Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 110: Timoteusa—Mukwafi gwaPaurusa gomupe

Esimwititi 110: Timoteusa—Mukwafi gwaPaurusa gomupe

MUMATIGARA ogu ono kumona apa namupositoli Paurusa kuna kara Timoteusa. Timoteusa kwa tunga nekoro lyendi moLisitira. Edina lyozina Eunike, ano lyozinakuru wovakadi Roise.

Esi kuna kara sikando sautatu esi Paurusa ana ya dingura Lisitira. Mvhura zimwe zina piti po, oPaurusa naBaranabasa kwa wizire oku romuhowo morugendo rokuzuvhisa. Ano ngesi Paurusa ana ka tengura hena namukwawo Sirasa

Timoteusa naPaurusa

Ono diva asi yinke Paurusa ana kutantera Timoteusa? Age kuna kupura asi: ‘Ono hara kuza name naSirasa ndi? Kuvhura tu ruganese ekwafo lyoge mokuzuvhisira vantu wokoure.’

Timoteusa ta limburura asi: ‘Nhi, nina hara kuza.’ Konyima tupu zosiruwogona Timoteusa ta sigi ekoro lyendi nokuza naPaurusa naSirasa. Nye komeho zokulironga kuhamena korugendo rwawo, tu tareni asi yinke yina kuhoraukira Paurusa. Pana piti nomvhura 17 kutunda apa Jesus ga mu monekerere monzira zokoDamasikusi.

Diworoka, Paurusa kwa wizire koDamasikusi a ya hepeke varongwa vaJesus, nye ngesi ana kara mwene murongwa! Konyima, vanankore vamwe tava hara kudipaga Paurusa morwa kapi va hara erongo lyendi lyokuhamena Jesus. Nye varongwa tava vatere Paurusa a tjwayuke. Tava mu tura mosikumba nokumuhegumwisira kekuma ponze zositata.

Konyima zeyi Paurusa ta zi koAntiyokiya a ka zuvhise. Oku yiko va hovere kutumbura vasikuli vaJesus asi Vakriste. Paurusa naBaranabasa makura tava va tumu va tunde moAntiyokiya va ze morugendo rokukazuvhisira koyirongo yokoure. Simwe soyitata esi va ka dingwire kuna kara Lisitira omu ga tunga Timoteusa.

Ngesi, konyima zomvhura zimwe, Paurusa ana ka tengura hena moLisitira morugendo rwauvali. Ono diva asi kupi oku vana vyuka oTimoteusa apa vana zi naPaurusa naSirasa? Tara kokarata, makura tu lironge ko mavango gamwe aga.

Pomuhowo tava zi koIkoniya ezi za kara pepi, ntani vana zi kositata sauvali sedina Antiyokiya. Kutunda opo tava zi koTorowasa, ntani vana ka za koFilipi nokoTesaronika ntani koBereya. To mono Atena pokarata? Paurusa kuna ka zuvhisira ko. Konyima zeyi tava ka kara ure womvhura zimwe noukahe awo tava zuvhisa moKolinte. Mouhura tava piti tupu nakauke moEfeso. Makura tava tengura nosikepa koKesareya, nokugenda va ze koAntiyokiya, oku ga kara Paurusa.

Timoteusa kuna gendi nokilometa mafere nomafere mokuvatera Paurusa a zuvhise “mbudi zongwa” nokutota po nombungakriste dononzi. Apa ngo kura, nove ngo kara mukareli gwaKarunga gokulimburukwa ngaTimoteusa ndi?

Yirugana 9:19-30; 11:19-26; magaununo 13 dogoro 17; 18:1-22.

Karata

1. Roma; 2. Malita; 3. Bereya; 4. Tesaronika; 5. Kolinte; 6. Filipi; 7. Atena; 8. Kereta; 9. Torowasa; 10. Efeso; 11. Mirete; 12. Korosi; 13. Antiyokiya; 14. Ikoniya; 15. Lisitira; 16. Kipurusi; 17. Antiyokiya; 18. Kasareya; 19. Jopa; 20. Damasikusi; 21. Jerusarema; 22. Efuta lyenene (Efuta lyopokatji)



Mapuro

  • Yilye mumatigara ogu ana kara mefano, kupi oku ga tunga, ntani wolye madina gozina nozinakuru?
  • Yinke ana kuuyunga Timoteusa apa Paurusa ana mu pura asi nsene ana hara kuza kumwe nendi naSirasa mokuzuvhisira kovantu wokoure?
  • Kupi oku vana va tumbura muhowo vasikuli vaJesus asi Vakriste?
  • Konyima zokutunda oPaurusa naSirasa ntani naTimoteusa moAntiyokiya, yitata musinke yimwe vana dingura?
  • Ngapi omu ana vatere Timoteusa Paurusa, ntani epuro musinke va hepa vadinkantu vanaina kulipura nyamwawo?

Mapuro gokugwederera ko

  • Resa Yirugana 9:19-30.

    Ngapi omu ga likidire mupositoli Paurusa etakameso apa ga ligwanekerere nekwama-kwamo kombudi zongwa?

  • Resa Yirugana 11:19-26.

    Sihorokwa somoYirugana 11:19-21, 26, ngapi omu asi likida asi mpepo zaJehova kuna kupitisira nokuvyukisa sirugana sezuvhiso?

  • Resa Yirugana 13:13-16, 42-52.

    Yirugana 13:51, 52, ngapi omu ayi likida asi varongwa kapi va pulisire makwama-kwamo mokuvahagekesa?

  • Resa Yirugana 14:1-6, 19-28.

    Ngapi omu nonkango edi asi “tava va tura kosipara saHompa” adi vatere mokutusesupikisira sinka sokupitakanena ngamoomu tuna kuvatera wovape?

  • Resa Yirugana 16:1-5.

    Ngapi omu eharo lyaTimoteusa lyokuligava kovamba lya nkondopeka mulyo gokuruganena ‘nayinye morwaMbudi zoNgwa’?

  • Resa Yirugana 18:1-11, 18-22.

    Yinke ayi likida Yirugana 18:9, 10 kuhamena elihamekomo lyaJesus mwene mokuvyukisa sirugana sezuvhiso, ntani ehuguvaro musinke ayi gava eyi kwetu naina?