi lyatagura vapagani”

Jerusarema kuna kuzizonagura
←K.S.N. S.N.→ 1914

“Karunga nga mu pa uhompa”

Jesus Kristusa ngoHompa

← Tara egaununo eli