Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 109: Peturusa ta dingura Koroneliusa

Esimwititi 109: Peturusa ta dingura Koroneliusa

OGU kuna kara mupositoli Peturusa ana sikama apa, ano owo konyima zendi kuna kara vakwawo. Nye morwasinke mugara ogu ana kunyongamenena Peturusa? Kuvhura a yi rugane eyi ndi? Ono diva asi yige yilye?

Peturusa ta gwanekere naKoroneliusa

Mugara kuna kara Koroneliusa. Age mupitisili govakwayita woVaroma. Koroneliusa kapi ga diva Peturusa, nye age kwa mu tanterere asi a mu zigide a wize kembo lyendi. Tu tareni asi ngapi omu ya horokere eyi.

Vasikuli vaJesus wokuhova kwa kere Vajuda, nye Koroneliusa kapisi Mujuda. Nye age kwa hara Karunga, kumukanderera nokuruganena vantu yininke yombili yoyinzi. Sitenguko simwe, muengeli ta mu monekere nokutanta asi: ‘Karunga ana ku panda, ntani ta ka limburura makanderero goge. Tuma vagara vamwe va ka hare mugara gedina Peturusa. Age kuna kara moJope membo lyaSimoni, ogu ga tunga pepi nefuta.’

Poopo Koroneliusa ta tumu vagara vamwe va ka papare Peturusa. Ezuva lyokukwama ko, apa vana ya siki vagara ava pepi naJope, Peturusa age peguru lyembo lyaSimoni. Opo Karunga ta ninki Peturusa a gazare asi kuna kumona emumwaye lina kuhegumuka li tunde meguru. Pemumwaye kuna kara po yikorama yomarudi gokulisiga-siga. Mokukwama veta zaKarunga, yikorama eyi kwa nyete mokuvhura kuyilya, nye ezwi tali tanta asi: ‘Peturusa, katuka. Dipaga o lye.’

Peturusa ta limburura asi: ‘Hawe! Ame kapi na lya rumwe yininke yokunyata.’ Nye ezwi tali tantere Peturusa asi: ‘Hageka kutumbura yininke asi ya nyata age Karunga kuna kuyitumbura ngesi asi yina zere.’ Eyi tayi horoka rutatu. Siruwo oso Peturusa ana kulipura asi yinke yina kutanta nayinye eyi, vagara ava ga tumine Koroneliusa tava ya siki pembo nokupulida Peturusa.

Peturusa ta gurumuka nokutanta asi: ‘Nyame ogu muna kupapara. Yinke muna wizire?’ Apa vagara ava vana tanta asi muengeli kwa tantera Koroneliusa a zigide Peturusa kembo lyendi, Peturusa ta pura a ze nawo. Ezuva lyokukwama ko Peturusa novakwawo tava katuka va ka dingure Koroneliusa koKesareya.

Koroneliusa ana pongeke ekoro lyendi novakaume vendi wopopepi. Peturusa apa ana wiza, Koroneliusa ta gwanekere nage. Ta gu nokutongamena konompadi daPeturusa, ngomu ono kuyimona apa. Nye Peturusa ta tanta asi: ‘Katuka, namesi ni muntu tupu.’ Yimo, Bibeli kwa likida asi kapi ya hungama yokutongamena nokukanderera muntu. Ose twa kona kukanderera Jehova gelike.

Peturusa makura ta zuvhisire owo vana pongo. Ta tanta asi: ‘Nina yi mono asi Karunga kutambura vantu navenye ava vana hara kumukarera.’ Age kuna kuuyunga, Karunga ta tumu mpepo zendi zokupongoka, ano vantu tava tameke kuuyunga maraka gokulisiga-siga. Eyi tayi tetura varongwa woVajuda ava va wizire naPeturusa, morwa awo kwa gazarere asi Karunga kwa hara Vajuda velike. Eyi tayi va rongo asi Karunga kapi a tara vantu womuhoko gumwe asi mulyo unene kwaKarunga kupitakana vantu womuhoko nagopeke. Nani esi kapisi sininke sosiwa esi natu diworoka natuvenye?

Yirugana 10:1-48; 11:1-18; Ehororo 19:10.



Mapuro

  • Yilye ogu mugara ana kunyogama mefano?
  • Yinke ana kutanta muengeli kwaKoroneliusa?
  • Yinke ana ninki Karunga Peturusa a mone apa ana kara peguru lyembo lyaSimoni moJope?
  • Morwasinke ana tanterere Peturusa Koroneliusa asi kapisi a mu tongamene nokumukanderera?
  • Morwasinke vana tetukire varongwa woVajuda ava vana kara naPeturusa?
  • Sirongwa musinke somulyo twa hepa kulirongera ko kedinguro lyaPeturusa kwaKoroneliusa?

Mapuro gokugwederera ko

  • Resa Yirugana 10:1-48.

    Nonkango daPeturusa domoYirugana 10:42, yinke adi likida kuhamena sirugana sezuvhiso lyombudi zongwa zoUhompa?

  • Resa Yirugana 11:1-18.

    Nkareso musinke ga likidire Peturusa apa evyukiso lyaJehova kuhamena Vapagani lya ya monekere, ntani ngapi omu natu vhura kuhonena sihonena sendi?